Biblia ekoki kosalisa yo okóma na esengo

ATAKO Biblia ezali mokanda ya minganga te, elobeli makambo ya malamu to ya mabe oyo esengo to mawa ekoki komemela moto na makanisi to na nzoto. Elobi boye: “Motema ya kosepela ekosalaka malamu lokola nkisi; nde [elimo] etutami ekokaokisa mikuwa.” Mpe lisusu: “Soki okosenzwa na mokolo ya mpasi, nguya na yo ezali bobele moke.” (Masese 17:22; 24:10) Soki moto alɛmbi nzoto, yango ekoki kosilisa ye makasi, mpe akomiyoka ete akoki kosala lisusu eloko te mpe azalaka na mposa ya kobongola likambo yango to ya koluka lisalisi te.

Kolɛmba nzoto ekoki mpe kobebisa moto na elimo. Mbala mingi, bato oyo bakanisaka ete bazali na ntina te bamonaka mpe ete bakoki soki moke te kozala na boyokani na Nzambe mpe kondimama na ye. Simone, oyo tolobelaki na lisolo eleki, azalaki kondima te ete azali “moto oyo Nzambe akoki kondima.” Nzokande, soki totali na Liloba ya Nzambe, Biblia, tokomona ete Nzambe asepelaka na bato oyo basalaka makasi mpo na kosepelisa ye.

Nzambe atyelaka bato likebi

Biblia eyebisi biso ete “[Yehova] azali penepene na bango bazali na mitema etutami; akobikisa bango bazali na milimo minyɛtami.” Nzambe aboyaka te “motema motutami mpe ya mawa,” kasi alaki ete ‘akopelisa elimo ya mosokemi mpe akopelisa motema ya motutami.’​—Nzembo 34:18; 51:17; Yisaya 57:15.

Mokolo moko Yesu, Mwana ya Nzambe, amonaki malamu ayebisa bayekoli na ye ete Nzambe amonaka makambo malamu oyo basaleli na ye basalaka. Na nzela ya elilingi moko, ayebisaki bango ete Nzambe amonaka ntango mokɛngɛli-mboka ekwei na mabelé, likambo oyo bato mingi bakoki ata kotyela yango likebi te. Amonisaki mpe ete Nzambe ayebi bato malamumalamu; ayebi ata motángo ya nsuki ya mitó na bango. Asukisaki elilingi na ye na koloba boye: “Na yango bóbanga te: Bino boleki bakɛngɛli-mboka ebele na motuya.” (Matai 10:29-31)a Yesu amonisaki ete ata soki bato bazali komimona ndenge nini, bato ya kondima bazali na valɛrɛ na miso ya Nzambe. Kutu, ntoma Petelo alobi na biso ete, “Nzambe aponaka bilongi te, kasi na ekólo nyonso moto oyo azali kobanga ye mpe azali kosala boyengebene andimami na ye.”​—Misala 10:34, 35.

Tózalaka na bokatikati

Liloba ya Nzambe ezali kolendisa biso tózala na momeseno ya komitalela na bokatikati. Ntoma Paulo akomaki na lisalisi ya elimo santu ete: “Na nzela ya boboto monene oyo bamoniselaki ngai nazali koyebisa moto nyonso kuna na kati na bino ete akanisa mpo na ye moko te koleka ndenge oyo esengeli kokanisa; kasi akanisa nde na ndenge ya kozala na makanisi malamu, moto na moto na mezire ya kondima oyo Nzambe akabeli ye.”​—Baloma 12:3.

Ya solo, tosengeli te komizwaka na lokumu koleka ndelo, mpo tokóma lolendo te; epai mosusu, tosengeli mpe te komimonaka bato mpamba. Kasi, mokano na biso esengeli kozala ya komitalelaka na bokatikati, elingi koloba tóyebaka esika makoki na biso esuki. Mwasi moko moklisto amonisaki likambo yango na maloba oyo: “Ngai moto nasukisi mabe te; nazali mpe malamu koleka bato nyonso te. Nasalaka malamu mpe mabe lokola bato nyonso.”

Nzokande, ezali pɛtɛɛ te mpo moto akóma komitalela na bokatikati ndenge wana. Soki tozalaki komimona na valɛrɛ te banda bambula ebele, ekoki kosɛnga milende makasi mpo na kolongola makanisi yango. Kasi, na lisalisi ya Nzambe, tokoki kobongola bomoto na biso mpe lolenge na biso ya kotalela bomoi. Yango nde Liloba ya Nzambe ezali kolendisa biso tósala. Totángaka boye: “[Bólongola] bomoto ya kala oyo eyokani na etamboli na bino ya liboso mpe oyo ezali kopɔla engebene bamposa na yango ya bokosi; kasi. . . bosengeli kokómisama sika na kati ya bokasi oyo ezali kopusa makanisi na bino, mpe bosengeli kolata bomoto ya sika oyo ezalisamaki engebene mokano ya Nzambe na kati ya boyengebene ya solosolo mpe bosembo.”​—Baefese 4:22-24.

Soki tosali makasi mpo na kobongola ‘bokasi oyo ezali kopusa makanisi na biso,’ elingi koloba, nguya oyo ebongolaka makanisi na biso, bomoto na biso ekoki kobongwana, tokotika komimona bato mpamba mpe tokokóma komitalela na bokatikati. Lena, oyo tolobelaki na lisolo eleki, amonaki ete soki alongolaki te likanisi oyo azalaki na yango ete moto moko te akoki kolinga ye to kosalisa ye, eloko moko te ekokaki kobongola lolenge oyo azalaki komitalela. Batoli nini ya Biblia esalisaki Lena, Simone, mpe bato mosusu básala mbongwana wana?

Mitinda ya Biblia oyo esalisaka moto akóma na esengo

“Kitisá mokumba na yo epai ya [Yehova] mpe ye akokumba yo.” (Nzembo 55:22) Likambo ya ntina mingi oyo ekoki kosalisa biso tokóma na esengo ya solosolo ezali libondeli. Simone alobi boye: “Ntango nyonso oyo natungisami na makanisi, nasɛngaka Yehova asalisa ngai. Na makambo nyonso oyo nakutanaka na yango, namonaka ete apesaka ngai makasi mpe atambwisaka ngai.” Ntango mokomi na nzembo azali kolendisa biso tókitisa mikumba na biso epai na Yehova, azali nde koyebisa biso ete Yehova atyelaka biso likebi mpe amonaka biso lokola bato oyo asengeli kosalisa. Na mokolo ya Elekeli ya mobu 33 ya ntango na biso (T.B.), bayekoli ya Yesu bayokaki mawa makasi mpamba te Yesu ayebisaki bango ete etikali moke atika bango. Yesu alendisaki bango bábondela Tata, mpe abakisaki boye: “Bósɛnga mpe bokozwa, mpo esengo na bino etonda mɛkɛ.”​—Yoane 16:23, 24.

“Esengo ya kopesa eleki oyo ya kozwa.” (Misala 20:35) Ndenge Yesu ateyaki, kopesa ezali sɛkɛlɛ ya esengo ya solosolo na bomoi. Soki tozali kosalela toli wana ya Biblia, tokobanda kotalela libosoliboso bamposa ya bato mosusu na esika tómitungisaka mpo na bolɛmbu na biso. Ntango tosalisi bato mosusu mpe bango bamonisi botɔndi, toyokaka esengo. Lena andimi ete kosakola nsango malamu ya Biblia mbala na mbala esalisaka ye na makambo mibale. Alobi boye: “Ya liboso, epesaka ngai kimya mpe esengo oyo Yesu alobelaki.” “Ya mibale, soki bato mosusu basepeli na lisalisi na ngai, yango esalisaka ngai nazala na esengo.” Soki tozali komipesa na bolingo nyonso, tokomona bosolo ya Masese 11:25 (NW): “Oyo azali kosopela baninga mai ebele ye mpe bakosopela ye mai ebele.”

“Mikolo nyonso ya banyokolami ezali mabe, nde ye oyo azali na motema ya esengo akolyaka elambo ntango nyonso.” (Masese 15:15) Mokomoko na biso akoki kopona ndenge oyo asengeli komitalelaka mpe ndenge oyo asengeli kotalelaka makambo oyo ekómelaka ye. Tokoki kozala lokola moto oyo amonaka makambo nyonso mabe mpe amonaka ete bazali konyokola ye, to tokoki kozala na makanisi oyo ebongi, kozala na “motema ya esengo,” mpe kosepela lokola nde tozali na kati ya fɛti. Simone alobi: “Nasalaka makasi nazala na makanisi oyo ebongi. Nayekolaka mingi, nabimaka mingi na mosala ya kosakola mpe nabondelaka mingi. Nasalaka mpe makasi nazala na baninga oyo bazali na esengo mpe nasalaka nyonso mpo na kosunga basusu.” Kozala na motema ya ndenge wana ememaka esengo ya solosolo, ndenge kaka Biblia elobi yango: “Bino bayengebeni, bósepela kati na [Yehova] mpe bózala na esengo; bóyemba na esengo bino nyonso na mitema sembo.”​—Nzembo 32:11.

“Moninga akolingaka ntango nyonso; [mpe azali] ndeko abotami mpo na ntango ya mpasi.” (Masese 17:17) Koyebisa likambo oyo ezali kotungisa biso epai ya moninga ya motema to moto moko oyo akoki kopesa biso toli ya malamu, ekoki kosalisa biso tótika komitungisatungisa mpe tólongola makanisi oyo ebongi te liboso ememela biso likama. Kosolola na basusu ekoki kosalisa biso tókóma kotalela makambo na bokatikati mpe na ndenge ebongi. Simone alobi ete: “Kobimisa makanisi oyo ozali na yango na motema esalisaka mingi. Ezali malamu oyebisaka moto mosusu ndenge ozali koyoka. Mbala mingi, esɛngaka kaka koyebisa moto mosusu makambo oyo ezali na motema na yo.” Kosala bongo, ekosalisa yo omona bosolo ya maloba ya Masese oyo: “Kozala na mawa na motema elembisaka moto nzoto; kasi maloba ya kitoko epesaka ye esengo.”​—Masese 12:25, Bible na lingala ya lelo oyo.

Oyo okoki kosala

Mitinda ya Biblia oyo ekoki kosalisa biso tótika kotungisama na makanisi mpe tokóma na esengo ya solosolo ezali mingi, kasi tolobeli kaka mwa ndambo. Soki yo mpe omonaka ete ozali na ntina moko te na bomoi, tolendisi yo otalela na mozindo Liloba ya Nzambe, Biblia. Yekolá kozala na makanisi ebongi mpo na yo moko mpe mpo na boyokani na yo na Nzambe. Tozali na elikya ete Liloba ya Nzambe ekosalisa yo okóma na esengo ya solosolo na makambo nyonso ozali kosala.

[Maloba na nse ya lokasa]

[Elilingi na lokasa 7]

Kosalela mitinda ya Biblia esalisaka moto akóma na esengo