ບົດ 31
ໂມເຊແລະອາໂລນເຂົ້າເຝົ້າຟາໂລ
ເມື່ອໂມເຊກັບໄປອີຢີບ ເພິ່ນໄດ້ເລົ່າໃຫ້ອາໂລນອ້າຍຟັງເຖິງການອັດສະຈັນທັງໝົດນັ້ນ. ແລະເມື່ອໂມເຊແລະອາໂລນໄດ້ສະແດງການອັດສະຈັນເຫຼົ່ານີ້ໃຫ້ຊົນຍິດສະລາເອນເຫັນ ຜູ້ຄົນທັງປວງໄດ້ເຊື່ອວ່າພະເຢໂຫວາສະຖິດຢູ່ກັບທ່ານທັງສອງ.
ແລ້ວໂມເຊແລະອາໂລນເຂົ້າເຝົ້າຟາໂລ. ພວກເຂົາທູນວ່າ: ‘ພະເຢໂຫວາພະເຈົ້າແຫ່ງຊົນຍິດສະລາເອນກ່າວວ່າ: “ຈົ່ງປ່ອຍໃຫ້ປະຊາຊົນຂອງເຮົາອອກໄປສາມມື້ ເພື່ອເຂົາຈະສາມາດນະມັດສະການເຮົາໄດ້ໃນປ່າ.” ແຕ່ຟາໂລຕອບວ່າ: ‘ເຮົາບໍ່ເຊື່ອໃນພະເຢໂຫວາ. ແລະເຮົາຈະບໍ່ປ່ອຍໃຫ້ຊົນຍິດສະລາເອນໄປ.’
ຟາໂລຮູ້ສຶກໂກດ ເພາະປະຊາຊົນຕ້ອງການຢຸດງານເພື່ອໄປນະມັດສະການພະເຢໂຫວາ. ດັ່ງນັ້ນຈຶ່ງບັງຄັບໃຫ້ພວກເຂົາເຮັດວຽກໜັກກວ່າອີກ. ພວກຍິດສະລາເອນໄດ້ກ່າວໂທດໃຫ້ແກ່ໂມເຊ ເພາະພວກເຂົາຖືກບີບບັງຄັບຢ່າງຮ້າຍແຮງ ແລະໂມເຊກໍ່ຮູ້ສຶກເສົ້າໃຈ. ແຕ່ພະເຢໂຫວາບອກວ່າເຂົາບໍ່ຕ້ອງວິຕົກເລີຍ. ພະເຢໂຫວາກ່າວວ່າ: ‘ເຮົາຈະເຮັດໃຫ້ຟາໂລປ່ອຍຜູ້ຄົນຂອງເຮົາໄປ.’
ໂມເຊແລະອາໂລນໄປເຝົ້າຟາໂລອີກ. ຄັ້ງນີ້ເຂົາໄດ້ເຮັດການອັດສະຈັນ. ອາໂລນໂຍນຖິ້ມໄມ້ເທົ້າຂອງເຂົາລົງ ແລະໄມ້ເທົ້າກາຍເປັນງູໃຫຍ່. ແຕ່ພວກຄົນສະຫຼາດໝໍວິຊາອາຄົມໄດ້ໂຍນຖິ້ມໄມ້ເທົ້າລົງ ແລະງູກໍ່ໄດ້ປາກົດຂຶ້ນ. ແຕ່ເບິ່ງກ່ອນ! ງູຂອງອາໂລນພວມກິນງູຂອງພວກຄົນສະຫຼາດ. ຟາໂລກໍ່ບໍ່ອະນຸຍາດໃຫ້ປ່ອຍຊົນຍິດສະລາເອນໄປ.
ຕອນນີ້ເຖິງເວລາແລ້ວທີ່ພະເຢໂຫວາຈະສອນບົດຮຽນໃຫ້ແກ່ຟາໂລ. ເຈົ້າຮູ້ບໍວ່າພະເຢໂຫວາໄດ້ເຮັດແນວໃດ? ໂດຍໄດ້ນຳເອົາໄພພິບັດຫຼືໄພລົບກວນໃຫຍ່ຫຼວງ 10 ປະການມາເທິງອີຢີບ.
ພາຍຫຼັງໄພພິບັດຫຼາຍປະການແລ້ວ ຟາໂລໄດ້ສົ່ງຄົນໄປເອີ້ນໂມເຊມາຫາແລະກ່າວວ່າ: ‘ຈົ່ງໃຫ້ໄພພິບັດຢຸດເຖີດ ແລະເຮົາຈະປ່ອຍຊົນຍິດສະລາເອນໄປ.’ ແຕ່ເມື່ອໄພພິບັດໄດ້ຢຸດແລ້ວ ຟາໂລກໍ່ປ່ຽນໃຈຂອງຕົນ. ເຂົາບໍ່ຍອມໃຫ້ຜູ້ຄົນໄປ. ແຕ່ໃນທີ່ສຸດ ຫຼັງຈາກໄພພິບັດປະການທີ 10 ຟາໂລຈຶ່ງສັ່ງໃຫ້ຊົນຍິດສະລາເອນອອກໄປ.
ເຈົ້າຮູ້ຈັກໄພພິບັດ 10 ປະການແຕ່ລະຢ່າງບໍ? ຈົ່ງພິກເບິ່ງໜ້າຕໍ່ໄປແລະຮຽນເຖິງໄພພິບັດເຫຼົ່ານັ້ນ.
ອຸປະຍົກໜີ 4:27-31; 5:1-23; 6:1-13, 26-30; 7:1-13.