ບົດຄວາມສຶກສາທີ 11
ເພງທີ 129 ເຮົາຈະອົດທົນຕໍ່ໄປ
ເຈົ້າສາມາດຮັບໃຊ້ພະເຢໂຫວາຕໍ່ໆໄປໄດ້ເຖິງວ່າຈະຜິດຫວັງ
“ເຈົ້າອົດທົນຕໍ່ຄວາມລຳບາກຕ່າງໆເພື່ອເຫັນແກ່ຊື່ຂອງຂ້ອຍ.”—ພນມ. 2:3
ຈຸດສຳຄັນ
ເຮົາຮັບໃຊ້ພະເຢໂຫວາຕໍ່ໆໄປໄດ້ເຖິງຈະເຈິເລື່ອງທີ່ເຮັດໃຫ້ຜິດຫວັງ.
1. ເຮົາໄດ້ຮັບສິ່ງດີໆຫຍັງແດ່ເມື່ອຢູ່ໃນອົງການຂອງພະເຢໂຫວາ?
ພວກເຮົາດີໃຈຫຼາຍແທ້ໆທີ່ໄດ້ຢູ່ໃນອົງການຂອງພະເຢໂຫວາໃນສະໄໝສຸດທ້າຍທີ່ຫຍຸ້ງຍາກລຳບາກນີ້. ເຖິງວ່າໂລກນີ້ໂຫດຮ້າຍຂຶ້ນເລື້ອຍໆ ແຕ່ພະເຢໂຫວາໄດ້ໃຫ້ເຮົາມີພີ່ນ້ອງທີ່ເປັນຄືກັບຄອບຄົວຂອງເຮົາ. (ພສ. 133:1) ເພິ່ນຊ່ວຍເຮົາໃຫ້ມີຊີວິດຄອບຄົວທີ່ມີຄວາມສຸກ. (ອຟຊ. 5:33–6:1) ນອກຈາກນັ້ນ ເພິ່ນຍັງໃຫ້ເຮົາມີສະຕິປັນຍາແລະຄວາມເຂົ້າໃຈເພື່ອຊ່ວຍເຮົາໃຫ້ມີຄວາມສະຫງົບໃຈ.
2. ເຮົາຕ້ອງເຮັດຫຍັງ? ແລະຍ້ອນຫຍັງ?
2 ເຮົາຕ້ອງພະຍາຍາມຫຼາຍແທ້ໆເພື່ອຈະຮັບໃຊ້ພະເຢໂຫວາຢ່າງສັດຊື່ຕໍ່ໆໄປ. ຍ້ອນຫຍັງ? ຍ້ອນວ່າບາງເທື່ອເຮົາອາດຮູ້ສຶກບໍ່ດີກັບສິ່ງທີ່ຄົນອື່ນເວົ້າແລະເຮັດ ແລະເຮົາອາດຜິດຫວັງກັບໂຕເອງທີ່ເຮັດຜິດຕະຫຼອດ. ເຮົາຕ້ອງອົດທົນຮັບໃຊ້ພະເຢໂຫວາຕໍ່ໆໄປ (1) ເມື່ອພີ່ນ້ອງເຮັດໃຫ້ເຮົາຜິດຫວັງ (2) ເມື່ອຄູ່ຂອງເຮົາເຮັດໃຫ້ເຮົາຜິດຫວັງ ແລະ (3) ເມື່ອເຮົາຜິດຫວັງກັບໂຕເອງ. ໃນບົດຄວາມນີ້ເຮົາຈະເບິ່ງກ່ຽວກັບ 3 ຈຸດນີ້ ແລະຈະເບິ່ງວ່າເຮົາຈະຮຽນຫຍັງຈາກຕົວຢ່າງຂອງຜູ້ຮັບໃຊ້ຂອງພະເຢໂຫວາໃນສະໄໝທີ່ຂຽນຄຳພີໄບເບິນ.
ໃຫ້ອົດທົນເມື່ອພີ່ນ້ອງເຮັດໃຫ້ເຈົ້າຜິດຫວັງ
3. ຜູ້ຮັບໃຊ້ຂອງພະເຢໂຫວາເຈິບັນຫາຫຍັງແດ່?
3 ບັນຫາ. ພີ່ນ້ອງບາງຄົນອາດຈະມີນິດໄສບາງຢ່າງທີ່ເຮົາບໍ່ມັກ. ບາງຄົນອາດເຮັດໃຫ້ເຮົາເສຍໃຈຫຼືເວົ້າແບບບໍ່ຄິດ ຫຼືເຮັດບໍ່ດີກັບເຮົາ. ພີ່ນ້ອງທີ່ນຳໜ້າໃນອົງການອາດເຮັດຜິດພາດ. ເມື່ອເຫັນແບບນີ້ ບາງຄົນອາດສົງໄສວ່ານີ້ແມ່ນອົງການຂອງພະເຈົ້າແທ້ໆບໍ? ແທນທີ່ຈະຮັບໃຊ້ “ຄຽງບ່າຄຽງໄຫຼ່” ກັບພີ່ນ້ອງຕໍ່ໆໄປ ເຂົາເຈົ້າອາດບໍ່ຢາກລົມກັບຄົນທີ່ເຮັດໃຫ້ເຂົາເຈົ້າເສຍໃຈ ຫຼືເຂົາເຈົ້າອາດເຖິງຂັ້ນເຊົາໄປປະຊຸມຊ້ຳ. (ຊຟຢ. 3:9) ການເຮັດແບບນີ້ສະຫຼາດບໍ? ໃຫ້ເບິ່ງວ່າເຮົາຈະຮຽນຫຍັງຈາກເລື່ອງຂອງຄົນທີ່ຢູ່ໃນຄຳພີໄບເບິນທີ່ເຈິບັນຫາຄ້າຍຄືກັນນີ້.
4. ໂປໂລເຈິເລື່ອງຫຍັງແດ່?
4 ຕົວຢ່າງໃນຄຳພີໄບເບິນ. ໂປໂລຮູ້ວ່າພີ່ນ້ອງເປັນຄົນບໍ່ສົມບູນແບບ. ຕົວຢ່າງເຊັ່ນ: ຕອນທີ່ລາວໄປປະຊາຄົມຢູ່ເມືອງເຢຣູຊາເລັມ ພີ່ນ້ອງບາງຄົນບໍ່ເຊື່ອວ່າລາວເຂົ້າມາເປັນລູກສິດແທ້ໆ. (ກຈກ. 9:26) ຕໍ່ມາ ມີບາງຄົນເວົ້າບໍ່ດີລັບຫຼັງໂປໂລແລະເຮັດໃຫ້ລາວເສຍຊື່ສຽງ. (2ກຣ. 10:10) ໂປໂລຍັງເຫັນຜູ້ເບິ່ງແຍງເຮັດສິ່ງທີ່ບໍ່ຖືກຕ້ອງ ເຊິ່ງອາດເຮັດໃຫ້ພີ່ນ້ອງບາງຄົນບໍ່ສະບາຍໃຈ. (ຄລຕ. 2:11, 12) ມາຣະໂກທີ່ເປັນໝູ່ສະໜິດຂອງໂປໂລເຮັດໃຫ້ລາວເສຍໃຈແລະຜິດຫວັງຫຼາຍ. (ກຈກ. 15:37, 38) ເລື່ອງທັງໝົດນີ້ອາດເຮັດໃຫ້ໂປໂລບໍ່ຢາກຄົບຫາກັບພີ່ນ້ອງເຫຼົ່ານີ້ ແຕ່ລາວບໍ່ໄດ້ເຮັດແບບນັ້ນ. ລາວເບິ່ງພີ່ນ້ອງໃນແງ່ດີແລະຍັງຮັບໃຊ້ພະເຢໂຫວາຢ່າງກະຕືລືລົ້ນຕໍ່ໆໄປ. ອັນໃດຊ່ວຍໂປໂລໃຫ້ເຮັດແບບນັ້ນ?
5. ອັນໃດຊ່ວຍໂປໂລບໍ່ໃຫ້ໝົດຫວັງໃນໂຕພີ່ນ້ອງ? (ໂກໂລຊາຍ 3:13, 14) (ເບິ່ງຮູບນຳ)
5 ໂປໂລຮັກພີ່ນ້ອງຫຼາຍ ລາວຈຶ່ງສົນໃຈແຕ່ຈຸດດີຂອງເຂົາເຈົ້າແລະເບິ່ງຂ້າມຄວາມບໍ່ສົມບູນແບບຂອງເຂົາເຈົ້າ. ນອກຈາກນັ້ນ ຄວາມຮັກຍັງຊ່ວຍໂປໂລໃຫ້ເຮັດຕາມສິ່ງທີ່ລາວຂຽນໄວ້ໃນໂກໂລຊາຍ 3:13, 14. (ອ່ານ) ໃຫ້ເຮົາເບິ່ງວ່າໂປໂລໃຫ້ອະໄພມາຣະໂກແນວໃດ. ເຖິງວ່າມາຣະໂກໜີປະໂປໂລຕອນທີ່ລາວເດີນທາງໄປປະກາດຮອບທຳອິດ ແຕ່ໂປໂລບໍ່ໄດ້ເກັບຄວາມຄຽດໄວ້. ຕໍ່ມາ ຕອນທີ່ໂປໂລຂຽນຈົດໝາຍໄປຫາປະຊາຄົມຢູ່ເມືອງໂກໂລຊາຍ ລາວຍ້ອງມາຣະໂກວ່າເປັນໝູ່ທີ່ດີທີ່ “ໃຫ້ກຳລັງໃຈ [ລາວ] ຫຼາຍ.” (ກລຊ. 4:10, 11) ຕອນທີ່ຖືກກັກບໍລິເວນໃຫ້ຢູ່ແຕ່ໃນເຮືອນໃນເມືອງໂຣມ ໂປໂລຂຽນແບບເຈາະຈົງໃນຈົດໝາຍວ່າໃຫ້ພາມາຣະໂກມານຳຍ້ອນລາວຊ່ວຍໂປໂລໄດ້. (2ຕມ. 4:11) ເຫັນໄດ້ແຈ້ງວ່າໂປໂລບໍ່ໄດ້ໝົດຫວັງໃນໂຕພີ່ນ້ອງ. ເຮົາຮຽນຫຍັງຈາກໂປໂລ?
ເຖິງວ່າໂປໂລມີບັນຫາກັບບາຣະນາບາແລະມາຣະໂກ ແຕ່ໂປໂລບໍ່ໄດ້ເກັບຄວາມຄຽດໄວ້. ຕໍ່ມາ ເຂົາເຈົ້າຮັບໃຊ້ນຳກັນຢ່າງມີຄວາມສຸກ. (ເບິ່ງຂໍ້ 5)
6-7. ອັນໃດຈະຊ່ວຍເຮົາໃຫ້ຮັກພີ່ນ້ອງຕໍ່ໆໄປເຖິງວ່າເຂົາເຈົ້າຈະບໍ່ສົມບູນແບບ? (1 ໂຢຮັນ 4:7)
6 ບົດຮຽນ. ພະເຢໂຫວາຢາກໃຫ້ເຮົາສະແດງຄວາມຮັກຕໍ່ພີ່ນ້ອງຕໍ່ໆໄປ. (ອ່ານ 1 ໂຢຮັນ 4:7) ຖ້າພີ່ນ້ອງບາງຄົນເຮັດໃຫ້ເຮົາເສຍໃຈ ເຮົາຄວນຄິດວ່າລາວອາດບໍ່ໄດ້ຕັ້ງໃຈເຮັດໃຫ້ເຮົາເຈັບ ແລະລາວເອງກໍກຳລັງພະຍາຍາມເຮັດສິ່ງທີ່ພະເຢໂຫວາເບິ່ງວ່າຖືກຕ້ອງ. (ສພສ. 12:18) ພະເຢໂຫວາຮັກຜູ້ຮັບໃຊ້ຂອງເພິ່ນທຸກຄົນເຖິງວ່າເຂົາເຈົ້າມີຂໍ້ບົກພ່ອງ. ເມື່ອເຮົາເຮັດຜິດ ພະເຢໂຫວາບໍ່ໄດ້ຖິ້ມເຮົາຫຼືບໍ່ໄດ້ຄຽດໃຫ້ເຮົາຕະຫຼອດໄປ. (ພສ. 103:9) ເປັນເລື່ອງສຳຄັນແທ້ໆທີ່ເຮົາຈະຮຽນແບບພະເຢໂຫວາພະເຈົ້າທີ່ໃຫ້ອະໄພ!—ອຟຊ. 4:32–5:1
7 ໃຫ້ຈື່ໄວ້ວ່າແຮ່ງຈຸດຈົບຂອງໂລກນີ້ໃກ້ເຂົ້າມາ ເຮົາກໍແຮ່ງຕ້ອງສະໜິດກັບພີ່ນ້ອງຫຼາຍຂຶ້ນ. ເຮົາຄາດໝາຍໄດ້ເລີຍວ່າການຂົ່ມເຫງຈະຮຸນແຮງຂຶ້ນເລື້ອຍໆ. ເຮົາອາດເຖິງຂັ້ນຕ້ອງຕິດຄຸກຍ້ອນຄວາມເຊື່ອ. ຖ້າເປັນແບບນັ້ນ ເຮົາຈະຕ້ອງການພີ່ນ້ອງຫຼາຍກວ່າທີ່ຜ່ານມາ. (ສພສ. 17:17) ໃຫ້ເຮົາເບິ່ງສິ່ງທີ່ເກີດຂຶ້ນກັບໂຈເຊັບaທີ່ເປັນຜູ້ເບິ່ງແຍງຢູ່ແອັດສະປາຍ. ລາວກັບພີ່ນ້ອງຊາຍບາງຄົນຕ້ອງຕິດຄຸກຍ້ອນບໍ່ຍອມເປັນທະຫານ. ໂຈເຊັບເວົ້າວ່າ: “ພວກເຮົາຢູ່ໃນຄຸກນຳກັນຕະຫຼອດເວລາ. ບາງເທື່ອພີ່ນ້ອງອາດເຮັດໃຫ້ເຮົາຮູ້ສຶກລຳຄານ ແຕ່ເຮົາຕ້ອງອົດທົນຕໍ່ກັນແລະກັນແລະໃຫ້ອະໄພກັນສະເໝີ. ການເຮັດແບບນີ້ຊ່ວຍເຮົາໃຫ້ສະໜິດກັນ. ພວກເຮົາປົກປ້ອງກັນຈາກນັກໂທດຄົນອື່ນທີ່ບໍ່ແມ່ນພະຍານພະເຢໂຫວາ. ມີເທື່ອໜຶ່ງຂ້ອຍເຈັບແຂນແລະຕ້ອງເອົາຜ້າພັນບາດພັນໄວ້ ຂ້ອຍຈຶ່ງເຮັດຫຍັງບໍ່ໄດ້ເລີຍ. ແຕ່ພີ່ນ້ອງຊາຍຄົນໜຶ່ງຊັກເຄື່ອງໃຫ້ຂ້ອຍແລະຊ່ວຍຂ້ອຍຫຼາຍຢ່າງ. ຂ້ອຍເຫັນເລີຍວ່າຕອນທີ່ຂ້ອຍຕ້ອງການຄວາມຊ່ວຍເຫຼືອຫຼາຍທີ່ສຸດ ພີ່ນ້ອງກໍສະແດງຄວາມຮັກແລະເບິ່ງແຍງຂ້ອຍ.” ເປັນສິ່ງທີ່ດີແທ້ໆທີ່ເຮົາຕ້ອງສະແດງຄວາມຮັກແລະໃຫ້ອະໄພພີ່ນ້ອງຕັ້ງແຕ່ຕອນນີ້!
ໃຫ້ອົດທົນເມື່ອຄູ່ຂອງເຈົ້າເຮັດໃຫ້ເຈົ້າຜິດຫວັງ
8. ຜົວກັບເມຍເຈິບັນຫາຫຍັງແດ່?
8 ບັນຫາ. ຄົນທີ່ແຕ່ງດອງແລ້ວຈະເຈິບັນຫາ ຍ້ອນຄຳພີໄບເບິນບອກວ່າຄົນທີ່ແຕ່ງດອງແລ້ວຈະມີ “ຄວາມຫຍຸ້ງຍາກໃນຊີວິດ.” (1ກຣ. 7:28) ເປັນຫຍັງຈຶ່ງເວົ້າແນວນັ້ນ? ຍ້ອນທັງຜົວແລະເມຍເປັນຄົນບໍ່ສົມບູນແບບ ມີນິດໄສຕ່າງກັນ ແລະມັກບໍ່ຄືກັນ. ບາງຄູ່ອາດມີເຊື້ອຊາດ ວັດທະນະທຳ ແລະພູມຫຼັງທີ່ແຕກຕ່າງກັນ. ເມື່ອເວລາຜ່ານໄປ ແຕ່ລະຄົນອາດສະແດງນິດໄສບາງຢ່າງອອກມາເຊິ່ງກ່ອນແຕ່ງດອງບໍ່ເຄີຍເຫັນ ແລະນິດໄສບາງຢ່າງກໍອາດເຮັດໃຫ້ເຂົາເຈົ້າເຖິງຂັ້ນຜິດກັນ. ແທນທີ່ແຕ່ລະຄົນຈະພະຍາຍາມຊ່ວຍກັນແກ້ໄຂບັນຫາ ເຂົາເຈົ້າພັດໂທດກັນໄປໂທດກັນມາທັງໆທີ່ທັງສອງກໍຜິດຄືກັນ. ບາງຄູ່ອາດເຖິງຂັ້ນຄິດວ່າການແຍກກັນຢູ່ຫຼືປະກັນເປັນທາງອອກທີ່ດີ. ແຕ່ການເຮັດແບບນີ້ຊ່ວຍເຂົາເຈົ້າໃຫ້ແກ້ບັນຫາໄດ້ແທ້ໆບໍ?b ຄຳພີໄບເບິນມີຕົວຢ່າງຂອງຜູ້ໜຶ່ງທີ່ອົດທົນກັບບັນຫາທີ່ໜັກໆໃນຊີວິດຄູ່. ໃຫ້ເຮົາມາເບິ່ງນຳກັນ.
9. ອາບີກາຍເຈິບັນຫາຫຍັງ?
9 ຕົວຢ່າງໃນຄຳພີໄບເບິນ. ອາບີກາຍແຕ່ງດອງກັບນາບານ. ຄຳພີໄບເບິນບອກວ່ານາບານເປັນຄົນຫຍາບຄາຍແລະນິດໄສບໍ່ດີ. (1ຊມ. 25:3) ອາບີກາຍຄືຊິທຸກໃຈຫຼາຍທີ່ຕ້ອງຢູ່ກັບຜູ້ຊາຍແບບນີ້. ລາວມີໂອກາດທີ່ຈະເຮັດໃຫ້ຊີວິດຄູ່ຈົບລົງບໍ? ມີແທ້. ລາວສາມາດເຮັດແບບນັ້ນໄດ້ຕອນທີ່ດາວິດກະສັດຂອງຊາດອິດສະຣາເອນໃນອະນາຄົດຕັດສິນໃຈວ່າຈະຂ້ານາບານ ຍ້ອນນາບານດູຖູກດາວິດກັບຄົນຂອງລາວ. (1ຊມ. 25:9-13) ທີ່ຈິງ ອາບີກາຍຈະໜີໄປແລະປ່ອຍໃຫ້ດາວິດຂ້ານາບານກໍໄດ້ ແຕ່ລາວບໍ່ໄດ້ເຮັດແບບນັ້ນ. ລາວໄດ້ຂໍຮ້ອງດາວິດບໍ່ໃຫ້ຂ້ານາບານ. (1ຊມ. 25:23-27) ເປັນຫຍັງລາວຈຶ່ງເຮັດແບບນັ້ນ?
10. ເປັນຫຍັງອາບີກາຍຈຶ່ງອົດທົນເຖິງວ່າຊີວິດຄູ່ຂອງລາວມີບັນຫາ?
10 ອາບີກາຍຮັກພະເຢໂຫວາແລະນັບຖືການຈັດກຽມເລື່ອງຊີວິດຄູ່. (ປຖກ. 2:24) ລາວຮູ້ວ່າພະເຢໂຫວາເວົ້າແນວໃດຕອນທີ່ເພິ່ນໃຫ້ອາດາມກັບເອວາມະນຸດຄູ່ທຳອິດແຕ່ງດອງກັນ. ລາວຮູ້ວ່າພະເຢໂຫວາຖືວ່າການແຕ່ງດອງເປັນການຈັດກຽມທີ່ສັກສິດ. ອາບີກາຍຢາກໃຫ້ພະເຢໂຫວາພໍໃຈ ລາວຈຶ່ງພະຍາຍາມເຮັດທຸກສິ່ງທີ່ເຮັດໄດ້ເພື່ອປົກປ້ອງຄົນໃນຄອບຄົວລວມທັງຜົວຂອງລາວນຳ. ອາບີກາຍຟ້າວໄປຫ້າມດາວິດບໍ່ໃຫ້ຂ້ານາບານແລະເຕັມໃຈຂໍໂທດແທນຜົວທັງໆທີ່ບໍ່ແມ່ນຄວາມຜິດຂອງລາວ. ເຮົາເຫັນເລີຍວ່າພະເຢໂຫວາຮັກອາບີກາຍທີ່ເປັນຄົນກ້າຫານແລະບໍ່ເຫັນແກ່ໂຕ. ຜົວກັບເມຍໄດ້ບົດຮຽນຫຍັງຈາກຕົວຢ່າງຂອງອາບີກາຍ?
11. (ກ) ພະເຢໂຫວາຢາກໃຫ້ຜົວກັບເມຍເຮັດຫຍັງ? (ເອເຟໂຊ 5:33) (ຂ) ເຈົ້າໄດ້ຮຽນຫຍັງຈາກເລື່ອງຂອງຄາເມນ? (ເບິ່ງຮູບນຳ)
11 ບົດຮຽນ. ພະເຢໂຫວາຢາກໃຫ້ຜົວກັບເມຍນັບຖືການຈັດກຽມເລື່ອງຊີວິດຄູ່ ເຖິງວ່າຄູ່ຂອງເຂົາເຈົ້າຈະເປັນຄົນທີ່ຢູ່ນຳຍາກ. ພະເຢໂຫວາຕ້ອງມີຄວາມສຸກຫຼາຍແທ້ໆເມື່ອເຫັນຜົວກັບເມຍພະຍາຍາມແກ້ບັນຫາ ສະແດງຄວາມຮັກແບບບໍ່ເຫັນແກ່ໂຕ ແລະນັບຖືກັນ. (ອ່ານເອເຟໂຊ 5:33) ຂໍໃຫ້ເບິ່ງເລື່ອງຂອງຄາເມນ. ຫຼັງຈາກແຕ່ງດອງໄດ້ 6 ປີ ຄາເມນເລີ່ມຮຽນຄຳພີໄບເບິນກັບພະຍານພະເຢໂຫວາແລະຫຼັງຈາກນັ້ນກໍຮັບບັບເຕມາ. ລາວເລົ່າວ່າ: “ຜົວຂອງຂ້ອຍບໍ່ມັກທີ່ຂ້ອຍຕັດສິນໃຈແບບນີ້. ລາວໃຈຮ້າຍຫຼາຍຍ້ອນຂ້ອຍຕັ້ງໃຈຮັບໃຊ້ພະເຢໂຫວາແລະຕ້ອງໄປປະຊຸມຈຶ່ງບໍ່ໄດ້ໃຊ້ເວລານັ້ນກັບລາວ. ລາວດ່າຂ້ອຍແລະຂູ່ວ່າຈະຖິ້ມຂ້ອຍ.” ເຖິງຈະເປັນແນວນັ້ນ ຄາເມນກໍອົດທົນແລະພະຍາຍາມຮັກສາຊີວິດຄູ່ໄວ້. ເປັນເວລາ 50 ປີທີ່ຄາເມນສະແດງຄວາມຮັກແລະນັບຖືຜົວສະເໝີ. ລາວເລົ່າຕໍ່ວ່າ: “ເມື່ອເວລາຜ່ານໄປ ຂ້ອຍພະຍາຍາມຫຼາຍຂຶ້ນທີ່ຈະເຂົ້າໃຈຄວາມຮູ້ສຶກຂອງຜົວແລະເວົ້າດີໆກັບລາວ. ຂ້ອຍຮູ້ວ່າພະເຢໂຫວາຖືວ່າການແຕ່ງດອງເປັນການຈັດກຽມທີ່ສັກສິດ. ຂ້ອຍຈຶ່ງພະຍາຍາມເຮັດທຸກສິ່ງທີ່ເຮັດໄດ້ເພື່ອຮັກສາຊີວິດຄູ່ໄວ້. ຂ້ອຍອົດທົນກັບຊີວິດຄູ່ໄດ້ຍ້ອນຂ້ອຍຮັກພະເຢໂຫວາ.”c ຖ້າເຈົ້າມີບັນຫາໃນຊີວິດຄູ່ ໃຫ້ໝັ້ນໃຈວ່າພະເຢໂຫວາຈະຊ່ວຍເຈົ້າໃຫ້ອົດທົນໄດ້.
ອາບີກາຍເຮັດທຸກສິ່ງທີ່ເຮັດໄດ້ເພື່ອປົກປ້ອງຄົນໃນຄອບຄົວ. ເຮົາຮຽນຫຍັງຈາກເລື່ອງນີ້? (ເບິ່ງຂໍ້ 11)
ໃຫ້ອົດທົນເມື່ອຜິດຫວັງກັບໂຕເອງ
12. ເມື່ອເຮົາເຮັດຜິດຮ້າຍແຮງ ເຮົາອາດຮູ້ສຶກແນວໃດ?
12 ບັນຫາ. ເມື່ອເຮົາເຮັດຜິດຮ້າຍແຮງ ເຮົາອາດຮູ້ສຶກທໍ້ໃຈຫຼາຍຈົນຄິດວ່າໂຕເອງບໍ່ມີຄ່າ. ຄຳພີໄບເບິນຍອມຮັບວ່າເມື່ອເຮົາເຮັດຜິດ ເຮົາຮູ້ສຶກ “ເຈັບປວດໃຈ.” (ພສ. 51:17) ພີ່ນ້ອງຊາຍຄົນໜຶ່ງຊື່ໂຣເບີດພະຍາຍາມຫຼາຍປີຈົນມີຄຸນສົມບັດໄດ້ເປັນຜູ້ຊ່ວຍວຽກຮັບໃຊ້. ແຕ່ເມື່ອເຮັດຜິດຮ້າຍແຮງ ລາວກໍຮູ້ສຶກວ່າລາວໄດ້ທໍລະຍົດພະເຢໂຫວາ. ລາວເວົ້າວ່າ: “ໃຈຮູ້ຜິດຮູ້ຖືກຕີຂ້ອຍແຮງຫຼາຍ ແລ້ວຈາກນັ້ນຂ້ອຍກໍເສຍໃຈຫຼາຍ. ຂ້ອຍອະທິດຖານຫາພະເຢໂຫວາແລະທັງຮ້ອງໄຫ້ໄປນຳ. ຂ້ອຍຈື່ໄດ້ວ່າຕອນນັ້ນຂ້ອຍຄິດວ່າພະເຢໂຫວາຄືຊິບໍ່ຟັງຄຳອະທິດຖານຂອງຂ້ອຍອີກແລ້ວຍ້ອນຂ້ອຍເຮັດໃຫ້ເພິ່ນຜິດຫວັງ.” ເມື່ອເຮົາເຮັດຜິດຮ້າຍແຮງ ເຮົາອາດຮູ້ສຶກເສຍໃຈຫຼາຍຈົນຄິດວ່າພະເຢໂຫວາບໍ່ສົນໃຈເຮົາແລ້ວແລະເຮົາຄືຊິບໍ່ມີທາງຮັບໃຊ້ເພິ່ນໄດ້ອີກຕໍ່ໄປ. (ພສ. 38:4) ຖ້າເຈົ້າເຄີຍຮູ້ສຶກແບບນັ້ນ ໃຫ້ເບິ່ງເລື່ອງຂອງຄົນທີ່ຢູ່ໃນຄຳພີໄບເບິນທີ່ອົດທົນຮັບໃຊ້ພະເຢໂຫວາຕໍ່ໆໄປເຖິງວ່າເຄີຍເຮັດຜິດຮ້າຍແຮງ.
13. ເປໂຕເຮັດຜິດພາດເລື່ອງຫຍັງແດ່? ແລະຄວາມຜິດຮ້າຍແຮງທີ່ສຸດທີ່ລາວເຮັດແມ່ນຫຍັງ?
13 ຕົວຢ່າງໃນຄຳພີໄບເບິນ. ໃນຄືນກ່ອນທີ່ພະເຢຊູຈະຖືກປະຫານ ເປໂຕໄດ້ເຮັດຜິດພາດຫຼາຍເລື່ອງຈຶ່ງເຮັດໃຫ້ລາວເຮັດຜິດຮ້າຍແຮງທີ່ສຸດໃນຊີວິດ. ທຳອິດ ເປໂຕໝັ້ນໃຈໃນໂຕເອງຫຼາຍເກີນໄປ ລາວເວົ້າອວດວ່າເຖິງວ່າພວກອັກຄະສາວົກຄົນອື່ນຈະຖິ້ມພະເຢຊູໄປໝົດ ແຕ່ລາວຊິບໍ່ເຮັດແບບນັ້ນ. (ມຣກ. 14:27-29) ຕໍ່ມາ ຕອນທີ່ຢູ່ສວນເຄັດເຊມາເນ ພະເຢຊູບອກເປໂຕໃຫ້ເຝົ້າລະວັງ ແຕ່ລາວກໍບໍ່ໄດ້ເຮັດ. (ມຣກ. 14:32, 37-41) ຈາກນັ້ນ ຕອນທີ່ມີຄົນກຸ່ມໃຫຍ່ມາຈັບພະເຢຊູ ເປໂຕໄດ້ໜີປະເພິ່ນ. (ມຣກ. 14:50) ໃນທີ່ສຸດ ເປໂຕກໍປະຕິເສດຮອດ 3 ເທື່ອວ່າບໍ່ຮູ້ຈັກພະເຢຊູ ແລະລາວເຖິງຂັ້ນສາບານວ່າບໍ່ຮູ້ຈັກເພິ່ນ. (ມຣກ. 14:66-71) ເມື່ອເປໂຕຮູ້ວ່າໂຕເອງເຮັດຜິດຮ້າຍແຮງ ລາວຮູ້ສຶກແນວໃດ? ລາວເສຍໃຈຫຼາຍແລະຮ້ອງໄຫ້ດ້ວຍຄວາມເຈັບປວດໃຈ ອາດເປັນຍ້ອນລາວຮູ້ສຶກຜິດຫຼາຍ. (ມຣກ. 14:72) ລອງຄິດເບິ່ງວ່າເປໂຕຊິຮູ້ສຶກບໍ່ດີສ່ຳໃດຕອນທີ່ພະເຢຊູຖືກປະຫານໃນຫຼາຍຊົ່ວໂມງຕໍ່ມາ. ເປໂຕຕ້ອງຮູ້ສຶກວ່າໂຕເອງບໍ່ມີຄ່າແທ້ໆ!
14. ອັນໃດຊ່ວຍເປໂຕໃຫ້ຮັບໃຊ້ພະເຢໂຫວາຕໍ່ໆໄປໄດ້? (ເບິ່ງຮູບໜ້າປົກ)
14 ອັນໃດຊ່ວຍເປໂຕໃຫ້ຮັບໃຊ້ພະເຢໂຫວາຕໍ່ໆໄປໄດ້? ລາວບໍ່ໄດ້ແຍກໂຕຢູ່ຄົນດຽວ ລາວໄປຫາພີ່ນ້ອງ ແລະແນ່ນອນວ່າເຂົາເຈົ້າໄດ້ໃຫ້ກຳລັງໃຈລາວ. (ລກ. 24:33) ນອກຈາກນັ້ນ ຫຼັງຈາກທີ່ພະເຢຊູຟື້ນຄືນມາຈາກຕາຍແລ້ວ ເພິ່ນກໍມາຫາເປໂຕ ແລະເປັນໄປໄດ້ວ່າເພິ່ນໄດ້ໃຫ້ກຳລັງໃຈລາວ. (ລກ. 24:34; 1ກຣ. 15:5) ຫຼັງຈາກນັ້ນ ແທນທີ່ພະເຢຊູຈະຕຳໜິເປໂຕທີ່ເຮັດຜິດ ແຕ່ເພິ່ນບອກເປໂຕວ່າລາວຊິໄດ້ຮັບໜ້າທີ່ຮັບຜິດຊອບທີ່ສຳຄັນກວ່າເກົ່າ. (ຢຮ. 21:15-17) ເປໂຕຮູ້ວ່າລາວເຮັດຜິດຮ້າຍແຮງ ແຕ່ລາວບໍ່ໄດ້ໝົດຫວັງກັບໂຕເອງ. ຍ້ອນຫຍັງ? ຍ້ອນລາວໝັ້ນໃຈວ່າພະເຢຊູນາຍຂອງລາວບໍ່ໝົດຫວັງໃນໂຕລາວ ແລະເປໂຕຮູ້ວ່າພີ່ນ້ອງພ້ອມທີ່ຈະຊ່ວຍລາວຕໍ່ໆໄປ. ເຮົາຮຽນຫຍັງຈາກຕົວຢ່າງຂອງເປໂຕ?
ໂຢຮັນ 21:15-17 ສະແດງໃຫ້ເຫັນວ່າພະເຢຊູບໍ່ໄດ້ໝົດຫວັງໃນເປໂຕ ເປໂຕຈຶ່ງຮັບໃຊ້ພະເຢໂຫວາຕໍ່ໆໄປໄດ້ (ເບິ່ງຂໍ້ 14)
15. ພະເຢໂຫວາຢາກໃຫ້ເຮົາໝັ້ນໃຈໃນເລື່ອງໃດ? (ເພງສັນລະເສີນ 86:5; ໂຣມ 8:38, 39) (ເບິ່ງຮູບນຳ)
15 ບົດຮຽນ. ພະເຢໂຫວາຢາກໃຫ້ເຮົາໝັ້ນໃຈວ່າເພິ່ນຮັກແລະພ້ອມທີ່ຈະໃຫ້ອະໄພເຮົາ. (ອ່ານເພງສັນລະເສີນ 86:5; ໂຣມ 8:38, 39) ເມື່ອເຮົາເຮັດຜິດ ເຮົາກໍຮູ້ສຶກຜິດ. ການຮູ້ສຶກແບບນີ້ເປັນເລື່ອງປົກກະຕິ ແລະມັນກໍຄວນຈະເປັນແບບນັ້ນ. ແຕ່ເຮົາຕ້ອງບໍ່ຄິດວ່າພະເຢໂຫວາບໍ່ຮັກເຮົາແລ້ວ ຫຼືເພິ່ນຈະບໍ່ມີທາງໃຫ້ອະໄພເຮົາ. ແທນທີ່ຈະຄິດແບບນັ້ນ ເຮົາຄວນຂໍຄວາມຊ່ວຍເຫຼືອທັນທີ. ໂຣເບີດທີ່ເວົ້າເຖິງກ່ອນໜ້ານີ້ເວົ້າວ່າ: “ຂ້ອຍເຮັດຜິດຍ້ອນຂ້ອຍເພິ່ງກຳລັງຂອງໂຕເອງໃນການຕ້ານທານການລໍ້ໃຈ.” ຫຼັງຈາກນັ້ນ ໂຣເບີດຮູ້ວ່າລາວຕ້ອງໄປເວົ້າກັບຜູ້ເບິ່ງແຍງ. ໂຣເບີດເວົ້າວ່າ: “ເມື່ອຂ້ອຍໄປເວົ້າກັບຜູ້ເບິ່ງແຍງ ເຂົາເຈົ້າຊ່ວຍຂ້ອຍໃຫ້ເຫັນວ່າພະເຢໂຫວາຍັງຮັກຂ້ອຍຢູ່ ແລະເຂົາເຈົ້າກໍເຮັດໃຫ້ຂ້ອຍເຫັນວ່າເຂົາເຈົ້າຮັກຂ້ອຍຄືກັນ. ເຂົາເຈົ້າຊ່ວຍຂ້ອຍໃຫ້ເຫັນວ່າພະເຢໂຫວາບໍ່ໄດ້ປະຖິ້ມຂ້ອຍ.” ເຮົາກໍໝັ້ນໃຈໄດ້ຄືກັນວ່າພະເຢໂຫວາຮັກເຮົາຫຼາຍແລະພ້ອມທີ່ຈະໃຫ້ອະໄພຖ້າເຮົາກັບໃຈ ຂໍຄວາມຊ່ວຍເຫຼືອ ແລະພະຍາຍາມສຸດຄວາມສາມາດທີ່ຈະບໍ່ເຮັດຜິດຊ້ຳອີກ. (1ຢຮ. 1:8, 9) ການທີ່ເຮົາໝັ້ນໃຈໃນເລື່ອງນີ້ຈະຊ່ວຍເຮົາບໍ່ໃຫ້ໝົດຫວັງກັບໂຕເອງຕອນທີ່ເຮົາເຮັດຜິດພາດ.
ເມື່ອເຈົ້າເຫັນຜູ້ເບິ່ງແຍງເຮັດວຽກໜັກເພື່ອຊ່ວຍເຈົ້າ ມັນເຮັດໃຫ້ເຈົ້າໝັ້ນໃຈໃນເລື່ອງຫຍັງ? (ເບິ່ງຂໍ້ 15)
16. ເປັນຫຍັງເຈົ້າຈຶ່ງຕັ້ງໃຈທີ່ຈະຮັບໃຊ້ພະເຢໂຫວາຕໍ່ໆໄປ?
16 ພະເຢໂຫວາເຫັນຄ່າທີ່ເຮົາພະຍາຍາມຮັບໃຊ້ເພິ່ນໃນສະໄໝສຸດທ້າຍທີ່ຫຍຸ້ງຍາກລຳບາກນີ້. ຖ້າເຮົາຍອມໃຫ້ພະເຢໂຫວາຊ່ວຍ ເຮົາຈະສາມາດອົດທົນຮັບໃຊ້ເພິ່ນຕໍ່ໆໄປໄດ້ເຖິງວ່າຈະເຈິກັບຄວາມຜິດຫວັງຫຼາຍຢ່າງ. ເຮົາຈະຮັກພີ່ນ້ອງຕໍ່ໆໄປແລະໃຫ້ອະໄພເຂົາເຈົ້າໄດ້ເຖິງວ່າເຂົາເຈົ້າເຮັດໃຫ້ເຮົາເສຍໃຈ. ເຮົາສະແດງຄວາມຮັກຕໍ່ພະເຢໂຫວາແລະສະແດງຄວາມນັບຖືຕໍ່ການຈັດກຽມຂອງເພິ່ນເລື່ອງການແຕ່ງດອງໂດຍພະຍາຍາມເຮັດທຸກສິ່ງທີ່ເຮັດໄດ້ເພື່ອແກ້ໄຂບັນຫາທີ່ອາດເກີດຂຶ້ນໃນຊີວິດຄູ່. ຖ້າເຮົາເຮັດຜິດ ໃຫ້ເຮົາຂໍໃຫ້ພະເຢໂຫວາຊ່ວຍ ໃຫ້ເຮົາໝັ້ນໃຈວ່າເພິ່ນຮັກແລະພ້ອມຈະໃຫ້ອະໄພເຮົາ ແລະໃຫ້ເຮົາຕັ້ງໃຈຮັບໃຊ້ເພິ່ນຕໍ່ໆໄປ. ເຮົາໝັ້ນໃຈໄດ້ວ່າເຮົາຈະໄດ້ຮັບສິ່ງດີໆຫຼາຍຢ່າງຖ້າເຮົາ “ບໍ່ທໍ້ຖອຍໃນການເຮັດດີ.”—ຄລຕ. 6:9
ເຮົາຈະຮັບໃຊ້ພະເຢໂຫວາຕໍ່ໆໄປໄດ້ແນວໃດເຖິງວ່າ . . .
ພີ່ນ້ອງເຮັດໃຫ້ເຮົາຜິດຫວັງ?
ຄູ່ຂອງເຮົາເຮັດໃຫ້ເຮົາຜິດຫວັງ?
ເຮົາຜິດຫວັງກັບໂຕເອງ?
ເພງທີ 139 ນຶກພາບເມື່ອທຸກສິ່ງກາຍເປັນສິ່ງໃໝ່
a ຊື່ສົມມຸດ
b ຄຳພີໄບເບິນບອກວ່າຜົວເມຍບໍ່ຄວນແຍກກັນຢູ່ ແລະບອກຢ່າງຈະແຈ້ງວ່າການແຍກກັນຢູ່ບໍ່ໄດ້ເຮັດໃຫ້ແຕ່ລະຝ່າຍມີສິດທີ່ຈະແຕ່ງດອງໃໝ່. ແຕ່ອາດມີບາງສະຖານະການທີ່ຄລິດສະຕຽນບາງຄົນຕັດສິນໃຈແຍກກັນຢູ່ກັບຄູ່ຂອງລາວ. ເບິ່ງຄຳອະທິບາຍເພີ່ມເຕີມ 4 “ການແຍກກັນຢູ່” ໃນປຶ້ມຊີວິດທີ່ມີຄວາມສຸກຕະຫຼອດໄປ!
c ເບິ່ງອີກຕົວຢ່າງໜຶ່ງຈາກວິດີໂອຢ່າຫຼົງເຊື່ອສັນຕິສຸກປອມ!—ດາເຣວແລະເດໂບຣາ ໄຟຣຊິງເກີຣ ໃນເວັບໄຊ jw.org.