ບົດທີ 73
ໂຢຮັນກຽມທາງໄວ້ໃຫ້ພະເຢຊູ
ໂຢຮັນລູກຊາຍຂອງເຊຄາຣີຢາກັບເອລີຊາເບັດໃຫຍ່ຂຶ້ນມາເປັນຜູ້ພະຍາກອນຂອງພະເຈົ້າ. ພະເຢໂຫວາໃຊ້ໂຢຮັນສອນປະຊາຊົນວ່າເມຊີອາກຳລັງມາ. ແທນທີ່ລາວຈະສອນໃນບ່ອນປະຊຸມຂອງຄົນຢິວຫຼືໃນເມືອງ ລາວພັດສອນຢູ່ບ່ອນກັນດານ. ຄົນຈາກເມືອງເຢຣູຊາເລັມແລະຈາກທົ່ວແຂວງຢູດາຍກໍມາຮຽນກັບໂຢຮັນ. ລາວສອນເຂົາເຈົ້າວ່າຖ້າຢາກເຮັດໃຫ້ພະເຈົ້າພໍໃຈ ເຂົາເຈົ້າຕ້ອງເຊົາເຮັດສິ່ງທີ່ບໍ່ດີ. ຫຼັງຈາກໄດ້ຟັງໂຢຮັນແລ້ວ ຫຼາຍຄົນກໍກັບໃຈແລະເຊົາເຮັດຊົ່ວ. ໂຢຮັນຈຶ່ງໃຫ້ບັບເຕມາເຂົາເຈົ້າຢູ່ແມ່ນ້ຳຈໍແດນ.
ໂຢຮັນໃຊ້ຊີວິດແບບຮຽບງ່າຍ. ລາວນຸ່ງເຄື່ອງທີ່ເຮັດຈາກຂົນອູດແລະກິນຕັກກະແຕນກັບນ້ຳເຜີ້ງປ່າເປັນອາຫານ. ທຸກຄົນສົງໄສວ່າໂຢຮັນແມ່ນໃຜ ແລະແມ່ນແຕ່ພວກຟາຣີຊາຍແລະພວກຊາດູກາຍທີ່ຍິ່ງຈອງຫອງກໍຍັງມາຫາລາວ. ໂຢຮັນບອກເຂົາເຈົ້າວ່າ: ‘ພວກເຈົ້າຕ້ອງປ່ຽນແນວທາງຊີວິດແລະຕ້ອງກັບໃຈ. ຢ່າຄິດວ່າພວກເຈົ້າເປັນຄົນພິເສດຍ້ອນພວກເຈົ້າເວົ້າວ່າໂຕເອງເປັນລູກຫຼານຂອງອັບຣາຮາມ ເພາະມັນບໍ່ໄດ້ໝາຍຄວາມວ່າພວກເຈົ້າເປັນລູກຂອງພະເຈົ້າ.’
ຫຼາຍຄົນມາຫາໂຢຮັນແລະຖາມວ່າ: ‘ພວກເຮົາຕ້ອງເຮັດຫຍັງແດ່ເພື່ອໃຫ້ພະເຈົ້າພໍໃຈ?’ ໂຢຮັນຕອບເຂົາເຈົ້າວ່າ: ‘ຖ້າເຈົ້າມີເສື້ອ 2 ໂຕ ເຈົ້າຕ້ອງແບ່ງໃຫ້ຄົນທີ່ບໍ່ມີ.’ ເຈົ້າຮູ້ບໍວ່າເປັນຫຍັງລາວຈຶ່ງສອນແນວນັ້ນ? ລາວຢາກໃຫ້ລູກສິດຂອງລາວຮູ້ວ່າຖ້າຢາກໃຫ້ພະເຈົ້າພໍໃຈ ເຂົາເຈົ້າກໍຕ້ອງຮັກຄົນອື່ນ.
ໂຢຮັນບອກຄົນເກັບພາສີວ່າ: ‘ພວກເຈົ້າຕ້ອງສັດຊື່ແລະຢ່າໂກງໃຜ.’ ລາວບອກພວກທະຫານວ່າ: ‘ຢ່າຮັບສິນບົນແລະຢ່າເວົ້າຕົວະ.’
ພວກປະໂລຫິດກັບພວກເລວີກໍມາຫາໂຢຮັນແລະເວົ້າວ່າ: ‘ເຈົ້າແມ່ນໃຜແທ້? ທຸກຄົນຢາກຮູ້ອີ່ຫຼີ.’ ໂຢຮັນຕອບວ່າ: ‘ຂ້ອຍແມ່ນຄົນທີ່ປະກາດຢູ່ບ່ອນກັນດານແລະພາປະຊາຊົນກັບມາຫາພະເຢໂຫວາຄືກັບທີ່ເອຊາຢາບອກໄວ້.’
ປະຊາຊົນມັກສິ່ງທີ່ໂຢຮັນສອນ. ຫຼາຍຄົນຄິດວ່າລາວເປັນເມຊີອາ ແຕ່ລາວບອກເຂົາເຈົ້າວ່າ: ‘ມີຜູ້ໜຶ່ງທີ່ຍິ່ງໃຫຍ່ກວ່າຂ້ອຍກຳລັງມາ ຂ້ອຍບໍ່ເໝາະສົມທີ່ຈະແກ້ສາຍມັດເກີບຂອງເພິ່ນຊ້ຳ. ຂ້ອຍໃຫ້ບັບເຕມາພວກເຈົ້າດ້ວຍນ້ຳ ແຕ່ເພິ່ນຈະໃຫ້ບັບເຕມາພວກເຈົ້າດ້ວຍພະລັງບໍລິສຸດ.’
“ລາວເປັນພະຍານທີ່ໃຫ້ຫຼັກຖານຢືນຢັນເລື່ອງຄວາມສະຫວ່າງນັ້ນ ເພື່ອຄົນທຸກປະເພດຈະໄດ້ເຊື່ອຍ້ອນສິ່ງທີ່ລາວບອກ.”—ໂຢຮັນ 1:7