Kozanga na yo na makita eyebanaka malamu!

¹ Na bantango mosusu, ekómelaka biso ete tózanga na likita moko to na makita mingi ya lisangá, na kolobáká ete: “Ekosala eloko te; bato mingi bakoyeba kútu te ete nazalaki te.” Ezali solo te! Lolenge moko na binama ya nzoto, tozali kosala biso nyonso mosala ya ntina mpo na bomoi ya lisangá. (1 Kol. 12:12) Kozanga na biso na likita moko ya pɔ́sɔ ekoki kobebisa bolamu ya elimo ya baoyo bayei na makita. Soki ozangaki na likita, omindimisa na likambo oyo ete: kozanga na yo na makita eyebanaka malamu!

² Mokumba ya ntina ya moko na moko: Ntoma Paulo azalaki kozela na motema likoló mpo na koyangana elongo na bandeko na ye. Ayebisi ntina na yango na Baloma 1:11, 12: “Ete nakabela bino likabo na [elimo, NW], . . . tóyikisana mpiko mpo na kondima na biso na bino mpenza, oyo ezali bobele kondima moko.” Bobele bongo, na bakomantere na biso, na masoló ya koteya oyo tozali kosala, bobele na koyangana na biso na makita, tozali kotongana bamoko na bamosusu mpe tozali kolendisana ete tótikala sembo.—1 Tes. 5:11.

³ Ozelaka na motema likoló ete okutana na baninga na yo baklisto na makita ya lisangá, boye te? Oyokaka na likebi bakomantere na bango mpe osepelaka na lolenge oyo bamonisaka kondima na bango. Makabo ya elimo oyo bazwi mazali kosalisa mpo na kotonga yo na elimo. Soki bamoko na bango bazali na makita te, okoyoka ete eloko moko ya ntina ezali kozanga. Bandeko na yo bayokaka lolenge moko soki ozangisi makita.

⁴ Ntina mpenza ya makita: Na oyo etali ntina ya makita mpo na elimo na biso, Linɔ́ngi ya Mosɛnzɛli moko elobaki ete: “Kati na mokili oyo mobebi na bitumba, na pite, lisangá ya boklisto ezali ekimelo ya solo . . . , ezali esika ya kimya mpe ya bolingo. Na bongo, yanganá mbala na mbala na makita na yango nyonso.” (w93 15/8 11) Mokolo na mokolo, tozali kokutana na makambo oyo mazali kotya elimo na biso na komekama makasi. Soki tomonisi bokɛngi te, tokoki kozindisama na mitungisi na biso kino kobungisa makambo maleki ntina, elingi koloba makambo ya elimo. Biso nyonso tozali na mposa, ya bamoko na bamosusu, mpo tózwa malendisi oyo tozali na yango mposa mpe tózala na bomoko mpe na molende na mosala ya Nzambe.—Ebe. 10:24, 25.

⁵ Ezali na ntina ete tóyanganaka na makita. Maladi to likambo mosusu oyo likanamaki te likoki kopekisa biso koyangana na makita, kasi na ntango nyonso oyo tozali na likoki, tózwa ekateli ya kozala ntango nyonso elongo na bato mingi oyo bazali koyangana mpo na kokumisa Yehova!—Nz. 26:12.