ບົດທີ 19
ໄພພິບັດ 3 ຢ່າງທຳອິດ
ພວກອິດສະຣາເອນຖືກບັງຄັບໃຫ້ເປັນທາດແລະເຮັດວຽກໜັກ. ພະເຢໂຫວາສົ່ງໂມເຊແລະອາໂຣນໄປບອກຟາໂຣວ່າ: ‘ປ່ອຍຄົນຂອງເຮົາໄປສະຫຼອງເທດສະການເພື່ອນະມັດສະການເຮົາໃນບ່ອນກັນດານ.’ ແຕ່ຟາໂຣທີ່ຍິ່ງຈອງຫອງຕອບວ່າ: ‘ຂ້ອຍບໍ່ສົນວ່າພະເຢໂຫວາຊິເວົ້າຫຍັງ ແລະຂ້ອຍກໍຈະບໍ່ປ່ອຍພວກອິດສະຣາເອນໄປ.’ ຫຼັງຈາກນັ້ນ ຟາໂຣກໍບັງຄັບໃຫ້ພວກອິດສະຣາເອນເຮັດວຽກໜັກກວ່າເກົ່າອີກ. ພະເຢໂຫວາເລີຍໃຫ້ບົດຮຽນບາງຢ່າງກັບຟາໂຣ. ເຈົ້າຮູ້ບໍວ່າພະເຢໂຫວາໄດ້ເຮັດຫຍັງ? ເພິ່ນໄດ້ເຮັດໃຫ້ເກີດໄພພິບັດ 10 ຢ່າງໃນເອຢິບ. ພະເຢໂຫວາບອກໂມເຊວ່າ: ‘ຟາໂຣບໍ່ຍອມຟັງເຮົາ. ມື້ອື່ນເຊົ້າລາວຈະໄປແມ່ນ້ຳນິນ ໃຫ້ເຈົ້າໄປຫາລາວແລະບອກລາວວ່າຖ້າບໍ່ປ່ອຍຄົນຂອງເຮົາໄປ ນ້ຳໃນແມ່ນ້ຳນິນຈະກາຍເປັນເລືອດ.’ ໂມເຊເຊື່ອຟັງພະເຢໂຫວາແລະໄປຫາຟາໂຣ. ຟາໂຣແນມເບິ່ງອາໂຣນເອົາໄມ້ຄ້ອນເທົ້າຟາດໃສ່ແມ່ນ້ຳນິນ ແລ້ວນ້ຳໃນແມ່ນ້ຳກໍກາຍເປັນເລືອດ. ປາໃນແມ່ນ້ຳກໍຕາຍແລະນ້ຳກໍເລີ່ມເນົ່າເໝັນຈົນກິນບໍ່ໄດ້. ແຕ່ຟາໂຣກໍຍັງບໍ່ຍອມປ່ອຍພວກອິດສະຣາເອນໄປ.
ເຈັດມື້ຕໍ່ມາ ພະເຢໂຫວາໄດ້ສົ່ງໂມເຊກັບໄປບອກຟາໂຣວ່າ: ‘ຖ້າເຈົ້າຍັງບໍ່ຍອມປ່ອຍເຂົາເຈົ້າໄປ ຢູ່ເອຢິບຈະເຕັມແຕ່ຝູງກົບ.’ ອາໂຣນຍົກໄມ້ຄ້ອນເທົ້າຂຶ້ນ ແລ້ວຝູງກົບກໍມາເຕັມແຜ່ນດິນ. ມັນຢູ່ໃນເຮືອນ ໃນບ່ອນນອນ ແລະໃນຖ້ວຍຂອງຄົນເອຢິບ. ມີກົບຢູ່ທົ່ວທຸກບ່ອນໃນເອຢິບ! ຟາໂຣບອກໂມເຊໃຫ້ຂໍພະເຢໂຫວາເຮັດໃຫ້ກົບໝົດໄປຈາກແຜ່ນດິນ ແລ້ວລາວສັນຍາວ່າຈະປ່ອຍພວກອິດສະຣາເອນໄປ. ພະເຢໂຫວາຈຶ່ງຢຸດໄພພິບັດນີ້. ພວກເອຢິບເກັບຊາກກົບຕາຍມາລວມກັນໄດ້ບັກຫຼາຍໆກອງ. ແລ້ວທົ່ວແຜ່ນດິນກໍມີແຕ່ກິ່ນເໝັນ. ແຕ່ຟາໂຣກໍຍັງບໍ່ປ່ອຍພວກອິດສະຣາເອນໄປ.
ຕໍ່ມາ ພະເຢໂຫວາກໍບອກໂມເຊວ່າ: ‘ໃຫ້ອາໂຣນເອົາໄມ້ຄ້ອນເທົ້າຟາດໃສ່ຂີ້ຝຸ່ນຢູ່ດິນ ແລ້ວຂີ້ຝຸ່ນກໍຈະກາຍເປັນໂຕຮີ້ນ.’ ທັນໃດນັ້ນກໍມີໂຕຮີ້ນເຕັມໄປທົ່ວທຸກບ່ອນ. ຄົນຂອງຟາໂຣກໍເລີຍມາບອກຟາໂຣວ່າ: ‘ໄພພິບັດນີ້ມາຈາກພະເຈົ້າ.’ ແຕ່ຟາໂຣກໍຍັງບໍ່ປ່ອຍພວກອິດສະຣາເອນໄປ.
“ເຮົາຈະເຮັດໃຫ້ເຂົາເຈົ້າເຫັນອຳນາດແລະລິດເດດຂອງເຮົາ ແລະເຂົາເຈົ້າຈະໄດ້ຮູ້ວ່າຊື່ຂອງເຮົາແມ່ນເຢໂຫວາ.”—ເຢເຣມີຢາ 16:21