ບົດ 26
ເມືອບ້ານທີ່ເມືອງກັບເອນາອູມ
ຕອນນີ້ຊື່ສຽງຂອງພະເຍຊູໄດ້ລາມຜາຍໄປທົ່ວ ແລະມີຫຼາຍຄົນເດີນທາງໄປບ່ອນທີ່ພະອົງພັກເຊົາເຊິ່ງຫ່າງໄກຈາກຊຸມຊົນ. ຢ່າງໃດກໍຕາມ ຈາກນັ້ນບໍ່ຈັກມື້ ພະອົງເດີນທາງເມືອກັບເອນາອູມເຊິ່ງຢູ່ຮິມທະເລຄາລິເລ. ຂ່າວໄດ້ລືໄປທົ່ວເມືອງຢ່າງໄວວ່າພະອົງກັບມາແລ້ວ ແລະຫຼາຍຄົນໄປຫາພະອົງຢູ່ເຮືອນທີ່ພະອົງນອນພັກ. ພວກຟາລິຊຽນແລະນັກກົດໝາຍຍັງເດີນທາງມາແຕ່ໄກຈາກກຸງເຢຣຶຊາເລມອີກ.
ມີຝູງຊົນຫຼາຍເຊິ່ງບຽດກັນຢູ່ໜ້າປະຕູ ຈົນບໍ່ມີຊ່ອງທາງທີ່ຄົນຈະເຂົ້າໄປຂ້າງໃນໄດ້. ເປັນໂອກາດດີສຳລັບເຫດການເດັ່ນແທ້ໆ. ສິ່ງທີ່ບັງເກີດຂຶ້ນໃນຕອນນັ້ນເປັນເລື່ອງສຳຄັນຫຼາຍ ເພາະຊ່ອຍໃຫ້ເຮົາຢັ່ງຮູ້ວ່າພະເຍຊູມີອຳນາດປົດເປື້ອງຕົ້ນເຫດຂອງຄວາມທຸກແລະໃຫ້ສຸຂະພາບທີ່ດີແກ່ທຸກຄົນເຊິ່ງພະອົງເລືອກ.
ຂະນະທີ່ພະເຍຊູພວມສອນຝູງຊົນຢູ່ ຊາຍສີ່ຄົນໄດ້ຫາມຄົນອຳມະພາດໃສ່ຕຽງມາ. ພວກເຂົາຢາກໃຫ້ພະເຍຊູປົວເພື່ອນຂອງເຂົາ ແຕ່ຍ້ອນວ່າຄົນອັ່ງຫຼາຍ ເຂົາຈຶ່ງເຂົ້າໄປຂ້າງໃນບໍ່ໄດ້. ນັບວ່າຜິດຫວັງຂະໜາດໃດ! ແຕ່ພວກເຂົາບໍ່ທໍ້ຖອຍ. ພວກເຂົາໄດ້ປີນຂຶ້ນເທິງຫຼັງຄາ ເຈາະໃຫ້ເປັນປ່ອງ ແລ້ວຢ່ອນຕຽງຄົນປ່ວຍລົງໃຫ້ໃກ້ພະເຍຊູ.
ການຖືກຂັດຈັງຫວະເຮັດໃຫ້ພະເຍຊູໄດ້ຮ້າຍບໍ? ບໍ່ເລີຍ! ແທນທີ່ຈະເປັນເຊັ່ນນັ້ນ ພະອົງຮູ້ສຶກປະທັບໃຈຫຼາຍກັບຄວາມເຊື່ອຂອງເຂົາ. ພະອົງບອກຄົນງ່ອຍວ່າ “ການບາບທັງຫຼາຍຂອງເຈົ້າເປັນທີ່ໂຜດຍົກເສຍແລ້ວ.” ແຕ່ພະເຍຊູສາມາດຍົກບາບໄດ້ແທ້ໆ ບໍ? ພວກສະໝຽນແລະຟາລິຊຽນບໍ່ໄດ້ຄິດຢ່າງນັ້ນ. ເຂົາຄິດໃນໃຈວ່າ “ທ່ານຜູ້ນີ້ປາກຢ່າງນີ້ ທ່ານກ່າວຄຳຫຍາບຊ້າ ໃຜອາດຍົກບາບໄດ້ ເທົ່າເວັ້ນໄວ້ແຕ່ພະເຈົ້າອົງດຽວ.”
ເມື່ອຮູ້ຄວາມໃນໃຈຂອງເຂົາ ພະເຍຊູກ່າວນຳເຂົາວ່າ “ເຫດສັນໃດທ່ານຄິດຖຽງຢ່າງນີ້ໃນໃຈຂອງທ່ານ. ຄຳອັນໃດງ່າຍກວ່າກັນ ຈະເວົ້າແກ່ຄົນງ່ອຍວ່າ ການບາບທັງຫຼາຍຂອງເຈົ້າເປັນທີ່ໂຜດຍົກເສຍຈາກເຈົ້າແລ້ວ. ຫຼືຈະເວົ້າວ່າ ຈົ່ງເອົາຕຽງນອນຂອງເຈົ້າຍົກຂຶ້ນແລະທຽວໄປເທີ້ນ.”
ຈາກນັ້ນ ພະເຍຊູໃຫ້ຝູງຊົນ ລວມທັງຜູ້ວິຈານພະອົງ ເຫັນການສະແດງອັນສຳຄັນເຊິ່ງເປີດເຜີຍວ່າພະອົງມີອຳນາດທີ່ຈະຍົກບາບເທິງແຜ່ນດິນໂລກ ແລະແທ້ຈິງແລ້ວ ພະອົງເປັນບຸລຸດຜູ້ຍິ່ງໃຫຍ່ທີ່ສຸດເຊິ່ງເຄີຍມີຊີວິດຢູ່. ພະອົງຫັນໄປສັ່ງຊາຍອຳມະພາດວ່າ “ຈົ່ງລຸກຂຶ້ນ ເອົາຕຽງນອນຂອງເຈົ້າຍົກຂຶ້ນ ແລະໄປທີ່ເຮືອນຂອງເຈົ້າເທີ້ນ.” ເຂົາລຸກຂຶ້ນທັນທີ ຍົກຕຽງນອນຂອງຕົນແລ້ວຍ່າງໄປຕໍ່ໜ້າຄົນທັງປວງ! ຄົນຢູ່ຫັ້ນໄດ້ສັນລະເສີນພະເຈົ້າດ້ວຍຄວາມປະຫຼາດໃຈຮ້ອງວ່າ “ເຮົາທັງຫຼາຍບໍ່ເຄີຍເຫັນສິ່ງໜຶ່ງສິ່ງໃດຢ່າງນີ້ສັກເທື່ອ.”
ເຈົ້າສັງເກດບໍທີ່ພະເຍຊູກ່າວເຖິງຄວາມບາບວ່າກ່ຽວຂ້ອງກັບຄວາມເຈັບໄຂ້ແລະ ການອະໄພບາບກ່ຽວຂ້ອງກັບການໄດ້ສຸຂະພາບດີ? ຄຳພີໄບເບິນຊີ້ແຈງວ່າອາດາມພໍ່ເຄົ້າຂອງເຮົາເຮັດບາບແລະເຮົາທຸກຄົນໄດ້ຮັບສືບທອດຜົນຂອງຄວາມບາບ ເຊັ່ນ ຄວາມເຈັບໄຂ້ແລະຄວາມຕາຍ. ແຕ່ພາຍໃຕ້ການປົກຄອງແຫ່ງລາຊະອານາຈັກຂອງພະເຈົ້າ ພະເຍຊູຈະຍົກບາບຂອງທຸກຄົນເຊິ່ງຮັກແລະຮັບໃຊ້ພະເຈົ້າ ຄັນແລ້ວຄວາມເຈັບປ່ວຍທັງໝົດຈະຖືກກຳຈັດໄປ. ຈັ່ງແມ່ນດີແທ້ໆ! ມາລະໂກ 2:1-12; ລຶກາ 5:17-26; ມັດທາຽ 9:1-8; ໂລມ 5:12, 17-19.
▪ ສາກເຫດການທີ່ເດັ່ນແທ້ໆ ນັ້ນເປັນຢ່າງໃດ?
▪ ຄົນອຳມະພາດເຂົ້າເຖິງພະເຍຊູໄດ້ຢ່າງໃດ?
▪ ເຫດໃດເຮົາທຸກຄົນຈຶ່ງມີບາບ ແຕ່ພະເຍຊູໃຫ້ຄວາມຫວັງຢ່າງໃດວ່າການອະໄພບາບແລະສຸຂະພາບທີ່ສົມບູນຈະເປັນໄປໄດ້?