ບົດທີ 2
ເປັນຫຍັງຂ້ອຍກັບພໍ່ແມ່ຈຶ່ງຖຽງກັນຕະຫຼອດ?
ໃນຕອນເລີ່ມຕົ້ນສາກເຫດການຂອງບົດນີ້ ຣາເຊວມີສ່ວນໃນການກໍ່ໃຫ້ເກີດການຖຽງກັນໃນສາມແງ່. ເຈົ້າລະບຸໄດ້ບໍ? ຂໍໃຫ້ຂຽນຄຳຕອບຂອງເຈົ້າໃສ່ທາງລຸ່ມນີ້ ແລະຈາກນັ້ນໃຫ້ສົມທຽບກັບຄຳຕອບທີ່ຢູ່ໃນຂອບທີ່ຊື່ວ່າ “ຄຳຕອບ” ໃນໜ້າທີ 20.
․․․․․
ເປັນຄືນວັນພຸດ. ນາງ ຣາເຊວ ອາຍຸ 17 ປີ ຫາກໍເຮັດວຽກເຮືອນແລ້ວແລະຢາກພັກຜ່ອນໃຫ້ເຊົາເມື່ອຍ! ລາວເປີດໂທລະພາບແລະນັ່ງຕັ່ງທີ່ມັກທີ່ສຸດ.
ຕອນນັ້ນແມ່ກໍຍ່າງເຂົ້າມາ ແລະເບິ່ງຄືວ່າແມ່ອາລົມບໍ່ດີ. “ຣາເຊວ! ເປັນຫຍັງເສຍເວລາກັບການເບິ່ງໂທລະພາບ ແທນທີ່ຈະຊ່ວຍນ້ອງສາວເຮັດວຽກບ້ານ? ເຈົ້າບໍ່ເຄີຍເຮັດໃນສິ່ງທີ່ແມ່ບອກເລີຍ!”
ຣາເຊວຈົ່ມສຽງດັງພໍທີ່ແມ່ຈະໄດ້ຍິນວ່າ: “ອີກແລ້ວ.”
ແມ່ເນີ້ງໂຕລົງມາພ້ອມກັບເວົ້າວ່າ: “ເວົ້າຫຍັງເກາະ ອີ່ຫຼ້າ?”
ຣາເຊວຕອບວ່າ: “ບໍ່ມີຫຍັງດອກແມ່” ພ້ອມທັງຖອນຫາຍໃຈແລະເຫຼືອກຕາຂຶ້ນ.
ຕອນນີ້ແມ່ໃຈຮ້າຍແທ້ໆ. ແມ່ເວົ້າວ່າ: “ຢ່າໃຊ້ນ້ຳສຽງແບບນັ້ນກັບແມ່ໄດ໋!”
ຣາເຊວຕອບຄືນທັນທີວ່າ: “ແລ້ວຊັ້ນນ້ຳສຽງທີ່ແມ່ກຳລັງໃຊ້ກັບລູກເດ?”
ໝົດເວລາພັກຜ່ອນ . . . ການຖຽງກັນກໍເລີ່ມຂຶ້ນ.
ເຫດການຂ້າງເທິງນີ້ຟັງເບິ່ງລຶ້ງຫູບໍ? ເຈົ້າແລະພໍ່ແມ່ຖຽງກັນຕະຫຼອດບໍ? ຖ້າເປັນດັ່ງນັ້ນ ຂໍໃຫ້ວິເຄາະສະພາບການຈັກບຶດໜຶ່ງ. ເລື່ອງໃດທີ່ພາໃຫ້ເກີດການຂັດແຍ່ງກັນຫຼາຍທີ່ສຸດ? ໃຫ້ໝາຍ ✔ ໃສ່ໃນປ່ອງທີ່ກົງກັບກໍລະນີຂອງເຈົ້າທີ່ສຸດ ຫຼືຂຽນເລື່ອງຂອງເຈົ້າໃນປ່ອງ “ອື່ນໆ.”
◻ ທັດສະນະ
◻ ວຽກເຮືອນ
◻ ເຄື່ອງນຸ່ງ
◻ ການເມືອເຮືອນຕາມເວລາທີ່ກຳນົດ
◻ ຄວາມບັນເທີງ
◻ ໝູ່ເພື່ອນ
◻ ເພດກົງກັນຂ້າມ
◻ ອື່ນໆ ․․․․․
ບໍ່ວ່າຈະເປັນເລື່ອງໃດ ການຖຽງກັນພາໃຫ້ເຈົ້າແລະ ພໍ່ແມ່ຮູ້ສຶກບໍ່ສະບາຍໃຈ. ແນ່ນອນວ່າເຈົ້າອາດມິດງຽບແລະເຮັດທຳທ່າວ່າເຫັນດີກັບທຸກສິ່ງທີ່ພໍ່ແມ່ເວົ້າ. ແຕ່ພະເຈົ້າຄາດໝາຍໃຫ້ເຈົ້າເຮັດແນວນັ້ນບໍ? ບໍ່. ແມ່ນຢູ່ຄຳພີໄບເບິນບອກວ່າໃຫ້ “ນັບຖືພໍ່ແມ່ຂອງເຈົ້າ.” (ເອເຟດ 6:2, 3) ແຕ່ຄຳພີໄບເບິນຍັງສະໜັບສະໜູນເຈົ້າໃຫ້ພັດທະນາ “ຄວາມສາມາດໃນການຄຶດ” ແລະໃຫ້ໃຊ້ “ຄວາມສາມາດໃນການໃຊ້ເຫດຜົນ.” (ສຸພາສິດ 1:1-4, ລ.ມ.; ໂລມ 12:1) ເມື່ອເຮັດເຊັ່ນນັ້ນ ເປັນສິ່ງທີ່ແນ່ນອນວ່າເຈົ້າຈະມີຄວາມເຊື່ອໝັ້ນທີ່ແຂງແກ່ນ ເຊິ່ງບາງຢ່າງກໍອາດແຕກຕ່າງຈາກພໍ່ແມ່. ແນວໃດກໍຕາມ ໃນຄອບຄົວທີ່ນຳໃຊ້ຫຼັກການຕ່າງໆໃນຄຳພີໄບເບິນ ພໍ່ແມ່ກັບລູກໄວຮຸ່ນສາມາດສື່ຄວາມກັນໄດ້ຢ່າງສັນຕິ ເຖິງແມ່ນວ່າບໍ່ ເຫັນດີນຳກັນໃນທຸກເລື່ອງ.—ໂກໂລດ 3:13.
ເຈົ້າຈະເວົ້າເຖິງຄວາມຮູ້ສຶກໄດ້ແນວໃດໂດຍທີ່ບໍ່ປ່ຽນໃຫ້ການສົນທະນາແບບທຳມະດາກາຍເປັນການຖຽງກັນແບບຮຸນແຮງ? ມັນງ່າຍທີ່ຈະເວົ້າວ່າ: “ບັນຫາຢູ່ກັບພໍ່ແມ່. ຖ້າຈະເວົ້າແລ້ວ ພໍ່ແມ່ຕ່າງຫາກທີ່ເປັນຝ່າຍຈູ້ຈີ້ກັບຂ້ອຍຕະຫຼອດ!” ແຕ່ຄິດເບິ່ງດູ ເຈົ້າສາມາດຄວບຄຸມຄົນອື່ນລວມທັງພໍ່ແມ່ໄດ້ຫຼາຍໜ້ອຍສ່ຳໃດ? ທີ່ຈິງ ຄົນດຽວທີ່ເຈົ້າປ່ຽນໄດ້ແມ່ນຕົວເຈົ້າເອງ. ແລະສິ່ງທີ່ໜ້າຍິນດີກໍຄືຖ້າເຈົ້າເຮັດໃນສ່ວນຂອງຕົວເອງເພື່ອຈະຫລຸດຜ່ອນຄວາມເຄັ່ງຕຶງ ເປັນໄປໄດ້ຫຼາຍຂຶ້ນທີ່ພໍ່ແມ່ຈະບໍ່ໃຈຮ້າຍແລະຟັງເມື່ອເຈົ້າຢາກເວົ້າ.
ດັ່ງນັ້ນ ຂໍໃຫ້ມາເບິ່ງນຳກັນວ່າເຈົ້າສາມາດເຮັດຫຍັງໄດ້ແດ່ເພື່ອລະງັບການຖຽງກັນກັບພໍ່ແມ່. ລອງໃຊ້ຄຳແນະນຳຕໍ່ໄປນີ້ ແລະເຈົ້າອາດເຮັດໃຫ້ພໍ່ແມ່ແລະຕົວເຈົ້າເອງ ປະຫຼາດໃຈທີ່ເຈົ້າໄດ້ຮຽນຮູ້ທັກສະການສື່ຄວາມແບບໃໝ່.
• ຄິດກ່ອນແລ້ວຈຶ່ງຕອບ. ເມື່ອຮູ້ສຶກຖືກຕຳໜິ ຢ່າເວົ້າໂປ້ງອອກມາໂລດກັບສິ່ງທຳອິດທີ່ຜຸດຂຶ້ນມາໃນຄວາມຄິດ. ຕົວຢ່າງເຊັ່ນ ສົມມຸດແມ່ເວົ້າວ່າ: “ເປັນຫຍັງຈຶ່ງບໍ່ລ້າງຖ້ວຍ? ເຈົ້າບໍ່ເຄີຍ ເຮັດໃນສິ່ງທີ່ແມ່ບອກເລີຍ!” ຄຳຕອບທີ່ຜຸດຂຶ້ນມາອາດຈະເປັນ “ເປັນຫຍັງແມ່ຄືມາຈູ້ຈີ້ຈຸກຈິກກັບລູກແທ້?” ແຕ່ຈົ່ງໃຊ້ຄວາມສາມາດໃນການຄິດ. ພະຍາຍາມເຂົ້າໃຈວ່າທີ່ຈິງແລ້ວແມ່ເວົ້າແບບນັ້ນ ແຕ່ໃນໃຈ ແມ່ຮູ້ສຶກແນວໃດ. ຕາມປົກກະຕິແລ້ວ ຄຳເວົ້າດັ່ງເຊັ່ນ “ຕະຫຼອດ” ແລະ “ບໍ່ເຄີຍ” ບໍ່ໄດ້ມີຄວາມໝາຍຕາມຕົວອັກສອນ. ແນວໃດກໍຕາມ ຄຳເວົ້າເຫຼົ່ານີ້ສະແດງເຖິງຄວາມຮູ້ສຶກໃນໃຈຂອງແມ່. ຄວາມຮູ້ສຶກແບບໃດ?
ບາງເທື່ອແມ່ເຈົ້າອາດຮູ້ສຶກໝຸດໝິດ ເພາະຮູ້ສຶກວ່າຕ້ອງແບກຫາບພາລະວຽກເຮືອນຫຼາຍໂພດ. ອາດເປັນໄປໄດ້ທີ່ແມ່ຕ້ອງການຄວາມໝັ້ນໃຈວ່າເຈົ້າຈະຊ່ວຍເພິ່ນ. ຖ້າເປັນເຊັ່ນນັ້ນ ການເວົ້າວ່າ: “ເປັນຫຍັງແມ່ຄືມາຈູ້ຈີ້ຈຸກຈິກກັບລູກແທ້?” ຈະບໍ່ໄດ້ຊ່ວຍໃຫ້ອັນໃດດີຂຶ້ນເລີຍ ນອກຈາກຈະພາໃຫ້ເກີດການຖຽງກັນ! ແທນທີ່ຈະເວົ້າແນວນັ້ນ ເຈົ້າຄວນຈະເຮັດໃຫ້ແມ່ສະບາຍໃຈແມ່ນບໍ? ຕົວຢ່າງເຊັ່ນ ເຈົ້າອາດເວົ້າວ່າ: “ລູກເຂົ້າໃຈວ່າແມ່ອາລົມບໍ່ດີ. ລູກຈະໄປລ້າງຖ້ວຍດຽວນີ້ແຫຼະ.” ຂໍ້ຄວນລະວັງ ຢ່າ ໃຊ້ນ້ຳສຽງແບບເວົ້າໃສ່. ໃຫ້ຕອບດ້ວຍຄວາມເຫັນອົກເຫັນໃຈ ແລະຈະເປັນໄປໄດ້ທີ່ແມ່ຈະອ່ອນລົງແລະບອກເຈົ້າກ່ຽວກັບບັນຫາທີ່ແທ້ຈິງ.a
ທາງລຸ່ມນີ້ໃຫ້ຂຽນສິ່ງທີ່ພໍ່ຫຼືແມ່ເວົ້າເຊິ່ງອາດເຮັດໃຫ້ເຈົ້າ ຄຽດທັນທີໂລດ ຖ້າເຈົ້າບໍ່ໄດ້ຄວບຄຸມຕົວເອງ.
․․․․․
ບັດນີ້ໃຫ້ຄິດວ່າເຈົ້າຈະຕອບແນວໃດເພື່ອສະແດງຄວາມເຫັນອົກເຫັນໃຈເຊິ່ງເປັນການຄຳນຶງເຖິງຄວາມຮູ້ສຶກທີ່ແຝງຢູ່ໃນຄຳເວົ້າຂອງພໍ່ແມ່.
․․․․․
• ເວົ້າດ້ວຍຄວາມນັບຖື. ຍິງສາວຊື່ມິແຊນ ອາຍຸ 16 ປີໄດ້ຮຽນຮູ້ຈາກປະສົບການເຖິງຄວາມສຳຄັນຂອງວິທີ ທີ່ລາວເວົ້າກັບແມ່. ລາວບອກວ່າ: “ບໍ່ວ່າຈະເປັນບັນຫາໃດກໍຕາມ ໃນທີ່ສຸດກໍເປັນຍ້ອນແມ່ບໍ່ມັກນ້ຳສຽງທີ່ຂ້ອຍຕອບເພິ່ນ.” ຖ້າເປັນເຊັ່ນນັ້ນເລື້ອຍໃນກໍລະນີຂອງເຈົ້າ ຈົ່ງແອບເວົ້າດ້ວຍນ້ຳສຽງທີ່ນຸ່ມນວນແລະຊ້າໆ ຢ່າສະແດງສີໜ້າຫຼືທ່າທີທີ່ວ່າຮູ້ສຶກລຳຄານ. (ສຸພາສິດ 30:17) ຖ້າຮູ້ສຶກວ່າກຳລັງຄວບຄຸມອາລົມບໍ່ໄດ້ ໃຫ້ອະທິດຖານສັ້ນໆໃນໃຈ. (ເນເຫມີ 2:4) ແນ່ນອນວ່າຈຸດປະສົງຂອງເຈົ້າບໍ່ແມ່ນເພື່ອຈະຂໍພະເຈົ້າຊ່ວຍ ‘ໃຫ້ພໍ່ແມ່ເຊົາຈູ້ຈີ້ຈຸກຈິກນຳເຈົ້າ’ ແຕ່ເພື່ອເຈົ້າຈະຄວບຄຸມອາລົມໄດ້ເພື່ອບໍ່ໃຫ້ເລື່ອງຕ່າງໆຮ້າຍແຮງໄປຕື່ມອີກ.—ຢາໂກໂບ 1:26.
ໃນບ່ອນວ່າງທາງລຸ່ມນີ້ ໃຫ້ຂຽນສິ່ງທີ່ເຈົ້າບໍ່ຄວນເວົ້າຫຼືເຮັດ.
ການສະແດງອອກທາງຄຳເວົ້າ
․․․․․
ການສະແດງອອກທາງສີໜ້າແລະທ່າທາງ
․․․․․
• ຟັງ. ຄຳພີໄບເບິນກ່າວວ່າ: “ໃນຄວາມເວົ້າດຸມີຄວາມຜິດລ່ວງແທ້.” (ສຸພາສິດ 10:19) ດັ່ງນັ້ນ ຈົ່ງໃຫ້ໂອກາດພໍ່ຫຼືແມ່ໄດ້ເວົ້າ ແລະເຈົ້າກໍຕັ້ງໃຈຟັງເພິ່ນ. ຢ່າເວົ້າແຊກຂຶ້ນເພື່ອແກ້ຕົວ. ໃຫ້ຟັງຢ່າງດຽວ. ຫຼັງຈາກທີ່ພໍ່ແມ່ເວົ້າຈົບແລ້ວ ເຈົ້າກໍມີໂອກາດຫຼາຍທີ່ຈະຖາມຫຼືອະທິບາຍຄວາມເຫັນຂອງເຈົ້າ. ໃນອີກດ້ານໜຶ່ງ ຖ້າເຈົ້າຢືນຢັນທີ່ຈະສະແດງຄວາມຄິດເຫັນຂອງຕົນໃນຕອນນີ້ ເຈົ້າອາດຈະມີແຕ່ເຮັດໃຫ້ສະຖານະການຮ້າຍແຮງຂຶ້ນ. ເຖິງແມ່ນວ່າມີບາງສິ່ງທີ່ເຈົ້າຢາກເວົ້າ ແຕ່ໃນຕອນນີ້ຄົງຈະເປັນ “ເວລາມິດປາກ.”—ຜູ້ເທສະໜາປ່າວປະກາດ 3:7.
• ເຕັມໃຈທີ່ຈະຂໍໂທດ. ເປັນສິ່ງທີ່ເໝາະສົມສະເໝີທີ່ຈະເວົ້າວ່າ: “ລູກຂໍໂທດ” ສຳລັບສິ່ງໃດກໍຕາມທີ່ເຈົ້າເຮັດເຊິ່ງມີສ່ວນໃນການເຮັດໃຫ້ເກີດຄວາມຂັດແຍ່ງກັນ. (ໂລມ 14:19) ເຈົ້າແມ່ນແຕ່ອາດເວົ້າວ່າລູກຂໍໂທດທີ່ພາໃຫ້ເກີດຄວາມຂັດແຍ່ງ. ຖ້າເຈົ້າຮູ້ສຶກວ່າຍາກທີ່ຈະເວົ້າຄຳວ່າຂໍໂທດຕໍ່ໜ້າພໍ່ແມ່ ລອງຂຽນຄຳຂໍໂທດໃຫ້ເພິ່ນອ່ານ. ຈາກນັ້ນ ‘ກ້າວໄປອີກໂຢກໜຶ່ງ’ ໂດຍການປ່ຽນແປງນິດໄສໃຈຄໍບາງຢ່າງທີ່ອາດມີສ່ວນເຮັດໃຫ້ເກີດການຂັດແຍ່ງ. (ມັດທາຍ 5:41) ຕົວຢ່າງເຊັ່ນ ຖ້າການບໍ່ເອົາໃຈໃສ່ວຽກເຮືອນແລະນັ້ນເປັນຕົ້ນເຫດຂອງການຖຽງກັນ ລອງເຮັດໃຫ້ພໍ່ແມ່ປະຫຼາດໃຈດ້ວຍການເຮັດວຽກເຮືອນນັ້ນເບິ່ງດູ. ເຖິງແມ່ນວ່າເຈົ້າບໍ່ມັກວຽກນັ້ນ ແຕ່ດີກວ່າບໍ່ແມ່ນບໍຖ້າເຈົ້າໄດ້ເຮັດວຽກນັ້ນໃຫ້ຮຽບຮ້ອຍແທນທີ່ຈະຖືກເວົ້າໃຫ້ເມື່ອພໍ່ແມ່ເຫັນວ່າວຽກນັ້ນຍັງບໍ່ທັນເຮັດແລ້ວເທື່ອ? (ມັດທາຍ 21:28-31) ຂໍໃຫ້ຄິດເຖິງຜົນປະໂຫຍດທີ່ຈະໄດ້ຮັບໂດຍການເຮັດສ່ວນຂອງເຈົ້າເພື່ອຫລຸດຜ່ອນຄວາມເຄັ່ງຕຶງລະຫວ່າງເຈົ້າກັບພໍ່ແມ່.
ຄອບຄົວທີ່ປະສົບຜົນສຳເລັດກໍຍ່ອມມີຄວາມຂັດແຍ່ງກັນຢູ່ແລ້ວ ແຕ່ເຂົາເຈົ້າຮູ້ວິທີທີ່ຈັດການກັບມັນຢ່າງສັນຕິ. ຈົ່ງຝຶກຝົນທັກສະຕາມທີ່ກ່າວໄວ້ໃນບົດນີ້ ເຈົ້າຈະປະສົບວ່າຕົນເອງສາມາດເວົ້າລົມກັບພໍ່ແມ່ແມ່ນແຕ່ເລື່ອງທີ່ລຳບາກໃຈ ໂດຍບໍ່ຕ້ອງຖຽງກັນ!
ເຈົ້າຮູ້ສຶກວ່າພໍ່ແມ່ຄວນໃຫ້ອິດສະຫຼະເຈົ້າຕື່ມອີກບໍ? ຖ້າແມ່ນ ເຈົ້າສາມາດເຮັດຫຍັງໄດ້?
[ຂໍ້ຄວາມໄຂເງື່ອນ]
a ສຳລັບຂໍ້ມູນເພີ່ມເຕີມຂໍໃຫ້ເບິ່ງໃນບົດທີ 21 ຂອງເຫຼັ້ມທີ 2.
ຂໍ້ພະຄຳພີຫຼັກ
“ຄົນຊອບທຳຄຶດຕຶກຕອງກ່ອນຈຶ່ງຕອບ.”—ສຸພາສິດ 15:28.
ຄຳແນະນຳ
ເມື່ອພໍ່ແມ່ເວົ້າກັບເຈົ້າ ໃຫ້ມອດສຽງເພງ ວາງປຶ້ມຫຼືຈຸນລະສານລົງ ແລະໃຫ້ຈັບສາຍຕາເບິ່ງທີ່ພໍ່ແມ່.
ເຈົ້າຮູ້ບໍ . . .?
ການຫາທາງເພື່ອຈະແກ້ບັນຫາຫຼືປ້ອງກັນບໍ່ໃຫ້ເກີດຄວາມຂັດແຍ່ງຈະເຮັດໃຫ້ຊີວິດງ່າຍຂຶ້ນສຳລັບເຈົ້າ. ທີ່ຈິງຄຳພີໄບເບິນກ່າວວ່າ ຄົນ “ທີ່ມີຄວາມກະລຸນາຮັກໄຄ່ປະຕິບັດແບບທີ່ເປັນປະໂຫຍດກັບຊີວິດຂອງຕົນເອງ.”—ສຸພາສິດ 11:17, ລ.ມ.
ແຜນພາກປະຕິບັດ!
ຄຳແນະນຳໃນບົດນີ້ທີ່ຂ້ອຍຈຳເປັນຕ້ອງພະຍາຍາມ ໃຊ້ຫຼາຍທີ່ສຸດແມ່ນ ․․․․․
ຂ້ອຍຕັດສິນໃຈທີ່ຈະເລີ່ມໃຊ້ຄຳແນະນຳນີ້ນັບແຕ່ (ຂຽນວັນທີໃສ່) ․․․․․
ສິ່ງທີ່ຂ້ອຍຢາກຖາມພໍ່ (ແມ່) ກ່ຽວກັບເລື່ອງນີ້ແມ່ນ ․․․․․
ເຈົ້າຄິດວ່າແນວໃດ?
• ເປັນຫຍັງໝູ່ຄູ່ຮຸ່ນດຽວກັນກັບເຈົ້າຈຶ່ງຮູ້ສຶກວ່າການເອົາຊະນະການຖຽງກັນຈຶ່ງເປັນສິ່ງທີ່ດີ?
• ເປັນຫຍັງພະເຢໂຫວາພະເຈົ້າຈຶ່ງຖືວ່າຄົນທີ່ມັກຖຽງກັນເປັນຄືກັບຄົນໂງ່?—ສຸພາສິດ 20:3.
• ເຈົ້າ ຈະໄດ້ຮັບປະໂຫຍດອັນໃດຖ້າເຈົ້າຫລຸດຜ່ອນຄວາມເຄັ່ງຕຶງລະຫວ່າງເຈົ້າກັບພໍ່ແມ່?
[ຈຸດເດັ່ນໜ້າ 18]
“ບາງຄັ້ງແມ່ເວົ້າວ່າ ‘ແມ່ຂໍໂທດ’ ແລ້ວກໍກອດຂ້ອຍ ແລະນັ້ນຄັກແທ້. ສະນັ້ນເຮົາສາມາດລືມສິ່ງທີ່ເກີດຂຶ້ນ. ຂ້ອຍພະຍາຍາມເຮັດແບບດຽວກັນນັ້ນ. ການເອົາຄວາມຍິ່ງໄວ້ຂ້າງຫຼັງແລະເວົ້າຢ່າງຈິງໃຈວ່າ ‘ລູກຂໍໂທດ’ ເປັນປະໂຫຍດຫຼາຍ ແນວໃດກໍຕາມ ຂ້ອຍຍອມຮັບວ່າມັນບໍ່ແມ່ນເລື່ອງງ່າຍ.”—ນາງ ລໍເຣັນ
[ກອບໜ້າ 20]
ຄຳຕອບ
1. ການໃຊ້ຄຳເວົ້າທີ່ເປັນການເວົ້າໃສ່ (“ອີກແລ້ວ”) ມີແຕ່ເຮັດໃຫ້ແມ່ຂອງລາວບໍ່ພໍໃຈຫຼາຍຂຶ້ນຕື່ມອີກ.
2. ການສະແດງອອກທາງສີໜ້າຂອງຣາເຊວ (ການເຫຼືອກຕາຂຶ້ນ) ເປັນການກໍ່ໃຫ້ເກີດເລື່ອງ.
3. ການຕອບຄືນແບບບໍ່ສະແດງຄວາມນັບຖື (“ແລ້ວນ້ຳສຽງທີ່ແມ່ກຳລັງໃຊ້ກັບລູກ ເດ໋?”) ເຮັດໃຫ້ເລື່ອງຮ້າຍແຮງກວ່າເກົ່າເກືອບທຸກຄັ້ງ.
[ຮູບພາບໜ້າ 19]
ການຖຽງກັນກັບພໍ່ແມ່ເປັນຄືກັບການແລ່ນຢູ່ເທິງເຄື່ອງຍ່າງອອກກຳລັງກາຍ ນັ້ນຄືເຈົ້າຈະໃຊ້ເຫື່ອແຮງຫຼາຍແທ້ຫຼາຍວ່າແຕ່ບໍ່ໄປຮອດໃສຈັກເທື່ອ