Tósalisa bato oyo bazali na eksperiansi te ete bákanga ntina
1 Na lisalisi ya mosala ya kozalisa bayekoli, tozali koteya bato mosusu makambo oyo Nzambe azali kosɛnga epai na bango. (Mat. 28:19, 20) Na likambo yango, koleka milió mitano ya Batatoli, bazali kosala makasi mingi kati na mokili mobimba. Elónga ezali te na motuya ya ngonga, na mikanda mikabolami to na boyekoli ya Biblia oyo esalemi. Tozali kokokisa mokano na biso na ntango bato bazali kokanga ntina mpe bazali kosala engebene makambo bayekolaki.
2 Mpo na kosalisa bango na elimo, esengeli ‘kosalisa bato oyo bazali na eksperiansi te ete bákanga ntina.’ (Nz. 119:130) Mitema na bango mikosimbama mpe bakopusama na kosala misala bobele soki ‘bakangi ntina.’ (Mat. 15:10) Na meko oyo mosala na biso ezali kokola mpe koya monene, tozali komona malamu ntina ya koloba mpe koteya na maloba ya pɛtɛɛ. Yango wana la Société abimisi mwa búku Nzambe azali kosɛnga nini epai na biso? Ezali na manáka ya boyekoli oyo ekoki mpe ezali kozongela mateya ya moboko ya Biblia. Mateya mazali mikuse, elobeli ya pɛtɛɛ, mpe mateya mazali na mpasi te mpo na kokanga ntina na yango, yango wana mwa búku yango ekoki kotángama na bato mingi.
3 Na sanza ya Máí mpe ya Yúni tokokabola yango elongo na bazulunalo. Ntango tokomibongisa mpo na pɔ́sɔ na biso ya mosala ya kosakola, toli epesameli biso ete tómibongisa mpo na kolakisa bazulunalo mokolo ya pɔ́sɔ mpe tósalela mwa búku yango na mikolo mosusu mitikali kati na pɔ́sɔ. Tólakisa yango epai ya bato oyo basilá kozwa mikanda na mikolo mileki. Tómikundola ete ekoki kozala na ntina mingi mpo na koteya bana, bato na nkóta mosusu mpe baoyo bazali na mikakatano mpo na kotánga.
4 Tóbanda masoló epai na bato na maloba ya pɛtɛɛ: Ntango tozali kolakisa mwa búku Azali kosɛnga, tósalela lokasa 2 epai elimbolami ete “esalelami mpo na kopesa mateya ya Biblia.” tóbenda likebi na paragrafe 3, lokasa 3, mpo na komonisa na moto yango ntina oyo asengeli koyekola Biblia. Tólamwisa mposa na ye na lisalisi ya mitó ya mateya mosusu oyo ezali komonisa na lolenge ya pɛtɛɛ mateya ya Biblia. Tómonisa ye ete mwa búku yango esalami na lolenge ete boyekoli ezala likambo ya kosepelisa mpe tómonisa ye ete tozali pene mpo na kosunga ye.
5 Tótambwisa boyekoli oyo ezali kokóla: Mokano na biso ezali bobele ya kotambwisa boyekoli te, tolingi mpe kokomisa bango bayekoli ya molende oyo bazali kokotela lingomba ya solo. Mwa búku yango ekoki kosila na boumeli ya mwa bapɔ́sɔ, boyekoli wana esengeli komema mbala moko na boyekoli ya búku Boyebi. (Talá maloba na nsé ya lokasa 31.) Uta ebandeli, tósalisa moyekoli na koyeba lisangá ya Yehova. (Talá búku Comment raisonner nkasa 273-274.) Tólobela mingi ntina ya makita ya lisangá mpe tólimbola ete koyangana na makita ezali kopesa nzela na koyeba mokemoke lolenge ya kosalela losambo ya pɛto.—Ebe. 10:24, 25.
6 Ezali solo ete soki tosangani mpenza na mosala wana ya sipesiale na sanza ya Máí mpe ya Yúni, tokozala na esengo ya kosalisa bato ya sembo na “kozwa mayele” oyo ezali komema na bomoi.—Mas. 4:5.