ບົດຄວາມສຶກສາທີ 30
ເຫັນຄ່າການເປັນສະມາຊິກຄອບຄົວຂອງພະເຢໂຫວາ
“ພະອົງສ້າງລາວ [ມະນຸດ] ໃຫ້ຕ່ຳກວ່າທູດສະຫວັນໜ້ອຍໜຶ່ງ ພະອົງໃຫ້ລາວມີກຽດຕິຍົດແລະຄວາມສະຫງ່າງາມ.”—ເພງ. 8:5, ລ.ມ.
ເພງ 123 ເຊື່ອຟັງກົດລະບຽບຂອງອົງການພະເຈົ້າຢ່າງພັກດີ
ໃຈຄວາມສຳຄັນa
1. ເມື່ອເຮົາຄິດເຖິງທຸກສິ່ງທີ່ພະເຢໂຫວາສ້າງ ເຮົາອາດຈະຖາມຕົວເອງແນວໃດ?
ເມື່ອເຮົາຄິດເຖິງທຸກສິ່ງທີ່ພະເຢໂຫວາສ້າງລວມທັງຈັກກະວານອັນກວ້າງໃຫຍ່ໄພສານ ເຮົາກໍອາດຈະຮູ້ສຶກຄືກັບດາວິດຜູ້ຂຽນຄຳເພງທີ່ໄດ້ອະທິດຖານເຖິງພະເຢໂຫວາວ່າ: “ເມື່ອຂ້ອຍເບິ່ງທ້ອງຟ້າເຊິ່ງເປັນຜົນງານຂອງພະອົງ ແລະດວງເດືອນກັບດວງດາວທີ່ພະອົງສ້າງໄວ້ ຂ້ອຍກໍຄິດວ່າ ມະນຸດແມ່ນໃຜພະອົງຈຶ່ງຄິດຮອດລາວ ແລະລູກມະນຸດແມ່ນໃຜທີ່ພະອົງຕ້ອງເບິ່ງແຍງລາວ?” (ເພງ. 8:3, 4, ລ.ມ.) ເມື່ອເຮົາສົມທຽບຕົວເອງກັບດວງດາວຕ່າງໆທີ່ພະເຢໂຫວາສ້າງ ເຮົາອາດຈະຮູ້ສຶກຄືກັບດາວິດທີ່ຄິດວ່າ ເປັນຫຍັງພະເຢໂຫວາຄືສົນໃຈເຮົາ? ແລະຄືກັບທີ່ເຮົາຈະໄດ້ຮຽນໃນບົດຄວາມນີ້ ພະເຢໂຫວາບໍ່ພຽງແຕ່ສົນໃຈອາດາມແລະເອວາເຊິ່ງເປັນມະນຸດຄູ່ທຳອິດ ແຕ່ເພິ່ນຍັງໃຫ້ເຂົາເຈົ້າໄດ້ມາເປັນສ່ວນໜຶ່ງຂອງຄອບຄົວເພິ່ນ.
2. ພະເຢໂຫວາຢາກໃຫ້ອາດາມແລະເອວາເຮັດຫຍັງ?
2 ອາດາມແລະເອວາເປັນມະນຸດຄູ່ທຳອິດທີ່ພະເຢໂຫວາສ້າງໃຫ້ຢູ່ໃນໂລກ ແລະເພິ່ນກໍປະຕິບັດກັບເຂົາເຈົ້າດ້ວຍຄວາມຮັກຄືກັບພໍ່ທີ່ຮັກລູກ. ເພິ່ນຄາດໝາຍໃຫ້ເຂົາເຈົ້າເຮັດວຽກຊ່ວຍກັນໂດຍບອກເຂົາເຈົ້າວ່າ: “ຈົ່ງພາກັນອອກແມ່ແພ່ລູກເກີດມາກທະວີຂຶ້ນໃຫ້ແຜ່ນດິນເຕັມ ແລະຈົ່ງບັງຄັບແຜ່ນດິນໂລກ.” (ຕົ້ນ. 1:28) ພະເຢໂຫວາຢາກໃຫ້ເຂົາເຈົ້າມີລູກແລະເບິ່ງແຍງສິ່ງຕ່າງໆທີ່ຢູ່ໃນໂລກ. ຖ້າເຂົາເຈົ້າເຊື່ອຟັງແລະເຮັດຕາມສິ່ງທີ່ພະເຢໂຫວາບອກ ເຂົາເຈົ້າແລະລູກຫຼານກໍຈະໄດ້ຢູ່ໃນຄອບຄົວຂອງພະເຢໂຫວາຕະຫຼອດໄປ.
3. ເປັນຫຍັງເຮົາເວົ້າໄດ້ວ່າພະເຢໂຫວາໃຫ້ກຽດອາດາມແລະເອວາໃຫ້ຢູ່ໃນຄອບຄົວຂອງເພິ່ນ?
3 ພະເຢໂຫວາໃຫ້ກຽດອາດາມແລະເອວາໄດ້ມາເປັນສ່ວນໜຶ່ງຂອງຄອບຄົວເພິ່ນ. ຄືກັບທີ່ດາວິດຂຽນໄວ້ໃນຄຳເພງ 8:5, ລ.ມ. ທີ່ວ່າ: “ພະອົງສ້າງ [ມະນຸດ] ໃຫ້ຕ່ຳກວ່າທູດສະຫວັນໜ້ອຍໜຶ່ງ ພະອົງໃຫ້ລາວມີກຽດຕິຍົດແລະຄວາມສະຫງ່າງາມ.” ທີ່ຈິງ ມະນຸດບໍ່ໄດ້ມີຄວາມສາມາດແລະລິດອຳນາດເທົ່າທຽມກັບທູດສະຫວັນ. (ເພງ. 103:20) ແຕ່ມະນຸດກໍຕ່ຳຕ້ອຍກວ່າທູດສະຫວັນພຽງແຕ່ ‘ໜ້ອຍດຽວ.’ ນີ້ສະແດງວ່າພະເຢໂຫວາໄດ້ໃຫ້ມະນຸດຄູ່ທຳອິດມີຊີວິດທີ່ດີແທ້ໆ!
4. ເກີດຫຍັງຂຶ້ນເມື່ອອາດາມກັບເອວາບໍ່ເຊື່ອຟັງພະເຢໂຫວາ ແລະເຮົາຈະຮຽນຫຍັງໃນບົດຄວາມນີ້?
4 ໜ້າເສຍດາຍທີ່ອາດາມແລະເອວາບໍ່ເຊື່ອຟັງພະເຢໂຫວາ ເຂົາເຈົ້າຈຶ່ງບໍ່ໄດ້ຢູ່ໃນຄອບຄົວຂອງເພິ່ນ. ເລື່ອງນີ້ສົ່ງຜົນຕໍ່ລູກຫຼານຂອງເຂົາເຈົ້ານຳເຊິ່ງເຮົາຈະໄດ້ຮຽນຕໍ່ໄປໃນບົດນີ້. ແຕ່ຄວາມຕ້ອງການຂອງພະເຢໂຫວາກໍຍັງຄືເກົ່າ. ເພິ່ນຢາກໃຫ້ມະນຸດທີ່ເຊື່ອຟັງເປັນຄົນໃນຄອບຄົວຂອງເພິ່ນຕະຫຼອດໄປ. ຕອນນີ້ໃຫ້ເຮົາມາເບິ່ງວ່າພະເຢໂຫວາໄດ້ໃຫ້ກຽດເຮົາແນວໃດ. ຈາກນັ້ນ ເຮົາຈະເບິ່ງວ່າເຮົາຕ້ອງເຮັດຫຍັງເພື່ອຈະສະແດງໃຫ້ເຫັນວ່າເຮົາຢາກຢູ່ໃນຄອບຄົວຂອງພະເຢໂຫວາ. ແລະສຸດທ້າຍເຮົາຈະມາເບິ່ງວ່າ ຄົນໃນຄອບຄົວຂອງພະເຢໂຫວາທີ່ຢູ່ໃນໂລກຈະໄດ້ຮັບສິ່ງດີໆຫຍັງແດ່.
ພະເຢໂຫວາໃຫ້ກຽດມະນຸດແນວໃດ?
ພະເຢໂຫວາໃຫ້ກຽດເຮົາໃນທາງໃດແດ່? (ເບິ່ງຂໍ້ 5-11)b
5. ເຮົາຈະສະແດງໃຫ້ເຫັນແນວໃດວ່າເຮົາຮູ້ບຸນຄຸນພະເຢໂຫວາທີ່ໄດ້ສ້າງເຮົາຕາມແບບຂອງເພິ່ນ?
5 ພະເຢໂຫວາໃຫ້ກຽດເຮົາໂດຍສ້າງເຮົາຕາມແບບຂອງເພິ່ນ. (ຕົ້ນ. 1:26, 27) ຍ້ອນເຮົາຖືກສ້າງຕາມແບບຂອງພະເຈົ້າ ເຮົາຈຶ່ງສາມາດສະແດງຄຸນລັກສະນະທີ່ດີເຫຼົ່ານີ້ໄດ້ ເຊັ່ນ: ຄວາມຮັກ ຄວາມເຫັນອົກເຫັນໃຈ ຄວາມສັດຊື່ ແລະຄວາມຍຸຕິທຳ. (ເພງ. 86:15; 145:17) ເມື່ອເຮົາສະແດງຄຸນລັກສະນະເຫຼົ່ານີ້ຫຼາຍຂຶ້ນ ເຮົາກໍກຳລັງໃຫ້ກຽດພະເຢໂຫວາແລະຮູ້ບຸນຄຸນເພິ່ນ. (1 ປຕ. 1:14-16) ເມື່ອເຮົາເຮັດໃຫ້ພະເຢໂຫວາພໍໃຈ ເຮົາກໍຈະມີຄວາມສຸກ. ຍ້ອນເຮົາມີຄຸນລັກສະນະທີ່ຄືກັບພະເຢໂຫວາ ເຮົາຈຶ່ງສາມາດຢູ່ໃນຄອບຄົວຂອງເພິ່ນໄດ້.
6. ເມື່ອພະເຢໂຫວາສ້າງໂລກນີ້ ເພິ່ນໄດ້ໃຫ້ກຽດມະນຸດແນວໃດ?
6 ພະເຢໂຫວາກຽມບ້ານທີ່ພິເສດໃຫ້ເຮົາ. ພະເຢໂຫວາໄດ້ກຽມໂລກໄວ້ໃຫ້ເປັນບ່ອນຢູ່ຂອງມະນຸດກ່ອນທີ່ເພິ່ນຈະສ້າງມະນຸດຄົນທຳອິດດ້ວຍຊ້ຳ. (ໂຢບ 38:4-6; ຢເຣ. 10:12) ຍ້ອນພະເຢໂຫວາເປັນຜູ້ທີ່ມີໃຈເອື້ອເຟື້ອແລະຄິດເຖິງຄົນອື່ນ ເພິ່ນຈຶ່ງໄດ້ໃຫ້ສິ່ງທີ່ດີຫຼາຍຢ່າງເພື່ອໃຫ້ມະນຸດມີຄວາມສຸກ. (ເພງ. 104:14, 15, 24) ເພິ່ນໄດ້ໃຊ້ເວລາຄິດເຖິງສິ່ງທີ່ເພິ່ນສ້າງແລະ “ເຫັນວ່າສິ່ງນັ້ນດີ.” (ຕົ້ນ. 1:10, 12, 31) ເພິ່ນໄດ້ໃຫ້ກຽດມະນຸດໂດຍໃຫ້ເຂົາເຈົ້າຄຸ້ມຄອງທຸກສິ່ງທີ່ເພິ່ນສ້າງໃນໂລກ. (ເພງ. 8:6) ແລະເພິ່ນຢາກໃຫ້ມະນຸດມີຄວາມສຸກໃນການເບິ່ງແຍງສິ່ງເຫຼົ່ານັ້ນຕະຫຼອດໄປ. ເຈົ້າຢາກຂອບໃຈພະເຢໂຫວາເລື້ອຍໆບໍທີ່ໃຫ້ເຮົາມີສິ່ງທີ່ດີແບບນີ້?
7. ໂຢຊວຍ 24:15 ສະແດງໃຫ້ເຫັນແນວໃດວ່າມະນຸດມີອິດສະຫຼະໃນການເລືອກ?
7 ພະເຢໂຫວາໃຫ້ເຮົາມີອິດສະຫຼະໃນການເລືອກ. ເຮົາສາມາດເລືອກໄດ້ວ່າຈະໃຊ້ຊີວິດຂອງເຮົາແນວໃດ. (ອ່ານໂຢຊວຍ 24:15) ພະເຢໂຫວາມີຄວາມສຸກເມື່ອເຮົາເລືອກທີ່ຈະຮັບໃຊ້ເພິ່ນ. (ເພງ. 84:11; ສຸພາ. 27:11) ເຮົາຍັງສາມາດໃຊ້ອິດສະຫຼະໃນການເລືອກເພື່ອເຮັດສິ່ງທີ່ດີອີກຫຼາຍຢ່າງ. ໃຫ້ເຮົາມາເບິ່ງຕົວຢ່າງຂອງພະເຢຊູ.
8. ພະເຢຊູໃຊ້ອິດສະຫຼະໃນການເລືອກແນວໃດ?
8 ເຮົາສາມາດເຮັດຕາມຕົວຢ່າງຂອງພະເຢຊູໄດ້ໂດຍໃຫ້ຜົນປະໂຫຍດຂອງຄົນອື່ນມາກ່ອນຜົນປະໂຫຍດຂອງເຮົາເອງ. ມີເທື່ອໜຶ່ງຕອນທີ່ພະເຢຊູແລະພວກອັກຄະສາວົກຮູ້ສຶກເມື່ອຍຫຼາຍແລະກໍຢາກຊອກຫາບ່ອນງຽບໆເພື່ອຈະພັກຜ່ອນ. ແຕ່ເຂົາເຈົ້າກໍບໍ່ໄດ້ພັກ ຍ້ອນຝູງຄົນໄດ້ມາຊອກຫາພະເຢຊູແລະຢາກໃຫ້ເພິ່ນສອນເຂົາເຈົ້າ. ເຖິງປານນັ້ນພະເຢຊູກໍບໍ່ໄດ້ອາລົມເສຍ ເພິ່ນເຫັນອົກເຫັນໃຈເຂົາເຈົ້າ. ແລ້ວພະເຢຊູໄດ້ເຮັດຫຍັງ? ‘ເພິ່ນໄດ້ສອນພວກເຂົາຫຼາຍ ເລື່ອງ.’ (ມຣກ. 6:30-34) ເມື່ອເຮົາຮຽນແບບພະເຢຊູໂດຍສະລະເວລາແລະກຳລັງຂອງເຮົາເພື່ອຊ່ວຍຄົນອື່ນ ເຮົາກໍກຳລັງໃຫ້ກຽດແລະຍົກຍ້ອງພະເຢໂຫວາພໍ່ທີ່ຢູ່ໃນສະຫວັນ. (ມທ. 5:14-16) ແລະເຮົາກໍຍັງສະແດງໃຫ້ເຫັນວ່າເຮົາຢາກຢູ່ໃນຄອບຄົວຂອງພະເຢໂຫວາ.
9. ພໍ່ແມ່ຄວນຄິດເຖິງໜ້າທີ່ຫຍັງ?
9 ພະເຢໂຫວາໃຫ້ມະນຸດສາມາດມີລູກແລະມີໜ້າທີ່ສອນລູກໃຫ້ຮັກແລະຮັບໃຊ້ເພິ່ນ. ຜູ້ທີ່ເປັນພໍ່ແມ່ ເຈົ້າໄດ້ເຫັນຄ່າຂອງຂວັນທີ່ພິເສດນີ້ບໍ? ເຖິງວ່າທູດສະຫວັນຈະດີກວ່າເຮົາໃນຫຼາຍດ້ານ ແຕ່ພະເຢໂຫວາກໍບໍ່ໄດ້ໃຫ້ເຂົາເຈົ້າມີສິດທິພິເສດນີ້. ດັ່ງນັ້ນ ຜູ້ທີ່ກຳລັງລ້ຽງລູກຢູ່ກໍຄວນຈະເຫັນຄ່າສິດທິພິເສດນີ້. ພໍ່ແມ່ມີໜ້າທີ່ທີ່ສຳຄັນທີ່ຈະລ້ຽງລູກຕາມ “ຄຳສັ່ງສອນແລະຄຳຕັກເຕືອນຈາກພະເຢໂຫວາ.” (ອຟຊ. 6:4; ບັນຍັດ. 6:5-7; ເພງ. 127:3) ເພື່ອຈະຊ່ວຍພໍ່ແມ່ໃຫ້ເຮັດແບບນີ້ໄດ້ ອົງການຂອງພະເຢໂຫວາໄດ້ຈັດໃຫ້ມີເຄື່ອງມືຕ່າງໆເຊັ່ນ: ເພງ ວິດີໂອ ແລະປຶ້ມຕ່າງໆທີ່ຢູ່ໃນເວັບໄຊ. ນີ້ສະແດງວ່າພະເຢໂຫວາແລະພະເຢຊູຮັກເດັກນ້ອຍຫຼາຍແທ້ໆ. (ລກ. 18:15-17) ເມື່ອພໍ່ແມ່ໝາຍເພິ່ງພະເຢໂຫວາແລະເຮັດດີທີ່ສຸດໃນການເບິ່ງແຍງລູກ ພະເຢໂຫວາກໍຈະພໍໃຈເຂົາເຈົ້າ ແລະເຂົາເຈົ້າກໍມີໂອກາດທີ່ຈະໄດ້ຊ່ວຍລູກໃຫ້ຢູ່ໃນຄອບຄົວຂອງພະເຢໂຫວາຕະຫຼອດໄປ!
10-11. ຍ້ອນຄ່າໄຖ່ ພະເຢໂຫວາຈຶ່ງໃຫ້ເຮົາມີໂອກາດໄດ້ຫຍັງ?
10 ພະເຢໂຫວາໃຫ້ລູກຊາຍທີ່ເພິ່ນຮັກຫຼາຍເພື່ອເຮົາຈະເຂົ້າມາເປັນຄອບຄົວຂອງເພິ່ນໄດ້ອີກເທື່ອໜຶ່ງ. ຄືກັບທີ່ເຮົາໄດ້ຮຽນໃນຂໍ້ທີ 4 ແລ້ວວ່າ ອາດາມແລະເອວາບໍ່ພຽງແຕ່ບໍ່ໄດ້ຢູ່ໃນຄອບຄົວຂອງພະເຢໂຫວາ ແຕ່ເຂົາເຈົ້າຍັງໄດ້ເຮັດໃຫ້ລູກຫຼານບໍ່ໄດ້ຢູ່ໃນຄອບຄົວຂອງພະເຢໂຫວາຄືກັນ. (ຣມ. 5:12) ຍ້ອນອາດາມແລະເອວາຈົງໃຈບໍ່ເຊື່ອຟັງພະເຈົ້າ ເຂົາເຈົ້າຈຶ່ງຖືກຕັດອອກຈາກຄອບຄົວຂອງພະເຢໂຫວາ. ແຕ່ລູກຫຼານຂອງເຂົາເຈົ້າເດ ຈະເປັນແນວໃດ? ພະເຢໂຫວາໄດ້ກຽມບາງຢ່າງເພື່ອຊ່ວຍໃຫ້ຜູ້ທີ່ເຊື່ອຟັງເພິ່ນເຂົ້າມາໃນຄອບຄົວຂອງເພິ່ນໄດ້. ເພິ່ນໄດ້ເຮັດແບບນັ້ນໂດຍເສຍສະລະພະເຢຊູລູກຊາຍຄົນດຽວຂອງເພິ່ນ. (ຢຮ. 3:16; ຣມ. 5:19) ຍ້ອນຄ່າໄຖ່ຂອງພະເຢຊູ ຄົນທີ່ສັດຊື່ 144.000 ຄົນຈຶ່ງສາມາດເຂົ້າມາເປັນລູກຂອງພະເຢໂຫວາໄດ້.—ຣມ. 8:15-17; ພນມ. 14:1
11 ນອກຈາກນັ້ນ ຜູ້ທີ່ສັດຊື່ອີກຫຼາຍລ້ານຄົນເຊິ່ງເຊື່ອຟັງພະເຈົ້າກໍມີໂອກາດທີ່ຈະໄດ້ຢູ່ໃນຄອບຄົວຂອງພະເຢໂຫວາຄືກັນຫຼັງຈາກການທົດສອບຄັ້ງສຸດທ້າຍໃນຕອນທ້າຍ 1.000 ປີ. (ເພງ. 25:14; ຣມ. 8:20, 21) ຍ້ອນເຂົາເຈົ້າມີຄວາມຫວັງແບບນັ້ນ ເຂົາເຈົ້າຈຶ່ງໄດ້ເອີ້ນພະເຢໂຫວາຜູ້ທີ່ສ້າງເຂົາເຈົ້າວ່າ “ພໍ່.” (ມທ. 6:9) ນອກຈາກຄົນກຸ່ມນັ້ນແລ້ວ ກໍຍັງມີຄົນທີ່ຄືນມາຈາກຕາຍທີ່ຈະມີໂອກາດໄດ້ຮຽນຮູ້ເລື່ອງຂອງພະເຢໂຫວາ ແລະຖ້າເຂົາເຈົ້າເຮັດຕາມທີ່ພະເຢໂຫວາບອກ ເຂົາເຈົ້າກໍມີໂອກາດທີ່ຈະໄດ້ເຂົ້າມາເປັນຄົນໃນຄອບຄົວຂອງເພິ່ນຄືກັນ.
12. ຕອນນີ້ເຮົາຈະຕອບຄຳຖາມຫຍັງ?
12 ເຮົາໄດ້ເຫັນແລ້ວວ່າພະເຢໂຫວາໄດ້ເຮັດສິ່ງດີໆຫຼາຍຢ່າງເພື່ອໃຫ້ກຽດມະນຸດ. ຕອນນີ້ ເພິ່ນໄດ້ໃຫ້ຜູ້ຖືກເຈີມເຂົ້າມາເປັນລູກຂອງເພິ່ນແລ້ວ ແລະໃນໂລກໃໝ່ ເພິ່ນກໍຈະໃຫ້ “ຄົນຝູງໃຫຍ່” ມີໂອກາດໄດ້ເຂົ້າມາເປັນລູກຂອງເພິ່ນນຳ. (ພນມ. 7:9) ຄັນຊັ້ນ ຕອນນີ້ເຮົາຕ້ອງເຮັດຫຍັງເພື່ອສະແດງວ່າເຮົາຢາກຢູ່ໃນຄອບຄົວຂອງພະເຢໂຫວາຕະຫຼອດໄປ?
ເຮັດໃຫ້ພະເຢໂຫວາເຫັນວ່າເຈົ້າຢາກຢູ່ໃນຄອບຄົວຂອງເພິ່ນ
13. ເພື່ອຈະໄດ້ຢູ່ໃນຄອບຄົວຂອງພະເຢໂຫວາຕະຫຼອດໄປ ເຮົາຕ້ອງເຮັດແນວໃດ? (ມຣກ. 12:30)
13 ສະແດງຄວາມຮັກຕໍ່ພະເຢໂຫວາໂດຍຮັບໃຊ້ເພິ່ນສຸດຫົວໃຈ. (ອ່ານມາຣະໂກ 12:30) ຂອງຂວັນທີ່ສຳຄັນທີ່ສຸດຢ່າງໜຶ່ງທີ່ພະເຢໂຫວາໃຫ້ເຮົາກໍຄື ຄວາມສາມາດໃນການນະມັດສະການເພິ່ນ. ເຮົາສະແດງໃຫ້ເຫັນວ່າເຮົາຮັກເພິ່ນກໍໂດຍ ‘ເຊື່ອຟັງຄຳສັ່ງຂອງເພິ່ນ.’ (1 ຢຮ. 5:3) ແລະຄຳສັ່ງຢ່າງໜຶ່ງທີ່ພະເຢໂຫວາຢາກໃຫ້ເຮົາເຮັດກໍຄື ເຮັດຕາມທີ່ພະເຢຊູບອກໂດຍສອນຄົນໃຫ້ເຂົ້າມາເປັນລູກສິດ. (ມທ. 28:19) ແລະເພິ່ນຍັງບອກໃຫ້ເຮົາຮັກກັນແລະກັນ. (ຢຮ. 13:35) ພະເຢໂຫວາຈະຮັບເອົາຜູ້ທີ່ເຮັດຕາມຄຳສັ່ງຂອງເພິ່ນໃຫ້ເຂົ້າມາຢູ່ໃນຄອບຄົວຂອງເພິ່ນທີ່ຢູ່ທົ່ວໂລກ.—ເພງ. 15:1, 2
14. ເຮົາຄວນສະແດງຄວາມຮັກຕໍ່ຄົນອື່ນໂດຍເຮັດຫຍັງ? (ມັດທາຍ 9:36-38; ໂຣມ 12:10)
14 ຮັກຄົນອື່ນ. ຄວາມຮັກເປັນຄຸນລັກສະນະທີ່ສຳຄັນທີ່ສຸດຂອງພະເຢໂຫວາ. (1 ຢຮ. 4:8) ພະເຢໂຫວາໄດ້ສະແດງຄວາມຮັກຕໍ່ເຮົາກ່ອນທີ່ເຮົາຈະຮູ້ຈັກເພິ່ນຊ້ຳ. (1 ຢຮ. 4:9, 10) ແລະເຮົາກໍຢາກຮຽນແບບເພິ່ນໂດຍສະແດງຄວາມຮັກຕໍ່ຄົນອື່ນ. (ອຟຊ. 5:1) ວິທີໜຶ່ງທີ່ເຮົາຈະສະແດງຄວາມຮັກຕໍ່ຄົນອື່ນກໍຄື ຊ່ວຍຄົນອື່ນໃຫ້ຮຽນຮູ້ເລື່ອງຂອງພະເຢໂຫວາຕອນທີ່ຍັງມີເວລາຢູ່. (ອ່ານມັດທາຍ 9:36-38) ເມື່ອເຮົາເຮັດແບບນີ້ ເຮົາກໍກຳລັງເປີດໂອກາດໃຫ້ຄົນອື່ນໄດ້ເຂົ້າມາເປັນຄົນໃນຄອບຄົວຂອງພະເຢໂຫວາ. ແຕ່ຫຼັງຈາກທີ່ເຮົາໄດ້ຊ່ວຍຜູ້ໜຶ່ງໃຫ້ຮັບບັບເຕມາແລ້ວ ເຮົາກໍຍັງຕ້ອງສະແດງຄວາມຮັກແລະໃຫ້ກຽດລາວຕໍ່ໆໄປ. (1 ຢຮ. 4:20, 21) ແລ້ວເຮົາຈະຮັກແລະໃຫ້ກຽດລາວແນວໃດ? ວິທີໜຶ່ງກໍຄືເຮົາຄວນໄວ້ໃຈລາວ. ຕົວຢ່າງເຊັ່ນ: ຖ້າເຮົາບໍ່ເຂົ້າໃຈສິ່ງທີ່ລາວເຮັດ ເຮົາຄວນຈະຄິດໃນແງ່ບວກ ແລະບໍ່ຄິດວ່າລາວເຮັດຍ້ອນເຫດຜົນທີ່ເຫັນແກ່ຕົວ. ຖ້າເຮົາເຮັດແບບນີ້ ເຮົາກໍກຳລັງໃຫ້ກຽດລາວແລະຖືວ່າລາວດີກວ່າເຮົາ.—ອ່ານໂຣມ 12:10; ຟລປ. 2:3
15. ເຮົາຄວນສະແດງຄວາມເມດຕາແລະເຮັດດີຕໍ່ໃຜແດ່?
15 ສະແດງຄວາມເມດຕາແລະເຮັດດີຕໍ່ທຸກຄົນ. ຖ້າເຮົາຢາກໃຫ້ພະເຢໂຫວາເປັນພໍ່ຂອງເຮົາຕະຫຼອດໄປ ເຮົາກໍຕ້ອງເຮັດຕາມຄຳສອນໃນຄຳພີໄບເບິນ. ຕົວຢ່າງເຊັ່ນ ພະເຢຊູສອນວ່າເຮົາຄວນສະແດງຄວາມເມດຕາແລະເຮັດດີຕໍ່ທຸກຄົນ ແມ່ນແຕ່ຜູ້ທີ່ເປັນສັດຕູຂອງເຮົາ. (ລກ. 6:32-36) ເຖິງວ່າບາງເທື່ອເຮົາອາດຮູ້ສຶກວ່າຍາກທີ່ຈະເຮັດແບບນີ້ ແຕ່ເຮົາຕ້ອງພະຍາຍາມປ່ຽນຄວາມຄິດແລະເຮັດຄືກັບພະເຢຊູ. ເມື່ອເຮົາພະຍາຍາມສຸດຄວາມສາມາດທີ່ຈະເຊື່ອຟັງພະເຢໂຫວາແລະຮຽນແບບພະເຢຊູ ເຮົາກໍສະແດງໃຫ້ເຫັນວ່າເຮົາຢາກເປັນຄົນໃນຄອບຄົວຂອງພະເຢໂຫວາຕະຫຼອດໄປ.
16. ເຮົາຕ້ອງເຮັດຫຍັງເພື່ອຈະປົກປ້ອງຊື່ສຽງຄອບຄົວຂອງພະເຢໂຫວາ?
16 ປົກປ້ອງຊື່ສຽງຄອບຄົວຂອງພະເຢໂຫວາ. ໃນຄອບຄົວໜຶ່ງ ປົກກະຕິແລ້ວນ້ອງມັກຈະຮຽນແບບອ້າຍ. ຖ້າອ້າຍເຮັດຕາມສິ່ງທີ່ຄຳພີໄບເບິນສອນ ອ້າຍກໍຈະເປັນຕົວຢ່າງທີ່ດີໃຫ້ກັບນ້ອງ. ແຕ່ຖ້າອ້າຍເຮັດສິ່ງທີ່ບໍ່ດີ ນ້ອງກໍອາດຈະຮຽນແບບຕົວຢ່າງທີ່ບໍ່ດີຂອງອ້າຍ. ເລື່ອງນີ້ກໍຄ້າຍຄືກັບຄອບຄົວຂອງພະເຢໂຫວາຄືກັນ. ຖ້າຄລິດສະຕຽນທີ່ສັດຊື່ກາຍເປັນຜູ້ທີ່ທໍລະຍົດພະເຈົ້າ ເຮັດຜິດສິນລະທຳທາງເພດຫຼືເຮັດສິ່ງທີ່ບໍ່ດີຢ່າງອື່ນ ຄົນອື່ນກໍອາດຈະຮຽນແບບລາວໄດ້. ຜູ້ທີ່ເຮັດແບບນີ້ຈະທຳລາຍຊື່ສຽງຄອບຄົວຂອງພະເຢໂຫວາ. (1 ທຊ. 4:3-8) ດັ່ງນັ້ນ ເຮົາຕ້ອງບໍ່ເຮັດຕາມຕົວຢ່າງທີ່ບໍ່ດີແລະບໍ່ຍອມໃຫ້ສິ່ງໃດກໍຕາມມາທຳລາຍສາຍສຳພັນຂອງເຮົາກັບພະເຢໂຫວາພໍ່ທີ່ຢູ່ໃນສະຫວັນ.
17. ເຮົາຄວນຫຼີກລ່ຽງຄວາມຄິດແບບໃດ ແລະຍ້ອນຫຍັງ?
17 ໄວ້ໃຈພະເຢໂຫວາຫຼາຍກວ່າຊັບສິນເງິນຄຳ. ພະເຢໂຫວາສັນຍາວ່າຖ້າເຮົາໃຫ້ການປົກຄອງຂອງເພິ່ນແລະການເຊື່ອຟັງເພິ່ນເປັນສິ່ງສຳຄັນທີ່ສຸດໃນຊີວິດ ເພິ່ນກໍຈະໃຫ້ເຮົາມີສິ່ງຈຳເປັນທີ່ເຮົາຕ້ອງມີ ເຊັ່ນ: ອາຫານ ແລະບ່ອນຢູ່ອາໄສ. (ເພງ. 55:22; ມທ. 6:33) ຖ້າເຮົາໝັ້ນໃຈໃນຄຳສັນຍານັ້ນ ເຮົາກໍຈະບໍ່ຄິດວ່າສິ່ງຂອງໃນໂລກນີ້ຈະຊ່ວຍໃຫ້ເຮົາປອດໄພແລະມີຄວາມສຸກໄດ້ ເພາະເຮົາຮູ້ວ່າເຮົາຈະມີຄວາມສຸກໄດ້ແທ້ໆກໍຕໍ່ເມື່ອເຮົາເຮັດຕາມທີ່ພະເຢໂຫວາບອກ. (ຟລປ. 4:6, 7) ເຖິງວ່າເຮົາຈະມີເງິນຊື້ສິ່ງຕ່າງໆໄດ້ ແຕ່ເຮົາກໍຕ້ອງຄິດນຳວ່າເຮົາໃຊ້ເວລາແລະກຳລັງກັບສິ່ງເຫຼົ່ານັ້ນຫຼາຍເກີນໄປບໍ? ເຮົາເປັນຄົນທີ່ມັກຄິດເຖິງແຕ່ວັດຖຸສິ່ງຂອງບໍ? ເຮົາຕ້ອງຈື່ໄວ້ວ່າພະເຢໂຫວາເປັນຜູ້ມອບໝາຍວຽກໃຫ້ເຮົາເຮັດໃນຄອບຄົວຂອງເພິ່ນ. ດັ່ງນັ້ນ ເຮົາບໍ່ຄວນຍອມໃຫ້ສິ່ງໃດກໍຕາມມາເຮັດໃຫ້ເຮົາບໍ່ໄດ້ເອົາໃຈໃສ່ຕໍ່ວຽກທີ່ເພິ່ນມອບໝາຍໃຫ້ເຮັດ. ເຮົາບໍ່ຢາກເປັນຄືກັບຊາຍໜຸ່ມຄົນໜຶ່ງທີ່ບໍ່ຍອມຕິດຕາມພະເຢຊູຍ້ອນຍຶດຕິດກັບຊັບສິນເງິນຄຳ. ນີ້ເຮັດໃຫ້ລາວສູນເສຍໂອກາດທີ່ຈະຮັບໃຊ້ພະເຢໂຫວາແລະເຂົ້າມາເປັນຄົນໃນຄອບຄົວຂອງເພິ່ນ.—ມຣກ. 10:17-22
ສິ່ງທີ່ລູກຂອງພະເຢໂຫວາຈະມີຕະຫຼອດໄປ
18. ຄົນທີ່ເຊື່ອຟັງຈະໄດ້ຮັບກຽດແລະສິ່ງທີ່ດີຫຍັງແດ່?
18 ທຸກຄົນທີ່ເຊື່ອຟັງຈະໄດ້ຮັບກຽດທີ່ດີທີ່ສຸດເຊິ່ງກໍຄື ໄດ້ນະມັດສະການພະເຢໂຫວາຕະຫຼອດໄປ. ຜູ້ທີ່ມີຄວາມຫວັງຢູ່ໃນໂລກນີ້ຈະມີຄວາມສຸກທີ່ໄດ້ເບິ່ງແຍງໂລກທີ່ພະເຢໂຫວາສ້າງໃຫ້ເປັນບ່ອນຢູ່ຂອງເຮົາ. ອີກບໍ່ດົນ ການປົກຄອງຂອງພະເຈົ້າຈະເຮັດໃຫ້ໂລກນີ້ແລະທຸກສິ່ງທີ່ຢູ່ໃນໂລກກັບມາສວຍງາມອີກເທື່ອໜຶ່ງ. ພະເຢຊູຈະແກ້ໄຂບັນຫາທັງໝົດທີ່ເກີດຂຶ້ນຍ້ອນອາດາມແລະເອວາຕັດສິນໃຈທີ່ຈະອອກຈາກຄອບຄົວຂອງພະເຈົ້າ. ພະເຢໂຫວາຈະປຸກຫຼາຍລ້ານຄົນໃຫ້ຄືນມາຈາກຕາຍເພື່ອເຂົາເຈົ້າຈະມີໂອກາດທີ່ຈະໄດ້ຊີວິດຕະຫຼອດໄປແລະມີສຸຂະພາບທີ່ແຂງແຮງໃນໂລກທີ່ເປັນອຸທິຍານ. (ລກ. 23:42, 43) ເມື່ອທຸກຄົນໃນໂລກນີ້ກຳລັງຈະກາຍເປັນຄົນທີ່ສົມບູນແບບ ເຂົາເຈົ້າກໍຈະ “ມີກຽດຕິຍົດແລະສະຫງ່າງາມ” ຄືກັບທີ່ດາວິດຂຽນໄວ້.—ເພງ. 8:5, ລ.ມ.
19. ເຮົາຄວນຄິດເຖິງຫຍັງສະເໝີ?
19 ຖ້າເຈົ້າຢູ່ໃນກຸ່ມທີ່ເປັນ “ຄົນຝູງໃຫຍ່” ເຈົ້າກໍມີຄວາມຫວັງທີ່ດີຫຼາຍແທ້ໆ. ພະເຢໂຫວາຮັກເຈົ້າແລະຢາກໃຫ້ເຈົ້າເຂົ້າມາຢູ່ໃນຄອບຄົວຂອງເພິ່ນ. ດັ່ງນັ້ນ ໃຫ້ເຈົ້າເຮັດທຸກຢ່າງເພື່ອຈະເຮັດໃຫ້ເພິ່ນພໍໃຈ. ໃຫ້ພະຍາຍາມຄິດເຖິງຄວາມຫວັງແລະຄຳສັນຍາຂອງເພິ່ນທຸກມື້. ໃຫ້ເຈົ້າເຫັນຄ່າສິດທິພິເສດທີ່ໄດ້ຮັບໃຊ້ພະເຢໂຫວາແລະໄດ້ສັນລະເສີນເພິ່ນຕະຫຼອດໄປ.
ເພງ 107 ພະເຈົ້າເປັນແບບຢ່າງຂອງຄວາມຮັກ
a ເພື່ອຄອບຄົວຈະມີຄວາມສຸກ ທຸກຄົນໃນຄອບຄົວຕ້ອງຮູ້ຈັກໜ້າທີ່ຂອງຕົວເອງແລະຕ້ອງຊ່ວຍເຫຼືອກັນ ເຊັ່ນ: ພໍ່ເປັນຫົວໜ້າຄອບຄົວ ແມ່ເປັນຜູ້ຊ່ວຍພໍ່ ແລະລູກກໍຕ້ອງເຊື່ອຟັງພໍ່ແມ່. ຄ້າຍຄືກັບຄອບຄົວຂອງພະເຢໂຫວາ ພະເຢໂຫວາເປັນຜູ້ມອບໝາຍວຽກໃຫ້ເຮົາແຕ່ລະຄົນ ແລະຖ້າເຮົາເຮັດຕາມທີ່ເພິ່ນມອບໝາຍໃຫ້ ເຮົາກໍຈະໄດ້ຢູ່ໃນຄອບຄົວຂອງເພິ່ນຕະຫຼອດໄປ.
b ຄຳອະທິບາຍຮູບພາບ: ຜົວເມຍຄູ່ນີ້ໄດ້ສະແດງຄວາມຮັກແລະຄວາມເຫັນອົກເຫັນໃຈຕໍ່ກັນແລະຕໍ່ລູກຊາຍຂອງເຂົາເຈົ້ານຳ ຍ້ອນເຂົາເຈົ້າຖືກສ້າງຕາມແບບຂອງພະເຈົ້າ. ຜົວເມຍຄູ່ນີ້ຮັກພະເຢໂຫວາແລະເຫັນວ່າລູກເປັນຂອງຂວັນ ເຂົາເຈົ້າຈຶ່ງສອນລູກໃຫ້ຮັກແລະຮັບໃຊ້ພະເຢໂຫວາ. ພໍ່ແມ່ໄດ້ໃຊ້ວິດີໂອເພື່ອອະທິບາຍໃຫ້ລູກເຂົ້າໃຈວ່າ ເປັນຫຍັງພະເຢໂຫວາຈຶ່ງໃຫ້ພະເຢຊູມາເປັນຄ່າໄຖ່ ແລະຍັງສອນລູກວ່າອີກບໍ່ດົນໂລກຈະກາຍເປັນອຸທິຍານ ແລະເຂົາເຈົ້າຈະໄດ້ເບິ່ງແຍງລູກແລະສັດສາວາສິ່ງຕະຫຼອດໄປ.