Ani Ya Ɣɛna Nu Maazu Vɛtɛ Su, Ɣaa Ɓaa Ga Kuuzu Nɛɛ Ɣɛ E Ya

1-2. Jehova na ki-gaa-ziɛi ɣa ga zɛɓɛ e vile niitiɛ va ta ta numaitiɛ maazu vɛtɛ? (Proverbs 19:17) (Wɛlɛ ɓalaa footeitiɛ va.)

DE ƔAA yɔwɔ̃i nii e Korea daa ga Jin-yeol, nii ɣa e boni: “Ga ŋazai ge kɛɛ sa kii-ma ga kwena 32. Tɔwɔ, na ɣa ge vɛɛ ɓɔsu ba kwena dooluo wuuzu. Ŋazai ɣa zeeɓɛzu ga ʋike. Seeɓɛi kɛɛ na ɓaavɛ ga e ziɛ. Wõila ɣa ɓɔɔ zeea ŋazai ʋaa ma. Ga ɣɛna ɓɔsu ba na ɣa kuuwu nɛɛ. Betee wui sale lii ɣɛɛ veaitiɛ te fea, towa ya ŋii ga kpidi nɛpɛ. Ga la koba, na ɣa ɣɛɛna ga ɣii yee zo ge ŋii.”

² Ya ɓalaa ya nui ta maazu vɛtɛ su? E ɣeea ve, e lee ve, e ŋazai ve, e wɔɔ nu ve ɔɔ ya ziɛ-pululii ta ve? Ani vele ɣa na e la, e wuuzu nɛɛvɛ ga e ɓɔ manui va. Zaɓui ɣa ga wõila ɣa e ya faa ma. Ya ɣɛna ɓɔsu ya numaitiɛ va ya ɣɛ dɛɛzu ga wõila ɣa e ya Jehova ʋaa ma. (1 Tem. 5:4, 8; Jĩi 1:27) Na ɓalaa ɣɛɛvɛ ya leve faa ɓaa tamaa zu ga numaa tɛ lɛ faa wɛ̃ɛga ɔ vile ba. Tanisu ya ɣɛ ʋɔlɔ ɣi-gaa-ziɛzu ga ya nɔ ɣa e laa-nɔwɔ-wosu. Numaa ta e vɛtɛ yiɛ ŋɛɛ, kɛ ya ɣɛna ŋada ya gila yiɛ kpee-loo. (Ps. 6:6) Velei ɓalaa numaa tɛ lɛ faa ɓaagitiɛ wɛ̃ni la e levesu su, Jehova kwɛ̃ni. (Wɛlɛ ɓalaa Exodus 3:7.) E ɣaazu ma yiɛi ɓɔga niitiɛ ɓɔgapɛ ya kɛ, te ʋize wogɛ Jehova ɣaazu. (Ps. 56:8; 126:5) E niitiɛ ɓɔgapɛ kwɛ̃ni ya kɛ ga e ɓɔ ya wõila veaitiɛ va. E bogɛ ga niitiɛ ɓɔgapɛ e kɛɛzu ya numaitiɛ vɛ, ya kɛɛzu bɛ. Na ɣa ɣɛɛna tɔ vaazu tuuyiɛ loozu e ma.—Proverbs 19:17 lodo.

3. Faa ɓaagi taniga ta ga zɛɓɛ Eeɓɔlɔhɛ̃ɛ ɓɔga Salɔ te leveni su tei te ɣɛni Terah maazu vɛtɛ su?

³ Po-kɔ̃ɔ-ma lamaa ɣa Gala Kɔlɔi zu e vile numaa taniga va te ta numaitiɛ maazu vɛtɛni. De ɣi-gaa-ziɛ Eeɓɔlɔhɛ̃ɛ ɓɔga Salɔ ta wɔ-kɔ̃ɔ-mai ma. Tei te wuloni tai nii zu daa ga Ur, ɣeeta Eeɓɔlɔhɛ̃ɛ keea Terah ɣɛni sa ga kwena 200. Kɛ na ɓalaa ɣɛɛvɛ, ta tiɛni te liini. Te ziɛni folo lamaa tɔ vɛɛ ziiti zu Haran. (Gen. 11:31, 32) Ɓɔɔɓɔɔsu, wõila ɣɛɛni Salɔ ɓɔga Eeɓɔlɔhɛ̃ɛ ya Terah ʋaa ma. Kɛ, ɣi-gaa-ziɛ nɔ velei na ɓai e ɣɛni la ga te ɓɔ ba siɛi na ma. Ɣeeta, te ɣɛni soi ɔɔ suoi nii maazu daa ga keeamɔ. Na ɣa ɣɛɛna ɣeeta na ɓaani Terah yee ma tei pɔlɔ-zaɣagɛi e ɣɛni. Tanisu Eeɓɔlɔhɛ̃ɛ ɓɔga Salɔ tɔ ɓɔlɔ ga ʋike. Na ɓalaa ɣɛɛvɛ Jehova gaa-ɓaa ʋeeni te ya ga te na ɣɛ. E ɣɛ velei nɔ Jehova ɓɔni la Eeɓɔlɔhɛ̃ɛ ɓɔga Salɔ va, vele ɣa na nɔ e vaazu ɓɔsu la e va.—Ps. 55:22.

4. Zɛɓɛi de vaazu yɛpɛzu e vile ba kɔlɔ zɛvɛi nii zu?

⁴ Kuuzu nɛɛ ɣa ɓɔ e va ga e yii-lɔ ani ya ga nu maazu vɛtɛ nu. (Prov. 15:13) Nui kuuzu nɛɛ zeea, towa yii-lɔ faa nɛpɛ su. (Jĩi 1:2, 3) Ya kuuzu nɛɛ na maa zɔlɔwo ɣɛ le? Pele gila ka ga e yee-la Jehova ma yiɛ feli. Na ɣa ɣɛɛna, yiɛ gaa-zaɣa-kɛ ga e ɓɔ e va e ɣi-gaa-ziɛ ga pagɔ. Kɔlɔ zɛvɛi nii zu, da vaazu yɛpɛzu e vile velei va nu maazu vɛtɛ nu ɣa ɣɛɛ la ga kuuzu nɛɛ nu wɔ. Da vaazu yɛpɛzu wɔnɔ e vile velei va numaa ɓalaga ta ɓɔ la te va. Kɛ a de yɛpɛ dɛ e vile zaɓui va e kɛɛ maa nɛɛ nu maazu vɛtɛ nui ɣaa-ɓaa ga kuuzu nɛɛ ɣɛ zeea. Da yɛpɛ wɔnɔ e vile faa ɓaagi taniga va ya kuuzu nɛɛ nii wulo te ya.

ANI YA NU MAAZU VƐTƐSU NA ƔA FAA VƐƐ ƔƐ LE YA WUUZU NƐƐ VA

5. Zɛɓɛi e kɛɛ maa nɛɛ kuuzu nɛɛ ɣɛ niitiɛ ya ta nu maazu vɛtɛ?

⁵ Ani kuuzu nɛɛ lɛ niitiɛ ya te ɣaa ɓaazu ta numaitiɛ ma, na ɣa kɛ te yii zuuli na ɣa ɣɛɛna te ɓɔlɔ kaʋile. (Prov. 24:10) Tɔwɔ ta ɓɔlɔna, na ɣa ɓaa ga te yɛpɛ ga pagɔ ɔ nɔ ɣɛ ga te ɓɔ ta numaitiɛ va. Faa taniga ta ga zɛɓɛ ya kɛ kuuzu nɛɛ lɛ ɣɛɛ niitiɛ ya te ɣaa ɓaazu ta numaitiɛ ma?

6. Zɛɓɛi e kɛɛ taitiɛ ta ɓɔ ta numaitiɛ va ta ɓɔlɔ ga ʋike?

⁶ Taitiɛ te ɣaa ɓaazu ta numaitiɛ ma ta ɓɔlɔ ga ʋike. De ɣaa yɔwɔ̃i nii daa ga Leah, nii ɣa e boga: “Ɛ lɛ ga soloya ga e nu maazu vɛtɛ, towa e ɓɔlɔ ga ʋikee. Towa ɣɛna ga kpɔkɔ, gaa-ɓaa nɛpɛ lɛ ɣɛɛ sa zeea. Tanisu gaa-ɓaa lɛ ɣɛɛ zeea ga gɔ keela woitiɛ ɣaa wote ya va na foũgi ma.” Numaa taniga na ɣa ɓaa ga te siɛ siɣi ba ga te loowo. De ɣaa yɔwɔ̃i daa ga Inés, nii ɣa e boga: “Na ɣaa-ɓaa ɓɔɔ ga ge ŋii. Kpidi lamaa ɣalava felegɔi ɣa levena ga wuziɣi ga ge ɓɔ dee-mɔɔ va. E wulo na wulu, kwena tamaa wuuzu ga pɔɔ nu gɛ lɛ dɛ siɛ siɣini ba ga ge li siɛ ma ga ge loowo.” Niitiɛ ta numaa maazu vɛtɛ te taniga na ɣa ɓaa ga te vɛɛ ta siɛ-pululitiɛ va ga te ɣaa-wo. Na ɣa ɓaa wɔnɔ ga te yee zei tii taniga wu Jehova na ɓulugi zu. Zaɓui ɣa ga maa nɛɛ te ta numaitiɛ maazu vɛtɛ. Na ɣa kɛ te yii zuuli, zaɓui ɣa ga niitiɛ ta wõi ga te kɛ tɛ lɛ na ɣɛɛ.

7. Tatiɛ te numaa maazu vɛtɛsu zɛɓɛi e kɛɛ tanisu te yii ɣa ɣɛ zuuli zu?

⁷ Niitiɛ ta numaa maazu vɛtɛ te yii ɣaa zuuli ga ʋike. De ɣaa yɔwɔ̃i daa ga Jessica, nii ɣa e boga: “Na ɓaavɛ ga ge kwɛ̃ɛ vɛ maa nɛɛ ge wɛ̃ɛ na. Ani ga ɣɛna siɛ siɣizu ba ga ge kpalama ʋai ta ɣaa wulo ba na ɣa kɛ ge ɣi-gaa-ziɛ ga, ga sa ɣaazu ɓadosu ɓɔɔ va. Tɔwɔ zii ɣa zuuli. Niitiɛ ta numaa maazu vɛtɛ te yii ɣa zuuli zaɓui ɣa ga tanisu manu lɛ ɣɛɛ wõini ga nii e ɣɛɛzu la. Taniga te yii ɣa zuuli zaɓui ɣa ga ta ɣɛ ɣi-gaa-ziɛ ga tɛ lɛ faa lamaa ɣɛɛzu te wõila nui na vɛ. Na ɓalaa ɣɛɛvɛ numaa taniga te yii ɣa zuuli zaɓui ɣa ga ta fai ta wo nui nii ma te maazu vɛtɛsu ga lɛ zolo woni. (JĩI 3:2) Numaa taniga te yii ɣa zuuli wɔnɔ ani ta wɛlɛna ta wõila nui na seeɓɛi va su yiɛ wɔɔlɔ. De ɣaa yɔwɔ̃i nii daa ga Barbara, nii ɣa e boga: “Nii ɓɔɔ e zii zuulini e ɣɛni ga, giɛ wɛlɛ nui nii va wõila zeea faa ma na seeɓɛi zu yiɛ wɔɔlɔ.”

8. Ani da ɣɛna niitiɛ mama su te numaa maazu vɛtɛ su, na ɣa ɓɔ te va ɣɛ le?

⁸ Niitiɛ ta numaa maazu vɛtɛ taniga ta ɣi-gaa-ziɛ ga numaa tɛ lɛ yee zeizu nii wu te kɛɛzu. Zɛɓɛ ʋaa ma? Zaɓui ɣa ga na ɣa ɓaa ga numaa te te mama tiitiɛ ʋaa ma te kɛɛzu. Ani da te mama na, na ɣa te wuuzu nɛɛ siɛ tamaa wuuzu. (1 Tɛsɛ. 5:18) De ɣaa yɔwɔ̃i nii daa ga Melissa, nii ɣa e boga: “Tanisu zii zuulii ɣa kɛ ge kpee-loo ga ʋikee. Kɛ taitiɛ ge te maazu vɛtɛsu ta ɣɛna ma, ‘e mama niitiɛ ɓɔgapɛ faa ma e kɛɛzu ge vɛ,’ na ɣa kuuzu nɛɛ! Woi natiɛ ta ɓɔ ba te gaa-ɓaa ʋe zeea na wulu ʋoloi ge zoo ge tii ɣɛ ga ge te maazu vɛtɛ.” De ɣaa yɔwɔ̃i daa ga Ahmadu, e yɛpɛni e vile velei va mama feeai ɓɔni la ba. Ta ŋazai ta ɣaa ɓaazu ta nui ta ma ʋele-ʋele seeɓɛi ba. Nii ɣa e boga: “Velei ɓalaa ɛ lɛ niitiɛ ɓɔgapɛ ɣaa ɣazu ge kɛɛzu ga ge maazu vɛtɛ, ya mama feena ge vɛ ge wuuzu ɣa nɛɛ ɓɔɔ. Ɔɔ ani ya ponɛ na kɔlɔi ta ma ga ‘wõila ɣa ɓɔɔ zeea wo ʋaa ma.’”

NIITIƐ YA KƐ GA KUUZU NƐƐ ƔƐ E YA

9. Nui ya numaa maazu vɛtɛ, towa leve ɣɛ le e dɛ ga e kwɛ̃ni vɛ ya wɛ̃ɛna?

⁹ Kwɛ̃ɛ nii ya ziɛ bu. (Prov. 11:2) De ɓɔgapɛ gaa-ɓaa lɛ de ya ga de niitiɛ ɓɔgapɛ kɛ da wõi ga de kɛ. Na ma, maa nɛɛ de deʋe wo e vile niitiɛ va da ziɛ bu ga de kɛ ta niitiɛ dɛ lɛ zooga dɔ kɛ. Tɔwɔ na ZOLOWOGƐ! Na ɣa dɛ ga e kwɛ̃ni nii ya ziɛ bu ga e kɛ. Ani numaa te wõini te ɓɔ e va yee zei bu. De ɣaa yɔwɔ̃i nii daa ga Jay, nii ɣa e boga: “Foloi wuuzu nii da ziɛ bu ga de kɛ na nɔ ɣa maa nɛɛ de kɛ. Ani da niitiɛ kwɛ̃ɛna da ziɛ bu ga de kɛ na ɣa ɓɔ de va kuuzu nɛɛ ɣɛ de ya.”

10. Zɛɓɛi e kɛɛ e ga faa ɓi ga nui e ga nu maazu vɛtɛ nu, maa nɛɛ e ɣɛ ga kele-ɣele nu? (Proverbs 19:11)

¹⁰ Ɣɛ ga kele-ɣele nu. (Proverbs 19:11 lodo.) Ani ya ɣɛna ga kele-ɣele nu ɛ lɛ yii ɣaa-wãla ani numaa ta ŋɛɛ wulosu ʋaa ɣɛɛna ga yiɛ. Ani nu ɣa ɣɛna luɓozu ga taɓala nui e ga kele-ɣele nu towa ɣaa-ɓaa ga e zaɓui wɛ̃ɛ e kɛɛ manui yiɛ luɓo ɣa na. Ɓɔɔɓɔɔsu, seeɓɛi taniga ta kɛ numaa tiɛ luɓo ga taɓala. (Eccl. 7:7) Ma wo-kɔ̃ɔ-mai ta ɣa ga, nui ta ɣa ɣɛ na tuɓo vele vagɛi ɔɔ na fai lɛ ɓaani, kɛ seeɓɛi ɣa kɛ manu ɣɛ ga kpɔi nu ɔɔ ŋakpi wɔɔ nu. Na ɣa ɣɛɛna manui na fai ɣa ɓaa ɔɔ na ɓaa ga e manu yii la. Ani ya ɓɔsu nui ta va na seeɓɛi ɓoeizu da, towa zolowo ani ya ɣaa ɓaana e na seeɓɛi mazii wɛ̃ɛ. Ani ya manui na seeɓɛi mazii wɛ̃ɛna na ɣa ɓɔ e va e kwɛ̃ɛ ga seeɓɛi ɣa e kɛɛzu manui yiɛ luɓo ɣa na, lɛ ga vele ɣa na manui la.—Prov. 14:29.

11. Tatiɛ ta numaa maazu vɛtɛ faa ɓi sɛɓɛi maa nɛɛ te kɛ folo nɛpɛ? (Psalm 132:4, 5)

¹¹ Siɛ siɣi ba ga e ya ziɛ-pului zuɓaa wo yɔɔzu wa Jehova . Tanisu, kɛni ya laa wulo tii taniga ɣɛɛ ʋai zu ga e ɣaazu ɓado faa ɓigi va. (Fel. 1:10) Faa ɓigii nii gila ka ga, yiɛ ya ziɛ-pului zuɓaa wo yɔɔzu wa Jehova. Masagi Deeve Jehova ʋeli ʋai loni faa pɛ tuo. (Psalm 132:4, 5 lodo.) Ya ɓalaa towa ɣɛ ga faa ɓi ani ya siɛ siɣina ba yiɛ Gala Kɔlɔi lodo na ɣa ɣɛɛna yiɛ Gala feli siɛ nɛpɛ. De ɣaa yɔwɔ̃i nii daa ga Elisha, nii ɣa e boni: “Ga kuuzu nɛɛ maa zɔlɔwo ga ɣɛna Gala felizu na ɣa ɣɛɛna giɛ ɣi-gaa-ziɛ gaa nɛkpɛgitiɛ ma te psalms zu. Gala-feliai ɣa ɓɔɔ e vɛɛ ɓɔsu ba na ŋeteai zu. Ga Jehova ʋeli foloi wuuzu ga e ɓɔ ba zii ɣaa lei.”

12. Zɛɓɛi e kɛɛ e ga faa ɓi ga niitiɛ te ga nu maazu vɛtɛ vea maa nɛɛ te siɛ siɣi ba ga te ɓɔɔ maazu vɛtɛ?

¹² Siɛ siɣi ba e faa taniga ɣɛ ga kɔlɔ-suwodo ɣɛ e ya. Taitiɛ tii lamagɛi te ma e ɣɛ velei niitiɛ te la—ta ta numaitiɛ maazu vɛtɛ—tanisu na ɣa ɓaa te yee ma ga te daa-mii-ŋɛni vagɔ mi. Zaɓui ɣa ga siɛ lamaa lɛ ɣɛɛ te ya ga tɔ daa-mii-ŋɛni vagɔ ɓɛtɛ. Ani ya daa-mii-ŋɛni vagɔ miina na ɣa ɣɛɛna yiɛ faa taniga ɣɛ ga e ɓɔ e wɔlɔgi va, na ɣa kɛ yiɛ ɣi-gaa-ziɛ ga pagɔ na ɣa ɣɛɛna e wɔlɔ su wodo. Siɛgi e e ya ɣaa-ɓaa yiɛ daa-mii-ŋɛni vagɔ mi na ɣa ɣɛɛna yiɛ faa taniga ɣɛ ga e ɓɔ e wɔlɔgi va. (Ɛfɛ. 5:15, 16) E wulo na wulu ɣaa-ɓaa yiɛ siɛ tamaa ziɣi ba ga e ŋii ga pagɔ. (Eccl. 4:6) Taitiɛ ta faa wulu ɣaa-ziɛ te bogɛ ga ŋii ɣa kɛ da wũ-kpɔlɔi tii ɣɛ ga pagɔ. Kɔlɔ zɛvɛi nii daa ga “How Sleep Can Affect Stress,” kuloai ɓulugi nii ya ta tili ga Banner Health, e bogɛ ga ani da siɛ siɣina ba diɛ ŋii ga pagɔ, towa kɛ dɛ lɛ ɣi-gaa-ziɛa ga ʋike na ɣa ɣɛɛna de zoo de yii-lɔɔ ani zii zuuli ʋaa ɣa ɣɛɛna ga diɛ. Kɛni wɔnɔ e siɛ siɣi ba e ɣaa-ɓaa ga yiɛ ɣaa-wo. (Eccl. 8:15) De ɣaa yɔwɔ̃i ta yɛpɛvɛ e vile nii va e ɓɔni ba ga kuuzu nɛɛ ɣɛ zeea wɔ. Nii ɣa e boni: “Ani wooza vagɛ, ga ɣaa-ɓaa ɓɔɔ ge wulo ŋeteavɛ ga ge foloi ma ɣaa nɛɛ zo. Folo gila ɣalogi zu, ga siɛ siɣi ba gaa baitiɛ ge ɣaa-wo.”

13. Zɛɓɛi e kɛɛ e ga faa vagɔ ga diɛ ŋɛɛ? (Proverbs 17:22)

¹³ Mɛ lɛ ɣaazu ɣili nɔ wɔ. (Proverbs 17:22 lodo; Eccl. 3:1, 4) Ŋɛɛ ʋai vagɛ de ʋaa ma. Ani ya ɣɛna nu maazu vɛtɛsu, tanisu manui ɣa faa ɣɛ ga yiɛ lɛ vani. Kɛ ani nu ɣa faa yowũ ɣɛɛna ga yiɛ e kɛ ga ŋɛɛ ʋaa na ɣa ɓaa ga e yii ɣaa-wãla ga ʋike. Nui e maazu vɛtɛ su ani wa tɔ wa ɣɛna ŋɛɛzu kii-ma na ɣa kɛ siɛ-pului e wo yɔɔzu suɓaa.

14. Da ɣɛna yɛpɛzu da siɛ-pului ta wɔ, na ɣa ɓɔ de va ɣɛ le?

¹⁴ Yɛpɛ ya ziɛ-pului ta wɔ e lai la. Velei ɓalaa e ɣaa ɓaazu la ga kuuzu nɛɛ ɣɛ e ya, siɛ tamaa e yii ɣa zuuli. Na ma, towa ɣɛ ga faa vagɔ ga e yɛpɛ ya ziɛ-pului ta wɔ e vile fai na va. Ya ziɛ-pului nii lɛ ya ʋaa wo gaa-levea ɔ nɔ ɣɛ ga e yɛpɛ ga yowũa e wɔ. (Prov. 17:17) Towa zolowo ani manui ɣa wuito na e woi ma ɓɔɔ ga pagɔ na ɣa ɣɛɛna e gaa nɛkpɛ woo wo e ma. Ɣeeta na ɣa kɛ e kuuzu nɛɛ maa zɔlɔwo wɔnɔ.—Prov. 12:25.

15. Ani ya ɣɛna ɣi-gaa-ziɛzu ya ɣi-togi ma, towa kuuzu nɛɛ ʋe e ya ɣɛ le?

¹⁵ Nui e maazu vɛtɛ su ɣi-gaa-ziɛ siɛgi ma wa tɔ wo vaazu yɛsu la zuu vagɔi zu. Kwɛ̃ɛ ga nu maazu vɛtɛ lii lei e yɛsu kɛɛzu wɔ. Tii na mazii lei Jehova feeni nu ɓuse ya. (2 Kɔl. 4:16-18) “Zɛʋu ɓɔɔɓɔɔgi” ɣa dɛ naa luo. (1 Tem. 6:19) Ya wõi ga yiɛ yɛpɛ manui wɔ e vile niitiɛ va wo vaazu kɛɛzu zuu vagɔi zu. (Isa. 33:24; 65:21) De ɣaa yɔwɔ̃i nii daa ga Heather, nii ɣa e boga: “Siɛ nɛpɛ nui ge ɓɔsu ba ga bo ma ga su lɛ vaa lebisu, da vaazu seɣe zɔlɔsu kii-ma, diɛ ɓize, na ɣa ɣɛɛna diɛ koli-zoo ziɛ. Da bele ɓɛtɛ, de diɣi-ɣili de wõi la veaitiɛ vɛ ta wuziɣi saa ya. Ga Jehova mama e vile ga ɣi-togi va.”

NUMAA ƁALAGA TA ƁƆ E VA ƔƐ LE?

16. Taitiɛ te da wuuwui zu tiɛ ta numaitiɛ maazu vɛtɛ, da leve ɣɛ le de ɓɔ te va? (Wɛlɛ ɓalaa footei va.)

¹⁶ Ɓɔ niitiɛ va te numaa maazu vɛtɛ su ga te siɛ sɔlɔwo ga te faa ɓalaa kɛ. Daitiɛ te kuuwui zu ta deʋe ga te ɓɔ nui nii va e zeeɓɛzu. Na ɣa kɛ nui nii sa e manui maazu vɛtɛ su e siɛ sɔlɔwo ga e loowo ɔɔ e faa ɓalaa kɛ ɓɔɔ ʋaa ma. (Gal. 6:2) De ɣaa yɔwɔ̃i taniga te deʋe woga e ɓɔ te va te kwɛ̃ɛ nui ta ɓɔ ba dɔwɔi wuuzu. De ɣaa yɔwɔ̃i daa ga Natalya, e ɣaa ɓaazu pɔɔ nu ma mɛlɛ-ŋɛlɛgɛi, nii ɣa e boga: “De ɣaa yɔwɔ̃i ta e ga wuuwui zu towa va folo gila ɔɔ folo felegɔ dɔwɔi zu ga e laali pɔɔ nu ma. Ta li Gala goo wosu vɛ kii-ma, te yɛpɛ, na ɣa ɣɛɛna te wɛlɛ ʋiliogi taniga va kii-ma. Daa-li-mai nii ʋize wogɛ ɓɔɔ pɔɔ nu ɣaazu na ɣa ɣɛɛna towa siɛ fe zeea ga ge kpalama ʋaitiɛ ɣaa wulo ba, ta ɣa ga ge li ge wɔwɔ maa ziɛ-ziɛ.” Tanisu ya deʋe ɓalaa ga e li e ŋii na, kɛɛ ʋaa ma nui e maazu vɛtɛgi wosu e siɛ sɔlɔwo ga e ŋii ga pagɔ.

17. Taitiɛ te numaa maazu vɛtɛ su, da ɓɔ te va ɣɛ le da ɣɛna gaalɛ-bai zu?

¹⁷ Taitiɛ te ta numaitiɛ maazu vɛtɛ su, ya ɓɔ te va wa liina gaalɛ-bai zu. Taitiɛ te numaa maazu vɛtɛ su na ɣa ɓaa ga te faa lamaa maa woli da ɣaalɛ-baitiɛ zu, zaɓui ɣa ga ta te wõila veaitiɛ maazu vɛtɛ su. Taitiɛ te kuuwui zu ta deʋe ga te zei te woba siɛ ta ʋaa ma ɔɔ e yɛsu gaalɛ-bai ɓea. Ani nui te ɣaa ɓaazu ma ɛ lɛ wuloa pɛlɛ wu, ya da ɣisu ga e li na pɛlɛi la. Na ɣa ɣɛɛna e vɛɛ e ɣaa yɔwɔ̃itiɛ va fãga wɔlɔi ma ga wo gaalɛ-bai zo nii ya kɛ nui e maazu vɛtɛ su na manui li gaalɛ-bai zu.

18. Zɛɓɛi wɔnɔ da kɛ ga de ɓɔ nui nii va e numaa maazu vɛtɛ su?

¹⁸ Tatitiɛ te ta numaitiɛ maazu vɛtɛ su yiɛ te mama yiɛ Gala feli te ʋaa ma. Siɛ nɛpɛ maa nɛɛ kuuwu wũ-tuo veaitiɛ tiɛ laali niitiɛ ma te ta numaitiɛ maazu vɛtɛ su. (Prov. 27:23) De ɓɔgapɛ de kuuwui zu, maa nɛɛ de ɣaa-ɓaa siɛ nɛpɛ ma diɛ niitiɛ mama te ɣaa ɓaazu ta numaitiɛ ma. Da Jehova ʋeli wɔnɔ ga yiɛ gaa-ɓaa ʋe te ya na ɣa ɣɛɛna kuuzu nɛɛ ɣɛ te ya wɔ.—2 Kɔl. 1:11.

19. Ki-to sɛɓɛi e de ya ŋeteai ʋaa ma?

¹⁹ Su lɛ sa vaa lebisu Jehova de ɣaazu ma-yiɛi ɣaazɔ ɓale de ɣaazu, seeɓɛ ɓɔga saa lɛ ɣɛɛ sa na wɔlɔ-wɔlɔ ta wɔlɔ-wɔlɔ. (Faa. 21:3, 4) “Mɛlɛ-ŋɛlɛ beaitiɛ ta lɛ geezu e ɣɛ dopa.” (Isa. 35:5, 6) Daa-nɔwɔ-wogi pɔlɔ-zaɣa bea ta levesu, e vɛɛ zii zuulii va e niitiɛ va te ɣaa ɓaazu te wõila veai niitiɛ ma te zeeɓɛzu ta faa wɔlɔ-zaɣagi niitiɛ zaama tɛ lɛ vaazu yɛsu te ɣisu. (Isa. 65:17) Velei ɓalaa de na maa kpowũsu la ga ki-togi niitiɛ te leve ma, Jehova lɛ wɔlɔ-wɔlɔ wulu ɣaaʋega de va. Ani da ɣaa ɓaana diɛ yee la Jehova ma ga e gaa-ɓaa ʋe de ya, towa ɓɔ de va ga diɛ zii-lɔɔ wulo na gaa-ɓaa walai zaa-la-zu. Diɛ wɔnɔ ziɛ fai ɣaazɔ wu ta kɛ kuuzu nɛɛ ɣɛ de ya.—Kol. 1:11.