Nkoma ya batángi

Mituna ya bilenge Nazali na mbula 12 mpe nasepelaka mingi kotánga bazulunalo na bino. Liboso nabanda kotánga yango, nazalaki kokoka te kosolola malamu na baninga na ngai, mpamba te bango nyonso bazalaki mikóló na ngai. Kasi nsima ya kotánga masolo “Mituna oyo bilenge batunaka . . . ,” ezali lisusu mpasi te mpo nasolola na bango. Napesi bino matɔndi mingi mpo na bazulunalo na bino. Ezali mpenza kosalisa bato.

N. I., Russie

Koyekola monɔkɔ mosusu Matɔndi mingi mpo na makanisi malamu bopesaki na lisolo “Olingi koyekola monɔkɔ ya bapaya?” (Yuli​-Sɛtɛmbɛ 2000) Nabandaki koyekola monɔkɔ ya Espagnole esili koleka sikoyo mbula mibale mpe nakómi koyeba yango. Na liyangani moko ya mikili mingi oyo euti kosalema, nasalisaki bandeko baklisto ebele oyo bautaki mikili mosusu.

K.L.R., Brésil

Nazali koyekola Lifalanse uta mbula misato sikoyo mpe nasengeli kopesa bino matɔndi mingi mpo na lisolo wana. Elendisaki ngai mpenza! Epesi ngai makasi mpo natika te koyekola monɔkɔ yango. Nazali na elikya mpe nazali kobondela ete lokola nasalaka mosala ya kosakola nsango malamu, nasala yango na minɔkɔ ya bato mosusu mpe na lolenge mosusu ya mosala yango.

L. C., États-Unis

Awa na etúká ya Bavière, bapaya bazali mingi. Atako mingi balobaka monɔkɔ ya Allemand, basepelaka mingi soki bayoki nsango malamu na monɔkɔ ya mboka na bango. Lokola mingi bauti na Russie, nakanaki ete nayekola monɔkɔ na bango. Bolobaki mpenza solo ete ezali pɛtɛɛ te. Kasi nalongi mokakatano ya liboso: koyekola balɛtrɛ na yango. Nazali lisusu komona yango mpasi te.

B. K., Allemagne

Bopesaki toli ya kosalela bakasɛti ya radio mpo na koyekola monɔkɔ moko ntango ozali kotambwisa motuka. Nandimi te ete ezali likanisi malamu kosala likambo moko oyo ezali kobenda likebi na biso ntango tozali kotambwisa motuka. Yango ekoki komema na likama.

K. S., Japon

Totunaki na masangá mingi oyo etalelaka likambo ya makama ya mituka mpe ata moko te emonisaki biso ete koyoka kasɛti ya radio mpo na koyekola monɔkɔ moko ntango ozali kotambwisa motuka ezali likama. Ezali kaka lokola ozali koyoka miziki to ozali kosolola na bato oyo ozali komema na motuka. Atako bongo, tosepeli mingi na ndenge osalisi bato bábosana te ete basengeli kokeba ntango bazali kotambwisa motuka.​—BAKOMI

Lipaso kozanga kozongisa makila Nalingi kopesa bino matɔndi mpo na lisolo “Bato mingi bakómi koluka básala bango lipaso kozanga kozongisa makila.” (8 Yanuali 2000, ebimeli ya Lifalanse) Lisolo yango ekweisi mpenza makanisi mabe oyo bato mosusu bazalaka na yango mpo na Batatoli ya Yehova. Namemaki bazulunalo yango na biro mpe napesaki yango na baninga na ngai ya mosala. Na ntango ya bopemi ya midi, namonaki moninga moko ya mosala azali kotánga yango na likebi mpenza. Na nsima, apusanaki penepene na ngai mpe alobaki ete: “Nandimaki te ete zulunalo oyo ezalaka na masolo mingi ya kitoko boye!”

I. S., République tchèque

Nyamankɛkɛ Matɔndi mingi mpo na lisolo “Nyamankɛkɛ: Bikelamu ya kokamwa.” (8 Yanuali 2000, ebimeli ya Lifalanse) Na ntembe te, bosalaki mpenza bolukiluki ya mozindo mpe bolobeli yango malamu mpenza. Nalingaki kotala televizyo, kasi motema etindaki ngai natánga Lamuká! Nsima ya kotánga lisolo yango, nandimaki ete likambo oyo naponaki kosala ezali malamu.

O. K., France

Lokola nayebaki mpenza te ntina oyo Yehova asalá nyamankɛkɛ, nasukisaki ete asalaki yango mpo atalaka soki bato babatelaka bandako na bango pɛto. Kasi lisolo oyo emonisi ngai ete nyamankɛkɛ ezali mpenza na kati ya buku ya biloko oyo ezalisami, oyo ezali koteya biso makambo mingi lisusu etali bonene ya Mozalisi na biso.

A. A., États-Unis