Eteni 2
Mabelé oyo mpasi esili kolongolama kati na yango
1, 2. Makanisi nini makeseni oyo bato mingi bazali na yango?
ATAKO bongo, kati na mokili mobimba, bamilió na bato bazali mpenza na makanisi makeseni. Bazali na elikya ete bato bakozala na bomoi malamu na mikolo mizali koya. Bazali koloba ete, mosika te, mokili oyo mokozala lisusu na mabe te mpe na mpasi te mokosalema bobele awa na mabelé. Bandimisami ete mosika te, makambo mabe makolongwa mpe mokili ya sika mpenza mokosalema. Bazali kino koloba ete moboko ya mokili yango ya sika mozali kotyama uta sikawa!
2 Bato yango bakanisi ete mokili ya sika mokozala na bitumba te, na misala mabe te, na koboma te, na bokesene te mpe na bobólá te. Na mokili yango, maladi ekozala te, na mpasi, na mpisoli, ata liwa mpe ekozala te. Na ntango yango, bato bakokóma na ezalela ya kokoka mpe bakozala na bomoi ya seko na esengo kati na paradis na mabelé. Likambo lileki mpenza malamu, ezali oyo ete bakufi bakosekwa mpe bakozwa likoki ya kozala na bomoi ya seko!
3, 4. Mpo na nini bato wana bandimisami na makanisi na bango?
3 Likanisi wana na ntina na mikolo mizali koya ezali nde ndoto mpamba, likanisi mpamba? Te, ezali bongo te. Etongami likoló na kondima makasi oyo ete koya ya paradis wana ezali likambo ya solo. (Baebele 11:1) Mpo na nini bato yango bandimisami bongo? Mpo ete elaká yango euti na Mozalisi ya molóngó, ye mozwi-na-nguya-nyonso.
4 Na ntina na bilaká na Nzambe, Biblia elobi ete: “Liloba moko te lizangi kokokana kati na maloba nyonso malamu oyo Jéhovah, Nzambe na bino alakaki bino. Nyonso masili kokokana mpo na bino. Soko moko te ezangi kokokana kati na yango.” “Nzambe azali lokola moto te ete abuka lokutá. . . . Ye asili koloba, akosala yango te? Mpe asili koyebisa, kasi akokokisa yango te?” “Jéhovah na bibele alapi ndai ete: ‘Lokola esili ngai kokanisa, ekosalama mpe bongo; mpe lokola esili ngai kolaka, ekokokisama bongo.’”—Yosua 23:14, MN; Mituya 23:19, MN; Yisaya 14:24, MN.
5. Mituna nini misengeli koyanolama?
5 Kasi, soki mokano ya Nzambe ezalaki ete atya paradis na mabelé oyo makozala na mpasi te, mpo na nini apesi naino nzela na makambo mabe? Mpo na nini azeli mibu nkɔto motoba kino sikawa, mpo ete abongisa oyo ezali mabe? Bikeke oyo ya mpasi bimonisi ete Nzambe azali mpenza komibanzabanza mpo na biso te, to mpe ete azali te?