ບົດທີ 1
ຂ້ອຍຈະເວົ້າລົມກັບພໍ່ແມ່ໄດ້ແນວໃດ?
“ຂ້ອຍພະຍາຍາມເອົາແທ້ເອົາວ່າທີ່ຈະບອກພໍ່ແມ່ກ່ຽວກັບຄວາມຮູ້ສຶກຂອງຂ້ອຍ ແຕ່ຂ້ອຍບໍ່ຮູ້ຈະເວົ້າແນວໃດ ແລະພວກເພິ່ນກໍຕັດຄວາມຂ້ອຍໂລດ. ຂ້ອຍຕ້ອງເກັບໂຮມຄວາມກ້າຫານຫຼາຍເພື່ອຈະເວົ້າຄວາມຮູ້ສຶກອອກມາ ແລະມັນກໍຫຼົມແຫຼວຢ່າງສິ້ນເຊີງ!”—ນາງ ໂຣຊາ.
ຕອນທີ່ເຈົ້າອາຍຸນ້ອຍກວ່ານີ້ ພໍ່ແມ່ອາດເປັນຄົນທຳອິດທີ່ເຈົ້າຈະເຂົ້າຫາເພື່ອຂໍຄຳແນະນຳ. ເຈົ້າຈະບອກເພິ່ນບໍ່ວ່າຈະເປັນເລື່ອງໃຫຍ່ຫຼືເລື່ອງນ້ອຍ. ເຈົ້າສະແດງຄວາມຄິດເຫັນແລະຄວາມຮູ້ສຶກໄດ້ຢ່າງເສລີ ແລະເຈົ້າກໍໝັ້ນໃຈໃນຄຳແນະນຳຂອງພວກເພິ່ນ.
ແຕ່ຕອນນີ້ເຈົ້າອາດຈະຮູ້ສຶກວ່າພໍ່ແມ່ບໍ່ເຂົ້າໃຈເຈົ້າເລີຍ. ຍິງສາວຄົນໜຶ່ງຊື່ອາເດເລົ່າວ່າ: “ໃນແລງມື້ໜຶ່ງຕອນກິນເຂົ້າ ຂ້ອຍເລີ່ມຮ້ອງໄຫ້ແລະລະບາຍຄວາມຮູ້ສຶກຂອງຕົນອອກມາ. ພໍ່ແມ່ຮັບຟັງ ແຕ່ເບິ່ງຄືວ່າພວກເພິ່ນບໍ່ເຂົ້າໃຈ ຂ້ອຍເລີຍ.” ຜົນເປັນແນວໃດ? “ຂ້ອຍກໍເລີຍຍ່າງເຂົ້າໄປໃນຫ້ອງນອນແລະຮ້ອງໄຫ້ຕໍ່!”
ໃນທາງກົງກັນຂ້າມ ບາງຄັ້ງເຈົ້າອາດບໍ່ ຢາກເວົ້າຢ່າງເປີດເຜີຍນຳພໍ່ແມ່. ຊາຍໜຸ່ມຊື່ຄລິດສະໂຕເຟີເລົ່າວ່າ: “ຂ້ອຍເວົ້າລົມກັບພໍ່ແມ່ໃນຫຼາຍເລື່ອງ ແຕ່ຂ້ອຍກໍພັດມັກທີ່ວ່າບາງຄັ້ງເພິ່ນບໍ່ຮູ້ຄວາມໃນໃຈຂອງຂ້ອຍທັງໝົດ.”
ເປັນສິ່ງຜິດບໍທີ່ຈະບໍ່ເປີດເຜີຍຄວາມຄິດບາງເລື່ອງໃຫ້ຄົນອື່ນຮູ້? ບໍ່ຜິດສະເໝີໄປ ຕາບໃດທີ່ເຈົ້າບໍ່ມີເຈຕະນາຈະຫຼອກລວງ. (ສຸພາສິດ 3:32) ແນວໃດກໍຕາມ ແມ່ນກະທັ່ງເບິ່ງຄືວ່າພໍ່ແມ່ບໍ່ເຂົ້າໃຈເຈົ້າຫຼືເຈົ້າບໍ່ຢາກເປີດເຜີຍຄວາມຮູ້ສຶກ ແຕ່ມີສິ່ງໜຶ່ງທີ່ແນ່ນອນນັ້ນຄື ເຈົ້າຈຳເປັນຕ້ອງເວົ້າກັບພໍ່ແມ່ ແລະພວກເພິ່ນກໍຈຳເປັນຕ້ອງໄດ້ຍິນຈາກເຈົ້າ.
ເວົ້າລົມກັນເປັນປະຈຳ!
ໃນບາງແງ່ ການເວົ້າລົມກັບພໍ່ແມ່ເປັນຄືກັບການຂັບລົດ. ຖ້າເຈົ້າເຈິອຸປະສັກກີດຂວາງເທິງຫົນທາງ ເຈົ້າຄົງບໍ່ມີແຕ່ຈອດລົດໄວ້ເທົ່ານັ້ນ ແຕ່ຈະຫາເສັ້ນທາງລ່ຽງ. ຂໍໃຫ້ພິຈາລະນາສອງຕົວຢ່າງ.
ອຸປະສັກຂໍ້ທີ 1 ເຈົ້າຢາກເວົ້າ ແຕ່ເບິ່ງຄືວ່າພໍ່ແມ່ບໍ່ຟັງ. ຍິງສາວຄົນໜຶ່ງຊື່ເລອາບອກວ່າ: “ຂ້ອຍຮູ້ສຶກວ່າເປັນເລື່ອງຍາກທີ່ຈະເວົ້າກັບພໍ່. ບາງຄັ້ງຂ້ອຍເວົ້າກັບພໍ່ໄປໄດ້ໄລຍະໜຶ່ງແລ້ວພໍ່ຈະເວົ້າວ່າ: ‘ໂອ້ ຂໍໂທດໆ ລູກກຳລັງເວົ້ານຳພໍ່ບໍ?’”
ຄຳຖາມ ເລອາຈຳເປັນຕ້ອງໄດ້ປຶກສາບັນຫາແທ້ໆ ລາວຄວນເຮັດແນວໃດ? ຢ່າງໜ້ອຍລາວມີສາມທາງເລືອກ.
ທາງເລືອກ ກ
ຮ້ອງໃສ່ພໍ່. ເລອາຮ້ອງສຽງດັງວ່າ: “ໂອ້ຍ ນີ້ເປັນເລື່ອງສຳຄັນໄດ໋! ຟັງລູກແດ່ແມະ!”
ທາງເລືອກ ຂ
ບໍ່ເວົ້ານຳພໍ່ເລີຍ. ເລອາອາດຈະບໍ່ພະຍາຍາມເວົ້າລົມເລື່ອງບັນຫາຂອງຕົນກັບພໍ່ເລີຍ.
ທາງເລືອກ ຄ
ລໍຖ້າຈົນຮອດໂອກາດທີ່ດີກວ່າແລ້ວຈຶ່ງຄ່ອຍເວົ້າເລື່ອງນີ້. ເລອາອາດເວົ້າກັບພໍ່ໂດຍກົງໃນເວລາຕໍ່ມາ ຫຼືລາວຂຽນຈົດໝາຍເລົ່າບັນຫາຂອງຕົນໃຫ້ພໍ່ຮູ້.
ເຈົ້າ ຄິດວ່າເລອາຄວນເລືອກເຮັດທາງເລືອກຂໍ້ໃດ? ․․․․․
ຂໍໃຫ້ວິເຄາະເບິ່ງວ່າທາງເລືອກແຕ່ລະທາງອາດກໍ່ຜົນແນວໃດ.
ພໍ່ຂອງເລອາພວມສົນໃຈໃນເລື່ອງອື່ນ ແລະບໍ່ໄດ້ສັງເກດວ່າລູກສາວຂັດຂ້ອງໃຈ. ຖ້າເລອາໃຊ້ທາງເລືອກ (ກ) ພໍ່ອາດບໍ່ເຂົ້າໃຈວ່າເປັນຫຍັງເລອາຈຶ່ງຮ້ອງດັງໆໃສ່ລາວ. ທາງເລືອກນີ້ແຮ່ງຈະເຮັດໃຫ້ພໍ່ຂອງເລອາບໍ່ຟັງລາວ ແລະການເຮັດແບບນັ້ນກໍບໍ່ໄດ້ສະແດງຄວາມນັບຖືແລະໃຫ້ກຽດພໍ່ແມ່. (ເອເຟດ 6:2) ສະນັ້ນ ທີ່ຈິງແລ້ວທາງເລືອກຂໍ້ນີ້ບໍ່ໄດ້ເຮັດໃຫ້ອັນໃດດີຂຶ້ນ.
ເຖິງແມ່ນວ່າທາງເລືອກ (ຂ) ອາດຈະເປັນວິທີທີ່ງ່າຍທີ່ສຸດ ແຕ່ກໍບໍ່ແມ່ນວິທີທີ່ສະຫຼາດທີ່ສຸດ. ເພາະເຫດໃດ? ເນື່ອງຈາກວ່າ: “ໄຮ້ທີ່ປຶກສາແລ້ວແຜນການກໍຫຼົ້ມຈົມ.” (ສຸພາສິດ 15:22, ທ.ປ.) ເພື່ອຈະຈັດການກັບບັນຫານີ້ໃຫ້ສຳເລັດ ເລອາຕ້ອງເວົ້າກັບພໍ່ ແລະເພື່ອທີ່ພໍ່ຈະຊ່ວຍໄດ້ ເພິ່ນກໍຕ້ອງຮູ້ສິ່ງທີ່ເກີດຂຶ້ນໃນຊີວິດຂອງລາວ. ການບໍ່ເວົ້າກໍບໍ່ໄດ້ເຮັດໃຫ້ອັນໃດດີຂຶ້ນ.
ແນວໃດກໍຕາມຖ້າເລອາໃຊ້ທາງເລືອກ (ຄ) ລາວບໍ່ໄດ້ຍອມໃຫ້ສິ່ງກີດຂວາງເທິງຫົນທາງພາໃຫ້ກາຍເປັນທາງຕັນ. ເລອາຈະພະຍາຍາມເວົ້າເລື່ອງນັ້ນໃນໂອກາດອື່ນ. ແລະຖ້າລາວເລືອກທີ່ຈະຂຽນຈົດໝາຍໃຫ້ພໍ່ ເລອາອາດຈະຮູ້ສຶກສະບາຍໃຈຂຶ້ນໂດຍທັນທີໂລດ. ການຂຽນຈົດໝາຍອາດຊ່ວຍລາວໃຫ້ຮຽບຮຽງຄຳເວົ້າທີ່ລາວຢາກຈະເວົ້າກັບພໍ່. ເມື່ອອ່ານຈົດໝາຍ ພໍ່ຈະຮູ້ວ່າເລອາພະຍາຍາມຈະບອກຫຍັງໃຫ້ເພິ່ນຟັງ ເຊິ່ງອາດຊ່ວຍຜູ້ເປັນພໍ່ໃຫ້ເຂົ້າໃຈບັນຫາຂອງເລອາໄດ້ດີຂຶ້ນ. ດັ່ງນັ້ນ ທາງເລືອກ (ຄ) ຈຶ່ງເປັນປະໂຫຍດຕໍ່ທັງເລອາແລະພໍ່.
ເລອາອາດມີທາງເລືອກອັນໃດອີກ? ລອງເບິ່ງດູວ່າເຈົ້າຈະຄິດພໍ້ຈັກທາງເລືອກໜຶ່ງບໍ ແລະໃຫ້ຂຽນລົງທາງລຸ່ມນີ້. ຈາກນັ້ນໃຫ້ຂຽນວ່າທາງເລືອກຂໍ້ນັ້ນ ຄົງຈະເກີດຜົນແບບໃດ.
․․․․․
ອຸປະສັກຂໍ້ທີ 2 ພໍ່ແມ່ຢາກເວົ້ານຳ ແຕ່ເຈົ້າພັດບໍ່ຢາກເວົ້ານຳ. ຍິງສາວຊື່ຊາຣາບອກວ່າ: “ບໍ່ມີຫຍັງໂຫດຮ້າຍໄປກວ່າການຖືກຖາມດ້ວຍຄຳຖາມຕ່າງໆທັນທີທີ່ກັບມາແຕ່ໂຮງຮຽນ. ຂ້ອຍຢາກຈະລືມເລື່ອງຢູ່ໂຮງຮຽນ ແຕ່ທັນທີທັນໃດພໍ່ແມ່ກໍເລີ່ມຕົ້ນຖາມວ່າ: ‘ມື້ນີ້ລູກເປັນແນວໃດແດ່? ມື້ນີ້ມີບັນຫາຫຍັງບໍ?’” ແນ່ນອນວ່າພໍ່ແມ່ຂອງຊາຣາຖາມດ້ວຍເຈຕະນາທີ່ດີ. ເຖິງຢ່າງນັ້ນກໍຕາມ ລາວຈົ່ມວ່າ: “ເປັນເລື່ອງຍາກທີ່ຈະເລົ່າເລື່ອງກ່ຽວກັບໂຮງຮຽນເມື່ອຂ້ອຍເມື່ອຍແລະເຄັ່ງຕຶງ.”
ຄຳຖາມ ຊາຣາອາດຈະຮັດແນວໃດໃນສະຖານະການເຊັ່ນນີ້? ຄືກັບຕົວຢ່າງກ່ອນໜ້ານີ້ ຢ່າງໜ້ອຍຊາຣາມີສາມທາງເລືອກ.
ທາງເລືອກ ກ
ບໍ່ຍອມເວົ້າ. ຊາຣາເວົ້າວ່າ: “ປ່ອຍໃຫ້ລູກຢູ່ຄົນດຽວໄດ້ບໍ່. ລູກບໍ່ຕ້ອງການເວົ້າໃນຕອນນີ້!”
ທາງເລືອກ ຂ
ຝືນໃຈເວົ້າ. ເຖິງວ່າຮູ້ສຶກເຄັ່ງຕຶງ ຊາຣາຕອບຄຳຖາມຂອງພໍ່ແມ່ດ້ວຍຄວາມບໍ່ພໍໃຈ.
ທາງເລືອກ ຄ
ໂຈະການເວົ້າເລື່ອງ “ໂຮງຮຽນ” ໄວ້ກ່ອນ ແຕ່ປ່ຽນໄປເວົ້າເລື່ອງອື່ນແທນ. ຊາຣາສະເໜີວ່າໃຫ້ເວົ້າເລື່ອງໂຮງຮຽນໃນຕອນອຶ່ນເພາະລາວຮູ້ວ່າຕົນເອງຈະອາລົມດີຂຶ້ນ. ຈາກນັ້ນຊາຣາກໍເວົ້າດ້ວຍຄວາມສົນໃຈຢ່າງແທ້ຈິງວ່າ: “ພໍ່ແມ່ ເດມື້ນີ້ເປັນຈັ່ງໃດ?”
ເຈົ້າ ຄິດວ່າຊາຣາຄວນເລືອກເຮັດທາງເລືອກຂໍ້ໃດ? ․․․․․
ອີກຄັ້ງໜຶ່ງ ຂໍໃຫ້ວິເຄາະເບິ່ງວ່າແຕ່ລະທາງເລືອກອາດກໍ່ຜົນແນວໃດ.
ຊາຣາເຄັງຕືງແລະບໍ່ມີທ່າທີທີ່ຕ້ອງການຢາກເວົ້າ. ຖ້າຊາຣາເລືອກໃຊ້ທາງເລືອກ (ກ) ລາວຄົງຈະຍັງຮູ້ສຶກເຄັ່ງຕຶງຢູ່ ຊ້ຳບໍ່ໜຳລາວກໍຈະຮູ້ສຶກຜິດຕື່ມອີກທີ່ໃຊ້ຄຳເວົ້າຮຸນແຮງຕໍ່ພໍ່ແມ່.—ສຸພາສິດ 29:11.
ໃນຂະນະດຽວກັນ ພໍ່ແມ່ຂອງຊາຣາຄົງຈະຮູ້ສຶກບໍ່ພໍໃຈກັບການກະທຳແບບນັ້ນ ແລະຄວາມມິດງຽບທີ່ຕິດຕາມມາ. ພໍ່ແມ່ອາດສົງໄສວ່າຊາຣາກຳລັງປິດບັງບາງຢ່າງໄວ້ ດັ່ງນັ້ນ ພໍ່ແມ່ອາດພະຍາຍາມຫຼາຍຂຶ້ນທີ່ຈະໃຫ້ຊາຣາເວົ້າ ເຊິ່ງແນ່ນອນວ່າຈະເຮັດໃຫ້ລາວຂັດຂ້ອງໃຈຫຼາຍກວ່າເກົ່າ. ໃນທີ່ສຸດທາງເລືອກຂໍ້ນີ້ບໍ່ໄດ້ຊ່ວຍໃຫ້ດີຂຶ້ນ.
ເຫັນໄດ້ແຈ້ງວ່າທາງເລືອກ (ຂ) ດີກວ່າທາງເລືອກ (ກ). ເພາະວ່າ ຢ່າງໜ້ອຍຊາຣາກັບພໍ່ແມ່ກໍໄດ້ລົມກັນ. ແຕ່ເນື່ອງຈາກການເວົ້າລົມນັ້ນບໍ່ໄດ້ອອກມາຈາກໃຈ ດັ່ງນັ້ນທັງຊາຣາແລະພໍ່ແມ່ຈຶ່ງບໍ່ໄດ້ຮັບໃນສິ່ງທີ່ຕົນຕ້ອງການ ນັ້ນຄືການສົນທະນາແບບເປີດໃຈແລະຜ່ອນຄາຍ.
ແນວໃດກໍຕາມເມື່ອໃຊ້ທາງເລືອກ (ຄ) ຊາຣາຄົງຮູ້ສຶກດີຂຶ້ນເພາະການລົມກັນໃນເລື່ອງ “ໂຮງຮຽນ” ຖືກເລື່ອນອອກໄປໃນຕອນນີ້. ພໍ່ແມ່ຄົງຈະພໍໃຈທີ່ຊາຣາພະຍາຍາມເວົ້າລົມ ດັ່ງນັ້ນພໍ່ແມ່ຈຶ່ງຮູ້ສຶກດີເຊັ່ນກັນ. ທາງເລືອກຂໍ້ນີ້ຄົງຈະເປັນໂອກາດທີ່ດີທີ່ສຸດເພາະທັງສອງຝ່າຍໃຊ້ຫຼັກການທີ່ຢູ່ໃນຟີລິບ 2:4 ເຊິ່ງກ່າວວ່າ: “ຢ່າໃຫ້ຜູ້ໜຶ່ງຜູ້ໃດເບິ່ງແຕ່ສິ່ງທັງຫຼາຍຂອງຕົນເອງເທົ່ານັ້ນ ແຕ່ວ່າໃຫ້ເບິ່ງສິ່ງທັງຫຼາຍຂອງຜູ້ອື່ນດ້ວຍ.”
ຫຼີກລ່ຽງການສື່ຄວາມທີ່ບໍ່ຈະແຈ້ງ
ຂໍໃຫ້ຈື່ໄວ້ວ່າ ຄຳເວົ້າທີ່ເຈົ້າເວົ້າແລະສິ່ງທີ່ພໍ່ແມ່ເຂົ້າໃຈບໍ່ແມ່ນຈະເປັນແບບດຽວກັນສະເໝີໄປ. ຕົວຢ່າງເຊັ່ນ ຖ້າພໍ່ແມ່ຖາມວ່າເປັນຫຍັງເບິ່ງຄືວ່າອາລົມບໍ່ດີ. ເຈົ້າຕອບວ່າ: “ລູກບໍ່ຢາກເວົ້າເລື່ອງນີ້.” ແຕ່ພໍ່ແມ່ພັດຟັງວ່າ: “ລູກບໍ່ໄວ້ວາງໃຈພໍ່ (ແມ່) ຫຼາຍພໍທີ່ຈະບອກຄວາມລັບນີ້. ລູກຈະເລົ່າໃຫ້ໝູ່ເພື່ອນຟັງແຕ່ບໍ່ແມ່ນກັບພໍ່ (ແມ່).” ພະຍາຍາມເຮັດບົດຝຶກຫັດນີ້ໂດຍການຂຽນຄຳຕອບຂອງເຈົ້າ. ຂໍໃຫ້ນຶກພາບວ່າເຈົ້າກຳລັງປະເຊີນກັບບັນຫາຢ່າງໜຶ່ງທີ່ຫຍຸ້ງຍາກແລະພໍ່ແມ່ສະເໜີທີ່ຈະຊ່ວຍເຫຼືອ.
ຖ້າເຈົ້າເວົ້າວ່າ: “ບໍ່ຕ້ອງເປັນຫ່ວງ. ລູກແກ້ໄຂເອງໄດ້.”
ພໍ່ແມ່ຂອງເຈົ້າອາດຟັງວ່າ: ․․․․․
ຄຳຕອບທີ່ດີກວ່າຈາກເຈົ້າອາດຈະເປັນ ․․․․․
ອັນໃດເປັນສິ່ງສຳຄັນທີ່ສຸດທີ່ເຈົ້າຄວນຈື່ໄວ້? ໃຫ້ເລືອກຄຳເວົ້າຢ່າງລະອຽດຖີ່ຖ້ວນ. ກ່າວຖ້ອຍຄຳເຫຼົ່ານັ້ນດ້ວຍສຽງສຳນຽງທີ່ສະແດງຄວາມເຄົາລົບນັບຖື. (ໂກໂລດ 4:6) ໃຫ້ຄິດວ່າພໍ່ແມ່ເປັນມິດ ບໍ່ແມ່ນເປັນສັດຕູ. ເປັນຄວາມຈິງທີ່ວ່າ ເຈົ້າຕ້ອງໄດ້ຮັບຄວາມຊ່ວຍເຫຼືອທຸກຢ່າງທີ່ເຈົ້າສາມາດຮັບໄດ້ເພື່ອປະສົບຜົນສຳເລັດໃນສະພາບການຕ່າງໆທີ່ຫຍຸ້ງຍາກເຊິ່ງເຈົ້າຈະພົບພໍ້.
ຈະວ່າແນວໃດຖ້າການເວົ້າລົມກັບພໍ່ແມ່ບໍ່ແມ່ນບັນຫາ ແຕ່ບັນຫາກໍຄືວ່າທຸກເທື່ອທີ່ເວົ້າລົມກັນ ຖຽງກັນໂລດ?
ຂໍ້ພະຄຳພີຫຼັກ
“ຄຳເວົ້າທັງໝົດຂອງຂ້ອຍຈິງໃຈແລະສັດຊື່.”—ໂຢບ 33:3, ທ.ປ.
ຄຳແນະນຳ
ຖ້າເຈົ້າຮູ້ສຶກວ່າມັນເປັນເລື່ອງຍາກທີ່ຈະນັ່ງລົງແລະເວົ້າກັບພໍ່ (ແມ່) ກ່ຽວກັບບັນຫາຢ່າງໜຶ່ງ ໃຫ້ເວົ້າລົມເລື່ອງນັ້ນຕອນໄປຍ່າງຫຼິ້ນ ຕອນນັ່ງໃນລົດ ຫຼືຕອນຊື້ເຄື່ອງນຳກັນ.
ເຈົ້າຮູ້ບໍ . . .?
ໃນຂະນະທີ່ເຈົ້າອາດຮູ້ສຶກວ່າເປັນເລື່ອງຍາກທີ່ຈະເວົ້າກັບພໍ່ແມ່ກ່ຽວກັບເລື່ອງຕ່າງໆທີ່ຈິງຈັງ ພໍ່ແມ່ກໍອາດຮູ້ສຶກອຶດອັດແລະຂາດຄວາມສາມາດເມື່ອພະຍາຍາມເວົ້າກັບເຈົ້າກ່ຽວກັບເລື່ອງດຽວກັນນັ້ນ.
ແຜນພາກປະຕິບັດ!
ເທື່ອໜ້າເມື່ອຂ້ອຍຮູ້ສຶກວ່າຈະຢຸດລົມນຳພໍ່ແມ່ ຂ້ອຍຈະ ․․․․․
ຖ້າພໍ່ແມ່ຊຸກດັນຂ້ອຍໃຫ້ເວົ້າໃນເລື່ອງທີ່ຂ້ອຍບໍ່ເຕັມໃຈຈະເວົ້າ ຂ້ອຍຈະບອກວ່າ: ․․․․․
ສິ່ງທີ່ຂ້ອຍຢາກຖາມພໍ່ (ແມ່) ກ່ຽວກັບເລື່ອງນີ້ແມ່ນ ․․․․․
ເຈົ້າຄິດວ່າແນວໃດ?
• ເຈົ້າຄິດວ່າການເລືອກຈັງຫວະເວລາທີ່ເໝາະສົມມີຄວາມສຳຄັນແນວໃດໃນການສື່ຄວາມທີ່ດີ?—ສຸພາສິດ 25:11.
• ເປັນຫຍັງການພະຍາຍາມເວົ້າລົມກັບພໍ່ແມ່ຈຶ່ງຄຸ້ມຄ່າ?—ໂຢບ 12:12.
[ຈຸດເດັ່ນໜ້າ 10]
“ການສື່ຄວາມກັບພໍ່ແມ່ບໍ່ງ່າຍສະເໝີໄປ ແຕ່ເມື່ອເຈົ້າເປີດໃຈແລະເວົ້າກັບພໍ່ແມ່ ເຈົ້າຮູ້ສຶກຄືກັບວ່າເອົາໝາກໂຕ້ນຊິງທີ່ໃຫຍ່ຫຼາຍຍົກອອກຈາກໃຈເຈົ້າ.”—ນາງ ເດເວີເນ
[ຮູບພາບໜ້າ 8]
ທາງທີ່ມີສິ່ງກີດຂວາງບໍ່ຈຳເປັນຕ້ອງກາຍເປັນທາງຕັນ ເຈົ້າອາດພົບວິທີທີ່ຈະຜ່ານມັນໄປໄດ້ແລະສາມາດເວົ້າລົມກັບພໍ່ແມ່!