ອົງການແລະວຽກທີ່ເຂົາເຈົ້າເຮັດທົ່ວໂລກ
ມີການໃຊ້ຫຼາຍແນວທາງເພື່ອຊີ້ນຳວຽກງານໃຫ້ຄຳພະຍານເຊິ່ງກຳລັງເຮັດຢູ່ຫຼາຍກວ່າ 230 ດິນແດນ. ການຊີ້ນຳທັງໝົດມາຈາກຄະນະກຳມະການປົກຄອງທີ່ສຳນັກງານໃຫຍ່ຢູ່ບຣຸກລິນ ນິວຢອກ. ທຸກປີ ຄະນະກຳມະການປົກຄອງໄດ້ສົ່ງຕົວແທນໄປຂົງເຂດຕ່າງໆທົ່ວໂລກ ເພື່ອຫາລືກັບຜູ້ແທນສາຂາໃນຂົງເຂດນັ້ນ. ໃນສຳນັກງານສາຂາມີຄະນະກຳມະການສາຂາປະມານ 3 ເຖິງ 7 ຄົນ ເພື່ອເອົາໃຈໃສ່ວຽກໃນເຂດທີ່ຕົນຮັບຜິດຊອບຢູ່. ບາງສາຂາມີໂຮງພິມ ສາຂາບາງບ່ອນກໍມີເຄື່ອງພິມປະເພດ “ໂຣຕາຣີ” ທີ່ມີຄວາມໄວສູງ. ມີການແບ່ງປະເທດຫຼືພື້ນທີ່ແຕ່ລະສາຂາຮັບຜິດຊອບອອກເປັນຫຼາຍພາກ ແລ້ວພາກຕ່າງໆຈະແບ່ງເປັນຫຼາຍໝວດ. ແຕ່ລະໝວດມີປະມານ 20 ປະຊາຄົມ. ຜູ້ດູແລພາກຈະຫມູນວຽນໄປຢາມໝວດຕ່າງໆໃນພາກຂອງເຂົາເຈົ້າ. ແຕ່ລະໝວດຈະຈັດການປະຊຸມໃຫຍ່ປີລະ 2 ເທື່ອ. ນອກຈາກນັ້ນ ຍັງມີຜູ້ດູແລໝວດ ເຊິ່ງຈະຢາມແຕ່ລະປະຊາຄົມໃນໝວດຂອງລາວປີລະສອງເທື່ອເປັນປະຈຳ ເພື່ອຊ່ວຍເຫຼົ່າພະຍານໃນການຈັດລະບຽບແລະເຮັດວຽກການປະກາດໃນເຂດທີ່ປະຊາຄົມນັ້ນໄດ້ຮັບມອບໝາຍ.
ປະຊາຄົມທ້ອງຖິ່ນກັບຫໍປະຊຸມເປັນສູນກາງໃນການບອກຂ່າວດີໃນຊຸມຊົນຂອງເຈົ້າ. ມີການແບ່ງພື້ນທີ່ເຊິ່ງຢູ່ໃນການຮັບຜິດຊອບຂອງປະຊາຄົມອອກເປັນເຂດນ້ອຍໆ. ມີການມອບເຂດໃຫ້ພະຍານທີ່ພະຍາຍາມໄປຢາມແລະເວົ້າລົມກັນກັບຜູ້ຄົນທຸກເຮືອນໃນເຂດນັ້ນ. ແຕ່ລະປະຊາຄົມມີພະຍານຈຳນວນບໍ່ຈັກຄົນຈົນຮອດ 200 ຄົນ ມີຜູ້ເຖົ້າແກ່ທີ່ໄດ້ຮັບມອບໝາຍໃຫ້ເບິ່ງແຍງວຽກງານຕ່າງໆ. ຜູ້ປະກາດຂ່າວດີທຸກຄົນມີຄວາມສຳຄັນຕໍ່ອົງການຂອງພະຍານພະເຢໂຫວາ. ພະຍານທຸກຄົນ ບໍ່ວ່າເຂົາເຈົ້າຈະຮັບໃຊ້ໃນສຳນັກງານໃຫຍ່, ໃນສຳນັກງານສາຂາ, ຫຼືໃນປະຊາຄົມ ຕ່າງກໍເຮັດວຽກການບອກຄົນອື່ນເປັນສ່ວນຕົວກ່ຽວກັບລາຊະອານາຈັກຂອງພະເຈົ້າ.
ໃນທີ່ສຸດ ລາຍງານກ່ຽວກັບວຽກງານນີ້ຈະຖືກສົ່ງເຂົ້າສຳນັກງານໃຫຍ່ເພື່ອຮຽບຮຽງແລະຈັດພິມລົງໃນປຶ້ມປະຈຳປີ (ພາສາອັງກິດ). ປຶ້ມນີ້ມີລາຍງານຢ່າງລະອຽດກ່ຽວກັບສິ່ງທີ່ເຮັດສຳເລັດແລ້ວໃນແຕ່ລະປີຂອງການໃຫ້ຄຳພະຍານເລື່ອງພະເຢໂຫວາແລະລາຊະອານາຈັກຂອງພະອົງທີ່ພະເຍຊູຄລິດເປັນກະສັດ. ບໍ່ຈັກປີມານີ້ ພະຍານແລະຜູ້ສົນໃຈປະມານ 17.000.000 ຄົນ ໄດ້ເຂົ້າຮ່ວມການປະຊຸມອະນຸສອນທີ່ຈັດຂຶ້ນເປັນປະຈຳທຸກໆປີເພື່ອລະນຶກເຖິງການຕາຍຂອງພະເຍຊູ. ພະຍານພະເຢໂຫວາໃຊ້ເວລາຫຼາຍກວ່າ 1.000.000.000 ຊົ່ວໂມງຕໍ່ປີເພື່ອປະກາດຂ່າວດີ ແລະຄົນໃໝ່ຫຼາຍກວ່າ 300.000 ຄົນຮັບບັບເຕມາ. ຍອດລວມຂອງປຶ້ມຕ່າງໆທີ່ແຈກຈ່າຍອອກໄປມີຫຼາຍຮ້ອຍລ້ານຫົວ.