ບົດທີ 27
ເປັນຫຍັງພວກຜູ້ຊາຍຈຶ່ງບໍ່ມັກຂ້ອຍ?
ຊາຍຄົນນັ້ນຮູ້ວ່າມີຄົນມັກຂ້ອຍຫຼາຍເພາະຂ້ອຍບອກລາວວ່າມີຜູ້ຊາຍຫຼາຍຄົນມາມັກຂ້ອຍ. ລາວຫົວຂວັນເມື່ອຂ້ອຍບອກວ່າໝູ່ຂອງຂ້ອຍບາງຄົນໄຮ້ສາລະ. ແລະລາວຮູ້ວ່າຂ້ອຍເປັນຄົນສະຫຼາດ ເພາະຂ້ອຍເຄີຍແກ້ໄຂຄຳເວົ້າຂອງລາວສອງສາມເທື່ອ. ຂ້ອຍຢາກຮູ້ວ່າຍັງອີກດົນປານໃດທີ່ລາວຈະຂໍນັດພົບກັບຂ້ອຍ.
ສາວນັ້ນມີສະເໜ່ ແຕ່ເບິ່ງຄືເປັນຄົນທີ່ຄິດແບບຕື້ນໆ! ຂ້ອຍເກືອບບໍ່ມີໂອກາດໄດ້ເວົ້າເລີຍ. ແຕ່ເມື່ອຂ້ອຍເວົ້າ ລາວກໍແກ້ໄຂຄຳເວົ້າຂ້ອຍໂລດ! ຂ້ອຍພໍຢາກມຸດດິນໜີຈາກລາວ.
ເຈົ້າຮູ້ສຶກກັງວົນບໍທີ່ພວກຜູ້ຊາຍບໍ່ມາສົນໃຈ? ຍິງສາວຫຼາຍຄົນຮູ້ສຶກແບບນັ້ນ ແມ່ນແຕ່ບາງຄົນທີ່ຄິດວ່າບໍ່ໜ້າຈະມີບັນຫາ! ຍົກຕົວຢ່າງ ນາງໂຈແອນເປັນຄົນງາມ ສະຫຼາດ ແລະເວົ້າໄດ້ຄ່ອງແຄ່ວ. ແຕ່ໂຈແອນເວົ້າວ່າ: “ຂ້ອຍມັກຄິດວ່າພວກຜູ້ຊາຍບໍ່ມັກຂ້ອຍ. ບາງຄົນທີ່ຂ້ອຍມັກກໍສະແດງຄວາມສົນໃຈໃນຕົວຂ້ອຍບຶດດຽວ ແຕ່ຈາກນັ້ນກໍບໍ່ລົມກັບຂ້ອຍເລີຍ!”
ຄຸນລັກສະນະອັນໃດໃນຕົວຍິງສາວທີ່ດຶງດູດໃຈຊາຍໜຸ່ມໃຫ້ສົນໃຈ? ອັນໃດທີ່ບໍ່ດຶງດູດຄວາມສົນໃຈ ຂອງເຂົາເຈົ້າ? ເຈົ້າສາມາດເຮັດຫຍັງໄດ້ແດ່ເພື່ອດຶງດູດຄວາມສົນໃຈຂອງຊາຍໜຸ່ມທີ່ສຸພາບຮຽບຮ້ອຍ?
ສິ່ງທີ່ຄວນເຮັດ
• ຮູ້ຈັກໃຈຕົວເອງ. ເຈົ້າອາດຮູ້ສຶກສົນໃຈຜູ້ຊາຍຫຼາຍຂຶ້ນເມື່ອກ້າວເຂົ້າສູ່ໄວເປັນຜູ້ສາວ. ເຈົ້າອາດຄິດມັກຜູ້ຊາຍຫຼາຍກວ່າໜຶ່ງຄົນ. ນັ້ນເປັນເລື່ອງປົກກະຕິ. ແຕ່ຖ້າມອບຫົວໃຈໃຫ້ຊາຍໜຸ່ມຄົນທຳອິດທີ່ເຮັດໃຫ້ໃຈເຈົ້າເຕັ້ນຕຸບຕັບ ເຈົ້າກໍສ່ຽງທີ່ຈະເຮັດໃຫ້ການເຕີບໂຕທາງດ້ານອາລົມຢຸດຊະງັກແລະຂາດສາຍສຳພັນກັບພະເຈົ້ານຳອີກ. ເພື່ອຈະພັດທະນາລັກສະນະນິດໄສທີ່ດີ ເພື່ອທີ່ຈະ “ປ່ຽນ . . . ເອົາຈິດໃຈໃໝ່” ໃນເລື່ອງທີ່ສຳຄັນ ເພື່ອທີ່ຈະບັນລຸເປົ້າໝາຍບາງຢ່າງທີ່ເຈົ້າ ຕັ້ງໄວ້ ລ້ວນແຕ່ຕ້ອງໃຊ້ເວລາ.—ໂລມ 12:2; 1 ໂກລິນໂທ 7:36; ໂກໂລດ 3:9, 10.
ແມ່ນຢູ່ ຊາຍໜຸ່ມຫຼາຍຄົນມັກຍິງສາວທີ່ຍັງຂາດຄວາມໝັ້ນໃຈໃນຕົວເອງຫຼືເປັນຄົນທີ່ຂາດປະສົບການ. ແຕ່ສິ່ງທຳອິດທີ່ຊາຍໜຸ່ມປະເພດນັ້ນສົນໃຈຄືຮູບໂສມຂອງຍິງສາວ ບໍ່ແມ່ນທີ່ວ່າລາວເປັນຄົນແບບໃດແທ້ໆ. ຂໍ້ຄວາມຈິງກໍຄືວ່າຊາຍໜຸ່ມທີ່ມີເຫດຜົນຈະຊອກຫາຍິງສາວຜູ້ທີ່ມີຄຸນລັກສະນະເຊິ່ງສາມາດເສີມສ້າງສາຍສຳພັນເຊິ່ງກັນແລະກັນ.—ມັດທາຍ 19:6.
ສິ່ງທີ່ຊາຍໜຸ່ມເວົ້າ: “ຜູ້ຍິງທີ່ຂ້ອຍມັກຄືຄົນທີ່ມີຄວາມຄຶດເປັນຂອງຕົວເອງ ເຊິ່ງເປັນຜູ້ທີ່ປາກົດວ່າມີຄວາມໝັ້ນໃຈວ່າເປັນຕົວຂອງຕົວເອງ.”—ທ້າວ ເຈມສ.
“ຂ້ອຍຈະສົນໃຈຜູ້ຍິງທີ່ສາມາດເວົ້າດ້ວຍຄວາມຈິງໃຈ ໃນວິທີໃຫ້ຄວາມນັບຖື ແລະບໍ່ແມ່ນພຽງແຕ່ເຫັນດີກັບຂ້ອຍໃນທຸກເລື່ອງ. ເຖິງແມ່ນວ່າລາວງາມ ແຕ່ຮູ້ສຶກອຶດອັດໃຈເມື່ອຜູ້ຍິງເວົ້າເພື່ອເອົາໃຈຂ້ອຍ.”—ທ້າວ ດາເຣັນ.
ເຈົ້າຮູ້ສຶກແນວໃດຕໍ່ກັບຄວາມຄິດເຫັນຂອງຜູ້ຊາຍທີ່ຢູ່ໃນຫົວເລື່ອງນີ້?
․․․․․
• ພັດທະນາຄວາມນັບຖືຕໍ່ຄົນອື່ນ. ເຈົ້າຕ້ອງການເປັນທີ່ຮັກຂອງຄົນອື່ນສັນໃດ ຊາຍໜຸ່ມທີ່ເຈົ້າຮູ້ຈັກກໍຕ້ອງການໄດ້ຮັບຄວາມນັບຖືສັນນັ້ນ. ບໍ່ແມ່ນເລື່ອງບັງເອີນທີ່ຄຳພີໄບເບິນກ່າວກັບຜູ້ເປັນຜົວວ່າຄວນຮັກເມຍຂອງຕົນ ແຕ່ກໍກ່າວວ່າເມຍຄວນ “ນັບຖືຜົວຢ່າງສຸດຊຶ້ງ.” (ເອເຟດ 5:33, ລ.ມ.) ກົງກັບຖ້ອຍຄຳທີ່ສະແດງເຖິງສະຕິປັນຍານັ້ນ ການສຳຫຼວດຊາຍໜຸ່ມຫຼາຍຮ້ອຍຄົນພົບວ່າ ມີຫຼາຍກວ່າ 60 ສ່ວນຮ້ອຍເຫັນວ່າຄວາມນັບຖືມີຄ່າຫຼາຍກວ່າ ຄວາມຮັກ. ສ່ວນການສຳຫຼວດຜູ້ຊາຍທີ່ມີອາຍຸສູງກວ່ານັ້ນ ມີຮອດ 70 ສ່ວນຮ້ອຍເຊິ່ງມີຄວາມເຫັນແບບດຽວກັນ.
ຄວາມນັບຖືບໍ່ໄດ້ໝາຍຄວາມວ່າຕ້ອງຍອມໃນທຸກເລື່ອງ ຫຼືບໍ່ສາມາດສະແດງຄວາມຄິດເຫັນທີ່ແຕກຕ່າງໄດ້. (ຕົ້ນເດີມ 21:10-12) ແຕ່ວິທີ ທີ່ສະແດງຄວາມຄິດເຫັນອາດເປັນສິ່ງກຳນົດໄດ້ວ່າເຈົ້າຈະດຶງດູດຊາຍໜຸ່ມຫຼືຈະເຮັດໃຫ້ລາວຫັນໜ້າໜີໄປ. ຖ້າເຈົ້າຂັດແຍ່ງຫຼືແກ້ໄຂຄຳເວົ້າຂອງລາວເລື້ອຍໆ ລາວອາດຮູ້ສຶກວ່າເຈົ້າບໍ່ມີຄວາມນັບຖືລາວປານໃດ. ແຕ່ຖ້າເຈົ້າຍອມຮັບທັດສະນະແລະຄວາມເຫັນຂອງລາວໃນສິ່ງທີ່ເຈົ້າເຫັນວ່າສົມຄວນຍ້ອງຍໍ ລາວຈະຍອມຮັບແລະນັບຖືທັດສະນະຂອງເຈົ້າຫຼາຍຂຶ້ນເຊັ່ນກັນ. ແນ່ນອນ ຊາຍໜຸ່ມທີ່ສຸຂຸມຮອບຄອບກໍຈະສັງເກດເຫັນເຊັ່ນກັນຖ້າເຈົ້າປະຕິບັດຕໍ່ສະມາຊິກໃນຄອບຄົວແລະຄົນອື່ນໆດ້ວຍຄວາມນັບຖື.
ສິ່ງທີ່ຊາຍໜຸ່ມເວົ້າ: “ຂ້ອຍຄິດວ່າຄວາມນັບຖືເປັນສິ່ງສຳຄັນທີ່ສຸດໃນໄລຍະເລີ່ມຕົ້ນຂອງສາຍສຳພັນ. ຄວາມຮັກອາດພັດທະນາຂຶ້ນຕາມຫຼັງ.”—ທ້າວ ເອດຽນ.
“ຖ້າຍິງສາວສະແດງຄວາມນັບຖືຕໍ່ຂ້ອຍໄດ້ ຂ້ອຍຄິດວ່າລາວກໍຕ້ອງຮັກຂ້ອຍໄດ້ແທ້ໆ.”—ທ້າວ ມາກ.
ເຈົ້າຮູ້ສຶກແນວໃດຕໍ່ກັບຄວາມຄິດເຫັນຂອງຜູ້ຊາຍທີ່ຢູ່ຂ້າງເທິງນັ້ນ?
․․․․․
• ນຸ່ງເຄື່ອງສຸພາບຮຽບຮ້ອຍ ແລະຮັກສາສຸຂະອະນາໄມທີ່ດີ. ເຄື່ອງນຸ່ງແລະການແຕ່ງຕົວເປັນຄືກັບລຳໂພງກະຈາຍສຽງທີ່ປະກາດຄວາມຄິດແລະທັດສະນະທີ່ຢູ່ໃນໃຈຂອງເຈົ້າ. ເປັນເວລາດົນນານກ່ອນທີ່ເຈົ້າຈະເລີ່ມເວົ້າລົມກັບຊາຍໜຸ່ມ ການແຕ່ງຕົວຂອງເຈົ້າກໍບອກຫຼາຍຢ່າງກ່ຽວກັບຕົວເຈົ້າ. ຖ້າເຄື່ອງນຸ່ງຂອງເຈົ້າຮຽບຮ້ອຍແລະສຸພາບ ມັນຈະສະທ້ອນເຖິງຕົວເຈົ້າໃນທາງທີ່ດີຫຼາຍ. (1 ຕີໂມເຕ 2:9) ຖ້າເຄື່ອງນຸ່ງເປັນແບບຍົວະເຍົ້າຫຼືຫຼົມຕ່າມຍ່າມ ມັນຈະສະທ້ອນເຖິງຕົວເຈົ້າໃນທາງລົບຢ່າງຊັດເຈນ!
ສິ່ງທີ່ຊາຍໜຸ່ມເວົ້າ: “ມາດຕະຖານການແຕ່ງຕົວຂອງຍິງສາວບອກຫຼາຍຢ່າງກ່ຽວກັບທັດສະນະຂອງລາວທີ່ມີຕໍ່ຊີວິດ. ຖ້າລາວໃສ່ເຄື່ອງນຸ່ງທີ່ເປີດເຜີຍສັດສ່ວນຮ່າງຄີງຫຼືຫຼົມຕ່າມຍ່າມ ຂ້ອຍກໍຮູ້ໂລດວ່າລາວຕ້ອງການໃຫ້ຜູ້ຊາຍສົນໃຈ.”—ທ້າວ ເອດຽນ.
“ຂ້ອຍມັກຜູ້ຍິງທີ່ເບິ່ງແຍງຜົມຂອງຕົນເອງ ກິ່ນໂຕຫອມ ແລະມີນ້ຳສຽງທີ່ເປັນຕາຟັງ. ໃນທາງກົງກັນຂ້າມ ເຖິງແມ່ນວ່າຂ້ອຍມັກຍິງສາວຄົນໜຶ່ງທີ່ງາມ ແຕ່ຖ້າລາວບໍ່ມີສຸຂະອະນາໄມທີ່ດີ ທຸກຢ່າງກໍຈົບຢູ່ຫັ້ນ.”—ທ້າວ ຣາຍອັນ.
“ຖ້າຍິງສາວແຕ່ງຕົວຍົວະເຍົ້າ ແນ່ນອນວ່າລາວດຶງດູດຄວາມສົນໃຈໄດ້ແຕ່ໃນຕອນທຳອິດ. ແຕ່ຜູ້ຍິງປະເພດນັ້ນບໍ່ແມ່ນຄົນທີ່ຂ້ອຍຢາກເລີ່ມສານສາຍສຳພັນນຳ.”—ທ້າວ ນິໂຄລັດສ.
ເຈົ້າຮູ້ສຶກແນວໃດຕໍ່ກັບຄວາມຄິດເຫັນຂອງຜູ້ຊາຍທີ່ຢູ່ຂ້າງເທິງນັ້ນ?
․․․․․
ສິ່ງທີ່ບໍ່ຄວນເຮັດ
• ຢ່າຫຼິ້ນກັບຄວາມຮູ້ສຶກຂອງຄົນອື່ນ. ຜູ້ຍິງມີຄວາມສາມາດທີ່ຈະໃຊ້ອິດທິພົນເໜືອຜູ້ຊາຍ. ພະລັງດຶງດູດໃຈແບບນັ້ນອາດໃຊ້ໃນທາງທີ່ດີຫຼືບໍ່ດີກໍໄດ້. (ຕົ້ນເດີມ 29:17, 18; ສຸພາສິດ 7:6-23) ຖ້າຢາກທົດລອງເອົາພະລັງທີ່ເຈົ້າມີຢູ່ໄປໃຊ້ກັບຊາຍໜຸ່ມທຸກຄົນທີ່ເຈົ້າພົບພໍ້ ເຈົ້າອາດມີຊື່ສຽງວ່າເປັນຄົນມັກຈີບຜູ້ຊາຍ.
ສິ່ງທີ່ຊາຍໜຸ່ມເວົ້າ: “ພຽງແຕ່ນັ່ງໃກ້ໆຜູ້ຍິງທີ່ງາມແລະບ່າເຮົາຊູນກັນກໍອາດເຮັດໃຫ້ຮູ້ສຶກຕື່ນເຕັ້ນ ດັ່ງນັ້ນ ຂ້ອຍຈຶ່ງຄິດວ່າຜູ້ຍິງທີ່ມັກຈັບບາຍຕົວເຮົາເລື້ອຍໆເວລາລົມນຳນັ້ນກຳລັງຫຼິ້ນຄວາມຮູ້ສຶກ.”—ທ້າວ ນິໂຄລັດສ.
“ຖ້າຍິງສາວພະຍາຍາມແຕະຕ້ອງຕົວຜູ້ຊາຍທຸກຄົນທີ່ລາວພົບຫຼືຫຼິ້ນຫູຫຼິ້ນຕາກັບຜູ້ຊາຍທຸກຄົນທີ່ຍ່າງກາຍໄປ ຂ້ອຍຄິດໂລດວ່າລາວມັກຈີບຜູ້ຊາຍ ແລະຂ້ອຍຮູ້ສຶກວ່າມັນບໍ່ແມ່ນແນວເຮັດ.”—ທ້າວ ໂຫເຊ.
• ຢ່າຄວບຄຸມຫຼາຍໂພດ. ເມື່ອສອງຄົນແຕ່ງດອງກັນ ຄຳພີໄບເບິນກ່າວວ່າທັງສອງ “ເປັນເນື້ອໜັງອັນດຽວກັນ.” (ຕົ້ນເດີມ 2:24) ເມື່ອຄວາມສຳພັນມາເຖິງຂັ້ນນັ້ນ ທັງຜົວແລະເມຍກໍຍອມສະລະອິດສະລະພາບຫຼາຍຢ່າງທີ່ເຄີຍມີຕອນເປັນຄົນໂສດ ທີ່ຈິງແລ້ວເຂົາເຈົ້າມີພັນທະຜູກມັດຕໍ່ກັນ. (1 ໂກລິນໂທ 7:32-34) ແຕ່ຖ້າເຈົ້າຫາກໍຮູ້ຈັກກັບຊາຍໜຸ່ມຄົນໜຶ່ງ ເຈົ້າບໍ່ມີສິດທີ່ຈະຄາດໝາຍໃຫ້ລາວລາຍງານໃນທຸກເລື່ອງ ແລະລາວຈະຄາດໝາຍແບບນັ້ນຈາກເຈົ້າກໍບໍ່ໄດ້.a ຄວາມຈິງກໍຄືວ່າ ຖ້າເຈົ້າສຳນຶກເຖິງສິດຂອງລາວທີ່ຈະມ່ວນຊື່ນກັບໝູ່ຜູ້ອື່ນ ລາວອາດສົນໃຈເຈົ້າຫຼາຍກວ່າເກົ່າ. ແລະວິທີທີ່ລາວໃຊ້ອິດສະລະນັ້ນຈະບອກເຈົ້າຫຼາຍຢ່າງກ່ຽວກັບນິດໄສຂອງລາວ.—ສຸພາສິດ 20:11.
ສິ່ງທີ່ຊາຍໜຸ່ມເວົ້າ: “ຂ້ອຍຄິດວ່າຜູ້ຍິງຄວບຄຸມຫຼາຍໂພດ ຖ້າຕ້ອງການຮູ້ການເຄື່ອນໄຫວຂອງຂ້ອຍທຸກບາດກ້າວແລະເບິ່ງຄືວ່າບໍ່ສາມາດໃຊ້ຊີວິດໃນສັງຄົມຫຼືສົນໃຈເລື່ອງອື່ນນອກຈາກຕົວຂ້ອຍ.”—ທ້າວ ດາເຣັນ.
“ຖ້າຍິງສາວທີ່ຂ້ອຍຫາກໍເລີ່ມຮູ້ຈັກສົ່ງຂໍ້ຄວາມເຖິງຂ້ອຍຕະຫຼອດ ແລະຕ້ອງການຮູ້ວ່າມີໃຜແດ່ຢູ່ນຳຂ້ອຍ ໂດຍສະເພາະຢ່າງຍິ່ງຢາກຮູ້ຊື່ຂອງພວກຜູ້ຍິງທີ່ຢູ່ໃນກຸ່ມ ນັ້ນຄືສັນຍານເຕືອນໄພ.”—ທ້າວ ຣາຍອັນ.
“ຜູ້ຍິງທີ່ບໍ່ຍອມປ່ອຍໃຫ້ເຈົ້າໃຊ້ເວລາກັບໝູ່ຜູ້ຊາຍແລະຄຽດເມື່ອບໍ່ຊວນລາວໄປນຳເລື້ອຍໆ ເປັນຄົນເກາະຕິດຫຼາຍໂພດຈຶ່ງບໍ່ເປັນຕາໜ້າດຶງດູດໃຈ.”—ທ້າວ ເອດຽນ.
ເຈົ້າຮູ້ສຶກແນວໃດຕໍ່ກັບຄວາມຄິດເຫັນຂອງຜູ້ຊາຍທີ່ຢູ່ໃນຫົວເລື່ອງນີ້?
․․․․․
ເຫັນຄຸນຄ່າຂອງຕົວເອງ
ເຈົ້າອາດຮູ້ຈັກຜູ້ຍິງທີ່ຍອມເຮັດທຸກຢ່າງເພື່ອໃຫ້ຜູ້ຊາຍສົນໃຈ. ບາງຄົນອາດລົດມາດຕະຖານຂອງຕົນເອງເພື່ອຈະໄດ້ແຟນ ຫຼືໄດ້ຜົວ. ແນວໃດກໍຕາມ ຫຼັກການທີ່ວ່າ ‘ເຈົ້າຫວ່ານສິ່ງໃດກໍຈະເກັບກ່ຽວສິ່ງນັ້ນ’ ເອົາມາໃຊ້ໄດ້ໃນເລື່ອງນີ້. (ຄາລາຊີ 6:7-9) ຖ້າເຈົ້າບໍ່ເຫັນຄຸນຄ່າຕົວເອງແລະມາດຕະຖານທີ່ເຈົ້າພະຍາຍາມເອົາມາໃຊ້ ເຈົ້າກໍຄົງດຶງດູດໃຈໄດ້ແຕ່ຜູ້ຊາຍທີ່ບໍ່ເຫັນຄຸນຄ່າຫຼືມາດຕະຖານຂອງເຈົ້າ.
ຄວາມຈິງກໍຄືວ່າ ບໍ່ແມ່ນຜູ້ຊາຍໝົດທຸກຄົນຈະມັກເຈົ້າ ແລະນັ້ນອາດເປັນຜົນດີກໍໄດ້! ແຕ່ຖ້າເຈົ້າເອົາໃຈໃສ່ຄວາມງາມຂອງຕົວເອງທັງພາຍໃນແລະພາຍນອກ ເຈົ້າກໍຈະ “ມີລາຄາອັນແພງຕໍ່ໜ້າພະເຈົ້າ” ແລະເຈົ້າຈະດຶງດູດໃຈຊາຍໜຸ່ມປະເພດທີ່ເໝາະສົມທີ່ສຸດກັບເຈົ້າ.—1 ເປໂຕ 3:4.
ຈະວ່າແນວໃດຖ້າເຈົ້າເປັນຜູ້ຊາຍແລະສົງໄສວ່າ ‘ເປັນຫຍັງພວກຜູ້ຍິງຈຶ່ງບໍ່ມັກຂ້ອຍ’
[ຂໍ້ຄວາມໄຂເງື່ອນ]
a ແນ່ນອນວ່າເມື່ອທັງສອງໝັ້ນກັນແລ້ວ ກໍຕ້ອງຮັບຜິດຊອບຕໍ່ກັນຫຼາຍຂຶ້ນ.
ຂໍ້ພະຄຳພີຫຼັກ
“ກິລິຍາໜ້າຮັກເປັນສິ່ງທີ່ລໍ້ລວງແລະຄວາມງາມເປັນຄວາມເປົ່າໆ ຜູ້ຍິງທີ່ຢ້ານຢຳພະເຢໂຫວາເປັນຜູ້ນັ້ນທີ່ຈະໄດ້ຄວາມສັນລະເສີນ.”—ສຸພາສິດ 31:30.
ຄຳແນະນຳ
ຢ່າແຕ່ງໜ້າຫຼາຍໂພດ! ການແຕ່ງໜ້າຫຼາຍໂພດອາດສະທ້ອນເຖິງຕົວເຈົ້າໃນທາງທີ່ບໍ່ດີ ນັ້ນຄືເຈົ້າເປັນຄົນອວດດີຫຼືແມ່ນແຕ່ໝົດຫວັງຢ່າງເປັນຕາສົມເພດ.
ເຈົ້າຮູ້ບໍ . . .?
ຖ້າຮຽກຮ້ອງໃຫ້ຜູ້ຊາຍສົນໃຈເຈົ້າຄົນດຽວຕະຫຼອດເວລາ ເຈົ້າອາດທຳລາຍສາຍສຳພັນທີ່ມີຕໍ່ກັນ.
ແຜນພາກປະຕິບັດ!
ລັກສະນະນິດໄສທີ່ຂ້ອຍຕ້ອງເອົາໃຈໃສ່ປັບປຸງແມ່ນ ․․․․․
ສິ່ງທີ່ຂ້ອຍຢາກຖາມພໍ່ (ແມ່) ກ່ຽວກັບເລື່ອງນີ້ແມ່ນ ․․․․․
ເຈົ້າຄິດວ່າແນວໃດ?
• ເຈົ້າຈະສະແດງໃຫ້ເຫັນແນວໃດວ່າເຈົ້ານັບຖືຄວາມຄິດເຫັນແລະຄວາມຮູ້ສຶກຂອງຜູ້ຊາຍ?
• ເຈົ້າຈະສະແດງໃຫ້ເຫັນແນວໃດວ່າເຫັນຄຸນຄ່າຂອງຕົວເອງ?
[ຈຸດເດັ່ນໜ້າ 190]
“ຂ້ອຍຍອມຮັບວ່າຫຼາຍຄັ້ງ ຕັ້ງແຕ່ທຳອິດເລີຍຂ້ອຍມັກຄົນງາມ. ແຕ່ຄວາມຮູ້ສຶກນັ້ນຈະຫ່າງຫາຍໄປຢ່າງໄວຖ້າຜູ້ຍິງຄົນນັ້ນບໍ່ມີເປົ້າໝາຍແນ່ນອນທີ່ໜ້າຍົກຍ້ອງ. ໃນທາງກົງກັນຂ້າມ ຖ້າລາວຮູ້ວ່າຈະເຮັດຫຍັງກັບຊີວິດຂອງຕົນເອງ ໂດຍສະເພາະຢ່າງຍິ່ງຖ້າລາວບັນລຸເປົ້າໝາຍບາງຢ່າງແລ້ວ ນັ້ນເປັນສິ່ງທີ່ເຮັດໃຫ້ລາວເປັນຕາໜ້າດຶງດູດໃຈຫຼາຍ.”—ທ້າວ ເດມຽນ
[ຮູບພາບໜ້າ 191]
ຄວາມຮັກແລະຄວາມນັບຖືເປັນຄືກັບກົງລົດຖີບສອງກົງ ນັ້ນຄືຕ້ອງມີທັງສອງ