ບົດ 11
ໂຍຮັນກຽມທາງໄວ້
ສິບເຈັດປີໄດ້ຜ່ານໄປຕັ້ງແຕ່ຕອນພະເຍຊູເປັນເດັກນ້ອຍມີອາຍຸ 12 ປີແລະໄດ້ນັ່ງຊັກຖາມພວກອາຈານທີ່ພະວິຫານ. ຕອນນີ້ເປັນລະດູໃບໄມ້ປົ່ງຂອງປີສາກົນສັກກະຫຼາດ 29 ແລະເບິ່ງຄືວ່າທຸກຄົນພວມເວົ້າເຖິງໂຍຮັນລູກພີ່ລູກນ້ອງຂອງພະເຍຊູຜູ້ເຊິ່ງປະກາດໄປທົ່ວດິນແດນແຖວແມ່ນ້ຳຢູລະເດນ.
ໂຍຮັນເປັນຄົນທີ່ໜ້າແປກແທ້ໆ ທັງທາງການປາກົດຕົວແລະຄຳເວົ້າ. ເສື້ອຜ້າຂອງທ່ານເຮັດດ້ວຍຂົນອູດ ແລະທ່ານເອົາໜັງສັດຄາດແອວ. ອາຫານຂອງທ່ານແມ່ນຕັກແຕນແລະນ້ຳເຜີ້ງປ່າ. ສ່ວນຂ່າວສານຂອງທ່ານເດ? “ຈົ່ງປະໃຈເກົ່າເອົາໃຈໃໝ່ ເພາະວ່າແຜ່ນດິນສະຫວັນ [“ລາຊະອານາຈັກຝ່າຍສະຫວັນ,” ລ.ມ.] ໄດ້ຫຍັບເຂົ້າມາໃກ້ແລ້ວ.”
ຂ່າວສານນີ້ເຮັດໃຫ້ຜູ້ຟັງຂອງທ່ານຕື່ນເຕັ້ນ. ຫຼາຍຄົນສຳນຶກເຖິງຄວາມຈຳເປັນທີ່ເຂົາຈະຕ້ອງກັບໃຈ ນັ້ນແມ່ນປ່ຽນແປງທັດສະນະເດີມຂອງຕົນ ແລະປະຖິ້ມແນວທາງຊີວິດທີ່ບໍ່ເພີງປາຖະໜາແຕ່ເກົ່າກ່ອນ. ດັ່ງນັ້ນ ຜູ້ຄົນຈຳນວນຫຼາຍຈາກເມືອງຕ່າງໆ ຕາມຝັ່ງແມ່ນ້ຳຢູລະເດນ ແມ່ນແຕ່ຈາກກຸງເຢຣຶຊາເລມ ໄດ້ມາຫາໂຍຮັນແລະທ່ານໄດ້ໃຫ້ຄົນເຫຼົ່ານັ້ນຮັບບັບເຕມາ ແມ່ນຈຸ່ມຕົວເຂົາໃຫ້ມຸດລົງໄປໃນແມ່ນ້ຳຢູລະເດນ. ເພາະເຫດໃດ?
ໂຍຮັນໃຫ້ປະຊາຊົນຮັບບັບເຕມາເພື່ອສະແດງໃຫ້ເຫັນວ່າເຂົາສຳນຶກຜິດແລະໄດ້ປ່ຽນໃຈໃໝ່ຈາກແນວທາງຜິດບາບທີ່ເຂົາໄດ້ເຮັດຕໍ່ບັນຍັດຂອງພະເຈົ້າ. ດ້ວຍເຫດນີ້ ເມື່ອພວກຟາລິຊຽນແລະພວກຊາດຶເຊເອນບາງຄົນອອກມາທີ່ແມ່ນ້ຳຢູລະເດນ ໂຍຮັນໄດ້ຕຳໜິເຂົາດັ່ງນີ້ “ອ້າຍຄົນຊາດງູຮ້າຍ . . . ຈົ່ງເກີດໝາກສົມຄວນແກ່ການອັນປະໃຈເກົ່າເອົາໃຈໃໝ່ເທີ້ນ. ແລະຢ່າຊູຄຶດຈະເວົ້າໃນໃຈເອງວ່າ ຫມູ່ເຮົາມີທ່ານອັບລາຫາມເປັນພໍ່ຂອງເຮົາທັງຫຼາຍ. ເຫດວ່າເຮົາກ່າວແກ່ທ່ານທັງຫຼາຍວ່າ ພະເຈົ້າອາດເອົາຫີນທັງຫຼາຍນີ້ໃຫ້ເກີດເປັນລູກແຫ່ງທ່ານອັບລາຫາມກໍໄດ້. ແລະບັດນີ້ຂວານເປັນທີ່ວາງໄວ້ທີ່ຮາກກົກໄມ້ທັງຫຼາຍແລ້ວ ເຫດສັນນີ້ ໄມ້ທຸກຕົ້ນທີ່ບໍ່ເກີດໝາກດີກໍຕ້ອງບັກເສຍແລະຖິ້ມໃນໄຟເສຍ.”
ເນື່ອງຈາກໂຍຮັນໄດ້ຮັບຄວາມສົນໃຈຈາກຜູ້ຄົນຫຼວງຫຼາຍ ພວກຢິວສົ່ງປະໂລຫິດແລະພວກເລວີໄປຫາທ່ານ. ຄົນເຫຼົ່ານັ້ນຖາມວ່າ “ທ່ານເປັນຜູ້ໃດ”?
ໂຍຮັນຍອມຮັບວ່າ “ເຮົາບໍ່ເປັນພະຄລິດ.”
ເຂົາຈຶ່ງຖາມວ່າ “ຖ້າຢ່າງນັ້ນ ທ່ານເປັນທ່ານເອລີຫຼື”?
ທ່ານຕອບວ່າ “ເຮົາບໍ່ເປັນ.”
“ທ່ານເປັນຜູ້ທຳນວາຍຫຼື”?
“ບໍ່ເປັນ.”
ຄົນເຫຼົ່ານັ້ນຖາມຊ້ຳອີກວ່າ “ທ່ານເປັນຜູ້ໃດ ເພື່ອຫມູ່ເຮົາຈະໄດ້ຕອບແກ່ທ່ານທັງຫຼາຍທີ່ໄດ້ໃຊ້ຫມູ່ເຮົາມາ ທ່ານເວົ້າສິ່ງໃດເຖິງທ່ານເອງ”?
ໂຍຮັນຊີ້ແຈງວ່າ “ເຮົາເປັນສຽງປາກແຫ່ງຜູ້ທີ່ຮ້ອງໃນປ່າວ່າ ຈົ່ງຈັດແຈ່ງຫົນທາງແຫ່ງພະເຢໂຫວາໃຫ້ຊື່. ຕາມທີ່ທ່ານເອຊາອີຜູ້ທຳນວາຍໄດ້ບອກໄວ້.”
ຄົນເຫຼົ່ານັ້ນຈຶ່ງຢາກຮູ້ວ່າ “ຖ້າທ່ານບໍ່ເປັນພະຄລິດກໍດີ ທ່ານເອລີກໍດີ ທ່ານຜູ້ທຳນວາຍກໍດີ ເຫດສັນໃດທ່ານໄດ້ໃຫ້ຮັບສິນບັບເຕມາ”?
ທ່ານຕອບວ່າ “ເຮົາໃຫ້ຮັບສິນບັບເຕມາໃນນ້ຳ ແຕ່ວ່າໃນທ່າມກາງພວກທ່ານ ຍັງມີອົງໜຶ່ງທີ່ທ່ານທັງຫຼາຍບໍ່ຮູ້ຈັກ. ເປັນພະອົງທີ່ມາພາຍຫຼັງເຮົາ.”
ໂຍຮັນພວມຈັດກຽມຫົນທາງໄວ້ໂດຍຊ່ອຍປະຊາຊົນໃຫ້ມີສະພາບຫົວໃຈທີ່ຖືກຕ້ອງເພື່ອຍອມຮັບພະເມຊີຜູ້ເຊິ່ງຈະມາເປັນພະມະຫາກະສັດ. ໂຍຮັນກ່າວເຖິງຜູ້ນີ້ວ່າ “ພະອົງຜູ້ທີ່ມາພາຍຫຼັງເຮົາກໍມີອຳນາດຫຼາຍກວ່າເຮົາ ແລະເຮົາບໍ່ສົມຄວນຈະຖືເກີບແຫ່ງພະອົງໄປ.” ທີ່ຈິງ ໂຍຮັນຍັງເວົ້າວ່າ “ພະອົງທີ່ມາພາຍຫຼັງເຮົາ ກໍໃຫຍ່ກວ່າເຮົາ ເພາະພະອົງເປັນຢູ່ກ່ອນເຮົາແລ້ວ.”
ດ້ວຍເຫດນີ້ ຂ່າວສານທີ່ໂຍຮັນປະກາດວ່າ “ແຜ່ນດິນສະຫວັນ [“ລາຊະອານາຈັກຝ່າຍສະຫວັນ,” ລ.ມ.] ໄດ້ຫຍັບເຂົ້າມາໃກ້ແລ້ວ” ຈຶ່ງເປັນການແຈ້ງໃຫ້ປວງຊົນຮູ້ທົ່ວໄປວ່າ ການສັ່ງສອນຂອງພະເຍຊູຄລິດກະສັດຜູ້ເຊິ່ງພະເຢໂຫວາຕັ້ງໄວ້ນັ້ນ ຈວນຈະເລີ່ມຕົ້ນແລ້ວ. ໂຍຮັນ 1:6-8, 15-28; ມັດທາຽ 3:1-12; ລຶກາ 3:1-18; ກິດຈະການ 19:4.
▪ ໂຍຮັນມີບຸກຄະລິກລັກສະນະແນວໃດ?
▪ ເຫດໃດໂຍຮັນໃຫ້ຄົນຮັບບັບເຕມາ?
▪ ເຫດໃດໂຍຮັນເວົ້າໄດ້ວ່າລາຊະອານາຈັກມາໃກ້ແລ້ວ?