ບົດຄວາມສຶກສາທີ 21
ເພງທີ 107 ພະເຈົ້າເປັນແບບຢ່າງຂອງຄວາມຮັກ
ເຈົ້າຈະເຈິຄົນທີ່ຈະມາເປັນຄູ່ໄດ້ແນວໃດ?
“ໃຜຈະຫາເມຍທີ່ມີຄວາມສາມາດໄດ້? ລາວມີຄ່າຫຼາຍກວ່າປະກາລັງ.”—ສພສ. 31:10
ຈຸດສຳຄັນ
ເຮົາຈະຮຽນຫຼັກການຕ່າງໆໃນຄຳພີໄບເບິນທີ່ຈະຊ່ວຍຄົນໂສດໃຫ້ເຈິຄົນທີ່ເໝາະສົມທີ່ຈະມາເປັນຄູ່ ແລະເຮົາຍັງຈະຮຽນວ່າພີ່ນ້ອງໃນປະຊາຄົມຈະເຮັດຫຍັງໄດ້ແດ່ເພື່ອຊ່ວຍຄົນໂສດທີ່ຢາກແຕ່ງດອງ.
1-2. (ກ) ກ່ອນທີ່ຄົນໂສດຈະຄົບຫາກັບຜູ້ໃດຜູ້ໜຶ່ງ ລາວຕ້ອງຄິດເຖິງເລື່ອງຫຍັງແດ່? (ຂ) ການຄົບຫາເປັນແຟນກັນໝາຍຄວາມວ່າແນວໃດ? (ເບິ່ງ “ການອະທິບາຍຄຳສັບ”)
ເຈົ້າຢາກແຕ່ງດອງບໍ? ເຖິງວ່າການແຕ່ງດອງບໍ່ແມ່ນສິ່ງສຳຄັນທີ່ສຸດທີ່ຈະເຮັດໃຫ້ຊີວິດມີຄວາມສຸກ ແຕ່ຄົນໂສດຫຼາຍຄົນບໍ່ວ່າຈະອາຍຸໜ້ອຍຫຼືຫຼາຍກໍຢາກຊອກຜູ້ໃດຜູ້ໜຶ່ງມາເປັນຄູ່ຊີວິດ. ແນ່ນອນວ່າກ່ອນຈະຄົບຫາກັບຜູ້ໃດຜູ້ໜຶ່ງ ເຈົ້າຕ້ອງຫາລ້ຽງໂຕເອງໄດ້ ມີຄວາມເຊື່ອເຂັ້ມແຂງ ແລະຄິດແບບຜູ້ໃຫຍ່.a (1ກຣ. 7:36) ຖ້າເຈົ້າເປັນຄືກັບທີ່ເວົ້າມານີ້ ກໍເປັນໄປໄດ້ຫຼາຍທີ່ເຈົ້າຈະມີຊີວິດແຕ່ງດອງທີ່ມີຄວາມສຸກ.
2 ແຕ່ການຊອກຄົນທີ່ເໝາະສົມທີ່ຈະມາເປັນຄູ່ກໍບໍ່ງ່າຍ. (ສພສ. 31:10) ເຖິງວ່າເຈິຄົນທີ່ເຈົ້າຢາກຮູ້ຈັກຫຼາຍຂຶ້ນແລ້ວ ແຕ່ກໍອາດບໍ່ງ່າຍທີ່ຈະເລີ່ມຄົບຫາເປັນແຟນກັນ.b ໃນບົດນີ້ເຮົາຈະເບິ່ງວ່າມີຫຍັງທີ່ຈະຊ່ວຍຄົນໂສດໃຫ້ເຈິຄົນທີ່ຈະມາເປັນຄູ່ແລະເລີ່ມເປັນແຟນກັນ ແລະເຮົາຍັງຈະເບິ່ງວ່າພີ່ນ້ອງໃນປະຊາຄົມຈະເຮັດຫຍັງໄດ້ແດ່ເພື່ອຊ່ວຍຄົນໂສດທີ່ຢາກແຕ່ງດອງ.
ຊອກຫາຄົນທີ່ເໝາະສົມ
3. ກ່ອນທີ່ຄົນໂສດຈະຊອກຫາຄູ່ ລາວຄວນຄິດເຖິງເລື່ອງຫຍັງແດ່?
3 ຖ້າເຈົ້າຢາກແຕ່ງດອງ ກ່ອນເຈົ້າຈະຄົບຫາກັບຜູ້ໃດຜູ້ໜຶ່ງ ເຈົ້າຕ້ອງຮູ້ກ່ອນວ່າເຈົ້າກຳລັງຊອກຫາຄົນແບບໃດ. ຄັ້ນບໍ່ຊັ້ນ ເຈົ້າອາດຈະເບິ່ງຂ້າມຄົນທີ່ເໝາະສົມທີ່ຈະມາເປັນຄູ່ຂອງເຈົ້າ ຫຼືເຈົ້າອາດຈະໄປຄົບຫາກັບຄົນທີ່ບໍ່ເໝາະສົມກັບເຈົ້າ. ແນ່ນອນວ່າຄົນທີ່ຈະມາເປັນຄູ່ຂອງເຈົ້າຕ້ອງຮັບບັບເຕມາ. (1ກຣ. 7:39) ແຕ່ບໍ່ແມ່ນທຸກຄົນທີ່ຮັບບັບເຕມາຈະເໝາະສົມກັບເຈົ້າ. ດັ່ງນັ້ນ ໃຫ້ຖາມໂຕເອງວ່າ: ‘ຂ້ອຍມີເປົ້າໝາຍແນວໃດໃນຊີວິດ? ຄົນທີ່ຈະມາເປັນຄູ່ຂອງຂ້ອຍຕ້ອງມີຄຸນລັກສະນະຫຍັງແດ່ທີ່ຂ້ອຍຖືວ່າສຳຄັນ? ສິ່ງທີ່ຂ້ອຍຄາດໝາຍມີເຫດຜົນບໍ?’
4. ບາງຄົນທີ່ກຳລັງຊອກຄູ່ໄດ້ອະທິດຖານແນວໃດ?
4 ຖ້າເຈົ້າຢາກແຕ່ງດອງ ແນ່ນອນວ່າເຈົ້າຄືຊິໄດ້ອະທິດຖານກ່ຽວກັບເລື່ອງນີ້. (ຟລປ. 4:6) ພະເຢໂຫວາບໍ່ໄດ້ສັນຍາວ່າຊິໃຫ້ຜູ້ຮັບໃຊ້ຂອງເພິ່ນເຈິຄູ່. ແຕ່ເພິ່ນກໍເປັນຫ່ວງຄວາມຮູ້ສຶກແລະຄວາມຕ້ອງການຂອງເຈົ້າ ແລະເພິ່ນສາມາດຊ່ວຍເຈົ້າໄດ້ໃນການຊອກຄູ່. ດັ່ງນັ້ນ ໃຫ້ເຈົ້າບອກພະເຢໂຫວາຕໍ່ໆໄປວ່າເຈົ້າຮູ້ສຶກແນວໃດແລະຕ້ອງການຫຍັງ. (ພສ. 62:8) ໃຫ້ເຈົ້າອະທິດຖານຂໍພະເຢໂຫວາຊ່ວຍເຈົ້າໃຫ້ອົດທົນແລະມີສະຕິປັນຍາ. (ຢກບ. 1:5) ຈອນcພີ່ນ້ອງຊາຍໂສດຈາກອາເມຣິກາເວົ້າເຖິງສິ່ງທີ່ລາວເວົ້າໃນຄຳອະທິດຖານ. ລາວເວົ້າວ່າ: “ຂ້ອຍບອກພະເຢໂຫວາວ່າ ຂ້ອຍຢາກແຕ່ງດອງກັບພີ່ນ້ອງຍິງແບບໃດ ແລະຂ້ອຍກໍອະທິດຖານຂໍໃຫ້ມີໂອກາດເຈິກັບຄົນແບບນັ້ນ. ຂ້ອຍຂໍພະເຢໂຫວາຊ່ວຍຂ້ອຍໃຫ້ພັດທະນາຄຸນລັກສະນະຕ່າງໆທີ່ຈະເຮັດໃຫ້ຂ້ອຍເປັນຜົວທີ່ດີ.” ທັນຢ້າພີ່ນ້ອງຍິງຈາກສີລັງກາບອກວ່າ: “ຕອນທີ່ຂ້ອຍກຳລັງຊອກຫາຄົນທີ່ຈະມາເປັນຄູ່. ຂ້ອຍອະທິດຖານຂໍໃຫ້ພະເຢໂຫວາຊ່ວຍຂ້ອຍໃຫ້ເປັນຄົນສັດຊື່ ເບິ່ງໃນແງ່ບວກ ແລະມີຄວາມສຸກສະເໝີ.” ເຖິງວ່າເຈົ້າອາດບໍ່ໄດ້ເຈິກັບຄົນທີ່ຈະມາເປັນຄູ່ທັນທີ ແຕ່ພະເຢໂຫວາສັນຍາວ່າເພິ່ນຈະເບິ່ງແຍງເຈົ້າຕໍ່ໆໄປທາງດ້ານຮ່າງກາຍແລະອາລົມຄວາມຮູ້ສຶກ.—ພສ. 55:22
5. ມີໂອກາດໃດແດ່ທີ່ເຈົ້າຈະເຈິພີ່ນ້ອງໂສດທີ່ຮັກພະເຢໂຫວາ? (1 ໂກຣິນໂທ 15:58) (ເບິ່ງຮູບນຳ)
5 ຄຳພີໄບເບິນບອກເຮົາວ່າ: “ໃຫ້ທຸ່ມເທກັບວຽກຂອງຜູ້ເປັນນາຍທີ່ມີໃຫ້ເຮັດຫຼາຍແທ້ຫຼາຍວ່າ.” (ອ່ານ 1 ໂກຣິນໂທ 15:58) ຖ້າເຈົ້າໝັ່ນເຮັດວຽກຮັບໃຊ້ພະເຢໂຫວາແລະໃຊ້ເວລາກັບພີ່ນ້ອງທັງຜູ້ຊາຍແລະຜູ້ຍິງ ເຈົ້າບໍ່ພຽງແຕ່ຈະມີຄວາມສຸກໃນການຄົບຫາກັບພີ່ນ້ອງເທົ່ານັ້ນ ແຕ່ເຈົ້າຈະມີໂອກາດເຈິພີ່ນ້ອງໂສດທີ່ທຸ່ມເທໃນການຮັບໃຊ້ພະເຢໂຫວາຄືກັນກັບເຈົ້າ. ຖ້າເຈົ້າພະຍາຍາມເຕັມທີທີ່ຈະເຮັດໃຫ້ພະເຢໂຫວາພໍໃຈ ເຈົ້າກໍຈະມີຄວາມສຸກແທ້ໆ.
ຖ້າເຈົ້າໝັ່ນເຮັດວຽກຮັບໃຊ້ພະເຢໂຫວາແລະໃຊ້ເວລາກັບພີ່ນ້ອງທັງຜູ້ຊາຍແລະຜູ້ຍິງ ເຈົ້າອາດຈະເຈິບາງຄົນທີ່ຢາກແຕ່ງດອງ (ເບິ່ງຂໍ້ 5)
6. ຕອນທີ່ຄົນໂສດກຳລັງຊອກຄູ່ ລາວຄວນຈື່ຫຍັງໄວ້?
6 ໃຫ້ລະວັງທີ່ຈະບໍ່ໃຫ້ການຊອກຄູ່ເປັນເລື່ອງສຳຄັນທີ່ສຸດໃນຊີວິດ. (ຟລປ. 1:10) ຄວາມສຸກແທ້ບໍ່ໄດ້ຂຶ້ນກັບວ່າເຈົ້າແຕ່ງດອງຫຼືເປັນໂສດ ແຕ່ຂຶ້ນກັບວ່າເຈົ້າມີສາຍສຳພັນທີ່ໃກ້ຊິດກັບພະເຢໂຫວາ. (ມທ. 5:3) ຕອນທີ່ຍັງເປັນໂສດ ເຈົ້າມີອິດສະຫຼະຫຼາຍກວ່າໃນການເຮັດວຽກຮັບໃຊ້ພະເຢໂຫວາ. (1ກຣ. 7:32, 33) ໃຫ້ໃຊ້ເວລາຕອນທີ່ເປັນໂສດໃຫ້ເປັນປະໂຫຍດຫຼາຍທີ່ສຸດ. ເຈດຊິກ້າພີ່ນ້ອງຍິງຈາກອາເມຣິກາແຕ່ງດອງຕອນອາຍຸເກືອບ 40 ປີ ເວົ້າວ່າ: “ຕອນທີ່ເປັນໂສດ ຂ້ອຍຫຍຸ້ງຢູ່ກັບວຽກຮັບໃຊ້. ມັນຊ່ວຍຂ້ອຍໃຫ້ມີຄວາມສຸກເຖິງວ່າຂ້ອຍຢາກຈະແຕ່ງດອງ.”
ໃຊ້ເວລາສັງເກດ
7. ເປັນຫຍັງຈຶ່ງເປັນເລື່ອງສະຫຼາດທີ່ຈະໃຊ້ເວລາໄລຍະໜຶ່ງສັງເກດເບິ່ງ ກ່ອນທີ່ຈະບອກຜູ້ໃດຜູ້ໜຶ່ງວ່າເຈົ້າສົນໃຈລາວ? (ສຸພາສິດ 13:16)
7 ຖ້າເຈິຄົນທີ່ເຈົ້າຄິດວ່າອາດຈະເໝາະສົມທີ່ຈະມາເປັນຄູ່ຂອງເຈົ້າ ເຈົ້າຈະເຮັດແນວໃດ? ເຈົ້າຄວນບອກລາວທັນທີເລີຍບໍວ່າເຈົ້າສົນໃຈລາວ? ຄຳພີໄບເບິນບອກວ່າຄົນສະຫຼາດເຮັດທຸກສິ່ງໃນວິທີທີ່ສະແດງວ່າລາວມີຄວາມຮູ້ (ອ່ານສຸພາສິດ 13:16) ດັ່ງນັ້ນ ເປັນເລື່ອງສະຫຼາດຖ້າເຈົ້າໃຊ້ເວລາສັງເກດເບິ່ງຜູ້ນັ້ນໄລຍະໜຶ່ງ ກ່ອນຈະບອກລາວວ່າເຈົ້າສົນໃຈລາວ. ອັດຊ໌ວິນພີ່ນ້ອງຊາຍຈາກເນເທີແລນເວົ້າວ່າ: “ຄວາມຮູ້ສຶກມັນເກີດຂຶ້ນໄວ ແລະມັນກໍຫາຍໄປໄວ. ຖ້າເຈົ້າໃຊ້ເວລາສັງເກດເບິ່ງຜູ້ນັ້ນກ່ອນ ເຈົ້າກໍຈະບໍ່ຟ້າວຄົບຫາກັບຜູ້ໃດຜູ້ໜຶ່ງໂດຍອາໄສແຕ່ອາລົມຄວາມຮູ້ສຶກ.” ນອກຈາກນັ້ນ ຖ້າເຈົ້າໃຊ້ເວລາໜ້ອຍໜຶ່ງເພື່ອສັງເກດເບິ່ງ ເຈົ້າອາດຈະເຫັນວ່າລາວບໍ່ເໝາະສົມທີ່ຈະເປັນຄູ່ຂອງເຈົ້າ.
8. ຄົນທີ່ເປັນໂສດຈະສັງເກດເບິ່ງຄົນທີ່ລາວສົນໃຈແນວໃດ? (ເບິ່ງຮູບນຳ)
8 ເຈົ້າຈະສັງເກດເບິ່ງຄົນທີ່ເຈົ້າກຳລັງສົນໃຈແນວໃດ? ຕອນຢູ່ການປະຊຸມຫຼືກິນເຂົ້າສັງສັນກັນ ໃຫ້ສັງເກດເບິ່ງວ່າລາວມີຄວາມເຊື່ອເຂັ້ມແຂງບໍ່ ລາວເປັນຄົນນິດໄສຈັ່ງໃດ ການປະພຶດຂອງລາວເປັນແນວໃດ. ໃຜເປັນໝູ່ຂອງລາວ? ລາວມັກເວົ້າເລື່ອງຫຍັງ? (ລກ. 6:45) ລາວມີເປົ້າໝາຍຄ້າຍຄືກັບເຈົ້າບໍ່? ເຈົ້າອາດຈະລົມກັບຜູ້ເບິ່ງແຍງໃນປະຊາຄົມຂອງລາວຫຼືລົມກັບພີ່ນ້ອງທີ່ເປັນຜູ້ໃຫຍ່ທາງຄວາມເຊື່ອທີ່ຮູ້ຈັກລາວດີ. (ສພສ. 20:18) ເຈົ້າອາດຈະຖາມວ່າ: ‘ລາວມີຊື່ສຽງແບບໃດ? ນິດໄສລາວເປັນແນວໃດ?’ (ນຣ. 2:11) ຕອນທີ່ເຈົ້າສັງເກດເບິ່ງຜູ້ທີ່ເຈົ້າສົນໃຈ ຢ່າເຮັດໃຫ້ລາວຮູ້ສຶກອຶດອັດແລະບໍ່ສະບາຍໃຈ. ໃຫ້ນັບຖືຄວາມຮູ້ສຶກແລະຄວາມເປັນສ່ວນໂຕຂອງລາວ ແລະໃຫ້ຮັກສາໄລຍະຫ່າງນຳ.
ກ່ອນຈະບອກຜູ້ໃດຜູ້ໜຶ່ງວ່າເຈົ້າສົນໃຈລາວ ໃຫ້ໃຊ້ເວລາສັງເກດເບິ່ງໄລຍະໜຶ່ງກ່ອນ (ເບິ່ງຂໍ້ 7-8)
9. ກ່ອນຈະບອກຜູ້ໃດຜູ້ໜຶ່ງວ່າເຈົ້າສົນໃຈລາວ ເຈົ້າຄວນໝັ້ນໃຈໃນເລື່ອງໃດກ່ອນ?
9 ເຈົ້າຄວນໃຊ້ເວລາສັງເກດເບິ່ງດົນປານໃດກ່ອນຈະບອກຜູ້ໃດຜູ້ໜຶ່ງວ່າເຈົ້າສົນໃຈລາວ? ຖ້າເຈົ້າຟ້າວບອກໂພດ ອາດຈະເຮັດໃຫ້ລາວຮູ້ສຶກວ່າເຈົ້າບໍ່ໄດ້ຄິດຮອບຄອບກ່ອນຕັດສິນໃຈ. (ສພສ. 29:20) ກົງກັນຂ້າມ ຖ້າເຈົ້າໃຊ້ເວລາສັງເກດເບິ່ງດົນໂພດ ໂດຍສະເພາະຖ້າລາວຮູ້ສຶກວ່າເຈົ້າສົນໃຈລາວ ລາວອາດຈະຄິດວ່າເຈົ້າເປັນຄົນຕັດສິນໃຈຊ້າ. (ປຍຈ. 11:4) ຂໍໃຫ້ຈື່ໄວ້ວ່າ ກ່ອນເຈົ້າຈະບອກຜູ້ໃດຜູ້ໜຶ່ງວ່າສົນໃຈລາວ ເຈົ້າບໍ່ຈຳເປັນຕ້ອງຖ້າຈົນແນ່ໃຈວ່າຈະແຕ່ງດອງກັບລາວ. ແຕ່ເຈົ້າຄວນໝັ້ນໃຈວ່າເຈົ້າພ້ອມທີ່ຈະແຕ່ງດອງ ແລະໝັ້ນໃຈວ່າຜູ້ນັ້ນອາດຈະເປັນຄົນທີ່ເໝາະສົມກັບເຈົ້າ.
10. ຖ້າເຈົ້າຮູ້ສຶກວ່າມີຄົນກຳລັງສົນໃຈເຈົ້າ ແຕ່ເຈົ້າບໍ່ສົນໃຈລາວ ເຈົ້າຄວນເຮັດແນວໃດ?
10 ເຈົ້າຈະເຮັດແນວໃດຖ້າຮູ້ສຶກວ່າມີຄົນກຳລັງສົນໃຈເຈົ້າ? ຖ້າເຈົ້າບໍ່ສົນໃຈລາວ ເຈົ້າຄວນເຮັດໃຫ້ລາວເຫັນແຈ້ງເລີຍວ່າເຈົ້າບໍ່ສົນໃຈ. ມັນບໍ່ດີທີ່ຈະເຮັດໃຫ້ລາວຄິດວ່າມີຄວາມຫວັງທັງໆທີ່ມັນເປັນໄປບໍ່ໄດ້.—1ກຣ. 10:24; ອຟຊ. 4:25
11. ຖ້າເຈົ້າຖືກຂໍໃຫ້ເລືອກຄູ່ໃຫ້ຄົນທີ່ເປັນໂສດ ເຈົ້າຄວນຄິດເຖິງເລື່ອງຫຍັງແດ່?
11 ໃນບາງປະເທດອາດມີການຄາດໝາຍໃຫ້ພໍ່ແມ່ຫຼືຜູ້ໃຫຍ່ເລືອກຄູ່ໃຫ້ຄົນໃນຄອບຄົວທີ່ເປັນໂສດ ແລະໃນບາງປະເທດອາດມີການຂໍໃຫ້ຄົນໃນຄອບຄົວຫຼືໝູ່ເລືອກຄູ່ໃຫ້ຄົນທີ່ເປັນໂສດ ແລ້ວນັດໃຫ້ເຂົາເຈົ້າມາເຈິກັນເພື່ອເບິ່ງວ່າເຂົາເຈົ້າຢາກຄົບຫາເປັນແຟນກັນບໍ່. ຖ້າເຈົ້າຖືກຂໍໃຫ້ເລືອກຄູ່ໃຫ້ຄົນທີ່ເປັນໂສດ ຂໍໃຫ້ຄິດເຖິງຄວາມມັກແລະຄວາມຕ້ອງການຂອງທັງສອງຄົນ. ຖ້າເຈົ້າເຈິຄົນທີ່ເຈົ້າຄິດວ່າເໝາະສົມທີ່ຈະເປັນຄູ່ຂອງໝູ່ຫຼືຍາດຕິພີ່ນ້ອງຂອງເຈົ້າ ໃຫ້ເຈົ້າພະຍາຍາມຊອກຂໍ້ມູນກ່ຽວກັບຜູ້ນັ້ນໃຫ້ຫຼາຍທີ່ສຸດເທົ່າທີ່ຈະເຮັດໄດ້ວ່າລາວເປັນຄົນແບບໃດ ມີນິດໄສຈັ່ງໃດ ແລະສຳຄັນທີ່ສຸດຄວາມເຊື່ອຂອງລາວເປັນແນວໃດ. ສາຍສຳພັນທີ່ໃກ້ຊິດກັບພະເຢໂຫວາສຳຄັນຫຼາຍກວ່າເງິນຄຳ ການສຶກສາ ຫຼືຖານະທາງສັງຄົມ. ແຕ່ຂໍໃຫ້ຈື່ໄວ້ວ່າຄົນທີ່ມີສິດຕັດສິນໃຈຂັ້ນສຸດທ້າຍວ່າຈະແຕ່ງດອງຫຼືບໍ່ແມ່ນຄົນທີ່ເປັນໂສດ.—ຄລຕ. 6:5
ຈະເລີ່ມຄົບຫາກັນແນວໃດ?
12. ຖ້າເຈົ້າຢາກຄົບຫາກັບຄົນທີ່ເຈົ້າສົນໃຈ ເຈົ້າຈະບອກລາວແນວໃດ?
12 ຖ້າເຈົ້າຢາກຄົບຫາກັບຄົນທີ່ເຈົ້າສົນໃຈ ເຈົ້າຈະບອກລາວແນວໃດ?d ເຈົ້າອາດຈະນັດເຈິກັບລາວໃນບ່ອນສາທາລະນະຫຼືລົມກັບລາວທາງໂທລະສັບກໍໄດ້. ໃຫ້ບອກລາວແຈ້ງໆວ່າເຈົ້າສົນໃຈລາວແລະຢາກຮູ້ຈັກລາວຫຼາຍຂຶ້ນ. (1ກຣ. 14:9) ຖ້າຈຳເປັນກໍໃຫ້ເວລາລາວຄິດກ່ອນ. (ສພສ. 15:28) ຖ້າລາວບໍ່ຢາກຄົບຫາກັບເຈົ້າກໍໃຫ້ນັບຖືການຕັດສິນໃຈຂອງລາວ.
13. ເຈົ້າຈະເຮັດແນວໃດຖ້າມີຄົນບອກວ່າສົນໃຈເຈົ້າ? (ໂກໂລຊາຍ 4:6)
13 ເຈົ້າຈະເຮັດແນວໃດຖ້າມີຄົນບອກວ່າລາວສົນໃຈເຈົ້າ? ຜູ້ນັ້ນຄືຊິຕ້ອງລວບລວມຄວາມກ້າຫຼາຍແທ້ໆເພື່ອຈະບອກເຈົ້າວ່າລາວຮູ້ສຶກແນວໃດກັບເຈົ້າ. ດັ່ງນັ້ນ ຂໍໃຫ້ເຈົ້າສະແດງຄວາມກະລຸນາຕໍ່ລາວແລະນັບຖືຄວາມຮູ້ສຶກຂອງລາວ. (ອ່ານໂກໂລຊາຍ 4:6) ຖ້າເຈົ້າຕ້ອງການເວລາເພື່ອຄິດກ່ອນ ກໍໃຫ້ບອກລາວ. ແຕ່ພະຍາຍາມໃຫ້ຄຳຕອບໄວທີ່ສຸດເທົ່າທີ່ຈະເປັນໄປໄດ້. (ສພສ. 13:12) ຖ້າເຈົ້າບໍ່ຢາກຄົບຫາກັບລາວ ກໍໃຫ້ບອກລາວດີໆແບບຈະແຈ້ງ. ຂໍໃຫ້ສັງເກດວ່າພີ່ນ້ອງຊາຍຊື່ຮັນສ໌ຈາກອອດເຕຣຍຕອບແນວໃດຕອນທີ່ພີ່ນ້ອງຍິງຄົນໜຶ່ງມາຂໍຄົບຫາກັບລາວ. ຮັນສ໌ເວົ້າວ່າ: “ຂ້ອຍບອກລາວດີໆແບບຈະແຈ້ງ. ຂ້ອຍໃຫ້ຄຳຕອບລາວທັນທີຍ້ອນຂ້ອຍບໍ່ຢາກໃຫ້ລາວມີຄວາມຫວັງແບບລົມໆແລ້ງໆ. ຫຼັງຈາກນັ້ນ ຂ້ອຍຕ້ອງລະວັງສິ່ງທີ່ຂ້ອຍເວົ້າຫຼືສິ່ງທີ່ຂ້ອຍເຮັດເຊິ່ງອາດເຮັດໃຫ້ລາວຄິດວ່າຂ້ອຍປ່ຽນໃຈ.” ກົງກັນຂ້າມ ຖ້າເຈົ້າຢາກຄົບຫາກັບຜູ້ນັ້ນຄືກັນ ກໍໃຫ້ບອກລາວວ່າເຈົ້າຮູ້ສຶກແນວໃດແລະລົມກັນວ່າຄວນປະຕິບັດຕໍ່ກັນແນວໃດຕອນທີ່ຄົບຫາກັນ ຍ້ອນວັດທະນະທຳແລະປັດໄຈບາງຢ່າງອາດເຮັດໃຫ້ທັງສອງຄົນຄິດບໍ່ຄືກັນໃນເລື່ອງນີ້.
ພີ່ນ້ອງໃນປະຊາຄົມຈະຊ່ວຍຄົນໂສດແນວໃດ?
14. ເຮົາຄວນເວົ້າແນວໃດເພື່ອຊ່ວຍຄົນທີ່ເປັນໂສດ?
14 ເຮົາທຸກຄົນຈະຊ່ວຍຄົນໂສດທີ່ຢາກແຕ່ງດອງແນວໃດ? ວິທີໜຶ່ງແມ່ນໃຫ້ລະວັງສິ່ງທີ່ເຮົາເວົ້າ. (ອຟຊ. 4:29) ໃຫ້ຖາມໂຕເອງວ່າ: ‘ຂ້ອຍມັກເວົ້າຢອກພີ່ນ້ອງທີ່ຢາກແຕ່ງດອງບໍ? ເມື່ອຂ້ອຍເຫັນພີ່ນ້ອງຊາຍກັບພີ່ນ້ອງຍິງທີ່ເປັນໂສດລົມກັນ ຂ້ອຍຄິດເອົາເອງບໍວ່າເຂົາເຈົ້າມັກກັນ?’ (1ຕມ. 5:13) ນອກຈາກນັ້ນ ເຮົາບໍ່ຄວນເຮັດໃຫ້ຄົນທີ່ເປັນໂສດຮູ້ສຶກວ່າຊີວິດຂອງເຂົາເຈົ້າຂາດຫຍັງບາງຢ່າງຍ້ອນບໍ່ໄດ້ແຕ່ງດອງ. ຮັນສ໌ທີ່ເວົ້າເຖິງກ່ອນໜ້ານີ້ເວົ້າວ່າ: “ພີ່ນ້ອງບາງຄົນຖາມຂ້ອຍວ່າ ‘ມື້ໃດຊິເອົາເມຍ? ອາຍຸກະສ່ຳນີ້ແລ້ວ.’ ຄຳເວົ້ານີ້ເຮັດໃຫ້ຄົນທີ່ເປັນໂສດຮູ້ສຶກວ່າບໍ່ມີຄ່າແລະແຮ່ງຖືກກົດດັນໃຫ້ຮູ້ສຶກວ່າຕ້ອງແຕ່ງດອງ.” ຄືຊິດີກວ່າຖ້າເຮົາຊອກຫາໂອກາດຊົມເຊີຍຄົນທີ່ເປັນໂສດ!—1ທຊ. 5:11
15. (ກ) ຕາມຫຼັກການໃນໂຣມ 15:2 ເຮົາຄວນຄິດເຖິງຫຍັງກ່ອນຈະຊ່ວຍພີ່ນ້ອງໂສດຊອກຫາຄູ່? (ເບິ່ງຮູບນຳ) (ຂ) ເຮົາໄດ້ບົດຮຽນຫຍັງຈາກວິດີໂອ? (ເບິ່ງໄຂເງື່ອນ)
15 ຖ້າເຮົາເຫັນວ່າພີ່ນ້ອງຊາຍໂສດກັບພີ່ນ້ອງຍິງໂສດເໝາະສົມກັນ ເຮົາຈະເຮັດແນວໃດ? ຄຳພີໄບເບິນບອກວ່າໃຫ້ຄິດເຖິງຄວາມຮູ້ສຶກຂອງຄົນອື່ນ. (ອ່ານໂຣມ 15:2) ຄົນໂສດຫຼາຍຄົນບໍ່ມັກໃຫ້ຄົນອື່ນຈັບຄູ່ໃຫ້ ແລະເຮົາກໍຄວນນັບຖືການຕັດສິນໃຈຂອງເຂົາເຈົ້າ. (2ທຊ. 3:11) ບາງຄົນກໍຢາກໃຫ້ຊ່ວຍລະດັບໜຶ່ງ ແຕ່ເຮົາບໍ່ຄວນເຮັດຖ້າເຂົາເຈົ້າບໍ່ໄດ້ຂໍໃຫ້ຊ່ວຍ.e (ສພສ. 3:27) ຄົນໂສດບາງຄົນກໍບໍ່ມັກໃຫ້ໃຜມາຈັບຄູ່ໃຫ້ແບບກົງໆ. ລີເດຍພີ່ນ້ອງຍິງໂສດຈາກເຢຍລະມັນເວົ້າວ່າ: “ເຈົ້າອາດຈັດກິດຈະກຳທີ່ມີທັງພີ່ນ້ອງຊາຍແລະພີ່ນ້ອງຍິງຫຼາຍຄົນຢູ່ນຳກັນເພື່ອໃຫ້ເຂົາເຈົ້າມີໂອກາດຮູ້ຈັກກັນ. ສ່ວນທີ່ເຫຼືອກໍຂຶ້ນຢູ່ກັບເຂົາເຈົ້າ.”
ການຈັດກິດຈະກຳທີ່ມີຫຼາຍຄົນຢູ່ນຳກັນຈະເປີດໂອກາດໃຫ້ຄົນໂສດໄດ້ຮູ້ຈັກກັນ (ເບິ່ງຂໍ້ 15)
16. ຄົນທີ່ເປັນໂສດຄວນຈື່ຫຍັງໄວ້?
16 ເຮົາທຸກຄົນບໍ່ວ່າເປັນໂສດຫຼືແຕ່ງດອງແລ້ວ ກໍສາມາດມີຊີວິດທີ່ມີຄວາມສຸກໄດ້. (ພສ. 128:1) ຖ້າເຈົ້າຢາກແຕ່ງດອງແຕ່ຍັງບໍ່ທັນເຈິຄົນທີ່ເໝາະສົມ ຂໍໃຫ້ເຈົ້າຕັ້ງໃຈຮັບໃຊ້ພະເຢໂຫວາຕໍ່ໆໄປ. ຊິນຢີພີ່ນ້ອງຍິງຈາກມາເກົ້າເວົ້າວ່າ: “ເມື່ອສົມທຽບເວລາທີ່ເຈົ້າຈະໃຊ້ກັບຄູ່ຂອງເຈົ້າໃນໂລກໃໝ່ ເວລາທີ່ເຈົ້າເປັນໂສດໃນຕອນນີ້ມັນສັ້ນຫຼາຍແທ້ໆ. ຂໍໃຫ້ເຈົ້າມີຄວາມສຸກແລະໃຊ້ເວລາໃນຕອນນີ້ໃຫ້ເປັນປະໂຫຍດຫຼາຍທີ່ສຸດ.” ແຕ່ຖ້າຕອນນີ້ເຈົ້າເຈິຄົນທີ່ເໝາະສົມແລະເລີ່ມເປັນແຟນກັນແລ້ວເດ ເຈົ້າຈະເຮັດແນວໃດ? ໃນບົດຕໍ່ໄປເຮົາຈະມາເບິ່ງວ່າ ເຈົ້າຈະໃຊ້ເວລາຕອນທີ່ເປັນແຟນກັນແນວໃດເພື່ອຊ່ວຍເຈົ້າໃຫ້ຕັດສິນໃຈຢ່າງຖືກຕ້ອງ.
ເພງທີ 137 ພີ່ນ້ອງຍິງທີ່ສັດຊື່
a ຖ້າເຈົ້າຢາກຮູ້ວ່າໂຕເອງພ້ອມທີ່ຈະແຕ່ງດອງຫຼືບໍ່ ໃຫ້ເບິ່ງບົດຄວາມໃນເວັບໄຊ jw.org ເລື່ອງ “ແຟນ—ຕອນ 1: ຂ້ອຍພ້ອມຈະມີແຟນບໍ?” (ພາສາໄທ)
b ການອະທິບາຍຄຳສັບ: ໃນບົດນີ້ແລະບົດຕໍ່ໄປ ຄຳວ່າ “ຄົບຫາເປັນແຟນກັນ” ໝາຍເຖິງຕອນທີ່ຜູ້ຊາຍກັບຜູ້ຍິງຢາກຮູ້ຈັກກັນຫຼາຍຂຶ້ນເພື່ອເບິ່ງວ່າເຂົາເຈົ້າເໝາະສົມທີ່ຈະແຕ່ງດອງກັນບໍ່. ໃນບາງປະເທດອາດເອີ້ນວ່າເປັນແຟນກັນຫຼືກຳລັງເບິ່ງໃຈກັນ. ການຄົບຫາເປັນແຟນກັນເລີ່ມຕົ້ນຕອນທີ່ຜູ້ຊາຍກັບຜູ້ຍິງບອກກັນແຈ້ງໆວ່າເຂົາເຈົ້າສົນໃຈກັນ. ການຄົບຫາເປັນແຟນກັນຈະດຳເນີນຕໍ່ໄປຈົນຮອດຕອນທີ່ເຂົາເຈົ້າຕັດສິນໃຈແຕ່ງດອງກັນ ຫຼືເຊົາເປັນແຟນກັນ.
c ຊື່ສົມມຸດ.
d ໃນບາງວັດທະນະທຳ ຜູ້ຊາຍມັກຈະເປັນຝ່າຍຂໍເປັນແຟນກັບຜູ້ຍິງ. ແຕ່ມັນກໍບໍ່ຜິດທີ່ຜູ້ຍິງຈະຂໍເປັນແຟນກັບຜູ້ຊາຍ. (ນຣ. 3:1-13) ສຳລັບຂໍ້ມູນເພີ່ມເຕີມໃຫ້ເບິ່ງບົດຄວາມ “ໜຸ່ມສາວຖາມວ່າ ຂ້ອຍຈະບອກຄວາມໃນໃຈກັບລາວແນວໃດດີ?” ໃນຕື່ນເຖີດ 8 ພະຈິກ 2004.
e ເບິ່ງວິດີໂອໃນເວັບໄຊ jw.org ໄດ້ໄຊຊະນະໃນການຕໍ່ສູ້ເພື່ອຄວາມເຊື່ອ—ພີ່ນ້ອງທີ່ເປັນໂສດ.