ບົດທີ 68
ເອລີຊາເບັດມີລູກ
ຜ່ານມາຫຼາຍກວ່າ 400 ປີແລ້ວຫຼັງຈາກມີການສ້າງກຳແພງເມືອງເຢຣູຊາເລັມຂຶ້ນໃໝ່. ປະໂລຫິດທີ່ຊື່ເຊຄາຣີຢາກັບເອລີຊາເບັດເມຍຂອງລາວອາໄສຢູ່ໃກ້ເມືອງເຢຣູຊາເລັມ. ເຂົາເຈົ້າແຕ່ງດອງກັນມາບັກຫຼາຍໆປີ ແຕ່ກໍບໍ່ມີລູກ. ມີມື້ໜຶ່ງຕອນທີ່ເຊຄາຣີຢາກຳລັງເຜົາເຄື່ອງຫອມໃນວິຫານ ທູດສະຫວັນຄັບຣີເອນກໍມາຫາລາວ ລາວຕົກໃຈແລະຢ້ານຫຼາຍ. ແຕ່ຄັບຣີເອນບອກລາວວ່າ: ‘ບໍ່ຕ້ອງຢ້ານ. ພະເຢໂຫວາໃຫ້ຂ້ອຍມາບອກຂ່າວດີກັບເຈົ້າ. ເອລີຊາເບັດເມຍຂອງເຈົ້າຈະໄດ້ລູກຊາຍແລະໃຫ້ຕັ້ງຊື່ວ່າໂຢຮັນ. ພະເຢໂຫວາເລືອກໂຢຮັນໃຫ້ເຮັດວຽກພິເສດຢ່າງໜຶ່ງ.’ ເຊຄາຣີຢາຖາມວ່າ: ‘ຂ້ອຍຈະເຊື່ອເຈົ້າໄດ້ແນວໃດ? ຂ້ອຍກັບເມຍກໍເຖົ້າຫຼາຍແລ້ວ ມີລູກບໍ່ໄດ້ດອກ.’ ຄັບຣີເອນບອກວ່າ: ‘ພະເຈົ້າໃຊ້ຂ້ອຍມາບອກຂ່າວນີ້ ແຕ່ເຈົ້າພັດບໍ່ເຊື່ອ. ຍ້ອນແນວນີ້ ເຈົ້າຈະເວົ້າບໍ່ໄດ້ຈົນກວ່າລູກເຈົ້າຈະເກີດ.’
ເຊຄາຣີຢາຢູ່ໃນວິຫານດົນກວ່າປົກກະຕິ. ເມື່ອລາວອອກມາ ຄົນທີ່ຖ້າຢູ່ທາງນອກກໍຢາກຮູ້ວ່າມີຫຍັງເກີດຂຶ້ນ. ແຕ່ເຊຄາຣີຢາເວົ້າບໍ່ໄດ້. ລາວມີແຕ່ເຮັດທ່າທາງບອກເຂົາເຈົ້າ. ແລ້ວປະຊາຊົນກໍຮູ້ວ່າລາວໄດ້ຮັບຂ່າວສານຈາກພະເຈົ້າ.
ຕໍ່ມາ ເອລີຊາເບັດກໍຖືພາແລະເກີດລູກຊາຍຄືກັບທີ່ທູດສະຫວັນບອກ. ໝູ່ແລະຍາດຕິພີ່ນ້ອງຂອງລາວກໍມາເບິ່ງແອນ້ອຍນັ້ນ. ທຸກຄົນດີໃຈນຳລາວຫຼາຍ. ເອລີຊາເບັດບອກວ່າ: ‘ຂ້ອຍຕັ້ງຊື່ລູກວ່າໂຢຮັນ’ ແຕ່ຄົນທີ່ມາຢາມເວົ້າວ່າ: ‘ຍາດຕິພີ່ນ້ອງຂອງເຈົ້າບໍ່ມີຜູ້ໃດຊື່ໂຢຮັນໄດ໋. ຕັ້ງຊື່ແອນ້ອຍວ່າເຊຄາຣີຢາຄືກັບຊື່ພໍ່ຂອງລາວເລີຍ.’ ແຕ່ເຊຄາຣີຢາຂຽນໃສ່ແຜ່ນກະດານວ່າ: ‘ຊື່ໂຢຮັນ.’ ທັນໃດນັ້ນ ເຊຄາຣີຢາກໍເວົ້າໄດ້ອີກເທື່ອໜຶ່ງ! ແລ້ວເລື່ອງຂອງແອນ້ອຍຄົນນີ້ກໍຖືກຊ່າລືກັນໄປທົ່ວແຂວງຢູດາຍ. ມີຫຼາຍຄົນສົງໄສວ່າ: ‘ເມື່ອແອນ້ອຍຄົນນີ້ໃຫຍ່ຂຶ້ນ ລາວຈະເປັນແນວໃດນໍ້?’
ຈາກນັ້ນ ເຊຄາຣີຢາກໍໄດ້ຮັບພະລັງບໍລິສຸດແລະພະຍາກອນວ່າ: ‘ຂໍໃຫ້ພະເຢໂຫວາໄດ້ຮັບການສັນລະເສີນ. ເພິ່ນສັນຍາກັບອັບຣາຮາມວ່າຈະສົ່ງເມຊີອາຜູ້ຊ່ວຍໃຫ້ລອດມາຊ່ວຍພວກເຮົາ. ໂຢຮັນຈະເປັນຜູ້ພະຍາກອນແລະຈະກຽມທາງໄວ້ໃຫ້ເມຊີອາ.’
ມີເລື່ອງອັດສະຈັນເກີດຂຶ້ນກັບມາຣິອາທີ່ເປັນພີ່ນ້ອງຂອງເອລີຊາເບັດຄືກັນ. ເຮົາຈະມາເບິ່ງເລື່ອງນີ້ໃນບົດຕໍ່ໄປ.
“ມະນຸດເຮັດບໍ່ໄດ້ ແຕ່ພະເຈົ້າເຮັດໄດ້ທຸກຢ່າງ.”—ມັດທາຍ 19:26