ຈົດໝາຍສະບັບທີສອງເຖິງຄລິດສະຕຽນໃນເມືອງໂກຣິນໂທ
1 ຂ້ອຍໂປໂລເປັນອັກຄະສາວົກ*ຂອງພະຄລິດເຢຊູຕາມທີ່ພະເຈົ້າຕ້ອງການກັບຕີໂມທຽວ+ພີ່ນ້ອງຂອງພວກເຮົາຂຽນຫາປະຊາຄົມຂອງພະເຈົ້າໃນເມືອງໂກຣິນໂທແລະຜູ້ບໍລິສຸດທຸກຄົນທີ່ຢູ່ແຂວງອະຂາຢາ.+
2 ຂໍໃຫ້ພວກເຈົ້າໄດ້ຮັບຄວາມກະລຸນາທີ່ຍິ່ງໃຫຍ່ແລະສັນຕິສຸກຈາກພະເຈົ້າຜູ້ເປັນພໍ່ຂອງພວກເຮົາແລະຈາກພະເຢຊູຄລິດຜູ້ເປັນນາຍ.
3 ຂໍໃຫ້ພະເຈົ້າຜູ້ເປັນພໍ່ຂອງພະເຢຊູຄລິດນາຍຂອງພວກເຮົາໄດ້ຮັບການຍ້ອງຍໍສັນລະເສີນ.+ ເພິ່ນເປັນພໍ່ທີ່ມີຄວາມເມດຕາ+ແລະເປັນພະເຈົ້າທີ່ໃຫ້ກຳລັງໃຈໃນທຸກສະຖານະການ.+ 4 ພະເຈົ້າໃຫ້ກຳລັງໃຈພວກເຮົາທຸກເທື່ອທີ່ເຈິຄວາມຍາກລຳບາກ.*+ ຍ້ອນພວກເຮົາໄດ້ຮັບກຳລັງໃຈຈາກພະເຈົ້າ ພວກເຮົາຈຶ່ງຮູ້ວິທີໃຫ້ກຳລັງໃຈຄົນອື່ນ+ທີ່ເຈິຄວາມຍາກລຳບາກທຸກຮູບແບບ.+ 5 ພວກເຮົາທົນທຸກມາຫຼາຍເພື່ອພະຄລິດ+ ແຕ່ພວກເຮົາກໍໄດ້ຮັບກຳລັງໃຈຫຼາຍຄືກັນຜ່ານທາງພະຄລິດ. 6 ການທີ່ພວກເຮົາເຈິຄວາມຍາກລຳບາກເຮັດໃຫ້ພວກເຈົ້າໄດ້ຮັບກຳລັງໃຈແລະຄວາມລອດ. ເມື່ອພວກເຮົາໄດ້ຮັບກຳລັງໃຈ ພວກເຈົ້າກໍໄດ້ຮັບກຳລັງໃຈຄືກັນ. ກຳລັງໃຈນີ້ຈະຊ່ວຍພວກເຈົ້າໃຫ້ອົດທົນກັບຄວາມທຸກລຳບາກແບບດຽວກັບທີ່ພວກເຮົາເຈິ. 7 ພວກເຮົາໝັ້ນໃຈໃນພວກເຈົ້າສະເໝີ ພວກເຮົາຮູ້ວ່າພວກເຈົ້າຕ້ອງທົນທຸກຄືກັບພວກເຮົາ ແລະພວກເຈົ້າກໍໄດ້ຮັບກຳລັງໃຈຄືກັບພວກເຮົາ.+
8 ພີ່ນ້ອງເອີ້ຍ ພວກເຮົາຢາກໃຫ້ພວກເຈົ້າຮູ້ເລື່ອງຄວາມຍາກລຳບາກທີ່ພວກເຮົາເຈິໃນແຂວງອາຊີ.*+ ພວກເຮົາຖືກກົດດັນຢ່າງໜັກເກີນກຳລັງທີ່ພວກເຮົາຈະອົດທົນໄດ້ ຈົນຄິດວ່າຈະຕາຍແທ້ໆ.+ 9 ທີ່ຈິງ ພວກເຮົາຮູ້ສຶກຄືກັບວ່າຖືກຕັດສິນປະຫານຊີວິດແລ້ວ. ເຫດການນັ້ນສອນພວກເຮົາໃຫ້ວາງໃຈໃນພະເຈົ້າ+ຜູ້ປຸກຄົນຕາຍໃຫ້ຟື້ນຄືນມາ ບໍ່ແມ່ນວາງໃຈໃນໂຕເອງ. 10 ພະເຈົ້າໄດ້ຊ່ວຍພວກເຮົາໃຫ້ລອດຕາຍມາແລ້ວ ແລະເພິ່ນຈະຊ່ວຍພວກເຮົາອີກ. ພວກເຮົາໝັ້ນໃຈວ່າເພິ່ນຈະຊ່ວຍພວກເຮົາຕໍ່ໄປ.+ 11 ພວກເຈົ້າກໍຊ່ວຍພວກເຮົາໄດ້ໂດຍອະທິດຖານເພື່ອພວກເຮົາ.+ ຍ້ອນວ່າຖ້າມີຫຼາຍຄົນຂໍເພື່ອພວກເຮົາ ພະເຈົ້າຈະຟັງແລະຊ່ວຍພວກເຮົາ. ຍ້ອນແນວນີ້ ຫຼາຍຄົນຈະຂອບໃຈພະເຈົ້າ.+
12 ເລື່ອງໜຶ່ງທີ່ພວກເຮົາອວດໄດ້ແມ່ນ ໃຈຮູ້ຜິດຮູ້ຖືກບອກພວກເຮົາວ່າເມື່ອຢູ່ກັບຄົນໃນໂລກແລະໂດຍສະເພາະເມື່ອຢູ່ກັບພວກເຈົ້າ ພວກເຮົາປະພຶດໂຕແບບບໍລິສຸດສະອາດແລະດ້ວຍຄວາມຈິງໃຈຕາມທີ່ພະເຈົ້າສອນ. ພວກເຮົາບໍ່ໄດ້ເພິ່ງສະຕິປັນຍາຂອງມະນຸດ+ ແຕ່ເພິ່ງຄວາມກະລຸນາທີ່ຍິ່ງໃຫຍ່ຂອງພະເຈົ້າ. 13 ສິ່ງທີ່ພວກເຮົາຂຽນເຖິງພວກເຈົ້ານັ້ນພວກເຈົ້າອ່ານ*ແລະເຂົ້າໃຈໄດ້ບໍ່ຍາກ ແລະຂ້ອຍຫວັງວ່າພວກເຈົ້າຈະເຂົ້າໃຈແຈ້ງຂຶ້ນເລື້ອຍໆ. 14 ພວກເຈົ້າບາງຄົນກໍເຂົ້າໃຈແລ້ວວ່າ ພວກເຈົ້າອວດເລື່ອງຂອງພວກເຮົາໄດ້ ຄືກັບທີ່ພວກເຮົາຈະອວດເລື່ອງຂອງພວກເຈົ້າໄດ້ຄືກັນໃນວັນຂອງພະເຢຊູຜູ້ເປັນນາຍຂອງພວກເຮົາ.
15 ດ້ວຍຄວາມໝັ້ນໃຈໃນເລື່ອງນີ້ ຂ້ອຍເຄີຍຕັ້ງໃຈໄວ້ວ່າຈະແວ່ໄປຫາພວກເຈົ້າກ່ອນ ເພື່ອພວກເຈົ້າຈະໄດ້ດີໃຈເປັນເທື່ອທີ 2.* 16 ຕອນນັ້ນ ຂ້ອຍຄິດວ່າຈະແວ່ໄປຫາພວກເຈົ້າຕອນໄປແຂວງມາເກໂດເນຍ ແລະຕອນກັບຈາກແຂວງມາເກໂດເນຍຂ້ອຍຈະແວ່ໄປຫາພວກເຈົ້າອີກ ພວກເຈົ້າຈະໄດ້ໄປສົ່ງຂ້ອຍໄລຍະໜຶ່ງຕອນທີ່ຈະໄປແຂວງຢູດາຍ.+ 17 ເມື່ອຂ້ອຍບອກວ່າຊິເຮັດແບບນັ້ນ ຂ້ອຍບໍ່ໄດ້ຖືວ່າເປັນເລື່ອງຫຼິ້ນໆ. ຂ້ອຍບໍ່ຄືຄົນທົ່ວໄປທີ່ມັກເຮັດຕາມໃຈໂຕເອງ. ຂ້ອຍຊິບໍ່ສັນຍາວ່າຊິເຮັດບາງຢ່າງ ແລ້ວຕໍ່ມາກໍບໍ່ເຮັດ. 18 ພວກເຈົ້າໄວ້ໃຈຄຳເວົ້າຂອງພວກເຮົາໄດ້ຄືກັບທີ່ໄວ້ໃຈພະເຈົ້າ. ພວກເຮົາຊິບໍ່ເວົ້າວ່າຊິເຮັດ ແລ້ວນຳຫຼັງກໍເວົ້າວ່າບໍ່ເຮັດ. 19 ພະເຢຊູຄລິດລູກຂອງພະເຈົ້າເຊິ່ງຂ້ອຍກັບຊີລາວານ*ແລະຕີໂມທຽວ+ປະກາດເລື່ອງຂອງເພິ່ນໃຫ້ພວກເຈົ້າຟັງ ເພິ່ນບໍ່ໄດ້ເວົ້າວ່າຊິເຮັດບາງຢ່າງ ແລ້ວກໍປ່ຽນໃຈແລະເວົ້າວ່າຊິບໍ່ເຮັດ ແຕ່ເພິ່ນເຮັດຕາມທີ່ເພິ່ນເວົ້າສະເໝີ. 20 ພະເຢຊູເຮັດໃຫ້ຄຳສັນຍາຂອງພະເຈົ້າທຸກເລື່ອງເກີດຂຶ້ນແທ້.+ ຍ້ອນແນວນັ້ນ ພວກເຮົາຈຶ່ງເວົ້າວ່າ “ອາແມນ”* ເມື່ອອະທິດຖານເຖິງພະເຈົ້າໃນນາມຂອງພະເຢຊູ+ເຊິ່ງເຮັດໃຫ້ພະເຈົ້າໄດ້ຮັບການຍົກຍ້ອງ. 21 ພະເຈົ້າເປັນຜູ້ຮັບຮອງວ່າພວກເຮົາກັບພວກເຈົ້າເປັນຄົນຂອງພະຄລິດ ແລະເພິ່ນເປັນຜູ້ທີ່ເລືອກພວກເຮົາທຸກຄົນ.+ 22 ເພິ່ນຈ້ຳກາໃສ່ພວກເຮົາ+ ແລະເພິ່ນເອົາພະລັງຂອງເພິ່ນ+ໃສ່ໃນຫົວໃຈພວກເຮົາເພື່ອຮັບຮອງ*ວ່າພວກເຮົາຈະໄດ້ລາງວັນ.
23 ພະເຈົ້າຮູ້ດີວ່າຂ້ອຍຍັງບໍ່ໄດ້ໄປເມືອງໂກຣິນໂທກໍຍ້ອນຂ້ອຍບໍ່ຢາກໃຫ້ພວກເຈົ້າເສຍໃຈຫຼາຍກວ່ານີ້. 24 ພວກເຮົາບໍ່ແມ່ນນາຍທີ່ຈະຄວບຄຸມຄວາມເຊື່ອຂອງພວກເຈົ້າ+ ແຕ່ເປັນໝູ່ເຮັດວຽກນຳກັນທີ່ຢາກໃຫ້ພວກເຈົ້າມີຄວາມສຸກ. ພວກເຈົ້າໝັ້ນຄົງຢູ່ໄດ້ກໍຍ້ອນຄວາມເຊື່ອຂອງພວກເຈົ້າເອງ.