ບົດທີ 02
ຄຳພີໄບເບິນເຮັດໃຫ້ເຮົາມີຄວາມຫວັງ
ຫຼາຍຄົນເຈິບັນຫາທີ່ເຮັດໃຫ້ຮູ້ສຶກອຸກໃຈ ເສຍໃຈ ແລະເຈັບປວດ. ເຈົ້າເດເຄີຍເຈິເລື່ອງແບບນີ້ບໍ? ບາງເທື່ອເຈົ້າອາດຈະທຸກໃຈຍ້ອນຄວາມເຈັບປ່ວຍຫຼືຍ້ອນຄົນທີ່ເຈົ້າຮັກຕາຍຈາກໄປ. ເຈົ້າອາດສົງໄສວ່າ ‘ປານໃດເລື່ອງທີ່ບໍ່ດີຈຶ່ງຊິໝົດໄປ?’ ຄຳພີໄບເບິນມີຄຳຕອບໃນເລື່ອງນີ້.
1. ຄຳພີໄບເບິນໃຫ້ຄວາມຫວັງເຮົາແນວໃດ?
ຄຳພີໄບເບິນອະທິບາຍວ່າເປັນຫຍັງໂລກນີ້ຈຶ່ງມີແຕ່ບັນຫາ ແລະຍັງບອກຂ່າວດີນຳວ່າ ອີກບໍ່ດົນບັນຫາຈະໝົດໄປ. ຄຳພີໄບເບິນສັນຍາວ່າເຮົາ ‘ຈະມີອະນາຄົດທີ່ດີແລະມີຄວາມຫວັງ.’ (ອ່ານເຢເຣມີຢາ 29:11, 12) ຄຳສັນຍາໃນຄຳພີໄບເບິນຊ່ວຍເຮົາໃຫ້ອົດທົນກັບບັນຫາໄດ້ ຊ່ວຍເຮົາໃຫ້ຄິດໃນແງ່ບວກ ແລະເຮັດໃຫ້ໝັ້ນໃຈວ່າເຮົາຈະມີຄວາມສຸກໄດ້ແທ້ໆ.
2. ຄຳພີໄບເບິນບອກວ່າອະນາຄົດຈະເປັນແນວໃດ?
ຄຳພີໄບເບິນບອກວ່າໃນອະນາຄົດ “ຄວາມຕາຍຈະບໍ່ມີອີກຕໍ່ໄປ ຄວາມໂສກເສົ້າຫຼືສຽງຮ້ອງໄຫ້ເສຍໃຈຫຼືຄວາມເຈັບປວດຈະບໍ່ມີອີກເລີຍ.” (ອ່ານພະນິມິດ 21:4) ບັນຫາໃນທຸກມື້ນີ້ເຊັ່ນ ຄວາມທຸກຍາກ ຄວາມບໍ່ຍຸຕິທຳ ຄວາມເຈັບປ່ວຍ ແລະຄວາມຕາຍຈະໝົດໄປ. ຄຳພີໄບເບິນສັນຍາວ່າເຮົາຈະມີຊີວິດທີ່ມີຄວາມສຸກຕະຫຼອດໄປໃນໂລກທີ່ເປັນອຸທິຍານ.
3. ເພື່ອຈະໝັ້ນໃຈຄຳສັນຍາໃນຄຳພີໄບເບິນ ເຮົາຕ້ອງເຮັດຫຍັງ?
ຫຼາຍຄົນຫວັງຢາກໃຫ້ສິ່ງດີໆເກີດຂຶ້ນ ແຕ່ກໍບໍ່ຮູ້ວ່າສິ່ງທີ່ຫວັງໄວ້ຈະເກີດຂຶ້ນແທ້ຫຼືບໍ່. ແຕ່ເຮົາໝັ້ນໃຈໄດ້ວ່າຄຳສັນຍາໃນຄຳພີໄບເບິນຈະເກີດຂຶ້ນແທ້. ເຮົາຈະໝັ້ນໃຈຫຼາຍຂຶ້ນຖ້າເຮົາ “ສຶກສາຄົ້ນຄວ້າພະຄຳພີຢ່າງລະອຽດ.” (ກິດຈະການ 17:11) ເມື່ອຮຽນໄປເລື້ອຍໆ ເຈົ້າກໍຈະຮູ້ເອງວ່າຄຳສັນຍາໃນຄຳພີໄບເບິນເຊື່ອຖືໄດ້ຫຼືບໍ່.
ຮຽນຮູ້ຫຼາຍຂຶ້ນ
ມາເບິ່ງຄຳສັນຍາທີ່ຄຳພີໄບເບິນບອກວ່າຈະເກີດຂຶ້ນແທ້ໃນອະນາຄົດ ແລະເບິ່ງວ່າຄຳສັນຍານັ້ນມີປະໂຫຍດກັບເຮົາແນວໃດໃນທຸກມື້ນີ້.
4. ຄຳພີໄບເບິນສັນຍາວ່າເຮົາຈະມີຊີວິດຢູ່ຕະຫຼອດໄປໃນໂລກທີ່ບໍ່ມີຄວາມທຸກ
ຂໍໃຫ້ເບິ່ງຄຳສັນຍາຕ່າງໆໃນຄຳພີໄບເບິນທີ່ບອກໄວ້ທາງລຸ່ມນີ້. ເຈົ້າມັກເລື່ອງໃດຫຼາຍທີ່ສຸດ? ເປັນຫຍັງຈຶ່ງມັກ?
ອ່ານຂໍ້ຄຳພີທີ່ເວົ້າເຖິງຄຳສັນຍາແຕ່ລະຢ່າງ ແລະລົມກັນກ່ຽວກັບຄຳຖາມຕໍ່ໄປນີ້:
ເຈົ້າຮູ້ສຶກແນວໃດຫຼັງຈາກທີ່ໄດ້ອ່ານຂໍ້ຄຳພີເຫຼົ່ານີ້? ເຈົ້າຄິດວ່າຄອບຄົວແລະໝູ່ຄູ່ຂອງເຈົ້າຈະມັກເລື່ອງນີ້ບໍ?
ຂໍໃຫ້ນຶກພາບວ່າເຈົ້າຢູ່ໃນໂລກທີ່
ບໍ່ມີໃຜຕ້ອງ . . . |
ເຮົາທຸກຄົນຈະ . . . |
|---|---|
|
|
|
|
|
|
|
|
|
|
5. ຄຳສັນຍາໃນຄຳພີໄບເບິນຊ່ວຍໄດ້
ຫຼາຍຄົນຮູ້ສຶກທໍ້ຫຼືບໍ່ພໍໃຈເມື່ອເຫັນບັນຫາໃນສັງຄົມ. ບາງຄົນພະຍາຍາມຢ່າງໜັກເພື່ອປ່ຽນແປງສິ່ງຕ່າງໆໃຫ້ດີຂຶ້ນ. ມາເບິ່ງວ່າຄຳສັນຍາໃນຄຳພີໄບເບິນຊ່ວຍຜູ້ຄົນໄດ້ແນວໃດໃນຕອນນີ້. ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:
ໃນວິດີໂອ ມີເລື່ອງຫຍັງທີ່ເຮັດໃຫ້ຣາຟິກ້າຮູ້ສຶກບໍ່ສະບາຍໃຈ?
ເຖິງວ່າຄວາມບໍ່ຍຸຕິທຳຍັງມີຢູ່ ແຕ່ເມື່ອຮຽນຄຳພີໄບເບິນແລ້ວ ລາວຮູ້ສຶກແນວໃດ?
ຄຳສັນຍາໃນຄຳພີໄບເບິນຊ່ວຍໃຫ້ມີກຳລັງໃຈແລະອົດທົນກັບບັນຫາໄດ້. ອ່ານສຸພາສິດ 17:22 ແລະໂຣມ 12:12 ແລ້ວລົມກັນກ່ຽວກັບຄຳຖາມຕໍ່ໄປນີ້:
ເຈົ້າຄິດວ່າຄຳສັນຍາໃນຄຳພີໄບເບິນຈະຊ່ວຍເຈົ້າໃຫ້ມີຊີວິດທີ່ດີຂຶ້ນໃນຕອນນີ້ບໍ? ເປັນຫຍັງຈຶ່ງຄິດແນວນັ້ນ?
ບາງຄົນເວົ້າວ່າ: “ຄຳສັນຍາໃນຄຳພີໄບເບິນບໍ່ມີທາງເກີດຂຶ້ນແທ້ດອກ.”
ເຈົ້າຄິດແນວໃດ ເຈົ້າຄິດວ່າດີບໍທີ່ເຮົາຈະເບິ່ງເຫດຜົນກ່ອນວ່າຄຳສັນຍານັ້ນເຊື່ອຖືໄດ້ຫຼືບໍ່?
ສະຫຼຸບ
ຄຳພີໄບເບິນສັນຍາວ່າເຮົາຈະມີອະນາຄົດທີ່ມີຄວາມສຸກ. ຄຳສັນຍານີ້ຊ່ວຍເຮົາໃຫ້ມີຄວາມຫວັງແລະອົດທົນກັບບັນຫາຕ່າງໆໄດ້.
ຄຳຖາມທົບທວນ
ເປັນຫຍັງຄົນເຮົາຕ້ອງມີຄວາມຫວັງ?
ຄຳພີໄບເບິນສັນຍາວ່າອະນາຄົດຈະເປັນແນວໃດ?
ຄຳສັນຍາໃນຄຳພີໄບເບິນຊ່ວຍເຈົ້າໄດ້ແນວໃດໃນຕອນນີ້?
ເບິ່ງເພີ່ມເຕີມ
ມາເບິ່ງວ່າຄວາມຫວັງໃນອະນາຄົດຈະຊ່ວຍຄົນທີ່ເຈັບປ່ວຍຊຳເຮື້ອໄດ້ແນວໃດ.
“ຮັບມືກັບຄວາມເຈັບປ່ວຍຊຳເຮື້ອ—ຄຳພີໄບເບິນຊ່ວຍໄດ້ບໍ?” (ບົດຄວາມໃນເວັບໄຊ)
ຕອນທີ່ເບິ່ງມິວສິກວິດີໂອນີ້ ລອງນຶກພາບໂຕເຈົ້າແລະຄອບຄົວຢູ່ໃນສວນອຸທິຍານທີ່ສວຍງາມທີ່ຄຳພີໄບເບິນສັນຍາໄວ້.
ລອງອ່ານເບິ່ງວ່າຄວາມຫວັງເລື່ອງອະນາຄົດທີ່ບອກໄວ້ໃນຄຳພີໄບເບິນປ່ຽນຊີວິດຊາຍຄົນໜຶ່ງທີ່ເປັນນັກຕໍ່ສູ້ເພື່ອສັງຄົມແນວໃດ.
“ຂ້ອຍເຊົາຄິດທີ່ຈະປ່ຽນໂລກດ້ວຍມືຂອງຂ້ອຍເອງ” (ຫໍສັງເກດການ 1 ກໍລະກົດ 2013)