ບົດທີ 90
ພະເຢຊູຕາຍຢູ່ໂຄລະໂຄທາ
ພວກປະໂລຫິດໃຫຍ່ພາພະເຢຊູໄປເຮືອນຂອງປີລາດທີ່ເປັນເຈົ້າແຂວງ. ປີລາດຖາມເຂົາເຈົ້າວ່າ: “ພວກເຈົ້າຟ້ອງຜູ້ຊາຍຄົນນີ້ຍ້ອນຂໍ້ຫາຫຍັງ?” ເຂົາເຈົ້າຕອບວ່າ: ‘ລາວອ້າງວ່າໂຕເອງເປັນກະສັດ!’ ປີລາດຈຶ່ງຖາມພະເຢຊູວ່າ: “ເຈົ້າເປັນກະສັດຂອງຄົນຢິວບໍ?” ພະເຢຊູຕອບວ່າ: “ການປົກຄອງຂອງຂ້ອຍບໍ່ໄດ້ເປັນສ່ວນໜຶ່ງຂອງໂລກນີ້.”
ຕໍ່ມາ ປີລາດກໍສົ່ງພະເຢຊູໄປໃຫ້ເຮໂຣດຜູ້ປົກຄອງແຂວງຄາລີເລເພື່ອໃຫ້ລາວສອບສວນເບິ່ງວ່າພະເຢຊູມີຄວາມຜິດຫຍັງ. ເຮໂຣດເຫັນວ່າພະເຢຊູບໍ່ມີຄວາມຜິດຫຍັງ ລາວຈຶ່ງສົ່ງພະເຢຊູກັບໄປໃຫ້ປີລາດ. ແລ້ວປີລາດກໍບອກປະຊາຊົນວ່າ: ‘ເຮໂຣດກັບຂ້ອຍບໍ່ເຫັນວ່າລາວເຮັດຫຍັງຜິດ ຂ້ອຍຈະປ່ອຍລາວໄປ.’ ແຕ່ມີຄົນບັກຫຼາຍໆຮ້ອງຂຶ້ນວ່າ: ‘ຂ້າລາວ! ຂ້າລາວ!’ ພວກທະຫານເອົາແສ້ຟາດພະເຢຊູ ຖົ່ມນ້ຳລາຍໃສ່ເພິ່ນ ແລະຕີເພິ່ນ. ເຂົາເຈົ້າເອົາມົງກຸດໜາມສຸບໃສ່ຫົວເພິ່ນແລະເຍາະເຍີ້ຍເພິ່ນວ່າ: “ຂໍກົ້ມຄຳນັບກະສັດຂອງຄົນຢິວ.” ປີລາດບອກປະຊາຊົນອີກເທື່ອໜຶ່ງວ່າ: ‘ຂ້ອຍບໍ່ເຫັນວ່າຜູ້ຊາຍຄົນນີ້ມີຄວາມຜິດຫຍັງ.’ ແຕ່ເຂົາເຈົ້າຮ້ອງຂຶ້ນວ່າ: “ເອົາລາວໄປຄຶງໄວ້ເທິງເສົາ!” ປີລາດຈຶ່ງຍອມໃຫ້ເຂົາເຈົ້າເອົາພະເຢຊູໄປປະຫານ.
ພວກທະຫານພາພະເຢຊູໄປບ່ອນໜຶ່ງທີ່ຊື່ວ່າໂຄລະໂຄທາ ແລ້ວຕອກເພິ່ນຕິດກັບເສົາຕົ້ນໜຶ່ງແລະຍົກເສົານັ້ນຂຶ້ນ. ພະເຢຊູອະທິດຖານວ່າ: “ພໍ່ເອີ້ຍ ຍົກໂທດໃຫ້ເຂົາເຈົ້າແດ່ ເຂົາເຈົ້າບໍ່ຮູ້ວ່າກຳລັງເຮັດຫຍັງຢູ່.” ຜູ້ຄົນພາກັນເຍາະເຍີ້ຍພະເຢຊູວ່າ: ‘ຖ້າເຈົ້າເປັນລູກຂອງພະເຈົ້າແທ້ໆກະລົງມາຈາກເສົາທໍລະມານທະແມ້! ຊ່ວຍໂຕເອງໃຫ້ລອດແມ້!’
ຄົນຮ້າຍຜູ້ໜຶ່ງທີ່ຖືກຄຶງຢູ່ທາງຂ້າງພະເຢຊູເວົ້າວ່າ: “ຕອນທີ່ທ່ານໄດ້ເປັນກະສັດ ຢ່າລືມຂ້ອຍເດີ້.” ພະເຢຊູສັນຍາກັບລາວວ່າ: “ເຈົ້າຈະໄດ້ຢູ່ກັບຂ້ອຍໃນອຸທິຍານແນ່ນອນ.” ຕອນບ່າຍຂອງມື້ນັ້ນ ທ້ອງຟ້າກໍມືດແທ້ມືດວ່າດົນຮອດ 3 ຊົ່ວໂມງ. ມີລູກສິດບາງຄົນຢືນຢູ່ໃກ້ໆເສົາທໍລະມານຂອງພະເຢຊູ ແລະມາຣິອາແມ່ຂອງເພິ່ນກໍຢູ່ຫັ້ນນຳ. ພະເຢຊູບອກໂຢຮັນໃຫ້ເບິ່ງແຍງມາຣິອາຄືກັບເປັນແມ່ຂອງລາວເອງ.
ໃນທີ່ສຸດ ພະເຢຊູກໍເວົ້າວ່າ: “ສຳເລັດແລ້ວ!” ຈາກນັ້ນ ຄໍເພິ່ນກໍພັບລົງ ແລ້ວເພິ່ນກໍຕາຍ. ຕອນນັ້ນເກີດແຜ່ນດິນໄຫວຮຸນແຮງຂຶ້ນ. ຜ້າກັ້ງທີ່ຍາວແລະໜັກຫຼາຍເຊິ່ງຂັ້ນລະຫວ່າງຫ້ອງບໍລິສຸດກັບຫ້ອງບໍລິສຸດທີ່ສຸດໃນວິຫານກໍຈີກເຄິ່ງເປັນ 2 ຕ່ອນຕັ້ງແຕ່ເທິງລົງລຸ່ມ. ນາຍທະຫານຄົນໜຶ່ງເວົ້າວ່າ: “ຜູ້ນີ້ເປັນລູກຂອງພະເຈົ້າແທ້ໆ.”
“ພະເຢຊູເຮັດໃຫ້ຄຳສັນຍາຂອງພະເຈົ້າທຸກເລື່ອງເກີດຂຶ້ນແທ້.”—2 ໂກຣິນໂທ 1:20