ບົດທີ 09

ການອະທິດຖານເຮັດໃຫ້ເຮົາສະໜິດກັບພະເຈົ້າຫຼາຍຂຶ້ນ

ສະບັບພິມ

ເຈົ້າຢາກສະໜິດກັບພະເຢໂຫວາຫຼາຍຂຶ້ນບໍ? ການອະທິດຖານຈະຊ່ວຍເຈົ້າໃຫ້ສະໜິດກັບເພິ່ນ. ເພິ່ນພ້ອມຈະຊ່ວຍເຫຼືອແລະໃຫ້ຄຳແນະນຳກັບເຈົ້າ. ເພິ່ນຈະຕອບຄຳຖາມຫຼາຍເລື່ອງທີ່ເຈົ້າສົງໄສ ແລະເຈົ້າຈະໄດ້ກຳລັງໃຈ. ແຕ່ເຈົ້າຈະອະທິດຖານເຖິງເພິ່ນແນວໃດ? ເພິ່ນຟັງຄຳອະທິດຖານຂອງທຸກຄົນບໍ? ແລ້ວເຈົ້າຈະແນ່ໃຈໄດ້ແນວໃດວ່າເພິ່ນຟັງຄຳອະທິດຖານຂອງເຈົ້າ? ໃຫ້ເຮົາມາເບິ່ງນຳກັນ.

1. ເຮົາຄວນອະທິດຖານເຖິງໃຜ ແລະເຮົາອະທິດຖານເລື່ອງຫຍັງໄດ້ແດ່?

ພະເຢຊູສອນວ່າເຮົາຄວນອະທິດຖານເຖິງພະເຢໂຫວາເທົ່ານັ້ນ. ພະເຢຊູເອງກໍອະທິດຖານເຖິງພະເຢໂຫວາ. ເພິ່ນບອກວ່າ: “ພວກເຈົ້າຄວນອະທິດຖານແບບນີ້ ‘ພະເຈົ້າ ພໍ່ຂອງພວກເຮົາທີ່ຢູ່ໃນສະຫວັນ . . .’” (ມັດທາຍ 6:9) ແຮ່ງເຮົາອະທິດຖານເປັນປະຈຳ ເຮົາກໍຈະແຮ່ງສະໜິດກັບພະເຢໂຫວາຫຼາຍຂຶ້ນ.

ເຮົາອະທິດຖານເຖິງພະເຢໂຫວາໄດ້ທຸກເລື່ອງ ແລະຖ້າຄຳອະທິດຖານນັ້ນກົງກັບຄວາມຕ້ອງການຂອງເພິ່ນ ເພິ່ນກໍຈະຕອບຄຳອະທິດຖານຂອງເຮົາ. ຄຳພີໄບເບິນບອກວ່າ “ຖ້າພວກເຮົາຂໍສິ່ງໃດກໍຕາມທີ່ສອດຄ່ອງກັບຄວາມຕ້ອງການຂອງເພິ່ນ ເພິ່ນຈະຟັງພວກເຮົາ.” (1 ໂຢຮັນ 5:14) ພະເຢຊູບອກໃຫ້ຮູ້ວ່າເຮົາຈະອະທິດຖານເລື່ອງຫຍັງໄດ້ແດ່. (ອ່ານມັດທາຍ 6:9-13) ນອກຈາກອະທິດຖານເລື່ອງສ່ວນໂຕແລ້ວ ເຮົາຢາກອະທິດຖານຂໍໃຫ້ພະເຢໂຫວາຊ່ວຍຄົນອື່ນນຳ ແລະເຮົາບໍ່ຄວນລືມຂອບໃຈເພິ່ນທີ່ໃຫ້ສິ່ງດີໆກັບເຮົາ.

2. ເຮົາຈະອະທິດຖານແນວໃດ?

ຄຳພີໄບເບິນບອກໃຫ້ເຮົາ ‘ລະບາຍຄວາມຮູ້ສຶກກັບ [ພະເຈົ້າ].’ (ເພງສັນລະເສີນ 62:8) ເຮົາອະທິດຖານບອກຄວາມຄິດແລະຄວາມຮູ້ສຶກຂອງເຮົາກັບພະເຢໂຫວາໄດ້ເຕັມທີ. ເຮົາຈະອະທິດຖານໃນໃຈຫຼືອອກສຽງກໍໄດ້. ເຮົາຈະອະທິດຖານດ້ວຍທ່າທາງແບບໃດກໍໄດ້ ແຕ່ຕ້ອງເປັນແບບທີ່ສະແດງຄວາມນັບຖື ແລະຈະອະທິດຖານຕອນໃດຫຼືບ່ອນໃດກໍໄດ້.

3. ພະເຢໂຫວາຕອບຄຳອະທິດຖານໂດຍວິທີໃດ?

ພະເຢໂຫວາຕອບຄຳອະທິດຖານໃນຫຼາຍວິທີ ເຊັ່ນ ເພິ່ນໃຊ້ຄຳພີໄບເບິນຕອບຄຳອະທິດຖານ. ການອ່ານຄຳພີໄບເບິນຊ່ວຍ “ໃຫ້ຄົນທີ່ບໍ່ມີປະສົບການສະຫຼາດຂຶ້ນ.” (ເພງສັນລະເສີນ 19:7; ອ່ານຢາໂກໂບ 1:5) ເມື່ອເຮົາເຈິບັນຫາແລ້ວອະທິດຖານເຖິງພະເຢໂຫວາ ເພິ່ນກໍຈະຊ່ວຍໃຫ້ເຮົາສະຫງົບໃຈ ແລະເພິ່ນອາດຈະໃຫ້ບາງຄົນມາຊ່ວຍເຮົາກໍໄດ້.

ຮຽນຮູ້ຫຼາຍຂຶ້ນ

ເຮົາຄວນອະທິດຖານແບບໃດ ແລະການອະທິດຖານເປັນປະໂຫຍດກັບເຮົາແນວໃດ.

4. ພະເຈົ້າຟັງຄຳອະທິດຖານຂອງທຸກຄົນບໍ?

ຄຳອະທິດຖານແບບໃດທີ່ພະເຈົ້າຮັບຟັງ? ເປີດວິດີໂອ.

ວິດີໂອ: ພະເຈົ້າຟັງຄຳອະທິດຖານຂອງທຸກຄົນບໍ?—ວິດີໂອສັ້ນ (2:42)

ພະເຢໂຫວາຢາກໃຫ້ເຮົາອະທິດຖານເຖິງເພິ່ນ. ອ່ານເພງສັນລະເສີນ 65:2 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເຈົ້າຄິດວ່າພະເຈົ້າ “ຜູ້ຟັງຄຳອະທິດຖານ” ຢາກໃຫ້ເຈົ້າອະທິດຖານເຖິງເພິ່ນບໍ? ເປັນຫຍັງເຈົ້າຈຶ່ງຄິດແບບນັ້ນ?

ຖ້າຢາກໃຫ້ພະເຈົ້າຟັງຄຳອະທິດຖານ ເຮົາຕ້ອງພະຍາຍາມເຮັດທຸກຢ່າງຕາມທີ່ເພິ່ນສອນ. ອ່ານມີກາ 3:4 ແລະ 1 ເປໂຕ 3:12 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເຮົາຕ້ອງເຮັດຫຍັງເພື່ອພະເຢໂຫວາຈະຟັງຄຳອະທິດຖານຂອງເຮົາ?

ໃນສົງຄາມ ທະຫານທັງສອງຝ່າຍຂໍໃຫ້ສູ້ຮົບຊະນະ. ແຕ່ເຈົ້າຄິດວ່າພະເຈົ້າຟັງຄຳອະທິດຖານຂອງເຂົາເຈົ້າບໍ?

5. ຄຳອະທິດຖານຂອງເຮົາຄວນອອກມາຈາກໃຈແລະຄວາມຮູ້ສຶກແທ້ໆ

ບາງຄົນອາດຖືກສອນໃຫ້ເວົ້າຄຳອະທິດຖານແບບເກົ່າຊ້ຳໄປຊ້ຳມາ. ແຕ່ພະເຈົ້າຢາກໃຫ້ເຮົາອະທິດຖານແບບນັ້ນບໍ? ອ່ານມັດທາຍ 6:7 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເຈົ້າຈະເຮັດແນວໃດເພື່ອຈະບໍ່ “ເວົ້າຊ້ຳຄຳເກົ່າ” ໃນຄຳອະທິດຖານ?

ແຕ່ລະມື້ ໃຫ້ຄິດເຖິງສິ່ງດີໆ 1 ຢ່າງທີ່ເຈົ້າໄດ້ຮັບຈາກພະເຢໂຫວາແລະອະທິດຖານຂອບໃຈເພິ່ນທີ່ໃຫ້ສິ່ງນັ້ນກັບເຈົ້າ. ລອງເຮັດແບບນີ້ເປັນເວລາ 1 ອາທິດ ແລ້ວເຈົ້າກໍຈະອະທິດຖານໂດຍບໍ່ເວົ້າຊ້ຳຄຳເກົ່າເຖິງ 7 ເລື່ອງ.

ເດັກນ້ອຍຜູ້ຊາຍຄົນໜຶ່ງກຳລັງລົມກັບພໍ່ແມ່. — ຕອນທີ່ເຮົາອະທິດຖານເຖິງພະເຢໂຫວາ ເພິ່ນຢາກໃຫ້ເຮົາບອກຄວາມຮູ້ສຶກຈາກໃຈຂອງເຮົາອອກມາ.ຄືກັບຕອນທີ່ລູກລົມກັບພໍ່ພໍ່ກໍຢາກໃຫ້ລູກບອກວ່າລູກຮູ້ສຶກແນວໃດແທ້ໆ

6. ການອະທິດຖານເປັນຂອງຂວັນຈາກພະເຈົ້າ

ການອະທິດຖານຊ່ວຍເຮົາແນວໃດຕອນທີ່ເຈິຄວາມຍາກລຳບາກ? ເປີດວິດີໂອ.

ວິດີໂອ: ການອະທິດຖານຊ່ວຍເຮົາຮັບມືກັບບັນຫາ (1:32)

ຄຳພີໄບເບິນບອກວ່າການອະທິດຖານຈະເຮັດໃຫ້ເຮົາສະຫງົບໃຈ. ອ່ານຟີລິບປອຍ 4:6, 7 ແລ້ວລົມກັນກ່ຽວກັບຄຳຖາມຕໍ່ໄປນີ້:

ບາງເທື່ອການອະທິດຖານອາດຈະບໍ່ໄດ້ເຮັດໃຫ້ບັນຫາໝົດໄປທັນທີ ແຕ່ການອະທິດຖານມີປະໂຫຍດຫຍັງແດ່?
ເຈົ້າຢາກອະທິດຖານເລື່ອງຫຍັງແດ່?

ເຈົ້າຮູ້ບໍ?

“ອາແມນ” ໝາຍເຖິງ “ຂໍໃຫ້ເປັນແນວນັ້ນ” ຫຼື “ແນ່ນອນ.” ຄຳວ່າ “ອາແມນ” ຈະເວົ້າໃນຕອນຈົບຂອງຄຳອະທິດຖານ.—1 ຂ່າວຄາວ 16:36

7. ແບ່ງເວລາໄວ້ເພື່ອອະທິດຖານ

ບາງເທື່ອເຮົາຫຍຸ້ງຫຼາຍຈົນບໍ່ມີເວລາອະທິດຖານ. ແຕ່ພະເຢຊູຖືວ່າການອະທິດຖານເປັນເລື່ອງສຳຄັນ. ອ່ານມັດທາຍ 14:23 ແລະມາຣະໂກ 1:35 ແລ້ວລົມກັນກ່ຽວກັບຄຳຖາມຕໍ່ໄປນີ້: