ບົດ 123
“ເບິ່ງ! ລູກຜູ້ຊາຍ!”
ເພາະຮູ້ສຶກປະທັບໃຈຈາກການສະແດງອອກຂອງພະເຍຊູ ແລະຍອມຮັບວ່າພະອົງບໍ່ມີຄວາມຜິດ ພີລາດຈຶ່ງຫາວິທີອື່ນເພື່ອຈະປ່ອຍພະອົງ. ລາວຈຶ່ງບອກຝູງຊົນວ່າ “ທ່ານທັງຫຼາຍມີທຳນຽມທີ່ເຮົາຈະປ່ອຍຄົນຜູ້ໜຶ່ງເວລາປັດສະຄາ.”
ຕອນນັ້ນ ບາລັບບາດຄາຕະກອນທີ່ລືຊື່ຜູ້ໜຶ່ງກໍຖືກຄຸມຂັງນຳ ດັ່ງນັ້ນ ພີລາດຈຶ່ງຖາມວ່າ “ທ່ານທັງຫຼາຍຢາກໄດ້ເຮົາປ່ອຍຜູ້ໃດໃຫ້ແກ່ທ່ານທັງຫຼາຍ ບາລັບບາດຫຼືພະເຍຊູທີ່ຊື່ວ່າພະຄລິດ”?
ເນື່ອງຈາກຖືກໂນ້ມນ້າວໂດຍພວກປະໂລຫິດໃຫຍ່ເຊິ່ງໄດ້ປຸກລະດົມພວກເຂົາ ປະຊາຊົນຂໍໃຫ້ປ່ອຍບາລັບບາດ ແຕ່ໃຫ້ປະຫານພະເຍຊູ. ໂດຍບໍ່ຍອມເລີກ ພີລາດຖາມອີກວ່າ “ແຕ່ສອງຄົນນີ້ທ່ານທັງຫຼາຍຢາກໄດ້ເຮົາປ່ອຍຜູ້ໃດໃຫ້ທ່ານທັງຫຼາຍ”?
ເຂົາຮ້ອງສຽງດັງວ່າ “ບາລັບບາດ.”
ດ້ວຍຄວາມສະດຸ້ງຕົກໃຈພີລາດຖາມຂຶ້ນວ່າ “ເຫດສັນນີ້ເຮົາຈະກະທຳສິ່ງໃດກັບພະເຍຊູ ທີ່ຊື່ວ່າພະຄລິດ”?
ພວກເຂົາຕອບສຽງດັງສະທ້ານແກ້ວຫູວ່າ “ໃຫ້ຄຶງທ່ານໄວ້.” ‘ຄຶງທ່ານໄວ້ ຄຶງທ່ານໄວ້.’
ເມື່ອຮູ້ວ່າເຂົາຮຽກຮ້ອງເອົາຄວາມຕາຍຂອງຄົນທີ່ບໍ່ມີຄວາມຜິດ ພີລາດຈຶ່ງອ້ອນວອນວ່າ “ແຕ່ວ່າ ທ່ານຜູ້ນີ້ໄດ້ກະທຳການຮ້າຍປະການໃດ ເຮົາບໍ່ໄດ້ເຫັນສິ່ງໜຶ່ງສິ່ງໃດໃນທ່ານທີ່ເປັນສົມຄວນຈະຖືກຕາຍ. ເຫດສັນນີ້ ເມື່ອໄດ້ຂ້ຽນທ່ານແລ້ວເຮົາຈະປ່ອຍທ່ານໄປ.”
ເຖິງວ່າລາວໄດ້ພະຍາຍາມແລ້ວ ຝູງຊົນທີ່ເປັນເດືອດເປັນແຄ້ນທີ່ຖືກຍຸຍົງໂດຍຫົວໜ້າສາສະໜາຂອງເຂົາກໍຍັງໂຫ່ຮ້ອງຢູ່ບໍ່ຢຸດວ່າ “ໃຫ້ຄຶງທ່ານໄວ້.” ການປຸກປັ່ນຂອງປະໂລຫິດເຮັດໃຫ້ພວກເຂົາເສຍສະຕິ ຝູງຊົນຈຶ່ງບ້າເລືອດ. ລອງຄິດເບິ່ງ ພຽງແຕ່ຫ້າມື້ກ່ອນທໍ່ນັ້ນ ລາງຄົນໃນພວກນີ້ຄົງຈະຢູ່ໃນຈຳນວນຄົນເຫຼົ່ານັ້ນທີ່ຍິນດີຕ້ອນຮັບພະເຍຊູເຂົ້າສູ່ເມືອງເຢຣຶຊາເລມຖານະກະສັດ! ລະຫວ່າງນັ້ນ ຫາກວ່າເຫຼົ່າສາວົກຂອງພະເຍຊູຢູ່ຫັ້ນ ເຂົາເຈົ້າກໍຄົງຈະຢູ່ຢ່າງມິດໆ ເພື່ອບໍ່ໃຫ້ເປັນທີ່ສັງເກດ.
ເມື່ອພີລາດເຫັນວ່າຄຳອ້ອນວອນຂອງຕົນບໍ່ໄດ້ຜົນ ແຕ່ພັດກໍ່ຄວາມວຸ່ນວາຍຂຶ້ນຊ້ຳ ລາວຈຶ່ງເອົານ້ຳມາລ້າງມືຂອງຕົນຕໍ່ໜ້າຝູງຄົນ ແລ້ວກ່າວວ່າ “ເຮົາບໍ່ມີຜິດເລືອດຂອງທ່ານຊອບທຳຜູ້ນີ້ ສຸດແລ້ວກັບທ່ານທັງຫຼາຍເທີ້ນ.” ເຖິງຕອນນີ້ ປະຊາຊົນຕອບວ່າ “ໃຫ້ເລືອດຂອງທ່ານຕົກຢູ່ເທິງເຮົາທັງຫຼາຍ ແລະເທິງລູກຂອງເຮົາທັງຫຼາຍເທີ້ນ.”
ດັ່ງນັ້ນ ເພື່ອໃຫ້ເປັນໄປຕາມຄຳຮຽກຮ້ອງຂອງພວກເຂົາ ພ້ອມທັງຢາກໃຫ້ຝູງຊົນພໍໃຈຫຼາຍກວ່າການເຮັດສິ່ງທີ່ຕົນຮູ້ວ່າຖືກຕ້ອງ ພີລາດຈຶ່ງປ່ອຍບາລັບບາດໃຫ້ພວກເຂົາ. ລາວສັ່ງໃຫ້ຖອດເສື້ອຜ້າຂອງພະເຍຊູອອກ ແລ້ວກໍຂ້ຽນພະອົງ. ນີ້ບໍ່ແມ່ນການຂ້ຽນຕີແບບທຳມະດາ. ເດິ ເຈິຣ໌ນັລ ອອຟ ດິ ອາເມລິກັນ ເມດິຄັລ ແອສໂຊຊິເອຊັນ ພັນລະນາວິທີການຂ້ຽນຕີຂອງຊາວໂລມັນວ່າ:
“ເຄື່ອງມືໂດຍທົ່ວໄປເປັນແສ້ສັ້ນ (ຟລາກຣຸມ ຫຼື ຟລາເກລຸມ ) ເຊິ່ງມີເສັ້ນໜັງດຽວ ຫຼືເສັ້ນໜັງເປຍຫຼາຍເສັ້ນສັ້ນຍາວຕ່າງກັນເຊິ່ງມີຕຸ່ມເຫຼັກໜ່ວຍນ້ອຍໆ ຫຼືຕ່ອນກະດູກແກະທີ່ແຫຼມຄົມມັດຕິດເປັນໄລຍະໄປ. . . . ຕອນທີ່ທະຫານໂລມັນຟາດຫຼັງນັກໂທດຢ່າງສຸດແຮງຊ້ຳແລ້ວຊ້ຳອີກ ໜ່ວຍເຫຼັກນັ້ນຈະເຮັດໃຫ້ຟົກຊ້ຳເລິກ ແລະເຊືອກໜັງກັບກະດູກແກະຈະບາດເຂົ້າໄປໃນໜັງແລະເອັນໃຕ້ຜິວໜັງ. ແລ້ວເມື່ອຂ້ຽນຕໍ່ໄປ ຮອຍແຜຈະສີກເຂົ້າໄປໃນກ້າມຊີ້ນເກືອບຮອດໂຄງກະດູກ ແລະເຮັດໃຫ້ຊີ້ນແຕກຈົນມີເລືອດໄຫຼອອກມາ.”
ຫຼັງຈາກການຂ້ຽນແບບທໍລະມານເຊັ່ນນັ້ນແລ້ວ ພະເຍຊູຖືກພາເຂົ້າໄປໃນທຳນຽບຂອງຜູ້ວ່າການລ້ດ ແລະພວກທະຫານຖືກເອີ້ນໃຫ້ມາປະຊຸມກັນ. ຢູ່ຫັ້ນພວກທະຫານໄດ້ປະໝາດຢຽບຫຍາມພະອົງຕໍ່ໄປອີກ ໂດຍເອົາໜາມມາສານເປັນມຸງກຸດແລ້ວກົດໃສ່ຫົວຂອງພະອົງ. ເຂົາເອົາໄມ້ອໍ້ໃສ່ມືຂວາ ແລະເອົາເສື້ອສີມ່ວງມານຸ່ງໃຫ້ພະອົງແບບທີ່ຜູ້ຄົນໃນລາຊະວົງນຸ່ງຖືກັນ. ຕໍ່ຈາກນັ້ນ ເຂົາເວົ້າເຍາະເຍີ້ຍພະອົງວ່າ “ກະສັດຊາວຢູເດເອີຍ ຈົ່ງຈຳເລີນເທີ້ນ.” ເຂົາຍັງຖົ່ມນ້ຳລາຍແລະຕົບໜ້າພະອົງ. ດຶງເອົາໄມ້ອໍ້ແຂງມາຈາກມືຂອງພະອົງ ໃຊ້ໄມ້ນັ້ນຟາດຫົວພະອົງ ຊ້ຳບໍ່ຫນຳຍັງກົດໜາມແຫຼມຂອງ “ມຸງກຸດ” ທີ່ລົບລູ່ພະອົງນັ້ນໃສ່ໜັງຫົວຂອງພະອົງອີກ.
ຄວາມສະຫງ່າຜ່າເຜີຍແລະພະລັງທີ່ໂດດເດັ່ນຂອງພະເຍຊູເມື່ອປະເຊີນກັບການທາລຸນເຊັ່ນນີ້ ເຮັດໃຫ້ພີລາດຮູ້ສຶກປະທັບໃຈຫຼາຍຈົນກະຕຸ້ນໃຫ້ເຂົາພະຍາຍາມທີ່ຈະປ່ອຍພະອົງອີກເທື່ອໜຶ່ງ. ລາວບອກຝູງຊົນວ່າ “ເບິ່ງເທີ້ນ ເຮົາພາທ່ານອອກມາຫາທ່ານທັງຫຼາຍ ເພື່ອທ່ານທັງຫຼາຍຈະຮູ້ຈັກວ່າ ເຮົາບໍ່ພົບໂທດຫຼວງໃນທ່ານສັກຂໍ້.” ລາວອາດຈະຄິດວ່າພາບທີ່ພະເຍຊູຖືກທໍລະມານຈະເຮັດໃຫ້ໃຈຂອງພວກເຂົາອ່ອນລົງກໍໄດ້. ຂະນະທີ່ພະເຍຊູຢືນຢູ່ຕໍ່ໜ້າກຸ່ມຄົນເຊິ່ງໂຫດຫ້ຽມເຫຼົ່ານັ້ນ ໂດຍສວມມຸງກຸດໜາມແລະເສື້ອຊັ້ນນອກສີມ່ວງ ພ້ອມດ້ວຍໃບໜ້າທີ່ມີຄາບເລືອດເຊິ່ງບົ່ງບອກເຖິງຄວາມເຈັບປວດນັ້ນ ພີລາດຖະແຫຼງວ່າ “ເບິ່ງ! ລູກຜູ້ຊາຍ!” (ລ.ມ.)
ແມ່ນວ່າຈະຟົກຊ້ຳແລະຖືກທຸບຕີປານນັ້ນ ຜູ້ທີ່ຢືນຢູ່ນີ້ແມ່ນບຸກຄົນເຊິ່ງໂດດເດັ່ນທີ່ສຸດໃນຕະຫຼອດປະຫວັດສາດ ບຸລຸດຜູ້ຍິ່ງໃຫຍ່ທີ່ສຸດຢ່າງແທ້ຈິງເທົ່າທີ່ໂລກເຄີຍເຫັນ! ແມ່ນແລ້ວ ພະເຍຊູພິສູດໃຫ້ເຫັນຄວາມສະຫງ່າຜ່າເຜີຍແລະຄວາມໝັ້ນຄົງແນ່ນອນຢ່າງສະຫງົບທີ່ສະແດງເຖິງຄວາມຍິ່ງໃຫຍ່ເຊິ່ງແມ່ນແຕ່ພີລາດກໍຕ້ອງຍອມຮັບ ເພາະຄຳເວົ້າຂອງລາວເບິ່ງຄືມີທັງຄວາມຮູ້ສຶກນັບຖືແລະຄວາມສົງສານປົນກັນ. ໂຍຮັນ 18:39–19:5; ມັດທາຽ 27:15-17, 20-30; ມາລະໂກ 15:6-19; ລຶກາ 23:18-25.
▪ ພີລາດພະຍາຍາມທີ່ຈະປ່ອຍຕົວພະເຍຊູໂດຍວິທີໃດ?
▪ ພີລາດພະຍາຍາມປົດເປື້ອງຕົນເອງໃຫ້ພົ້ນຄວາມຮັບຜິດຊອບຢ່າງໃດ?
▪ ມີອັນໃດກ່ຽວຂ້ອງຢູ່ໃນການຂ້ຽນຕີແດ່?
▪ ຫຼັງຈາກການຂ້ຽນຕີແລ້ວ ພະເຍຊູຖືກເຍາະເຍີ້ຍແນວໃດແດ່?
▪ ເພື່ອຈະປ່ອຍຕົວພະເຍຊູ ພີລາດພະຍາຍາມເຮັດຫຍັງຕໍ່ໄປ?