ຊາມູເອນສະບັບທີໜຶ່ງ
1 ມີຜູ້ຊາຍຄົນໜຶ່ງຊື່ເອນການາ ລາວເປັນຄົນເອຟຣາຢິມ. ລາວຢູ່ເມືອງຣາມາທາຢິມໂຊຟິມ*+ໃນແຖວພູຂອງເຂດເອຟຣາຢິມ.+ ເອນການາ+ເປັນລູກຊາຍຂອງເຢໂຣຮາມ ເຢໂຣຮາມເປັນລູກຊາຍຂອງເອລີຮູ ເອລີຮູເປັນລູກຊາຍຂອງໂຕຮູ ໂຕຮູເປັນລູກຊາຍຂອງຊູບ. 2 ເອນການາມີເມຍ 2 ຄົນ. ຜູ້ໜຶ່ງຊື່ຮັນນາ ແລະອີກຜູ້ໜຶ່ງຊື່ເປນິນນາ. ເປນິນນາມີລູກຫຼາຍຄົນ ແຕ່ຮັນນາບໍ່ມີລູກຈັກຄົນ. 3 ເອນການາອອກຈາກເມືອງທີ່ລາວຢູ່ເພື່ອໄປນະມັດສະການ*ພະເຢໂຫວາຜູ້ບັນຊາການກອງທັບແລະເອົາເຄື່ອງບູຊາໄປເຜົາໃຫ້ເພິ່ນຢູ່ເມືອງຊີໂລ+ທຸກໆປີ. ຕອນນັ້ນ ໂຮບນີກັບຟີເນຮາດລູກຊາຍ 2 ຄົນຂອງເອລີ+ເປັນປະໂລຫິດຮັບໃຊ້ພະເຢໂຫວາຢູ່ຫັ້ນ.+
4 ເມື່ອເອນການາເອົາເຄື່ອງບູຊາໄປເຜົາແລ້ວໆ ລາວຈະແບ່ງເຄື່ອງບູຊາໃຫ້ເປນິນນາກັບພວກລູກຊາຍແລະລູກສາວທຸກຄົນຂອງລາວ.+ 5 ແຕ່ລາວຈະໃຫ້ຮັນນາຫຼາຍເປັນພິເສດ ເພາະວ່າລາວຮັກຮັນນາຫຼາຍ. ແຕ່ພະເຢໂຫວາບໍ່ໃຫ້ຮັນນາມີລູກ. 6 ເປນິນນາທີ່ເປັນຄູ່ແຂ່ງກໍເວົ້າໃສ່ລາວຕະຫຼອດເຊິ່ງເຮັດໃຫ້ຮັນນາທຸກໃຈຫຼາຍ ຍ້ອນພະເຢໂຫວາບໍ່ໃຫ້ລາວມີລູກ. 7 ເປນິນນາເວົ້າໃສ່ແບບນີ້ທຸກໆປີ. ເມື່ອໃດກໍຕາມທີ່ຮັນນາໄປເຕັ້ນສັກສິດ*ຂອງພະເຢໂຫວາ+ ເປນິນນາຈະເວົ້າໃສ່ຮັນນາຈົນລາວຮ້ອງໄຫ້ແລະບໍ່ຍອມກິນຂອງກິນທີ່ເອນການາແບ່ງໃຫ້. 8 ເອນການາຈຶ່ງຖາມວ່າ: “ຮັນນາ ເປັນຫຍັງຈຶ່ງໄຫ້? ເປັນຫຍັງຈຶ່ງບໍ່ກິນເຂົ້າ? ເປັນຫຍັງຄືເສົ້າແທ້? ເຈົ້າມີຂ້ອຍຄົນດຽວກໍດີກວ່າມີລູກຊາຍ 10 ຄົນບໍ່ແມ່ນບໍ?”
9 ຕອນທີ່ຢູ່ເມືອງຊີໂລ ຫຼັງຈາກເຂົາເຈົ້າກິນເຂົ້າແລ້ວ ຮັນນາກໍອອກໄປ. ຕອນນັ້ນ ປະໂລຫິດເອລີນັ່ງຢູ່ຕັ່ງທາງຂ້າງປະຕູເຂົ້າວິຫານ*+ຂອງພະເຢໂຫວາ. 10 ຮັນນາທຸກໃຈຫຼາຍ ລາວຈຶ່ງອະທິດຖານຫາພະເຢໂຫວາ+ແລະຮ້ອງໄຫ້ສະອຶກສະອື້ນ. 11 ລາວສາບານວ່າ: “ພະເຢໂຫວາຜູ້ບັນຊາການກອງທັບ ຖ້າພະອົງເຫັນຄວາມທຸກຂອງລູກທີ່ເປັນຜູ້ຮັບໃຊ້ຂອງພະອົງແລະຄິດເຖິງລູກ ຖ້າພະອົງບໍ່ລືມຜູ້ຮັບໃຊ້ຂອງພະອົງແລະໃຫ້ລູກໄດ້ລູກຊາຍຄົນໜຶ່ງ+ ລູກຈະມອບລາວໃຫ້ຮັບໃຊ້ພະເຢໂຫວາຕະຫຼອດຊີວິດ ແລະລາວຈະບໍ່ຕັດຜົມເລີຍ.”+
12 ຕອນທີ່ຮັນນາອະທິດຖານຫາພະເຢໂຫວາດົນໆ ເອລີກໍແນມເບິ່ງລາວ. 13 ຮັນນາອະທິດຖານໃນໃຈ ແລະປາກຂອງລາວກໍເໜັງມຸບໆມິບໆ ແຕ່ບໍ່ມີສຽງເວົ້າອອກມາ. ເອລີຈຶ່ງຄິດວ່າລາວເມົາເຫຼົ້າ. 14 ເອລີເວົ້າກັບລາວວ່າ: “ຄົນເມົາເຫຼົ້າ ເຈົ້າມາເຮັດຫຍັງຢູ່ນີ້? ເມືອແມ້ ສ່ວງເຫຼົ້າແລ້ວຈຶ່ງຄ່ອຍມາ.” 15 ຮັນນາຈຶ່ງຕອບວ່າ: “ທ່ານເອີ້ຍ ຂ້ອຍບໍ່ໄດ້ເມົາເຫຼົ້າ. ຂ້ອຍກຳລັງທຸກໃຈຫຼາຍ. ຂ້ອຍບໍ່ໄດ້ກິນເຫຼົ້າແວງຫຼືສິ່ງມຶນເມົາ. ແຕ່ຂ້ອຍກຳລັງລະບາຍຄວາມໃນໃຈກັບພະເຢໂຫວາ.+ 16 ຢ່າເບິ່ງວ່າຜູ້ຮັບໃຊ້ຂອງທ່ານເປັນຜູ້ຍິງທີ່ບໍ່ດີ. ຂ້ອຍພຽງແຕ່ອະທິດຖານເພາະຂ້ອຍກຳລັງທຸກໃຈແລະເຈັບປວດໃຈຫຼາຍ.” 17 ເອລີຕອບວ່າ: “ຂໍໃຫ້ກັບເມືອເຮືອນດ້ວຍຄວາມສະບາຍໃຈ. ເຈົ້າອະທິດຖານຂໍຫຍັງຈາກພະເຈົ້າຂອງອິດສະຣາເອນກໍຂໍໃຫ້ໄດ້ຕາມນັ້ນ.”+ 18 ຮັນນາຈຶ່ງຕອບວ່າ: “ຂໍໃຫ້ທ່ານເມດຕາຂ້ອຍ.” ແລ້ວລາວກໍກັບເມືອເຮືອນແລະກິນເຂົ້າ ແລະໜ້າຕາຂອງລາວກໍບໍ່ໂສກເສົ້າອີກຕໍ່ໄປ.
19 ຄອບຄົວຂອງເອນການາຕື່ນແຕ່ເຊົ້າໆ ແລະພາກັນໝູບໜ້າລົງນະມັດສະການພະເຢໂຫວາ. ຈາກນັ້ນ ເຂົາເຈົ້າກໍເດີນທາງກັບເມືອເຮືອນທີ່ຢູ່ເມືອງຣາມາ.+ ເອນການາໄປນອນກັບຮັນນາ ແລະພະເຢໂຫວາກໍຕອບຄຳອະທິດຖານຂອງຮັນນາ.+ 20 ພາຍໃນໜຶ່ງປີ* ຮັນນາກໍຖືພາແລະເກີດລູກຊາຍ. ລາວຕັ້ງຊື່+ລູກວ່າຊາມູເອນ* ເພາະລາວບອກວ່າ “ຂ້ອຍຂໍລູກຜູ້ນີ້ຈາກພະເຢໂຫວາ.”
21 ຕໍ່ມາ ເອນການາກັບຄອບຄົວກໍເອົາເຄື່ອງບູຊາ+ປະຈຳປີແລະເຄື່ອງບູຊາສຳລັບຄຳສາບານຂອງລາວໄປເຜົາໃຫ້ພະເຢໂຫວາ. 22 ແຕ່ຮັນນາບໍ່ໄດ້ໄປນຳ.+ ລາວບອກຜົວວ່າ: “ເມື່ອລູກເຊົານົມ ຂ້ອຍຈະພາລາວໄປເຕັ້ນສັກສິດຂອງພະເຢໂຫວາ* ແລະໃຫ້ລາວຢູ່ຫັ້ນຕະຫຼອດໄປ.”+ 23 ເອນການາຈຶ່ງເວົ້າກັບຮັນນາວ່າ: “ແລ້ວແຕ່ເຈົ້າ ຄັນຊັ້ນໃຫ້ເຈົ້າຢູ່ເຮືອນຈົນລູກເຊົານົມ. ຂໍພະເຢໂຫວາຊ່ວຍເຈົ້າໃຫ້ເຮັດຕາມທີ່ເຈົ້າເວົ້າ.” ຮັນນາຈຶ່ງຢູ່ເຮືອນແລະລ້ຽງລູກຈົນລູກເຊົານົມ.
24 ເມື່ອຊາມູເອນເຊົານົມແລ້ວ ຮັນນາກໍພາລູກຂຶ້ນໄປເມືອງຊີໂລ. ລາວເອົາງົວໂຕຜູ້ໂຕໜຶ່ງອາຍຸ 3 ປີ ແລະແປ້ງ 1 ເອຟາ* ກັບເຫຼົ້າແວງ 1 ໄຫໃຫຍ່+ໄປເຕັ້ນສັກສິດຂອງພະເຢໂຫວາຢູ່ເມືອງຊີໂລ+ພ້ອມກັບລູກນ້ອຍຂອງລາວ. 25 ຈາກນັ້ນ ເຂົາເຈົ້າກໍຂ້າງົວ ແລ້ວພາຊາມູເອນໄປຫາເອລີ. 26 ຮັນນາເວົ້າວ່າ: “ທ່ານເອີ້ຍ ຂ້ອຍຂໍຢືນຢັນກັບທ່ານວ່າ ຂ້ອຍແມ່ນຜູ້ຍິງທີ່ມາອະທິດຖານຫາພະເຢໂຫວາຢູ່ນີ້+ແລະເຄີຍຢືນຢູ່ບ່ອນນີ້ກັບທ່ານ. 27 ຕອນນັ້ນ ຂ້ອຍໄດ້ອະທິດຖານຂໍລູກຜູ້ນີ້ ແລະພະເຢໂຫວາກໍໄດ້ໃຫ້ຕາມທີ່ຂ້ອຍຂໍ.+ 28 ຂ້ອຍຈຶ່ງພາລາວມາມອບໃຫ້ພະເຢໂຫວາ* ແລະລາວຈະເປັນຂອງພະເຢໂຫວາຕະຫຼອດຊີວິດຂອງລາວ.”
ແລ້ວລາວ*ກໍໝູບໜ້າລົງນະມັດສະການພະເຢໂຫວາຢູ່ຫັ້ນ.