Nkoma ya batángi

Koyiba biloko ya bato na mayele mabe  Nalingi koyebisa bino ete nasepelaki mingi na masolo “Protégez-vous des escrocs [Kebá na bato oyo bayibaka biloko ya bato na mayele mabe].” (22 Yuli 2004, na Lifalanse) Nasalaka mwa mombongo na lopango na ngai mpe bayibaki biloko na ngai na mayele mabe. Namiyokaki kaka ndenge masolo ya elobi​—⁠nsɔni, komema ngambo, mpe namimonaki mpenza zoba. Nasalelaki mpenza toli oyo masolo yango epesaki. Nandimaki ete nasalaki libunga, nabondelaki Yehova, mpe nayebisaki nkulutu moko oyo nameseni na ye mingi. Masolo yango esalisi ngai nabosana likambo yango. Motema ekiti!

T. G., États-Unis

Kosangisa nzoto liboso ya kobala  Lisolo “Les jeunes s’interrogent . . . Les relations sexuelles avant le mariage: est-ce mal? [Ezali mabe kosangisa nzoto liboso ya kobala?].” (22 Yuli 2004, na Lifalanse) elendisaki ngai mingi. Makanisi ya elenge balobeli na lisolo yango ekokani mpenza na makanisi na ngai. Maloba oyo ezali na Nzembo 84:⁠11, oyo elobi ete Yehova akoboya kopesa eloko malamu soko moko te na baoyo bazali kotambola alima, esimbaki mpenza motema na ngai.

T. U., Allemagne

Lokola nazali elenge mwasi, nasalaka nyonso mpo natikala sembo epai ya Yehova, kasi ntango mosusu ezalaka mpenza etumba. Lisolo oyo elendisi ekateli na ngai ya kotikala sembo mpe esalisi ngai nayeba ete nazali kaka ngai moko te na etumba oyo mokili ya Satana ezali kobundisa biso. Koyeba ete Yehova azali kobatela bilenge ezali mpenza kolendisa.

F. B., Botswana

Ndenge ozali komonana na miso ya bato  Nalingi kopesa bino matɔndi mpo na lisolo “Quand le souci de l’apparence tourne à l’obsession [Ntango okómi komitungisa na ndenge ozali komonana na miso ya bato.” (22 Yuli 2004, na Lifalanse) Nazali na mbula 21, mpe namimonaka ete nazali monene mingi koleka bato mosusu. Sikoyo nakoluka nde kobatela kitoko na ngai ya motema. Namoni lokola lisolo yango ekomami mpenza mpo na ngai.

N. U., Japon

Na mawa nyonso, bato bakómi kotinda biso tókanisa ete esengeli kaka kozala nzoto mike. Ntango mosusu ezali mpenza etumba mpe ezali kolɛmbisa nzoto ntango ozali kolonga likambo yango te. Kasi, nakosala makasi na likambo yango, mpe lisolo oyo elendisi ngai mpenza!

D. P., Allemagne

Bilembo oyo maladi ya bukabuka etikaka (SPP)  Matɔndi mingi mpo na makambo oyo Jack Meintsma alobi na lisolo “Une infection, deux afflictions. [Maladi moko, mpasi mbala mibale].” (22 Yuli 2004, na Lifalanse) Nabɛlaki mingai mbula 23 mpe bilembo na yango ezali kaka ndenge bolimboli na lisolo wana. Nalingi kopesa ndeko Meinstma matɔndi mpo na makambo oyo alobi ya kosalisa moto atambola mpe mpo na ndenge ya kosala mpo na kosalela mingi te misisa oyo ezwi maladi.

U. K., Autriche

Ntango nazalaki na mbula 25, nabɛlaki maladi ya bukabuka. Minganga bamesanaki na lolenge ya maladi yango te, mpe bazalaki koyeba bilembo na yango te. Liboso natánga lisolo oyo, nayebaki makambo mingi mpenza te na oyo etali maladi yango.

J. E., France

Mama na ngai abɛlaki maladi ya bukabuka ntango azalaki na mbula motoba. Ndenge bolimboli maladi yango malamu esalisi ngai nayeba mpasi oyo amonaka.

T. V., Italie

Nabɛlaki bukabuka ntango nazalaki na sanza 18, kasi ndenge ya ndeko Meintsma te. Atako bongo, lokola misisa na ngai ezalaka makasi te, nalɛmbaka mingi. Lisolo yango esalisi ngai nayeba ndenge ya kobatela makasi na ngai. Likambo esalisi ngai mingi na lisolo oyo ezali ya kotánga ete Yehova ayebi mpasi na biso mpe atikaka biso te!

L. J., États-Unis