MOTUNA 6
Biblia esakolaki nini mpo na Masiya?
ESAKWELI
“Yo, Ee Beteleme Efrata, . . . epai na yo nde moto oyo akozala mokonzi na Yisraele akobima mpo na ngai.”
KOKOKISAMA NA YANGO
“Nsima ya kobotama ya Yesu na Beteleme ya Yudea na mikolo ya Erode mokonzi, talá! banganga-minzoto oyo bautaki na Ɛsti bayaki na Yerusaleme.”
ESAKWELI
“Bakaboli bilamba na ngai kati na bango, mpe babwaki mbɛsɛ mpo na bilamba na ngai.”
KOKOKISAMA NA YANGO
“Ntango basoda babakaki Yesu na nzete na bansɛtɛ, bazwaki bilamba na ye ya likoló mpe bakabolaki yango na biteni minei . . . Kasi elamba yango ya kati etongamaki na biteni te, bakangisá yango banda na likoló tii na nse. Bongo balobanaki bango na bango ete: ‘Tópasola yango te, kasi tóbwaka mbɛsɛ mpo na koyeba soki ekozala ya nani.’”
ESAKWELI
“Azali kobatela mikuwa na ye nyonso; ata moko na yango ebukani te.”
KOKOKISAMA NA YANGO
“Ntango bakómaki epai ya Yesu, bamonaki ete asilaki kokufa, na yango babukaki makolo na ye te.”
ESAKWELI
“Atɔbɔlamaki mpo na misala na biso ya kobuka mibeko.”
KOKOKISAMA NA YANGO
“Moko ya basoda atɔbɔlaki ye mopanzi na likɔnga, mpe na mbala moko makila ná mai ebimaki.”
ESAKWELI
“Bapesaki ngai lifuti na ngai, mbongo ya bibende 30 ya palata.”
KOKOKISAMA NA YANGO
“Moko ya bantoma zomi na mibale, oyo babengi Yudasi Mokeriota, akendaki epai ya banganga-nzambe bakonzi mpe alobaki na bango: ‘Bokopesa ngai nini mpo natɛkɛla bino ye?’ Bayokanaki bápesa ye mbongo ya bibende 30 ya palata.”