Omityelaka mikano oyo okokokisa?

● Makambo nini omizelaka na yango na bomoi? Omizelaka na makambo oyo ebongi, to okanisakanisaka makambo oyo okokoka kosala te to oyo eleki makoki na yo? Moto moko oyo azalaki mpenza kotalela makambo ya bomoi ya bato apesaki toli oyo: “Malamu kutu ósepela na bomengo oyo ozali na yango, esika ’tè ózala tango nyonso na baposa ya biloko mosusu; pamba té yango pe ezali kaka pamba pe ezali lokola kolanda mopepe.”​—Mosakoli 6:9, Bible na lingala ya lelo oyo.

‘Oyo tozali na yango’ emonisi ndenge bomoi mpe makambo na biso ezali sikoyo. Ya solo, ezali mabe te koluka kobongisa bomoi na biso. Nzokande, Biblia emonisi ete moto ya bwanya amityelaka te mikano oyo ekoki kokokisama te. Mikano yango ekoki kozala na ndakisa koluka lokumu, koluka bozwi, koluka molongani ya kokoka, to koluka kozala na nzoto ya kokoka.

Longola yango, baoyo bazali kokokisa moko ya mikano ya ndenge wana, lokola kokóma na bozwi, bakoki kozala kaka na mposa ya kobakisa. Biblia elobi polele ete: “Moto oyo alingá palata akotonda palata te, mpe moto alingá bozwi akotonda mpe lifuti te. Yango mpe ezali mpamba.” (Mosakoli 5:10) Kasi bato oyo bazali na bwanya mpe bayebi Nzambe, basalaka makasi básepela na ‘oyo bazali na yango.’ Ya solo, bandimaka bosolo ya maloba oyo: “Mpo toyaki na eloko te na mokili, mpe tokokende na eloko te.”​—1 Timote 6:7.

Na ndenge tokelamá, bato oyo bazwaka esengo ya solosolo ezali baoyo bakokisaka bamposa na bango ya elimo. (Matai 5:3) Ndenge nini tokoki kosala yango? Yesu alobaki boye: “Moto asengeli kobika, kaka na mampa te, kasi na liloba nyonso oyo ezali kobima na monɔkɔ ya Yehova.” (Matai 4:4) Maloba yango ya ntina mingi ezali na Biblia, mpe moto akoki kozwa yango ofele.

Moko ya maloba yango ezali na Nzembo 37:4. Elobi boye: “Sepelá mingi mpenza na Yehova, mpe akopesa yo oyo motema na yo ezali kosɛnga.” Yehova, Nzambe Mozwi-ya-Nguya-Nyonso, akopesa basambeli na ye ya sembo biloko oyo moto akoki kopesa te: nzoto ya kokoka, biloko ya kobikela, mpe bomoi ya seko na paradiso awa na mabele. (Luka 23:43; Emoniseli 21:3, 4) Kotyela maloba wana motema elingi koloba te ete totalelaka makambo na ndenge oyo ebongi te.