Nkombo ya banani ekomamá na “buku ya bomoi”?

Eyano ya Biblia

“Buku ya bomoi,” oyo Biblia ebengi mpe “rulo ya bomoi” to “buku ya kokanisama,” ezali na bankombo ya bato oyo bakokisi masɛngami mpo na kozwa bomoi ya seko. (Emoniseli 3:5; 20:12; Malaki 3:16) Na buku yango, Nzambe akomaka nkombo ya bato oyo batikali sembo epai na ye.​—Yoane 3:16; 1 Yoane 5:3.

“Banda na ebandeli ya mokili,” Nzambe abatelaka na makanisi na ye basaleli na ye nyonso ya sembo, ezali lokola nde akomaka bankombo na bango na buku moko boye. (Emoniseli 17:8) Emonani ete nkombo ya Abele nde ekomamaki liboso na buku ya bomoi. (Baebre 11:4) Kasi, buku ya bomoi ezali kaka liste moko boye te ya bankombo; ezali komonisa ete Yehova azali Nzambe ya bolingo mpe ete “ayebi bato na ye.”​—2 Timote 2:19; 1 Yoane 4:8.

Nkombo ya moto ekoki kolongwa na “buku ya bomoi”?

Ɛɛ. Mpo na bato ya Yisraele oyo bazangaki botosi na ntango ya kala, Nzambe alobaki: “Moto oyo asaleli ngai lisumu, nakolongola ye na buku na ngai.” (Kobima 32:33) Kasi soki totikali sembo epai ya Nzambe, nkombo na biso ekolongwa te na “rulo ya bomoi.”​—Emoniseli 20:12.