ຄຳຖາມທີ 3
ຂ້ອຍຈະລົມກັບພໍ່ແມ່ໄດ້ແນວໃດ?
ເຈົ້າ ຈະເຮັດແນວໃດ?
ໃຫ້ນຶກພາບເຫດການນີ້: ຕອນແລງມື້ໜຶ່ງຂອງວັນພຸດ. ທ້າວຈອນ ອາຍຸ 17 ປີ ໄດ້ເຮັດວຽກເຮືອນແລ້ວໆແລະຢາກພັກຜ່ອນເຊົາເມື່ອຍ! ລາວເປີດໂທລະທັດ ແລະນັ່ງລົງຕັ່ງທີ່ລາວມັກ.
ທັນໃດນັ້ນ ພໍ່ກໍຍ່າງເຂົ້າມາດ້ວຍອາລົມທີ່ບໍ່ດີແລະເວົ້າວ່າ:
“ຈອນ! ມາເສຍເວລາເບິ່ງໂທລະທັດເຮັດຫຍັງ ແທນທີ່ຈະໄປຊ່ວຍນ້ອງເຮັດວຽກບ້ານ? ເຈົ້ານິ ບອກເຮັດຫຍັງກໍບໍ່ເຮັດ!”
“ອີກແລ້ວ” ຈອນເວົ້າສຽງດັງພໍທີ່ພໍ່ໄດ້ຍິນ.
ພໍ່ເອນໂຕລົງແລ້ວເວົ້າວ່າ: “ຈົ່ມຫຍັງ ຈອນ?”
ຈອນຕອບວ່າ: “ບໍ່ມີຫຍັງ” ພ້ອມທັງຖອນຫາຍໃຈແລະເຮັດຕາຂຽວໃສ່.
ຕອນນີ້ພໍ່ໃຈຮ້າຍຫຼາຍແທ້ໆຈຶ່ງເວົ້າວ່າ: “ຢ່າໃຊ້ນ້ຳສຽງແບບນີ້ກັບພໍ່ໄດ໋!”
ຖ້າເຈົ້າເປັນຈອນ ເຈົ້າຈະເຮັດແນວໃດເພື່ອຈະບໍ່ປະທະກັບພໍ່ແບບນັ້ນ?
ຢຸດແລະຄິດ!
ການລົມກັບພໍ່ແມ່ກໍຄ້າຍກັບການຂັບລົດໃຫຍ່. ຖ້າເຈົ້າເຈິສິ່ງກີດຂວາງໃນຫົນທາງ ເຈົ້າກໍຈະໄປທາງອື່ນ.
ຕົວຢ່າງເຊັ່ນ:
ເລອາເວົ້າວ່າ: “ຂ້ອຍຮູ້ສຶກວ່າລົມກັບພໍ່ໄດ້ຍາກ ບາງຄັ້ງຂ້ອຍເວົ້າໄປດົນເຕີບ ແລ້ວເພິ່ນກໍຈະຖາມວ່າ ‘ລູກເວົ້າກັບພໍ່ບໍ?’”
ເລອາມີ 3 ທາງເລືອກ.
ກ ຮ້ອງໃສ່ພໍ່
ເລອາຮ້ອງໃສ່ແບບໃຈຮ້າຍວ່າ: “ຟັງແດ່ດຸ! ເລື່ອງສຳຄັນໄດ໋ນິ!”
ຂ ເຊົາເວົ້ານຳພໍ່
ເລອາເຊົາອອກຄວາມພະຍາຍາມທີ່ຈະເວົ້າເລື່ອງບັນຫາຂອງລາວໃຫ້ພໍ່ຟັງ.
ຄ ລໍຖ້າເວລາທີ່ເໝາະສົມແລ້ວຈຶ່ງເວົ້າເລື່ອງນັ້ນອີກ.
ເລອາເວົ້າກັບພໍ່ໂດຍກົງໃນເວລາຕໍ່ມາ ຫຼືຂຽນຈົດໝາຍເລົ່າໃຫ້ພໍ່ຟັງກ່ຽວກັບບັນຫາຂອງລາວ.
ເຈົ້າຈະແນະນຳໃຫ້ເລອາໃຊ້ທາງເລືອກໃດ?
ສິ່ງທີ່ໜ້າຄິດ: ພໍ່ຂອງເລອາກຳລັງສົນໃຈເລື່ອງອື່ນ ດັ່ງນັ້ນຈຶ່ງບໍ່ຮູ້ວ່າລູກສາວບໍ່ພໍໃຈ. ຖ້າໃຊ້ທາງເລືອກ ກ ພໍ່ອາດບໍ່ເຂົ້າໃຈວ່າເປັນຫຍັງເລອາຈຶ່ງຮ້ອງໃສ່ພໍ່. ທາງເລືອກນີ້ອາດຈະເຮັດໃຫ້ພໍ່ບໍ່ຟັງລາວ ແລະທັງບໍ່ໄດ້ສະແດງຄວາມນັບຖືແລະໃຫ້ກຽດພໍ່. (ເອເຟດ 6:2) ແທ້ໆແລ້ວທາງເລືອກຂໍ້ນີ້ບໍ່ໄດ້ເຮັດໃຫ້ອັນໃດດີຂຶ້ນເລີຍ.
ເມື່ອເຈິຫົນທາງທີ່ມີສິ່ງກີດຂວາງເຈົ້າສາມາດໄປທາງອື່ນໄດ້ ຄ້າຍຄືກັນເມື່ອມີບັນຫາເຈົ້າກໍສາມາດຫາທາງອອກແລະລົມກັບພໍ່ແມ່ໄດ້
ເບິ່ງຄືວ່າທາງເລືອກ ຂ ອາດຈະງ່າຍທີ່ສຸດ ແຕ່ບໍ່ແມ່ນວິທີທີ່ດີທີ່ສຸດ. ຍ້ອນຫຍັງ? ຍ້ອນວ່າເພື່ອຈະແກ້ບັນຫາໄດ້ ເລອາຕ້ອງລົມກັບພໍ່ ແລະເພື່ອຈະຊ່ວຍລາວໄດ້ ພໍ່ກໍຕ້ອງຮູ້ຈັກສິ່ງທີ່ເກີດຂຶ້ນກັບເລອາ. ການມິດຢູ່ກໍບໍ່ໄດ້ຊ່ວຍເລີຍ.
ສ່ວນທາງເລືອກ ຄ ເລອາບໍ່ຍອມໃຫ້ສິ່ງກີດຂວາງມາເຮັດໃຫ້ທາງນັ້ນຕັນ. ລາວພະຍາຍາມລົມເລື່ອງນັ້ນໃນເວລາອື່ນ. ແຕ່ຖ້າເລອາເລືອກຂຽນຈົດໝາຍເພື່ອເລົ່າໃຫ້ພໍ່ຟັງ ລາວອາດຮູ້ສຶກດີຂຶ້ນໂດຍທັນທີ.
ການຂຽນຈົດໝາຍອາດຊ່ວຍເລອາໃຫ້ຈັດລຽງຄຳເວົ້າທີ່ລາວຢາກເວົ້າກັບພໍ່. ເມື່ອອ່ານຈົດໝາຍ ພໍ່ກໍຈະຮູ້ສິ່ງທີ່ເລອາພະຍາຍາມຈະບອກ ເຊິ່ງອາດຊ່ວຍພໍ່ໃຫ້ເຂົ້າໃຈບັນຫາຂອງເລອາໄດ້ດີຂຶ້ນ. ທາງເລືອກ ຄ ຈຶ່ງເປັນປະໂຫຍດຕໍ່ທັງເລອາແລະພໍ່. ບໍ່ວ່າຈະເປັນການເວົ້າໂດຍກົງຫຼືການຂຽນຈົດໝາຍ ທາງເລືອກນີ້ເຮັດຕາມຄຳແນະນຳໃນຄຳພີໄບເບິນທີ່ວ່າ: “ໃຫ້ເຮົາຕັ້ງໃຈເຮັດສິ່ງທີ່ສ້າງສັນຕິສຸກ.”—ໂລມ 14:19, ລ.ມ.
ເລອາອາດມີທາງເລືອກໃດອີກ?
ຖ້າເຈົ້າຄິດວ່າມີທາງເລືອກອື່ນອີກ ໃຫ້ຂຽນໃສ່ທາງລຸ່ມນີ້. ຈາກນັ້ນໃຫ້ຂຽນວ່າຜົນທີ່ໄດ້ຮັບຈະເປັນແນວໃດ.
ຫຼີກລ່ຽງການເຮັດໃຫ້ເຂົ້າໃຈຜິດ
ຂໍໃຫ້ຈື່ວ່າ ສິ່ງທີ່ເຈົ້າເວົ້າກັບສິ່ງທີ່ພໍ່ແມ່ເຂົ້າໃຈອາດບໍ່ກົງກັນທຸກຄັ້ງ.
ຕົວຢ່າງເຊັ່ນ:
ເມື່ອພໍ່ແມ່ຖາມວ່າ ເປັນຫຍັງລູກເບິ່ງຄືອາລົມບໍ່ດີ. ເຈົ້າຕອບວ່າ: “ລູກບໍ່ຢາກເວົ້າເຖິງມັນ.”
ແຕ່ພໍ່ແມ່ອາດເຂົ້າໃຈວ່າເຈົ້າໝາຍເຖິງ: “ລູກບໍ່ໄວ້ວາງໃຈພໍ່ແມ່ຫຼາຍພໍທີ່ຈະເລົ່າເລື່ອງນີ້ໃຫ້ຟັງ. ລູກຈະເລົ່າໃຫ້ໝູ່ຟັງແຕ່ບໍ່ແມ່ນພໍ່ແມ່.”
ລອງນຶກພາບວ່າເຈົ້າກຳລັງມີບັນຫາທີ່ຍາກຫຼາຍແລະພໍ່ແມ່ກໍສະເໜີທີ່ຈະຊ່ວຍເຈົ້າ ແຕ່ເຈົ້າບອກວ່າ: “ບໍ່ເປັນຫຍັງ ລູກຈັດການເອງໄດ້.”
ພໍ່ແມ່ອາດເຂົ້າໃຈວ່າເຈົ້າໝາຍເຖິງຫຍັງ?
ຄຳຕອບທີ່ດີກວ່າຂອງເຈົ້າແມ່ນຫຍັງ?