Bakoministe babomaki ngai te

NA NTƆNGƆ ya mwa 01/10/1965, basoda ya Indonésie oyo bazalaki na ngámbo ya Bakoministe balingaki kobɔtɔla bokonzi mpe babomaki bakonzi 6 ya basoda. Na yango, guvɛrnema ezongiselaki bango makambo ya nsɔmɔ koleka. Ekataki Bakoministe soki 500 000 nkingo; babengaki likambo yango “nsuka na mobulu.”

Bapɔsɔ ebele nsima ya likambo yango, komanda moko ya basoda ayebisaki ngai ete nkombo na ngai ezalaki nkombo ya liboso na liste ya bakonzi ya mangomba oyo Bakoministe bakanaki koboma. Alobaki kutu ete akoki kolakisa ngai esika batimolaki libulu mpo na kokunda ngai, kasi naboyaki na mayele. Na ntango wana ya yikiyiki makasi na makambo ya politiki, nalingaki te bato bámona ngai na ye, noki bákanisa ete nakómi kokɔta na makambo ya politiki.