Bato mingi basepelaka kokaba

SOKI olingi kokabela mokonzi moko eloko, okopesa ye nini? Ezali boni soki mokonzi yango azali na bozwi mpe na mayele koleka mokili mobimba? Okoki koyeba eloko oyo ekosepelisa ye? Eleki sikoyo mbula nkóto misato, mokonzi-mwasi ya Seba akanisaki mituna yango ntango azalaki komibongisa mpo na kokende kotala Salomo, mokonzi ya Yisalaele, oyo alekaki bato nyonso na bozwi mpe na mayele.

Biblia elobi na biso ete mokonzi-mwasi ya Seba apesaki Salomo mpata mokama na ntuku mibale ya wolo mpe “malasi mingi mpe mabanga na motuya.” Lelo oyo, wolo wana ekoki kozala na motuya ya dolare milio 40. Malasi mpe mafuta ya kopakola, ezalaki kotalelama na motuya lokola wolo. Atako Biblia epesi motuya ya mafuta oyo mokonzi-mwasi apesaki Salomo te, kasi eyebisi biso ete moto mosusu te apesaki Salomo biloko ndenge moko na ye.​—1 Mikonzi 10:10.

Emonani polele ete mokonzi-mwasi ya Seba azalaki na bozwi mpe azalaki kosepela kokaba. Lisusu, azwaki mbano mpo na ezaleli na ye ya kokaba. Biblia elobi ete: “Mokonzi Salomo apesaki mokonzi mwasi na Seba nyonso elingaki ye, eloko na eloko elɔmbaki ye wana esili ye kozongisela ye yango eyeisaki ye epai na mokonzi.” (Biso nde totɛngisi makomi; 2 Ntango 9:12) Ekoki kozala ete bakonzi bazalaki na momeseno ya kopesana makabo; kasi, Biblia elobi polele ete Salomo azalaki “lobɔkɔ pɛtɛɛ.” (1 Mikonzi 10:13, NW) Salomo akomaki ete: “Molimo na kokabela akofulisama monene; ye oyo akomema mai akozwa mpe mai mpo na ye moko.”—Masese 11:25.

Ya solo, mokonzi-mwasi ya Seba asalaki likambo moko monene ndenge azwaki ntango mpe milende ya kokende kotala Salomo. Emonani lokola ete Seba ezalaki na esika oyo ezali République de Yémen lelo oyo. Yango elingi koloba ete mokonzi-mwasi atambolaki kilomɛtɛlɛ koleka 1 600 likoló ya bakamela tii na Yelusaleme. Lokola Yesu alobaki yango, “alongwaki na nsuka na mokili.” Mpo na nini mokonzi-mwasi ya Seba asalaki milende yango? Ayaki libosoliboso “mpo na koyoka mayele na Salomo.”—Luka 11:31.

Mokanda ya 1 Mikonzi 10:1, 2 elobi ete mokonzi-mwasi ya Seba “ayaki ete ameka [Salomo] na bituneli makasi. . . . [Ye] alobanaki na ye mpo na makambo nyonso na motema na ye.” Salomo apesaki ye biyano nini? “Salomo azongiselaki ye bituneli na ye nyonso; likambo moko ebombamelaki mokonzi te oyo ye ayebaki kolimbwela ye te.”—1 Mikonzi 10:3.

Makambo oyo mokonzi-mwasi ayokaki mpe oyo amonaki ekamwisaki ye, mpe na komikitisa nyonso alobaki ete: “Baombo na yo bazali na esengo, baoyo bakotɛ[lɛ]maka liboso na yo mpe bakoyokaka mayele na yo.” (1 Mikonzi 10:4-8) Alobaki te ete baombo ya Salomo bazalaki na esengo mpo bafandaki esika oyo etondi na biloko kitoko mpe ya motuya, atako ezalaki mpenza bongo. Kasi, baombo ya Salomo bazalaki na esengo mpo bazalaki na likoki ya koyoka ntango nyonso mayele ya Salomo oyo Nzambe apesaki ye. Mokonzi-mwasi azali ndakisa malamu mpo na basaleli ya Yehova lelo oyo, baoyo bazali koyoka mayele ya Mozalisi mpe ya Mwana na ye, Yesu Klisto!

Likambo mosusu ya ntina oyo mokonzi-mwasi alobaki na Salomo yango oyo: “[Yehova], Nzambe na yo, akumisama.” (1 Mikonzi 10:9) Tomoni ete amonaki mpenza ete mayele mpe bozwi ya Salomo eutaki epai ya Yehova. Yango eyokani na makambo oyo Yehova alobaki kala na Yisalaele ete, ‘Kotosa mibeko na ngai,’ “ekozala mayele na bino mpe lisosoli na bino na miso na bato baoyo bakoyoka mpo na mibeko oyo nyonso, mpe bakoloba ete, Solo libota oyo ezali libota na mayele mpe na kososola.”—Deteronome 4:5-7.

Bazali koya epai na ye oyo apesaka mayele

Na eleko na biso, bamilio ya bato bayei na lisangá ya Yehova mpamba te bamoni ete bato ya “Yisalaele ya Nzambe” bazali “libota ya mayele mpe ya kososola.” Ezali te mpo babotamá bongo kasi mpo bazali kotambwisama na mibeko mpe mitinda ya Nzambe, yango ezali ya kokoka. (Bagalatia 6:16) Mbula na mbula bayekoli ya sika koleka 300 000 oyo bazali kozwa batisimo bazali koloba na Yisalaele ya elimo ete: “Tokokenda na yo elongo, zambi toyoki ete Nzambe azali elongo na bino.” (Zekalia 8:23) Bato yango ya sika bazali kokamwa ntango bazali komona elambo ya bilei ya elimo oyo Yehova azali kosalela basaleli na ye! Bamonaki bongo te na mangomba na bango ya kala.​—Yisaya 25:6.

Bazali kokabela ye oyo akabaka koleka bato nyonso

Lokola bazwi biloko mingi, bato oyo bazali na botondi bazali na mposa ya koyeba eloko nini bakoki kokabela Yehova Nzambe, Mokonzi oyo akabaka koleka bato nyonso. Biblia emonisi ete eloko eleki malamu oyo tokoki kokabela Yehova ezali “mbeka na masanzoli.” (Baebele 13:15) Mpo na nini? Mpamba te mbeka yango ezali mpenza kobikisa bato, lobanzo ya liboso ya Yehova na ntango oyo ya nsuka. (Ezekiele 18:23) Lisusu, makasi mpe ntango na biso oyo tozali kopesa mpo na kosalisa bato ya maladi, baoyo banyokwami na makanisi, mpe bamosusu ezali mbeka oyo Nzambe andimaka.​—1 Batesaloniki 5:14; Baebele 13:16; Yakobo 1:27.

Makabo ya mbongo ezali na ntina mingi. Yango esalisaka mpo na kobimisa Babiblia, mikanda oyo elimbolaka Biblia, mpe kofutela to kosomba bisika oyo baklisto bakoki koyanganaka. (Baebele 10:24, 25) Makabo ya mbongo ezali lisusu na ntina mpo na kosalisa bato oyo bazwi makama mpo na bitumba mpe makambo mosusu.

Mpo na kosalisa biso na likambo ya kopesa makabo, Liloba ya Nzambe epesi mwa makanisi ya malamu. Na ndakisa, ezali koteya biso ete baklisto bápesaka makabo ya mbongo oyo bakateli bango motuya te, kasi moto na moto apesaka na kotalela makoki na ye, na bolingo malamu, mpe na motema ya esengo. (2 Bakolinti 9:7) Bamoko bakoki kopesa mingi; bamosusu, lokola mobola mwasi-mokufeli-mobali na eleko ya Yesu, bakoki kopesa kaka moke. (Luka 21:2-4) Ezali likambo ya esengo na ndenge Yehova, Nkolo ya mokili mobimba, andimaka eloko nyonso oyo tokabelaka ye na motema malamu mpe makambo oyo tosalaka na nkombo na ye, boye te?—Baebele 6:10.

Mpo na kosalisa basaleli ya Yehova bápesa na esengo, bazali koyebisa bango bamposa mpe lolenge malamu ya kokokisa bamposa yango. Elimo ya Yehova ezali kopusa bato ya mitema ya bolingo bápesa makabo. Na Yisalaele ya kala, basalaki bongo ntango batongaki mongombo, mpe na nsima, tempelo. (Exode 25:2; 35:5, 21, 29; 36:5-7; 39:32; 1 Ntango 29:1-19) Na ekeke ya liboso T.B., basalaki mpe bongo mpe yango esalisaki baklisto bázwa makoki oyo esengeli mpo nsango malamu ya Bokonzi esakolama epai ya bato ya mabota mosusu mpe básunga bandeko oyo bazalaki na Yisalaele na eleko moko ya nzala.​—1 Bakolinti 16:2-4; 2 Bakolinti 8:4, 15; Bakolose 1:23.

Bobele bongo lelo oyo, Yehova apamboli basaleli na ye, mpe akolanda kopambola bango, akopesa bango nyonso oyo esengeli mpo na kosukisa mosala monene ya kosakola mpe koteya oyo esalemá naino na mokili te.​—Matai 24:14; 28:19, 20.

Biloko nini tosengeli na yango lelo oyo?

Na bambula oyo euti koleka, na bikólo mingi oyo mosala na bango epekisamaki, Leta andimi mosala ya Batatoli ya Yehova. Na yango, na ebele ya mikili yango basakoli bakómi mingi mpenza. Yango wana mpe bato yango basengeli na Babiblia na mikanda mingi oyo elimbolaka Biblia.

Tozali mpe na mposa ya Bandako ya Bokonzi. Lelo oyo tozali na mposa ya Ndako ya Bokonzi soki 9 000 na mokili mobimba. Soki na mokolo moko tozali kotonga Ndako ya Bokonzi moko, ekozwa biso koleka mbula 24 mpo na kokokisa mposa yango! Lisusu, masangá soki nsambo ezali kosalema mokolo na mokolo, mingi ezali kosalema na mikili oyo makambo ya nkita ezali kotambola malamu te. Kasi, na bisika mingi ezali kosɛnga kotonga bandako ya ntalo mingi te. Na bisika mosusu, Ndako ya Bokonzi oyo ezali kokokisa mposa ya bandeko mpe oyo ezali kopesa lokumu na miso ya bato ekoki kotongama na dolare 6 000.

Na ekeke ya liboso, baklisto mosusu bazalaki na mbongo mingi koleka bamosusu, na yango ntoma Paulo akomaki ete: “Nde mpo na kokokisa likambo, bozwi na bino na ntango oyo ekosunga kozanga na bango ete bozwi na bango bósunga kozanga na bino, bongo ekokoka malamu.” (2 Bakolinti 8:14) Lelo oyo, ‘kokokanisa’ ezali kopesa nzela na kozwa mbongo oyo esengeli mpo na kobimisa Babiblia, mikanda oyo elimbolaka Biblia, kotonga Bandako ya Bokonzi, mpe kotinda biloko na bisika mingi na mokili oyo bato bazwi makama. Makabo yango ezali mpenza lipamboli, ezala mpo na moto oyo azali kopesa to mpo na moto oyo azali kozwa!—Misala 20:35.

Ndenge emonisami na mikanda oyo bato ya mitema malamu batindelaka la Société, bato mingi oyo batángaka Linɔ́ngi ya Mosɛnzɛli bazalaka na mposa ya kopesa makabo kasi bayebaka te ndenge oyo bakoki kopesa yango. Tokanisi ete etanda oyo etyami na lisolo oyo ekosalisa bango na likambo yango.

Ntango Salomo azalaki koyangela na nkembo, “mikonzi nyonso na mokili” oyo bayokaki nsango na ye bayaki kotala ye. Kasi, Biblia etángi kaka nkombo ya mokonzi-mwasi ya Seba. (2 Ntango 9:23) Asalaki likambo moko ya monene! Kasi, azwaki mbano mingi, mingi koleka na boye ete na nsuka ya mobembo na ye, tango azongaki “azangaki mpema mpe akamwaki.”—2 Ntango 9:4, Today’s English Version.

Na mikolo ekoya, Yehova, Mokonzi mpe Ye moto akabaka koleka bato nyonso, akopesa baoyo bazali kokabela Ye makabo mingi koleka oyo Salomo apesaki. Na bongo, bato yango ‘bakozanga mpema,’ mpo Yehova akobikisa bango na mokolo ya nsɔmɔ ya kosambisa na ye mpe lisusu ‘akofungola lobɔkɔ na ye mpe akokokisa mposa ya bikelamu nyonso ya bomoi.’—Nzembo 145:16.

[Etanda na lokasa 22]

Ndenge bato mosusu bapesaka

MAKABO MPO NA MOSALA NA MOKILI MOBIMBA

BANDEKO mingi babombaka mwa mosolo, to bakanaka kosala bongo soki bazwi mbongo, mpe batyaka yango na kɛsi ya makabo oyo bakomá “Makabo mpo na mosala ya la Société na mokili mobimba​—Matai 24:14.” Sanza na sanza masangá matindaka mbongo yango na biro monene ya la Société na Brooklyn, na New York to na biro ya filiale oyo ezali na mboka na bango.

Makabo ya bolingo malamu ya mbongo makoki kotindama mbala moko na Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, to na biro ya filiale ya la Société na mboka na bino. Okoki mpe kopesa biju to biloko mosusu ya motuya. Osengeli kokoma mokanda moko ya mokuse mpo na komonisa ete makabo yango ezali makabo ya bolingo malamu.

KOSIMBISA MBONGO

Moto akoki kosimbisa la Société Watch Tower mbongo na boye ete soki asengeli na yango, akoki kozwa yango. Mpo na koyeba makambo mosusu, okoki kokomela Treasurer’s Office na adresi oyo etyami likoló.

LIBULA MPO NA KOSUNGA BABOLA

Longola makabo ya mbongo oyo epesami libela to oyo ekozongisama, ezali mpe na myango mosusu ya kopesa makabo mpo na matomba ya mosala ya Bokonzi kati na mokili mobimba. Yango esangisi:

Asiransi: Moto akoki kokomisa nkombo ya la Société Watch Tower mpo azwa mbongo ya asiransi to azwa mbongo na ye ya epaso.

Mosolo na banki: Na mikili mosusu, moto akoki kofungola kɔnti na banki, kopesa certificat de dépôt, to kobombisa mbongo ya epaso mpo na Société Watch Tower, to kotya yango na nkombo ya la Société mpe la Société akosangola yango soki akufi.

Lotomo ya mosolo: Okoki kopesa na la Société lotomo ya mosolo (titres et obligations) lokola likabo mpo na libela, to kobatela lotomo ya kozwa mbongo yango ntango ozali naino na bomoi.

Lopango to ndako: Moto akoki kopesa la Société Watch Tower lopango, ndako to biloko mosusu oyo bikoki kotekama, libela, to mpe akoki kobatela lotomo ya kosalela yango ntango azali naino na bomoi. Yambo ya kopesa biloko yango nyonso na la Société, esengeli koyebisa ye liboso.

Mokanda ya kopesa libula: Moto akoki kopesa na la Société biloko to ndako to mosolo na mokanda ya kozwa libula oyo mondimami na mibeko, to akoki kopesa na la Société lotomo ya kozwa biloko oyo akotika. Soki moto akufi, biloko oyo atikaki mpo na lingomba, ntango mosusu Leta akitisaka mpako na yango.

Lokola ebéngeli “Libula mpo na kosunga babola” emonisi yango, lolenge oyo ya makabo esɛngaka ete mopesi azwa bibongiseli. Mpo na kosalisa bato oyo balingi kopesa makabo na lolenge ya libula mpo na kosunga babola, la Société abongisi mwa buku moko ekomami na Lingelesi oyo ezali na motó na likambo ete Planned Giving to Benefit Kingdom Service Worldwide (Makabo makanami mpo na mosala ya Bokonzi na mokili mobimba). Mwa buku yango ekomami mpo na koyanola na ebele na mituna oyo la Société azwaki na ntina na makabo, mpe mokanda ya kopesa libula. Yango ezali mpe kopesa bandimbola mosusu ya sikisiki likoló na bibongiseli mpo na makabo ya biloko lokola ndako, mosolo, mpe mpako. Mpe ekomami mpo na kosunga baoyo bafandi na États-Unis mpe balingi kopesa la Société likabo sikoyo to balingi kotikela ye lotomo ya kozwa yango nsima ya liwa na bango. Bato yango basengeli koyeba kopona myango oyo eleki malamu mpe oyo ezali kosalema na kotaleláká ezalela ya mabota na bango mpe oyo ya bango moko. Soki olingi kozwa mwa buku yango okoki kosɛnga na Charitable Planning Office (Biro ya la société oyo etalaka makabo oyo moto apesi lokola libula mpo na kosunga babola).

Nsima ya kotánga mwa buku yango mpe ya kosolola na bandeko ya Charitable Planning Office, bato mingi basungaki la Société mpe mpako mpo na biloko yango ekitaki. Yambo ya kopesa likabo nyonso, esengeli koyebisa Charitable Planning Office mpe kopesa ye kopi ya mokanda nyonso oyo emonisi bibongiseli yango. Soki osepeli na bibongiseli oyo mpo na kopesa makabo, okoki kosolola na Charitable Planning Office, ezala na mokanda to na telefone to kosolola na biro ya la Société ya mboka na bino.

CHARITABLE PLANNING OFFICE

Watch Tower Bible and Tract Society of Pennsylvania

100 Watchtower Drive, Patterson, New York 12563-9204

Telephone: (914) 306-1000

[Bililingi na lokasa 23]

Mosala ya Batatoli ya Yehova esimbami na makabo ya bolingo malamu.