ບົດຄວາມສຶກສາທີ 22
ເພງທີ 127 ຂ້ອຍຄວນເປັນຄົນແບບໃດ
ໃຊ້ເວລາຕອນທີ່ເປັນແຟນກັນເພື່ອຊ່ວຍໃຫ້ຕັດສິນໃຈຢ່າງຖືກຕ້ອງ
“ຄວາມງາມ . . . ທີ່ຢູ່ພາຍໃນ . . . ມີຄ່າຫຼາຍ.”—1ປຕ. 3:4
ຈຸດສຳຄັນ
ຄົນທີ່ເປັນແຟນກັນຈະເຮັດຫຍັງເພື່ອຈະຕັດສິນໃຈຢ່າງຖືກຕ້ອງ ແລະພີ່ນ້ອງໃນປະຊາຄົມຈະຊ່ວຍເຂົາເຈົ້າແນວໃດ?
1-2. ບາງຄົນຮູ້ສຶກແນວໃດຕອນທີ່ເປັນແຟນກັນ?
ຕອນທີ່ເປັນແຟນກັນເປັນເວລາທີ່ມີຄວາມສຸກແລະໜ້າຕື່ນເຕັ້ນ. ຖ້າເຈົ້າກຳລັງຄົບຫາກັບຜູ້ໃດຜູ້ໜຶ່ງຢູ່ ເຈົ້າຄືຊິຢາກໃຫ້ມັນເປັນເວລາທີ່ມີຄວາມສຸກ ແລະຫຼາຍຄູ່ກໍຮູ້ສຶກແບບນັ້ນ. ຊີຢານaພີ່ນ້ອງຍິງຈາກເອທິໂອເປຍເວົ້າວ່າ: “ຕອນທີ່ຂ້ອຍກັບຜົວເປັນແຟນກັນເປັນໜຶ່ງໃນຊ່ວງເວລາທີ່ຂ້ອຍມີຄວາມສຸກຫຼາຍທີ່ສຸດ. ຕອນນັ້ນ ເຮົາໄດ້ລົມກັນຫຼາຍເລື່ອງທີ່ສຳຄັນ ແລະກໍໄດ້ລົມເລື່ອງອື່ນນຳທີ່ເຮັດໃຫ້ເຮົາຫົວ. ຂ້ອຍມີຄວາມສຸກຫຼາຍທີ່ເຈິຄົນທີ່ຂ້ອຍຮັກແລະລາວກໍຮັກຂ້ອຍຄືກັນ.”
2 ເຖິງຈະເປັນແນວນັ້ນ ອາເລໂຊພີ່ນ້ອງຊາຍຈາກເນເທີແລນເວົ້າວ່າ: “ຕອນທີ່ຂ້ອຍກັບເມຍເປັນແຟນກັນ ເຮົາມີຄວາມສຸກທີ່ໄດ້ຮູ້ຈັກກັນຫຼາຍຂຶ້ນ. ແຕ່ເຮົາກໍເຈິບັນຫາຄືກັນ.” ໃນບົດນີ້ເຮົາຈະເບິ່ງວ່າ ຄົນທີ່ເປັນແຟນກັນເຈິບັນຫາຫຍັງແດ່ແລະຫຼັກການໃນຄຳພີໄບເບິນຈະຊ່ວຍເຂົາເຈົ້າແນວໃດໃຫ້ຕັດສິນໃຈຢ່າງຖືກຕ້ອງ. ເຮົາຍັງຈະເບິ່ງວ່າພີ່ນ້ອງໃນປະຊາຄົມຈະຊ່ວຍຄົນທີ່ກຳລັງເປັນແຟນກັນແນວໃດ.
ຈຸດປະສົງຂອງການຄົບຫາເປັນແຟນກັນ
3. ຈຸດປະສົງຂອງການຄົບຫາເປັນແຟນກັນແມ່ນຫຍັງ? (ສຸພາສິດ 20:25)
3 ເຖິງວ່າການຄົບຫາເປັນແຟນກັນຈະເປັນເວລາທີ່ມີຄວາມສຸກຫຼາຍ ແຕ່ກໍເປັນຂັ້ນຕອນທີ່ສຳຄັນນຳຍ້ອນມັນອາດພາໄປສູ່ການແຕ່ງດອງ. ໃນມື້ແຕ່ງດອງ ເຈົ້າບ່າວກັບເຈົ້າສາວຈະປະຕິຍານຕໍ່ພະເຢໂຫວາວ່າເຂົາເຈົ້າຈະຮັກແລະໃຫ້ກຽດກັນຕາບໃດທີ່ເຂົາເຈົ້າຍັງມີຊີວິດຢູ່. ກ່ອນຈະປະຕິຍານເລື່ອງໃດເລື່ອງໜຶ່ງ ເຮົາຕ້ອງຄິດຄັກໆ. (ອ່ານສຸພາສິດ 20:25) ຄຳປະຕິຍານເລື່ອງການແຕ່ງດອງກໍເປັນແບບນັ້ນ. ການຄົບຫາເປັນແຟນກັນຊ່ວຍສອງຄົນໃຫ້ຮູ້ຈັກກັນຫຼາຍຂຶ້ນແລະຊ່ວຍເຂົາເຈົ້າໃຫ້ຕັດສິນໃຈຢ່າງຖືກຕ້ອງ. ບາງເທື່ອທັງສອງຄົນອາດຕັດສິນໃຈທີ່ຈະແຕ່ງດອງກັນ ຫຼືອາດຈະຕັດສິນໃຈເຊົາເປັນແຟນກັນກໍໄດ້. ຖ້າທັງສອງຄົນເຊົາເປັນແຟນກັນມັນກໍບໍ່ໄດ້ໝາຍຄວາມວ່າເຂົາເຈົ້າລົ້ມເຫຼວ ແຕ່ເຂົາເຈົ້າໄດ້ເຮັດຕາມຈຸດປະສົງຂອງການຄົບຫາເປັນແຟນກັນແລ້ວ ນັ້ນກໍຄືເພື່ອຊ່ວຍເຂົາເຈົ້າໃຫ້ຕັດສິນໃຈຢ່າງຖືກຕ້ອງວ່າຈະແຕ່ງດອງກັນຫຼືບໍ່ແຕ່ງ.
4. ເປັນຫຍັງເຮົາຕ້ອງມີຄວາມຄິດທີ່ຖືກຕ້ອງໃນເລື່ອງຄົບຫາເປັນແຟນກັນ?
4 ເປັນຫຍັງຈຶ່ງສຳຄັນທີ່ຈະມີຄວາມຄິດທີ່ຖືກຕ້ອງໃນເລື່ອງຄົບຫາເປັນແຟນກັນ? ຖ້າຄົນໂສດມີຄວາມຄິດທີ່ຖືກຕ້ອງໃນເລື່ອງນີ້ ເຂົາເຈົ້າກໍຈະບໍ່ເປັນແຟນກັບຜູ້ທີ່ເຂົາເຈົ້າບໍ່ຄິດທີ່ຈະແຕ່ງດອງນຳ. ບໍ່ແມ່ນແຕ່ຄົນໂສດເທົ່ານັ້ນທີ່ຕ້ອງມີຄວາມຄິດທີ່ຖືກຕ້ອງໃນເລື່ອງນີ້ ເຮົາທຸກຄົນກໍຕ້ອງມີຄືກັນ. ຕົວຢ່າງເຊັ່ນ: ບາງຄົນຄິດວ່າຖ້າເປັນແຟນກັນ ກໍຕ້ອງແຕ່ງດອງກັນ. ການຄິດແບບນີ້ມີຜົນກະທົບຕໍ່ຄົນໂສດແນວໃດ? ເມລິຊ້າພີ່ນ້ອງຍິງໂສດທີ່ຢູ່ອາເມຣິກາເວົ້າວ່າ: “ຄົນທີ່ກຳລັງຄົບຫາກັນຮູ້ສຶກວ່າຖືກກົດດັນຈາກພີ່ນ້ອງທີ່ເປັນພະຍານ ຍ້ອນເຂົາເຈົ້າຄາດໝາຍວ່າທັງສອງຕ້ອງແຕ່ງດອງກັນ. ບາງຄູ່ຈຶ່ງບໍ່ເຊົາເປັນແຟນກັນທັງໆທີ່ໄປກັນບໍ່ໄດ້. ສ່ວນຄົນໂສດບາງຄົນກໍບໍ່ກ້າຄົບຫາກັບໃຜເລີຍ. ຖ້າເປັນແບບນີ້ມັນກໍເຮັດໃຫ້ເຄັ່ງຕຶງຫຼາຍ.”
ຮູ້ຈັກກັນໃຫ້ຫຼາຍຂຶ້ນ
5-6. ຄົນທີ່ກຳລັງເປັນແຟນກັນຄວນລົມກັນເລື່ອງຫຍັງແດ່ເພື່ອຈະຮູ້ຈັກກັນຫຼາຍຂຶ້ນ? (1 ເປໂຕ 3:4)
5 ຖ້າເຈົ້າກຳລັງເປັນແຟນກັບຜູ້ໃດຜູ້ໜຶ່ງ ສິ່ງໃດຈະຊ່ວຍເຈົ້າໃຫ້ຕັດສິນໃຈວ່າຈະແຕ່ງດອງກັບລາວຫຼືບໍ່? ການຮູ້ຈັກກັນຫຼາຍຂຶ້ນຊ່ວຍໄດ້. ກ່ອນເປັນແຟນກັນ ເຈົ້າຄືຊິຮູ້ຈັກລາວແດ່ແລ້ວ ແຕ່ຕອນນີ້ເຈົ້າມີໂອກາດຮູ້ຈັກຕົວຕົນທີ່ “ຢູ່ພາຍໃນ” ຂອງລາວ. (ອ່ານ 1 ເປໂຕ 3:4) ເລື່ອງນີ້ລວມເຖິງການຮູ້ວ່າລາວມີຄວາມເຊື່ອເຂັ້ມແຂງບໍ່? ນິດໄສຂອງລາວເປັນຈັ່ງໃດ? ແລະວິທີຄິດຂອງລາວເປັນແນວໃດ? ເມື່ອເວລາຜ່ານໄປ ເຈົ້າຄວນຕອບຄຳຖາມເຫຼົ່ານີ້ໄດ້ ເຊັ່ນ: ‘ຜູ້ນີ້ເໝາະສົມທີ່ຈະມາເປັນຄູ່ຂອງຂ້ອຍບໍ?’ (ສພສ. 31:26, 27, 30; ອຟຊ. 5:33; 1ຕມ. 5:8) ‘ເຮົາຈະເອົາໃຈໃສ່ຄວາມຮູ້ສຶກຂອງກັນແລະກັນໄດ້ບໍ? ເຮົາຈະຍອມຮັບຈຸດທີ່ບໍ່ດີຂອງກັນແລະກັນໄດ້ບໍ?’b (ຣມ. 3:23) ເມື່ອຮູ້ຈັກກັນຫຼາຍຂຶ້ນ ຂໍໃຫ້ຈື່ໄວ້ວ່າສິ່ງສຳຄັນທີ່ສຸດບໍ່ແມ່ນວ່າເຈົ້າສອງຄົນມີຫຍັງແດ່ທີ່ຄ້າຍຄືກັນ ແຕ່ເຈົ້າສອງຄົນປັບໂຕເຂົ້າກັນໄດ້ດີສ່ຳໃດເຖິງວ່າມີນິດໄສທີ່ຕ່າງກັນ.
6 ຕອນທີ່ເປັນແຟນກັນ ເຈົ້າຄວນລົມກັນເລື່ອງຫຍັງອີກ? ກ່ອນທີ່ເຈົ້າຈະມັກຜູ້ນັ້ນຫຼາຍ ເຈົ້າຄືຊິຢາກລົມກັນກ່ຽວກັບເລື່ອງທີ່ສຳຄັນ ເຊັ່ນ ເປົ້າໝາຍໃນອະນາຄົດຂອງແຕ່ລະຄົນ. ແຕ່ຖ້າເປັນເລື່ອງສ່ວນໂຕເດ? ເຊັ່ນ: ເລື່ອງສຸຂະພາບ ເລື່ອງເງິນ ຫຼືເລື່ອງໃນອະດີດທີ່ກະທົບໃສ່ອາລົມຄວາມຮູ້ສຶກ. ເຈົ້າບໍ່ຈຳເປັນຕ້ອງລົມເລື່ອງທັງໝົດນີ້ຕັ້ງແຕ່ຕອນເລີ່ມຄົບກັນໃໝ່ໆ. (ສົມທຽບກັບໂຢຮັນ 16:12) ຖ້າເຈົ້າຮູ້ສຶກວ່າຍັງບໍ່ພ້ອມທີ່ຈະຕອບເລື່ອງສ່ວນໂຕບາງເລື່ອງ ກໍຂໍໃຫ້ບອກແຟນເຈົ້າ. ແຕ່ໃນທີ່ສຸດ ແຟນຂອງເຈົ້າກໍຕ້ອງຮູ້ເລື່ອງເຫຼົ່ານີ້ເພື່ອຈະຊ່ວຍລາວໃຫ້ຕັດສິນໃຈຢ່າງຖືກຕ້ອງ. ດັ່ງນັ້ນ ເມື່ອຮອດເວລາ ພວກເຈົ້າກໍຕ້ອງເປີດໃຈລົມກັນໂດຍເວົ້າຄວາມຈິງທຸກຢ່າງກ່ຽວກັບເລື່ອງເຫຼົ່ານີ້.
7. ມີວິທີໃດແດ່ຈະຊ່ວຍຄົນທີ່ກຳລັງເປັນແຟນກັນໃຫ້ຮູ້ຈັກກັນຫຼາຍຂຶ້ນ? (ເບິ່ງຂອບ “ເປັນແຟນກັນທາງໄກ” ນຳ) (ເບິ່ງຮູບນຳ)
7 ເຈົ້າຈະຮູ້ໄດ້ແນວໃດວ່າແຟນຂອງເຈົ້າເປັນຄົນແນວໃດແທ້ໆ? ວິທີທີ່ດີທີ່ສຸດແມ່ນເປີດໃຈລົມກັນແບບກົງໄປກົງມາ ໃຫ້ຖາມ ແລະຕັ້ງໃຈຟັງ. (ສພສ. 20:5; ຢກບ. 1:19) ບາງເທື່ອເຈົ້າອາດເລືອກເຮັດບາງຢ່າງນຳກັນເພື່ອຈະໄດ້ລົມກັນ ເຊັ່ນ: ໄປກິນເຂົ້ານຳກັນ ໄປຍ່າງຫຼິ້ນນຳກັນໃນບ່ອນທີ່ມີຄົນ ຫຼືໄປປະກາດນຳກັນ. ເຈົ້າຍັງສາມາດຮູ້ຈັກກັນຫຼາຍຂຶ້ນໂດຍໃຊ້ເວລາກັບໝູ່ແລະຄອບຄົວ. ນອກຈາກນັ້ນ ເຈົ້າອາດວາງແຜນເຮັດບາງຢ່າງເພື່ອຈະຊ່ວຍເຈົ້າໃຫ້ຮູ້ວ່າແຟນຂອງເຈົ້າມີນິດໄສແບບໃດເມື່ອຢູ່ໃນສະພາບແວດລ້ອມອື່ນແລະເມື່ອຢູ່ກັບຫຼາຍຄົນ. ໃຫ້ເບິ່ງສິ່ງທີ່ອັດຊ໌ວິນຈາກເນເທີແລນພະຍາຍາມເຮັດ. ລາວເວົ້າເຖິງຕອນທີ່ເປັນແຟນກັບອາລິເຊຍວ່າ: “ເຮົາຊອກຫາກິດຈະກຳງ່າຍໆເຮັດນຳກັນເພື່ອຈະຮູ້ຈັກກັນຫຼາຍຂຶ້ນ ເຊັ່ນ: ແຕ່ງກິນນຳກັນຫຼືເຮັດວຽກເລັກໆນ້ອຍໆນຳກັນ. ຕອນທີ່ເຮັດສິ່ງເຫຼົ່ານີ້ ເຮົາຈະເຫັນຈຸດດີແລະຈຸດອ່ອນຂອງກັນແລະກັນ.”
ຖ້າເຈົ້າສອງຄົນເຮັດບາງຢ່າງນຳກັນເພື່ອຈະໄດ້ລົມກັນ ພວກເຈົ້າກໍຈະຮູ້ຈັກກັນຫຼາຍຂຶ້ນ (ເບິ່ງຂໍ້ 7-8)
8. ຄົນທີ່ກຳລັງເປັນແຟນກັນອາດໄດ້ຮັບປະໂຫຍດຫຍັງແດ່ຈາກການສຶກສານຳກັນ?
8 ອີກວິທີໜຶ່ງທີ່ຈະຊ່ວຍເຈົ້າໃຫ້ຮູ້ຈັກກັນຫຼາຍຂຶ້ນແມ່ນ ການລົມກັນເລື່ອງໃນຄຳພີໄບເບິນ. ຖ້າແຕ່ງດອງແລ້ວ ເຈົ້າຕ້ອງຈັດເວລາໄວ້ສຳລັບນະມັດສະການປະຈຳຄອບຄົວເພື່ອພະເຢໂຫວາຈະເປັນສ່ວນສຳຄັນໃນຊີວິດແຕ່ງດອງຂອງເຈົ້າ. (ປຍຈ. 4:12) ຄັນຊັ້ນ ເປັນຫຍັງບໍ່ເຮັດແບບນີ້ຕອນທີ່ກຳລັງຄົບຫາກັນ? ກະແມ່ນຢູ່ວ່າຄົນທີ່ເປັນແຟນກັນຍັງບໍ່ແມ່ນຜົວເມຍກັນ ແລະຜູ້ຊາຍກໍຍັງບໍ່ໄດ້ເປັນຜູ້ນຳຄອບຄົວຂອງຜູ້ຍິງ. ແຕ່ການນະມັດສະການຄອບຄົວນຳກັນເປັນປະຈຳຈະຊ່ວຍໃຫ້ເຫັນຄວາມເຊື່ອຂອງອີກຝ່າຍໜຶ່ງ. ໃຫ້ເຮົາມາເບິ່ງວ່າແມັກສ໌ກັບລິຊ້າຈາກອາເມຣິກາໄດ້ຮັບປະໂຫຍດຫຍັງແດ່ຈາກການເຮັດແບບນີ້. ແມັກສ໌ເວົ້າວ່າ: “ເມື່ອເປັນແຟນກັນໄດ້ບໍ່ດົນ ເຮົາເລີ່ມສຶກສານຳກັນໂດຍໃຊ້ປຶ້ມຕ່າງໆຂອງອົງການທີ່ມີຫົວຂໍ້ກ່ຽວກັບການຄົບຫາເປັນແຟນກັນ ການແຕ່ງດອງ ແລະຊີວິດຄອບຄົວ. ບົດຄວາມເຫຼົ່ານີ້ເປີດໂອກາດໃຫ້ເຮົາໄດ້ລົມກັນກ່ຽວກັບເລື່ອງຕ່າງໆທີ່ສຳຄັນ ເຊິ່ງຕາມປົກກະຕິແລ້ວບໍ່ງ່າຍທີ່ຈະເອົາເລື່ອງແບບນີ້ມາລົມກັນ.”
ເລື່ອງອື່ນໆທີ່ຕ້ອງຄິດເຖິງ
9. ຖ້າເຈົ້າຈະບອກຄົນອື່ນວ່າກຳລັງຄົບຫາກັບຜູ້ໃດຜູ້ໜຶ່ງ ເຈົ້າຄວນຄິດເຖິງຫຍັງແດ່?
9 ເຈົ້າຄວນບອກໃຜແດ່ວ່າກຳລັງຄົບຫາກັບຜູ້ໃດຜູ້ໜຶ່ງ? ເຈົ້າສອງຄົນຕ້ອງຕັດສິນໃຈເອົາເອງ. ຕອນທີ່ເປັນແຟນກັນໃໝ່ໆ ເຈົ້າອາດຈະບໍ່ຕ້ອງບອກໃຫ້ຫຼາຍຄົນຮູ້. (ສພສ. 17:27) ການເຮັດແບບນີ້ຈະຊ່ວຍເຈົ້າບໍ່ໃຫ້ຖືກກົດດັນແລະບໍ່ຕ້ອງຕອບຄຳຖາມທີ່ບໍ່ຈຳເປັນເລື່ອງການຄົບຫາຂອງເຈົ້າ. ແຕ່ຖ້າເຈົ້າບໍ່ບອກໃຜ ເຈົ້າອາດຈະລັກຄົບຫາກັນຍ້ອນຢ້ານຄົນອື່ນຮູ້ ເຊິ່ງການເຮັດແບບນີ້ອັນຕະລາຍຫຼາຍເພາະຈະເຮັດຜິດໄດ້. ດັ່ງນັ້ນ ມັນດີກວ່າທີ່ຈະບອກຄົນທີ່ສາມາດໃຫ້ຄຳແນະນຳທີ່ດີແລະຊ່ວຍເຈົ້າໄດ້. (ສພສ. 15:22) ຕົວຢ່າງເຊັ່ນ: ຄົນໃນຄອບຄົວ ໝູ່ທີ່ເປັນຜູ້ໃຫຍ່ທາງຄວາມເຊື່ອ ແລະຜູ້ເບິ່ງແຍງໃນປະຊາຄົມ.
10. ຄົນທີ່ຄົບຫາກັນຈະເຮັດໃຫ້ຕອນທີ່ເປັນແຟນກັນເປັນຕາໜ້ານັບຖືໄດ້ແນວໃດ? (ສຸພາສິດ 22:3)
10 ເຈົ້າຈະເຮັດແນວໃດເພື່ອໃຫ້ຕອນທີ່ເປັນແຟນກັນເປັນຕາໜ້ານັບຖື? ເມື່ອເຈົ້າມັກຜູ້ໃດຜູ້ໜຶ່ງຫຼາຍ ມັນກໍເປັນເລື່ອງທຳມະດາທີ່ຢາກຈະໃກ້ຊິດກັນຫຼາຍຂຶ້ນ. ສິ່ງໃດຈະຊ່ວຍເຈົ້າບໍ່ໃຫ້ເຮັດຜິດສິນລະທຳເຊິ່ງຈະເຮັດໃຫ້ພະເຢໂຫວາເສຍໃຈ? (1ກຣ. 6:18) ຢ່າລົມກັນເລື່ອງຜິດສິນລະທຳ ຢ່າຢູ່ນຳກັນສອງຕໍ່ສອງ ແລະຢ່າກິນເຫຼົ້າຫຼາຍ. (ອຟຊ. 5:3) ສິ່ງເຫຼົ່ານີ້ອາດກະຕຸ້ນຄວາມຮູ້ສຶກທາງເພດແລະເຮັດໃຫ້ຍາກທີ່ຈະເຮັດສິ່ງທີ່ຖືກຕ້ອງ. ເປັນສິ່ງທີ່ດີທີ່ຈະລົມກັນເປັນໄລຍະໆວ່າເຈົ້າຈະເຮັດຫຍັງແດ່ເພື່ອຈະໃຫ້ກຽດກັນແລະນັບຖືມາດຕະຖານຂອງພະເຢໂຫວາ. (ອ່ານສຸພາສິດ 22:3) ດາວິດກັບອາມາສ໌ຈາກເອທິໂອເປຍເວົ້າເຖິງສິ່ງທີ່ຊ່ວຍເຂົາເຈົ້າໄດ້. ເຂົາເຈົ້າເວົ້າວ່າ: “ຕອນທີ່ໃຊ້ເວລານຳກັນ ເຮົາຈະຢູ່ໃນບ່ອນທີ່ມີຄົນຫຼາຍ ຫຼືບໍ່ຊັ້ນກໍມີໝູ່ຢູ່ນຳ. ເຮົາບໍ່ເຄີຍຢູ່ນຳກັນສອງຕໍ່ສອງໃນເຮືອນຫຼືໃນລົດ. ຍ້ອນແນວນີ້ ເຮົາຈຶ່ງຫຼີກລ່ຽງສະຖານະການທີ່ເຮັດໃຫ້ເກີດການລໍ້ໃຈ.”
11. ຄົນທີ່ເປັນແຟນກັນຄວນຄິດເຖິງຫຍັງແດ່ໃນເລື່ອງການສະແດງຄວາມຮັກຕໍ່ກັນ?
11 ຄົນທີ່ຄົບຫາກັນຄວນສະແດງຄວາມຮັກຕໍ່ກັນບໍ? ເມື່ອເຈົ້າມັກກັນຫຼາຍຂຶ້ນ ເຈົ້າອາດສະແດງຄວາມຮັກຕໍ່ກັນໃນແບບທີ່ເໝາະສົມ. (ພຊມ. 1:2; 2:6) ແຕ່ຖ້າເຮັດບາງຢ່າງທີ່ກະຕຸ້ນໃຫ້ມີຄວາມຮູ້ສຶກທາງເພດ ມັນກໍເປັນເລື່ອງຍາກທີ່ຈະເຮັດໃຫ້ເຈົ້າຕັດສິນໃຈຢ່າງຖືກຕ້ອງ. ນອກຈາກນັ້ນ ການສະແດງຄວາມຮັກຕໍ່ກັນກໍອາດເຮັດໃຫ້ຄວບຄຸມໂຕເອງໄດ້ຍາກແລະອາດຈະເຮັດບາງຢ່າງທີ່ເຮັດໃຫ້ພະເຢໂຫວາເສຍໃຈ. (ສພສ. 6:27) ດັ່ງນັ້ນ ຕອນທີ່ເປັນແຟນກັນໃໝ່ໆ ໃຫ້ລົມກັນເລື່ອງຂອບເຂດຂອງການສະແດງຄວາມຮັກວ່າຊິເຮັດຫຍັງແລະບໍ່ເຮັດຫຍັງໂດຍອາໄສຫຼັກການໃນຄຳພີໄບເບິນ.c (1ທຊ. 4:3-7) ໃຫ້ຖາມໂຕເອງວ່າ: ‘ໃນບ່ອນທີ່ຂ້ອຍຢູ່ ຄົນຮູ້ສຶກແນວໃດທີ່ຂ້ອຍກັບແຟນສະແດງຄວາມຮັກຕໍ່ກັນ? ແລະການສະແດງຄວາມຮັກແບບນັ້ນກະຕຸ້ນໃຫ້ມີຄວາມຮູ້ສຶກທາງເພດບໍ?’
12. ຖ້າຄົນທີ່ເປັນແຟນກັນມີບັນຫາແລະຜິດກັນ ເຂົາເຈົ້າຄວນເຮັດແນວໃດ?
12 ຈະເຮັດແນວໃດຖ້າມີບັນຫາແລະຜິດກັນ? ຖ້າເຈົ້າສອງຄົນຜິດກັນເປັນບາງເທື່ອ ນີ້ໝາຍຄວາມວ່າພວກເຈົ້າໄປກັນບໍ່ລອດບໍ? ບໍ່ແມ່ນແບບນັ້ນສະເໝີໄປ ຍ້ອນບໍ່ມີຄູ່ໃດຈະເຫັນດີນຳກັນທຸກເລື່ອງ. ຜົວເມຍທີ່ຮັກກັນຫຼາຍຈະໃຫ້ກຽດກັນແລະເຕັມໃຈປັບປ່ຽນເພື່ອເຮັດສິ່ງທີ່ອີກຝ່າຍໜຶ່ງມັກ. ດັ່ງນັ້ນ ວິທີທີ່ເຈົ້າພະຍາຍາມແກ້ໄຂບັນຫາໃນຕອນນີ້ຈະເຮັດໃຫ້ຮູ້ວ່າຊີວິດຄູ່ຂອງເຈົ້າຈະປະສົບຜົນສຳເລັດຫຼືບໍ່. ໃຫ້ແຕ່ລະຄົນຖາມໂຕເອງວ່າ: ‘ເຮົາລົມກັນແບບໃຈເຢັນໆແລະໃຫ້ກຽດກັນບໍ? ເຮົາຍອມຮັບຜິດແລະພະຍາຍາມປັບປຸງໂຕເອງໃຫ້ດີຂຶ້ນບໍ? ເຮົາຟ້າວຂໍໂທດ ຍອມກັນ ແລະຍົກໂທດໃຫ້ກັນບໍ?’ (ອຟຊ. 4:31, 32) ແຕ່ຖ້າເຈົ້າສອງຄົນມີບັນຫາແລະຜິດກັນຕະຫຼອດຕອນທີ່ເປັນແຟນກັນ ຢ່າຄິດວ່າມັນຊິດີຂຶ້ນຫຼັງຈາກແຕ່ງດອງ. ຖ້າເຈົ້າເຫັນແລ້ວວ່າເຈົ້າກັບລາວເຂົ້າກັນບໍ່ໄດ້ ການເຊົາເປັນແຟນກັນອາດເປັນການຕັດສິນໃຈທີ່ດີທີ່ສຸດສຳລັບທັງສອງຄົນ.d
13. ອັນໃດຈະຊ່ວຍຄົນທີ່ເປັນແຟນກັນໃຫ້ຕັດສິນໃຈວ່າຈະຄົບຫາກັນດົນປານໃດ?
13 ຄວນຄົບຫາກັນດົນປານໃດ? ການຟ້າວຕັດສິນໃຈໄວໂພດມັກຈະມີຜົນເສຍຫາຍຕາມມາ. (ສພສ. 21:5) ດັ່ງນັ້ນ ເຈົ້າສອງຄົນຄວນຄົບຫາກັນດົນພໍສົມຄວນເພື່ອຈະຮູ້ຈັກກັນຫຼາຍຂຶ້ນ. ແຕ່ກໍບໍ່ຄວນດົນເກີນໄປຖ້າບໍ່ຈຳເປັນ. ຄຳພີໄບເບິນບອກວ່າ: “ຄວາມຫວັງeທີ່ຖືກເລື່ອນອອກໄປເຮັດໃຫ້ເສຍໃຈ.” (ສພສ. 13:12) ນອກຈາກນັ້ນ ແຮ່ງຄົບຫາກັນດົນເທົ່າໃດ ກໍແຮ່ງຍາກທີ່ຈະຕ້ານທານການລໍ້ໃຈໃຫ້ເຮັດຜິດສິນລະທຳທາງເພດ. (1ກຣ. 7:9) ແທນທີ່ຈະສົນໃຈວ່າຄົບຫາກັນດົນປານໃດແລ້ວ ໃຫ້ຖາມໂຕເອງວ່າ: ‘ມີຫຍັງອີກບໍທີ່ຂ້ອຍຕ້ອງຮຽນຮູ້ກ່ຽວກັບລາວເພື່ອຈະຕັດສິນໃຈໄດ້?’
ພີ່ນ້ອງໃນປະຊາຄົມຈະຊ່ວຍຄົນທີ່ກຳລັງເປັນແຟນກັນແນວໃດ?
14. ເຮົາຈະຊ່ວຍຄົນທີ່ກຳລັງເປັນແຟນກັນແນວໃດ? (ເບິ່ງຮູບນຳ)
14 ຖ້າເຮົາຮູ້ຈັກຄົນທີ່ກຳລັງເປັນແຟນກັນ ເຮົາຈະຊ່ວຍເຂົາເຈົ້າແນວໃດ? ເຮົາສາມາດຊວນເຂົາເຈົ້າມາກິນເຂົ້າ ສຶກສາຄອບຄົວ ຫຼືເຮັດບາງຢ່າງນຳກັນກັບເຮົາ. (ຣມ. 12:13) ການເຮັດແບບນີ້ອາດຊ່ວຍເຂົາເຈົ້າໃຫ້ຮູ້ຈັກກັນຫຼາຍຂຶ້ນອີກ. ເຂົາເຈົ້າຢາກໃຫ້ມີໝູ່ໄປຫັ້ນໄປນີ້ນຳບໍ? ເຂົາເຈົ້າຢາກໃຫ້ມີຄົນຂີ່ລົດໄປນຳບໍ? ຫຼືເຂົາເຈົ້າຢາກໄດ້ບ່ອນທີ່ຈະລົມກັນເປັນສ່ວນໂຕບໍ? ຖ້າເປັນແບບນັ້ນ ເຈົ້າຈະຊ່ວຍເຂົາເຈົ້າໄດ້ບໍ? (ຄລຕ. 6:10) ອາລິເຊຍທີ່ເວົ້າເຖິງກ່ອນໜ້ານີ້ເວົ້າເຖິງຕອນທີ່ລາວກັບອັດຊ໌ວິນເປັນແຟນກັນ. ເຂົາເຈົ້າເຫັນຄ່າຫຼາຍທີ່ພີ່ນ້ອງຊ່ວຍເຂົາເຈົ້າ. ອາລິເຊຍເວົ້າວ່າ: “ເຮົາດີໃຈຫຼາຍທີ່ພີ່ນ້ອງບອກວ່າເຮົາສາມາດໄປຫາເຂົາເຈົ້າຢູ່ເຮືອນໄດ້ຖ້າເຮົາຢາກໄດ້ບ່ອນລົມກັນເປັນສ່ວນໂຕ ແຕ່ບໍ່ໄດ້ຢູ່ນຳກັນສອງຕໍ່ສອງ.” ຖ້າຄົນທີ່ເປັນແຟນກັນຂໍໃຫ້ເຈົ້າໄປເປັນໝູ່ ໃຫ້ຖືວ່າເປັນໂອກາດທີ່ດີທີ່ຈະຊ່ວຍໝູ່. ເຈົ້າຮູ້ວ່າເຂົາເຈົ້າຢາກມີເວລາແລະຢາກໄດ້ບ່ອນລົມກັນເປັນສ່ວນໂຕ ແຕ່ຕ້ອງລະວັງທີ່ຈະບໍ່ປ່ອຍໃຫ້ເຂົາເຈົ້າຢູ່ນຳກັນສອງຕໍ່ສອງ.—ຟລປ. 2:4
ຖ້າເຮົາຮູ້ຈັກຄົນທີ່ກຳລັງເປັນແຟນກັນ ເຮົາສາມາດຊ່ວຍເຂົາເຈົ້າໄດ້ (ເບິ່ງຂໍ້ 14-15)
15. ມີຫຍັງອີກທີ່ເຮົາເຮັດໄດ້ເພື່ອຊ່ວຍຄົນທີ່ເປັນແຟນກັນ? (ສຸພາສິດ 12:18)
15 ເຮົາຍັງສາມາດຊ່ວຍຄົນທີ່ເປັນແຟນກັນໂດຍຄິດເຖິງສິ່ງທີ່ເຮົາຄວນເວົ້າຫຼືບໍ່ຄວນເວົ້າ. ບາງເທື່ອເຮົາອາດຕ້ອງຄວບຄຸມໂຕເອງແລະບໍ່ເວົ້າຫຍັງເລີຍ. (ອ່ານສຸພາສິດ 12:18) ຕົວຢ່າງເຊັ່ນ: ເຮົາອາດຕື່ນເຕັ້ນຢາກບອກຄົນອື່ນວ່າມີຄົນກຳລັງຄົບຫາກັນ ແຕ່ເຂົາເຈົ້າອາດຢາກບອກເລື່ອງນັ້ນດ້ວຍໂຕເອງ. ເຮົາບໍ່ຄວນເວົ້າຂວັນເຂົາເຈົ້າ ຫຼືຕຳໜິເຂົາເຈົ້າກ່ຽວກັບເລື່ອງສ່ວນໂຕ. (ສພສ. 20:19; ຣມ. 14:10; 1ທຊ. 4:11) ນອກຈາກນັ້ນ ເຮົາບໍ່ຄວນເວົ້າຫຼືຖາມກ່ຽວກັບເລື່ອງແຕ່ງດອງເຊິ່ງອາດເຮັດໃຫ້ເຂົາເຈົ້າຮູ້ສຶກຖືກກົດດັນ. ພີ່ນ້ອງເອລີດສ໌ກັບຜົວເວົ້າວ່າ: “ເຮົາຮູ້ສຶກອຶດອັດຕອນທີ່ມີຄົນຖາມວ່າມື້ໃດຊິແຕ່ງ ທັງໆທີ່ເຮົາຍັງບໍ່ໄດ້ລົມກັນເລື່ອງນີ້ຊ້ຳ.”
16. ຖ້າຄົນທີ່ເປັນແຟນກັນເຊົາຄົບຫາກັນ ເຮົາຄວນເຮັດແນວໃດ?
16 ຖ້າຄົນທີ່ເປັນແຟນກັນຕັດສິນໃຈເຊົາຄົບຫາກັນ ເຮົາບໍ່ຄວນຖາມເລື່ອງນັ້ນຫຼືໂທດວ່າໃຜເປັນຝ່າຍຜິດ. (1ປຕ. 4:15) ພີ່ນ້ອງຍິງຊື່ເລອາເວົ້າວ່າ: “ເມື່ອຂ້ອຍໄດ້ຍິນຄົນອື່ນເວົ້າໂດຍບໍ່ຮູ້ຄວາມຈິງເລື່ອງທີ່ຂ້ອຍກັບພີ່ນ້ອງຊາຍຄົນໜຶ່ງເຊົາເປັນແຟນກັນ ມັນເຮັດໃຫ້ຂ້ອຍເສຍໃຈຫຼາຍ.” ຄືກັບທີ່ໄດ້ເວົ້າແລ້ວ ການເຊົາເປັນແຟນກັນບໍ່ໄດ້ໝາຍຄວາມວ່າເຂົາເຈົ້າລົ້ມເຫຼວ. ທີ່ຈິງ ເຂົາເຈົ້າໄດ້ເຮັດຕາມຈຸດປະສົງຂອງການຄົບຫາເປັນແຟນກັນແລ້ວ ນັ້ນກໍຄືເພື່ອຊ່ວຍເຂົາເຈົ້າໃຫ້ຕັດສິນໃຈຢ່າງຖືກຕ້ອງ. ເຖິງຈະເປັນແນວນັ້ນ ການເຊົາເປັນແຟນກັນອາດເຮັດໃຫ້ຮູ້ສຶກເສຍໃຈຫຼືຮູ້ສຶກເຫງົາ. ດັ່ງນັ້ນ ເຮົາຄວນຊອກວິທີທີ່ຈະຊ່ວຍເຂົາເຈົ້າ.—ສພສ. 17:17
17. ຄົນທີ່ເປັນແຟນກັນຄວນເຮັດຫຍັງຕໍ່ໆໄປ?
17 ຄືກັບທີ່ເຮົາໄດ້ເບິ່ງມາແລ້ວ ຕອນທີ່ເປັນແຟນກັນອາດມີບັນຫາຢູ່ ແຕ່ກໍມີຄວາມສຸກນຳ. ເຈດຊິກ້າເວົ້າວ່າ: “ເວົ້າແທ້ໆເດີ້ ຕອນທີ່ເປັນແຟນກັນມັນຍາກອີ່ຫຼີ ແຕ່ມັນກໍຄຸ້ມຄ່າແທ້ໆທີ່ໄດ້ໃຊ້ເວລາແລະກຳລັງເພື່ອຈະຮູ້ຈັກກັນຫຼາຍຂຶ້ນ.” ຖ້າເຈົ້າກຳລັງຄົບຫາກັບຜູ້ໃດຜູ້ໜຶ່ງ ຂໍໃຫ້ພະຍາຍາມຕໍ່ໆໄປເພື່ອຈະຮູ້ຈັກກັນຫຼາຍຂຶ້ນ. ຖ້າເຮັດແບບນີ້ ການຄົບຫາເປັນແຟນກັນຈະຊ່ວຍເຈົ້າສອງຄົນໃຫ້ຕັດສິນໃຈຢ່າງຖືກຕ້ອງ.
ເພງທີ 49 ເຮັດໃຫ້ພະເຢໂຫວາພໍໃຈ
a ຊື່ສົມມຸດ.
b ຖ້າຢາກເບິ່ງຄຳຖາມອື່ນອີກ ໃຫ້ເບິ່ງປຶ້ມຄຳຖາມທີ່ໜຸ່ມສາວຖາມ—ຄຳຕອບທີ່ໃຊ້ໄດ້ຜົນ ເຫຼັ້ມ 2 ໜ້າ 39-40. (ພາສາໄທ)
c ການລູບອະໄວຍະວະເພດຂອງອີກຝ່າຍໜຶ່ງເພື່ອກະຕຸ້ນເປັນຮູບແບບໜຶ່ງຂອງການເຮັດຜິດສິນລະທຳທາງເພດ. ຖ້າເລື່ອງແບບນີ້ເກີດຂຶ້ນ ຄະນະຜູ້ເບິ່ງແຍງກໍຕ້ອງຕັ້ງຄະນະຕັດສິນຄວາມ. ນອກຈາກນັ້ນ ການລູບໜ້າເອິກຫຼືການລົມກັນເລື່ອງຜິດສິນລະທຳໂດຍທາງໂທລະສັບຫຼືການສົ່ງຂໍ້ຄວາມກໍອາດຕ້ອງໃຫ້ມີການຕັດສິນຄວາມຄືກັນ ເຊິ່ງເລື່ອງນີ້ຂຶ້ນກັບແຕ່ລະສະຖານະການ.
d ສຳລັບຂໍ້ມູນເພີ່ມເຕີມ ໃຫ້ເບິ່ງ “ຄຳຖາມຈາກຜູ້ອ່ານ” ໃນຫໍສັງເກດການ 15 ສິງຫາ 1999. (ພາສາໄທ)
e ຄວາມຄາດຫວັງ