ບົດຄວາມສຶກສາທີ 23
ເພງທີ 2 ຊື່ຂອງພະອົງຄືເຢໂຫວາ
ຊື່ຂອງພະເຢໂຫວາສຳຄັນຕໍ່ເຮົາແນວໃດ?
“ພະເຢໂຫວາບອກວ່າ: ‘ເຈົ້າເປັນພະຍານຂອງເຮົາ.’”—ອຊຢ. 43:10
ຈຸດສຳຄັນ
ສິ່ງທີ່ເຮົາເຮັດໄດ້ເພື່ອເຮັດໃຫ້ຊື່ຂອງພະເຢໂຫວາໄດ້ຮັບຄວາມນັບຖືແລະພົ້ນຈາກຄຳຕຳໜິ.
1-2. ເຮົາຮູ້ໄດ້ແນວໃດວ່າຊື່ຂອງພະເຢໂຫວາສຳຄັນຕໍ່ພະເຢຊູ?
ຊື່ຂອງພະເຢໂຫວາສຳຄັນທີ່ສຸດຕໍ່ພະເຢຊູ. ພະເຢຊູເປັນບຸກຄົນສຳຄັນທີ່ເຮັດໃຫ້ຄົນຮູ້ຈັກຊື່ຂອງພະເຢໂຫວາ. ຄືກັບທີ່ເຮົາໄດ້ຮຽນໃນບົດແລ້ວນີ້ ພະເຢຊູຍອມຕາຍຍ້ອນເພິ່ນຮັກຊື່ຂອງພະເຢໂຫວາແລະທຸກສິ່ງທີ່ກ່ຽວຂ້ອງກັບຊື່ນັ້ນ. (ມຣກ. 14:36; ຮຣ. 10:7-9) ຫຼັງຈາກການປົກຄອງ 1.000 ປີຂອງພະເຢຊູສິ້ນສຸດລົງ ເພິ່ນຈະເຕັມໃຈມອບສິດອຳນາດທຸກຢ່າງຄືນໃຫ້ພະເຢໂຫວາເພື່ອຊື່ຂອງພະເຢໂຫວາຈະໄດ້ຮັບຄວາມນັບຖືຕະຫຼອດໄປ. (1ກຣ. 15:26-28) ທຸກສິ່ງທີ່ພະເຢຊູໄດ້ເຮັດເພື່ອຊື່ຂອງພະເຢໂຫວາພິສູດໃຫ້ເຫັນວ່າເພິ່ນຮັກພະເຢໂຫວາຫຼາຍແທ້ໆ.
2 ພະເຢຊູມາໂລກນີ້ໃນນາມພະເຢໂຫວາເພື່ອບອກຄົນໃຫ້ຮູ້ໃນສິ່ງທີ່ພະເຢໂຫວາຕ້ອງການໃຫ້ເຂົາເຈົ້າຮູ້. (ຢຮ. 5:43; 12:13) ພະເຢຊູເຮັດໃຫ້ພວກລູກສິດຂອງເພິ່ນຮູ້ຈັກຊື່ຂອງພະເຢໂຫວາ. (ຢຮ. 17:6, 26) ເມື່ອພະເຢຊູສອນຜູ້ຄົນແລະເຮັດການອັດສະຈັນຕ່າງໆ ເພິ່ນເຮັດໃຫ້ເຫັນແຈ້ງວ່າພະເຢໂຫວາເປັນຜູ້ໃຫ້ສະຕິປັນຍາແລະລິດເດດເພິ່ນເພື່ອເຮັດສິ່ງເຫຼົ່ານັ້ນ. (ຢຮ. 10:25) ຕອນທີ່ພະເຢຊູອະທິດຖານຂໍໃຫ້ພະເຢໂຫວາເບິ່ງແຍງພວກລູກສິດ ເພິ່ນຂໍໃຫ້ພະເຢໂຫວາເຮັດສິ່ງນີ້ “ເພື່ອເຫັນແກ່ຊື່ຂອງເພິ່ນເອງ.” (ຢຮ. 17:11) ຄັນຊັ້ນ ເປັນໄປໄດ້ແນວໃດທີ່ບາງຄົນອ້າງວ່າເປັນລູກສິດແທ້ຂອງພະເຢຊູ ແຕ່ພັດບໍ່ຮູ້ຊື່ຂອງພະເຢໂຫວາຫຼືບໍ່ໄດ້ໃຊ້ຊື່ນັ້ນ?
3. ເຮົາຈະຮຽນຫຍັງໃນບົດນີ້?
3 ເຮົາເປັນລູກສິດຂອງພະເຢຊູ ເຮົາຮຽນແບບພະເຢຊູໂດຍສະແດງຄວາມຮັກແລະນັບຖືຊື່ຂອງພະເຢໂຫວາ. (1ປຕ. 2:21) ໃນບົດນີ້ ເຮົາຈະຮຽນວ່າເປັນຫຍັງພະເຢໂຫວາຈຶ່ງເອີ້ນຜູ້ປະກາດ “ຂ່າວດີເລື່ອງການປົກຄອງຂອງພະເຈົ້າ” ຕາມຊື່ຂອງເພິ່ນ. (ມທ. 24:14) ນອກຈາກນັ້ນ ເຮົາຍັງຈະຮຽນວ່າຊື່ຂອງພະເຢໂຫວາສຳຄັນແນວໃດຕໍ່ເຮົາແຕ່ລະຄົນ.
“ໃຫ້ໃຊ້ຊື່ຂອງເພິ່ນ”
4. (ກ) ກ່ອນພະເຢຊູຈະກັບໄປສະຫວັນ ເພິ່ນບອກພວກລູກສິດວ່າແນວໃດ? (ຂ) ຈາກສິ່ງທີ່ພະເຢຊູບອກພວກລູກສິດເຮັດໃຫ້ມີຄຳຖາມຫຍັງ?
4 ບໍ່ດົນກ່ອນພະເຢຊູຈະກັບໄປສະຫວັນ ເພິ່ນບອກພວກລູກສິດວ່າ: “ພວກເຈົ້າຈະໄດ້ຮັບພະລັງບໍລິສຸດຈາກພະເຈົ້າ. ພະລັງນັ້ນຈະຢູ່ກັບພວກເຈົ້າ ແລະພວກເຈົ້າຈະເປັນພະຍານຂອງຂ້ອຍໃນເມືອງເຢຣູຊາເລັມແລະທົ່ວແຂວງຢູດາຍກັບແຂວງຊາມາເຣຍ ແລະຈົນຮອດສຸດຂອບໂລກ.” (ກຈກ. 1:8) ສະນັ້ນ ພວກລູກສິດຈະປະກາດຂ່າວດີຢູ່ທຸກບ່ອນ ບໍ່ແມ່ນແຕ່ໃນອິດສະຣາເອນເທົ່ານັ້ນ. ໃນທີ່ສຸດຄົນຢູ່ທົ່ວໂລກຈະມີໂອກາດເຂົ້າມາເປັນລູກສິດຂອງພະເຢຊູ. (ມທ. 28:19, 20) ແຕ່ພະເຢຊູເວົ້າວ່າ: “ພວກເຈົ້າຈະເປັນພະຍານຂອງຂ້ອຍ.” ພວກລູກສິດໃໝ່ເຫຼົ່ານີ້ຈະເປັນແຕ່ພະຍານຂອງພະເຢຊູເທົ່ານັ້ນບໍ ຫຼືເຂົາເຈົ້າຕ້ອງຮູ້ຈັກພະເຢໂຫວາແລະເປັນພະຍານໃຫ້ເພິ່ນນຳ? ເລື່ອງໃນກິດຈະການບົດ 15 ຈະຊ່ວຍເຮົາຕອບຄຳຖາມນີ້.
5. ພວກອັກຄະສາວົກແລະພວກຜູ້ເບິ່ງແຍງໃນເມືອງເຢຣູຊາເລັມສະແດງໃຫ້ເຫັນແນວໃດວ່າທຸກຄົນຈະຕ້ອງຮູ້ຈັກຊື່ຂອງພະເຢໂຫວາ? (ເບິ່ງຮູບນຳ)
5 ໃນປີ 49 ພວກອັກຄະສາວົກກັບພວກຜູ້ເບິ່ງແຍງໃນເມືອງເຢຣູຊາເລັມໄດ້ປະຊຸມກັນວ່າຄົນຕ່າງຊາດທີ່ບໍ່ໄດ້ຮັບສິນຕັດຈະຕ້ອງຮັບສິນຕັດຫຼືບໍ່ເພື່ອຈະເຂົ້າມາເປັນຄລິດສະຕຽນ. ໃນຕອນທ້າຍຂອງການປະຊຸມນັ້ນ ຢາໂກໂບທີ່ເປັນນ້ອງຊາຍຂອງພະເຢຊູເວົ້າວ່າ: “[ເປໂຕ] ໄດ້ເລົ່າຢ່າງລະອຽດວ່າ ຕອນນີ້ພະເຈົ້າໄດ້ສົນໃຈຄົນຕ່າງຊາດແລ້ວ ແລະເພິ່ນລວບລວມປະຊາຊົນກຸ່ມໜຶ່ງໃນເຂົາເຈົ້າໃຫ້ໃຊ້ຊື່ຂອງເພິ່ນ.” ຢາໂກໂບຍົກເອົາຄຳເວົ້າຂອງຜູ້ພະຍາກອນອາໂມດມາເວົ້າ ລາວເວົ້າຕື່ມວ່າ: “ເພື່ອຄົນທີ່ເຫຼືອຢູ່ຈະຊອກຫາເຮົາເຢໂຫວາຢ່າງຈິງຈັງນຳກັນກັບປະຊາຊົນຈາກຊາດຕ່າງໆ ເຊິ່ງແມ່ນປະຊາຊົນທີ່ຖືກເອີ້ນຕາມຊື່ຂອງເຮົ.” (ກຈກ. 15:14-18) ພວກລູກສິດໃໝ່ເຫຼົ່ານີ້ບໍ່ພຽງແຕ່ຮຽນຮູ້ກ່ຽວກັບພະເຢໂຫວາເທົ່ານັ້ນ ແຕ່ເຂົາເຈົ້າຈະ ‘ຖືກເອີ້ນຕາມຊື່ຂອງເພິ່ນນຳ.’ ນີ້ໝາຍຄວາມວ່າເຂົາເຈົ້າຈະໄດ້ເປັນພະຍານຂອງພະເຢໂຫວາແລະຍັງຈະຖືກເອີ້ນຕາມຊື່ນັ້ນນຳ.
ໃນການປະຊຸມຂອງຄະນະກຳມະການປົກຄອງໃນສະຕະວັດທຳອິດ ພີ່ນ້ອງຊາຍທີ່ສັດຊື່ເຫຼົ່ານີ້ເຂົ້າໃຈແຈ້ງວ່າຄລິດສະຕຽນຕ້ອງໃຊ້ຊື່ຂອງພະເຈົ້າ (ເບິ່ງຂໍ້ 5)
6-7. (ກ) ພະເຢຊູມາໂລກນີ້ເພື່ອຫຍັງ? (ຂ) ອັນໃດເປັນເຫດຜົນທີ່ສຳຄັນກວ່າການຊ່ວຍມະນຸດໃຫ້ລອດ?
6 ຊື່ຂອງພະເຢຊູມີຄວາມໝາຍວ່າ “ພະເຢໂຫວາເປັນຄວາມລອດ” ແລະເພິ່ນພິສູດໃຫ້ເຫັນເລື່ອງນີ້ໂດຍຊ່ວຍຄົນທີ່ສະແດງຄວາມເຊື່ອໃນພະເຢໂຫວາແລະໃນເພິ່ນໃຫ້ລອດ. ພະເຢຊູມາໂລກນີ້ເພື່ອຕາຍເປັນຄ່າໄຖ່ໃຫ້ມະນຸດ. (ມທ. 20:28) ການທີ່ພະເຢຊູເຮັດແບບນີ້ເຮັດໃຫ້ເປັນໄປໄດ້ທີ່ມະນຸດຈະໄດ້ຮັບການຊ່ວຍໃຫ້ລອດແລະມີຊີວິດຕະຫຼອດໄປ.—ຢຮ. 3:16
7 ເປັນຫຍັງມະນຸດຈຳເປັນຕ້ອງມີຄ່າໄຖ່? ຍ້ອນສິ່ງທີ່ເກີດຂຶ້ນໃນສວນເອເດັນ. ຄືກັບທີ່ໄດ້ເວົ້າໃນບົດແລ້ວນີ້ ອາດາມກັບເອວາມະນຸດຄູ່ທຳອິດບໍ່ເຊື່ອຟັງພະເຢໂຫວາ ເຂົາເຈົ້າຈຶ່ງສູນເສຍໂອກາດທີ່ຈະມີຊີວິດຕະຫຼອດໄປ. (ປຖກ. 3:6, 24) ແຕ່ພະເຢຊູມາໂລກນີ້ເພື່ອເຮັດສິ່ງໜຶ່ງທີ່ສຳຄັນກວ່າການຊ່ວຍມະນຸດໃຫ້ລອດ. ຊື່ຂອງພະເຢໂຫວາຖືກໃສ່ຮ້າຍ. (ປຖກ. 3:4, 5) ສະນັ້ນ ຄວາມລອດຂອງລູກຫຼານຂອງອາດາມກັບເອວາກ່ຽວຂ້ອງກັບເລື່ອງໜຶ່ງທີ່ສຳຄັນກວ່າ ນັ້ນຄືການເຮັດໃຫ້ຊື່ຂອງພະເຢໂຫວາໄດ້ຮັບຄວາມນັບຖື. ຍ້ອນພະເຢຊູເປັນຕົວແທນຂອງພະເຢໂຫວາແລະເຮັດທຸກສິ່ງຕາມທີ່ພະເຢໂຫວາຕ້ອງການ ເພິ່ນຈຶ່ງມີບົດບາດສຳຄັນໃນການເຮັດໃຫ້ຊື່ຂອງພະເຢໂຫວາໄດ້ຮັບຄວາມນັບຖື.
ເປັນໄປໄດ້ແນວໃດທີ່ບາງຄົນອ້າງວ່າເປັນລູກສິດແທ້ຂອງພະເຢຊູ ແຕ່ພັດບໍ່ຮູ້ຊື່ຂອງພະເຢໂຫວາແລະບໍ່ໄດ້ໃຊ້ຊື່ນັ້ນ?
8. ລູກສິດຂອງພະເຢຊູທຸກຄົນຕ້ອງຍອມຮັບເລື່ອງຫຍັງ?
8 ຄລິດສະຕຽນທຸກຄົນຕ້ອງຍອມຮັບວ່າພະເຢໂຫວາເປັນຜູ້ຊ່ວຍໃຫ້ລອດ. ຄືກັບພະເຢຊູ ເຂົາເຈົ້າຈະຖືກເອີ້ນຕາມຊື່ຂອງພະເຢໂຫວາ. (ຢຮ. 17:3) ນອກຈາກຍອມຮັບວ່າພະເຢໂຫວາເປັນຄວາມລອດແລ້ວ ເຂົາເຈົ້າຍັງຕ້ອງເຂົ້າໃຈວ່າການເຮັດໃຫ້ຊື່ຂອງພະເຢໂຫວາໄດ້ຮັບຄວາມນັບຖືເປັນເລື່ອງສຳຄັນຫຼາຍແທ້ໆ. ເຂົາເຈົ້າຕ້ອງເຮັດແບບນີ້ເພື່ອຈະໄດ້ຮັບການຊ່ວຍໃຫ້ລອດ. (ກຈກ. 2:21, 22) ລູກສິດທີ່ສັດຊື່ຂອງພະເຢຊູທຸກຄົນຕ້ອງຮຽນຮູ້ກ່ຽວກັບພະເຢໂຫວາແລະພະເຢຊູ. ຍ້ອນແນວນີ້ພະເຢຊູຈຶ່ງຈົບຄຳອະທິດຖານຂອງເພິ່ນທີ່ຂຽນໄວ້ໃນໂຢຮັນບົດ 17 ດ້ວຍຄຳເວົ້າທີ່ວ່າ: “ລູກເຮັດໃຫ້ເຂົາເຈົ້າຮູ້ຈັກຊື່ຂອງພໍ່ແລ້ວ ແລະຈະເຮັດໃຫ້ເຂົາເຈົ້າຮູ້ຈັກຕໍ່ໆໄປອີກ ເພື່ອເຂົາເຈົ້າຈະຮັກຄົນອື່ນຄືກັບທີ່ພໍ່ຮັກລູກ ແລະລູກຈະເປັນອັນໜຶ່ງອັນດຽວກັບເຂົາເຈົ້າ.”—ຢຮ. 17:26
“ເຈົ້າເປັນພະຍານຂອງເຮົາ”
9. ເຮົາຈະສະແດງໃຫ້ເຫັນແນວໃດວ່າຊື່ຂອງພະເຢໂຫວາສຳຄັນຕໍ່ເຮົາ?
9 ຄືກັບທີ່ເຮົາໄດ້ຮຽນມາແລ້ວ ລູກສິດແທ້ທຸກຄົນຂອງພະເຢຊູຕ້ອງສົນໃຈໃນການເຮັດໃຫ້ຊື່ຂອງພະເຢໂຫວາໄດ້ຮັບຄວາມນັບຖື. (ມທ. 6:9, 10) ເຮົາຕ້ອງຖືວ່າຊື່ຂອງພະເຢໂຫວາເປັນສິ່ງສຳຄັນທີ່ສຸດ ແລະເຮົາຕ້ອງສະແດງໃຫ້ເຫັນວ່າເຮົາຮູ້ສຶກແບບນັ້ນ. ແຕ່ເຮົາຈະເຮັດແນວໃດເພື່ອມີສ່ວນໃນການເຮັດໃຫ້ຊື່ຂອງພະເຢໂຫວາໄດ້ຮັບຄວາມນັບຖື ແລະພິສູດວ່າສິ່ງທີ່ຊາຕານໃສ່ຮ້າຍພະເຢໂຫວາບໍ່ແມ່ນຄວາມຈິງ?
10. ເອຊາຢາບົດ 42 ຫາ 44 ເວົ້າເຖິງເລື່ອງຫຍັງ? (ເອຊາຢາ 43:9; 44:7-9) (ເບິ່ງຮູບນຳ)
10 ໃນເອຊາຢາບົດ 42 ຫາ 44 ເວົ້າເຖິງສິ່ງທີ່ເຮົາເຮັດໄດ້ເພື່ອເຮັດໃຫ້ຊື່ຂອງພະເຢໂຫວາໄດ້ຮັບຄວາມນັບຖື. ໃນບົດເຫຼົ່ານີ້ເວົ້າຄືກັບວ່າກຳລັງມີການພິຈາລະນາຄະດີໃນສານກ່ຽວກັບເລື່ອງທີ່ວ່າໃຜເປັນພະເຈົ້າທ່ຽງແທ້. ພະເຢໂຫວາທ້າພວກພະເຈົ້າຕ່າງໆໃຫ້ອອກມາພິສູດວ່າເຂົາເຈົ້າເປັນພະເຈົ້າທ່ຽງແທ້ບໍ ແລະເພິ່ນຍັງໃຫ້ພວກພະເຈົ້າເຫຼົ່ານັ້ນເອົາພະຍານມາພິສູດປະເດັນນີ້ນຳ ແຕ່ບໍ່ມີໃຜເຮັດໄດ້ເລີຍ.—ອ່ານເອຊາຢາ 43:9; 44:7-9
ເຮົາສະແດງໃຫ້ເຫັນໃນຫຼາຍໆທາງວ່າເຮົາເປັນພະຍານຂອງພະເຢໂຫວາ (ເບິ່ງຂໍ້ 10-11)
11. ໃນເອຊາຢາ 43:10-12 ພະເຢໂຫວາເວົ້າຫຍັງກັບຜູ້ຮັບໃຊ້ຂອງເພິ່ນ?
11 ອ່ານເອຊາຢາ 43:10-12. ພະເຢໂຫວາເວົ້າກັບຜູ້ຮັບໃຊ້ຂອງເພິ່ນວ່າ: “ເຈົ້າເປັນພະຍານຂອງເຮົາ. . . . ແລະເຮົາເປັນພະເຈົ້າທ່ຽງແທ້.” ພະເຢໂຫວາໃຫ້ເຂົາເຈົ້າຕອບຄຳຖາມທີ່ວ່າ: “ມີພະເຈົ້າອື່ນບໍນອກຈາກເຮົາ?” (ອຊຢ. 44:8) ເຮົາໄດ້ຮັບກຽດຍິ່ງໃຫຍ່ທີ່ຈະຕອບຄຳຖາມນັ້ນ. ສິ່ງທີ່ເຮົາເວົ້າແລະເຮັດພິສູດວ່າພະເຢໂຫວາເປັນພະເຈົ້າທ່ຽງແທ້ ແລະຊື່ຂອງເພິ່ນຍິ່ງໃຫຍ່ທີ່ສຸດ. ໃນການໃຊ້ຊີວິດຂອງເຮົາ ເຮົາເຮັດໃຫ້ເຫັນວ່າເຮົາຮັກພະເຢໂຫວາແທ້ໆແລະພັກດີຕໍ່ເພິ່ນເຖິງວ່າຊາຕານພະຍາຍາມເຮັດໃຫ້ເຮົາເຊົາເຮັດແບບນັ້ນ. ເມື່ອເຮົາໃຊ້ຊີວິດຈັ່ງຊີ້ ເຮົາກໍມີໂອກາດເຮັດໃຫ້ຊື່ຂອງພະເຢໂຫວາໄດ້ຮັບຄວາມນັບຖື.
12. ຄຳພະຍາກອນໃນເອຊາຢາ 40:3, 5 ເກີດຂຶ້ນແທ້ແນວໃດ?
12 ເມື່ອເຮົາເຮັດໃຫ້ຊື່ຂອງພະເຢໂຫວາຫຼືຊື່ສຽງຂອງເພິ່ນໄດ້ຮັບຄວາມນັບຖື ເຮົາກໍກຳລັງຮຽນແບບພະເຢຊູ. ເອຊາຢາຍັງບອກລ່ວງໜ້າວ່າຈະມີຜູ້ໜຶ່ງ “ຖາງ (ຫຼື “ກຽມ”, ໄຂເງື່ອນ) ທາງຂອງພະເຢໂຫວາໃຫ້ກ້ຽງ.” (ອຊຢ. 40:3) ເລື່ອງນີ້ເກີດຂຶ້ນແທ້ແນວໃດ? ໂຢຮັນຜູ້ໃຫ້ບັບເຕມາກຽມທາງໄວ້ສຳລັບພະເຢຊູ ແຕ່ທີ່ຈິງແລ້ວເປັນການກຽມທາງໄວ້ສຳລັບພະເຢໂຫວາ ຍ້ອນພະເຢຊູມາໂລກນີ້ໃນນາມຂອງພະເຢໂຫວາແລະເວົ້າແທນພະເຢໂຫວາ. (ມທ. 3:3; ມຣກ. 1:2-4; ລກ. 3:3-6) ຄຳພະຍາກອນດຽວກັນນີ້ເວົ້າວ່າ: “ພະເຢໂຫວາຈະເຮັດໃຫ້ເຫັນຄວາມຍິ່ງໃຫຍ່ຂອງເພິ່ນ.” (ອຊຢ. 40:5) ເປັນແບບນັ້ນໄດ້ແນວໃດ? ຕອນທີ່ພະເຢຊູຢູ່ໂລກນີ້ ເພິ່ນສະທ້ອນໃຫ້ເຫັນພະເຢໂຫວາໄດ້ຢ່າງສົມບູນແບບຈົນເປັນຄືກັບວ່າພະເຢໂຫວາມາໂລກນີ້ເອງ.—ຢຮ. 12:45
13. ເຮົາຈະຮຽນແບບພະເຢຊູໄດ້ແນວໃດ?
13 ຄືກັບພະເຢຊູ ເຮົາກໍເປັນພະຍານຂອງພະເຢໂຫວາ. ເຮົາໃຊ້ຊື່ຂອງພະເຢໂຫວາແລະບອກທຸກຄົນທີ່ເຮົາເຈິໃຫ້ຮູ້ກ່ຽວກັບສິ່ງດີໆທີ່ເພິ່ນເຮັດ. ແຕ່ເພື່ອຈະເປັນພະຍານທີ່ດີຂອງພະເຢໂຫວາ ເຮົາຍັງຕ້ອງບອກໃຫ້ຄົນຮູ້ກ່ຽວກັບທຸກສິ່ງທີ່ພະເຢຊູໄດ້ເຮັດເພື່ອໃຫ້ຊື່ຂອງພະເຢໂຫວາໄດ້ຮັບຄວາມນັບຖື. (ກຈກ. 1:8) ພະເຢຊູເປັນພະຍານທີ່ສຳຄັນທີ່ສຸດຂອງພະເຢໂຫວາ ແລະເຮົາເຮັດຕາມຕົວຢ່າງຂອງເພິ່ນ. (ພນມ. 1:5) ເຮົາສະແດງໃຫ້ເຫັນແນວໃດອີກວ່າຊື່ຂອງພະເຢໂຫວາສຳຄັນຕໍ່ເຮົາ?
ຊື່ຂອງພະເຢໂຫວາສຳຄັນຕໍ່ເຮົາແນວໃດ?
14. ຕາມເພງສັນລະເສີນ 105:3 ເຮົາຮູ້ສຶກແນວໃດກ່ຽວກັບຊື່ຂອງພະເຢໂຫວາ?
14 ເຮົາພູມໃຈໃນຊື່ຂອງພະເຢໂຫວາ. (ອ່ານເພງສັນລະເສີນ 105:3) ພະເຢໂຫວາດີໃຈຫຼາຍເມື່ອເຮົາອວດກ່ຽວກັບຊື່ຂອງເພິ່ນ. (ຢຣມ. 9:23, 24; 1ກຣ. 1:31; 2ກຣ. 10:17) ເຮົາຮູ້ສຶກເປັນກຽດຫຼາຍທີ່ໄດ້ສັນລະເສີນຊື່ຂອງພະເຢໂຫວາແລະບອກຄົນອື່ນໃຫ້ຮູ້ວ່າທຸກສິ່ງທີ່ເພິ່ນເຮັດແມ່ນຖືກຕ້ອງ. ເຮົາຕ້ອງບໍ່ອາຍທີ່ຈະບອກໝູ່ຢູ່ບ່ອນເຮັດວຽກ ໝູ່ຢູ່ໂຮງຮຽນ ເພື່ອນບ້ານ ແລະຄົນອື່ນໃຫ້ຮູ້ວ່າເຮົາເປັນພະຍານພະເຢໂຫວາ. ຊາຕານຢາກໃຫ້ເຮົາເຊົາເວົ້າໃຫ້ຄົນອື່ນຟັງເລື່ອງຊື່ຂອງພະເຢໂຫວາ. (ຢຣມ. 11:21; ພນມ. 12:17) ທີ່ຈິງ ຊາຕານກັບຜູ້ທີ່ແຜ່ຄຳຕົວະຂອງມັນຢາກໃຫ້ຄົນລືມຊື່ຂອງພະເຢໂຫວາ. (ຢຣມ. 23:26, 27) ແຕ່ຍ້ອນເຮົາຮັກຊື່ຂອງພະເຢໂຫວາ ເຮົາຈຶ່ງມີຄວາມສຸກທີ່ໄດ້ສັນລະເສີນຊື່ນັ້ນ “ໝົດມື້.”—ພສ. 5:11; 89:16
15. ການຮ້ອງອອກຊື່ຂອງພະເຢໂຫວາໝາຍຄວາມວ່າແນວໃດ?
15 ເຮົາຮ້ອງອອກຊື່ຂອງພະເຢໂຫວາຕໍ່ໆໄປ. (ຢອ. 2:32; ຣມ. 10:13, 14) ການຮ້ອງອອກຊື່ຂອງພະເຢໂຫວາບໍ່ໄດ້ໝາຍຄວາມວ່າມີແຕ່ຮູ້ຈັກຊື່ຂອງເພິ່ນແລະໃຊ້ຊື່ນັ້ນເທົ່ານັ້ນ ແຕ່ເຮົາຕ້ອງຮູ້ວ່າພະເຢໂຫວາເປັນພະເຈົ້າທີ່ມີຄວາມຮູ້ສຶກແລະມີຄຸນລັກສະນະຕ່າງໆທີ່ດີ ແລະເຮົາສາມາດມີສາຍສຳພັນກັບເພິ່ນໄດ້. ເຮົາຮຽນຮູ້ທີ່ຈະໄວ້ວາງໃຈເພິ່ນແລະຂໍຄວາມຊ່ວຍເຫຼືອແລະການຊີ້ນຳຈາກເພິ່ນ. (ພສ. 20:7; 99:6; 116:4; 145:18) ການຮ້ອງອອກຊື່ຂອງພະເຢໂຫວາຍັງໝາຍຄວາມວ່າເຮົາບອກຄົນອື່ນໃຫ້ຮູ້ວ່າເພິ່ນຊື່ຫຍັງແລະເພິ່ນມີຄຸນລັກສະນະທີ່ດີຫຍັງແດ່. ເມື່ອເຮັດແບບນີ້ເຮົາກໍຊ່ວຍເຂົາເຈົ້າໃຫ້ກັບໃຈແລະປ່ຽນແປງໂຕເອງເພື່ອພະເຢໂຫວາຈະພໍໃຈເຂົາເຈົ້າ ແລະເຂົາເຈົ້າຈະໄດ້ຮັບການຊ່ວຍໃຫ້ລອດ.—ອຊຢ. 12:4; ກຈກ. 2:21, 38
16. ເຮົາພິສູດໃຫ້ເຫັນແນວໃດວ່າຊາຕານເວົ້າຕົວະ?
16 ເຮົາຍອມເຈິຄວາມລຳບາກເພື່ອຊື່ຂອງພະເຢໂຫວາ. (ຢກບ. 5:10, 11) ເມື່ອເຮົາຮັກສາຄວາມສັດຊື່ຕໍ່ພະເຢໂຫວາຕອນທີ່ເຮົາເຈິຄວາມລຳບາກ ເຮົາກໍພິສູດວ່າຊາຕານເວົ້າຕົວະ. ໃນສະໄໝຂອງໂຢບ ຊາຕານກ່າວຫາຜູ້ຮັບໃຊ້ຂອງພະເຢໂຫວາວ່າ: “ຄົນໆໜຶ່ງຈະຍອມເສຍທຸກສິ່ງທຸກຢ່າງເພື່ອແລກກັບຊີວິດຂອງໂຕເອງ.” (ໂຢບ 2:4) ຊາຕານເວົ້າວ່າຄົນເຮົາຈະຮັບໃຊ້ພະເຢໂຫວາຕອນທີ່ສະດວກສະບາຍເທົ່ານັ້ນ ແຕ່ຖ້າເຈິບັນຫາເຂົາເຈົ້າກໍຈະປະຖິ້ມພະເຢໂຫວາ. ໂຢບໄດ້ພິສູດໃຫ້ເຫັນວ່າສິ່ງທີ່ຊາຕານເວົ້າບໍ່ແມ່ນຄວາມຈິງ. ໃນທຸກມື້ນີ້ ເຮົາກໍມີໂອກາດທີ່ຈະພິສູດໃຫ້ເຫັນໄດ້ຄືກັນວ່າເມື່ອເຈິບັນຫາໃນຊີວິດ ຫຼືເມື່ອຊາຕານພະຍາຍາມເຮັດໃຫ້ເຮົາທໍ້ໃຈ ເຮົາຈະບໍ່ມີທາງເຊົາຮັບໃຊ້ພະເຢໂຫວາ. ເຮົາໝັ້ນໃຈເຕັມທີວ່າພະເຢໂຫວາຈະເບິ່ງແຍງເຮົາຕໍ່ໆໄປເພື່ອເຫັນແກ່ຊື່ຂອງເພິ່ນ.—ຢຮ. 17:11
17. ຕາມ 1 ເປໂຕ 2:12 ເຮົາສາມາດສັນລະເສີນພະເຢໂຫວາໂດຍທາງໃດອີກ?
17 ເຮົາສະແດງຄວາມນັບຖືຕໍ່ຊື່ຂອງພະເຢໂຫວາ. (ສພສ. 30:9; ຢຣມ. 7:8-11) ຍ້ອນເຮົາເປັນພະຍານຂອງພະເຢໂຫວາ ສິ່ງທີ່ເຮົາເຮັດສາມາດເຮັດໃຫ້ຊື່ຂອງເພິ່ນໄດ້ຮັບຄຳສັນລະເສີນຫຼືຖືກຕຳໜິກໍໄດ້. (ອ່ານ 1 ເປໂຕ 2:12) ສະນັ້ນ ເຮົາຢາກເຮັດທຸກສິ່ງທີ່ເຮັດໄດ້ເພື່ອສັນລະເສີນພະເຢໂຫວາໂດຍທາງຄຳເວົ້າແລະການກະທຳຂອງເຮົາ. ເມື່ອເຮັດແບບນີ້ ເຮົາຈະເຮັດໃຫ້ຊື່ຂອງພະເຢໂຫວາໄດ້ຮັບຄຳສັນລະເສີນຕາມທີ່ມະນຸດບໍ່ສົມບູນແບບສາມາດເຮັດໄດ້.
18. ມີວິທີໃດອີກທີ່ເຮົາພິສູດໃຫ້ເຫັນວ່າຊື່ຂອງພະເຢໂຫວາສຳຄັນຕໍ່ເຮົາ? (ເບິ່ງໄຂເງື່ອນນຳ)
18 ເຮົາເປັນຫ່ວງຊື່ຂອງພະເຢໂຫວາຫຼາຍກວ່າຊື່ສຽງຂອງໂຕເອງ. (ພສ. 138:2) ເປັນຫຍັງເລື່ອງນີ້ຈຶ່ງສຳຄັນຫຼາຍ? ຍ້ອນວ່າເມື່ອເຮົາເຮັດສິ່ງທີ່ເຮັດໃຫ້ພະເຢໂຫວາພໍໃຈ ຫຼາຍເທື່ອຄົນອື່ນອາດຈະບໍ່ມັກແລະອາດເວົ້າແນວບໍ່ດີໃຫ້ເຮົາ.a ຕອນທີ່ພະເຢຊູຕາຍ ຄົນເບິ່ງວ່າເພິ່ນເປັນຜູ້ທີ່ເຮັດຜິດຮ້າຍແຮງແລະເຂົາເຈົ້າເວົ້າດູຖູກເພິ່ນ ແຕ່ພະເຢຊູກໍຍອມຕາຍແບບນັ້ນເພື່ອເຮັດໃຫ້ຊື່ຂອງພະເຢໂຫວາໄດ້ຮັບຄຳສັນລະເສີນ. ພະເຢຊູຍອມເຈິກັບຄວາມອັບອາຍແລະບໍ່ໄດ້ເປັນຫ່ວງຫຼາຍເກີນໄປວ່າຄົນອື່ນຄິດແນວໃດກ່ຽວກັບເພິ່ນ. (ຮຣ. 12:2-4) ເພິ່ນສົນໃຈທີ່ຈະເຮັດຕາມທີ່ພະເຢໂຫວາຕ້ອງການ.—ມທ. 26:39
19. ເຈົ້າຮູ້ສຶກແນວໃດຕໍ່ກັບຊື່ຂອງພະເຢໂຫວາ ແລະຍ້ອນຫຍັງຈຶ່ງຮູ້ສຶກແບບນັ້ນ?
19 ເຮົາພູມໃຈທີ່ໄດ້ຮັບໃຊ້ພະເຢໂຫວາແລະຮູ້ສຶກເປັນກຽດທີ່ຖືກເອີ້ນວ່າເປັນພະຍານພະເຢໂຫວາ. ຍ້ອນແນວນີ້ ເຮົາຈະສັນລະເສີນເພິ່ນຕໍ່ໆໄປເຖິງວ່າຄົນອື່ນເວົ້າໃຫ້ເຮົາກໍຕາມ. ຊື່ຂອງພະເຢໂຫວາສຳຄັນຕໍ່ເຮົາຫຼາຍກວ່າຊື່ສຽງຂອງເຮົາເອງ. ສະນັ້ນ ຂໍໃຫ້ເຮົາຕັ້ງໃຈທີ່ຈະສັນລະເສີນຊື່ຂອງພະເຢໂຫວາຕໍ່ໆໄປເຖິງວ່າຊາຕານພະຍາຍາມເຮັດໃຫ້ເຮົາເຊົາເຮັດແບບນັ້ນ. ເມື່ອເຮົາຕັ້ງໃຈເຮັດຈັ່ງຊີ້ ເຮົາຈະພິສູດໃຫ້ເຫັນວ່າຊື່ຂອງພະເຢໂຫວາສຳຄັນທີ່ສຸດຕໍ່ເຮົາຄືກັບທີ່ສຳຄັນຕໍ່ພະເຢຊູ.
ເພງທີ 10 ສັນລະເສີນເຢໂຫວາພະເຈົ້າຂອງພວກເຮົາ!
a ໂຢບທີ່ເປັນຄົນສັດຊື່ເລີ່ມຄິດເຖິງໂຕເອງຫຼາຍໂພດວ່າຄົນອື່ນຈະເບິ່ງລາວແນວໃດຕອນທີ່ໝູ່ 3 ຄົນເວົ້າວ່າລາວຕ້ອງເຮັດຜິດບາງຢ່າງ. ທຳອິດ ຕອນທີ່ລູກຂອງໂຢບຕາຍແລະລາວສູນເສຍຊັບສິນທັງໝົດ “ລາວກໍບໍ່ໄດ້ເຮັດຜິດ ແລະບໍ່ໄດ້ເວົ້າວ່າພະເຈົ້າເຮັດສິ່ງທີ່ບໍ່ຖືກຕ້ອງ.” (ໂຢບ 1:22; 2:10) ແຕ່ເມື່ອໂຢບຖືກກ່າວຫາແບບຜິດໆ ລາວຈຶ່ງ “ເວົ້າອອກມາແບບບໍ່ຄິດ.” ໂຢບໃຫ້ການປົກປ້ອງຊື່ສຽງຂອງໂຕເອງສຳຄັນກວ່າການເຮັດໃຫ້ຊື່ຂອງພະເຢໂຫວາໄດ້ຮັບຄວາມນັບຖື.—ໂຢບ 6:3; 13:4, 5; 32:2; 34:5