Mu Bonise ku Beya Ba Bañwi mwa Munahano—Kalulo 1

¹ Lw’a taba ku bona ku kondisa lika kwa batu ba Jehova, ko ku tisize palo ye sweli ku ekezeha ya liputeho. Mwa libaka ze ñwi, sihulu mwa mileneñi ye mituna, sineneketo se i beilwe fa miyaho ya Mandu a Mubuso, kuli ka linako ze ñwi ku tokwahala kuli liputeho ze sikai li itusise Ndu ya Mubuso i liñwi. Muinelo w’o u tokwa kuli ku be ni ku beyana mwa munahano kwa neku la ba ba amilwe teñi.

² Puteho ye ñwi ni ye ñwi ye itusisa Ndu ya Mubuso i swanela ku i siya i kenile mi i li mwa muinelo wa ku lukiswa hande kwa neku la mizwale ba ba tatama hamulaho. Lipula li swanelwa ku beiwa hande, libuka lifi kamba lifi fa litafule li swanelwa ku zwisiwa teñi, mi tubongo-bongo twa ka butu tufi kamba tufi to tu siilwe mwa Ndu ya Mubuso tu swanelwa ku nonoyiwa. Mizuzu ya ku patehela teñi i swanelwa ku siiwa i kenile, ka ku ikolwisa kuli mulola, litaulo, ni mapepa li beilwe teñi mi matakala a yumbilwe.

³ Ha ku na ni mukopano o muñwi o’ tomahanyizwe ku kalisa hamulahonyana, ba ba siyezi hamulaho wa mukopano wa makalelo ha ba swaneli ku zina-zina ku si na tokwahalo, ili ku filikanya litukiso kwa neku la mukopano o tatama. Ku ikambota-kambota ko k’u nga nako ye telele ne ku kana kwa tahisa simpiti fa munyako ni ku liyehisa mizwale kwa ku lukisa lika kwa neku la mukopano o tatama. Sibaka sa ku pakica limotikala kwa Ndu ya Mubuso ne si kana si li se si nyinyani, mi ne ku k’a ba sishemo ku funduka ka bubebe ilikuli ba ba t’o kena ba be ni sibaka sa ku pakica teñi. Kwa lineku le liñwi, ba ba fumaneha kwa mukopano o tatama ha ba swaneli ku taha ka ku itahanela hahulu, ili ku tisa simpiti se si s’a tokwahali mwa munyako ni kwa ku pakica limotikala.

⁴ Mwa sibaka m’o liputeho ze sikai li amilwe, ku na ni tokwahalo ye ipitezi ya ku swalisana hahulu mwa ku eza litukiso kwa neku la ku kenisa Ndu ya Mubuso kwa ka viki ni viki. Hañata, liputeho z’a icapa hamulaho wa nako ye lumelelanwi. Puteho ya mina ha i na ni buikalabelo b’o, mu ikolwise kuli ku kenisa ku eziwa ka ku tala ni ka bubebe ilikuli liputeho ze ñwi ze itusisa ndu yeo cwale li si ke z’a ba ni libaka la ku bilaela.

⁵ Ka linako ze ñwi ku na ni tokwahalo ya kuli puteho ye ñwi ni ye ñwi i cince linako za mikopano ya yona, ze cwale inge muta muokameli wa mupotoloho h’a pota. Haiba puteho ye ñwi i amiwa, maeluda ba swanela ku taluseza puteho ye ñwi yeo isali ka bunako ilikuli ba kone ku zibisa bahasanyi ba bona ka bubebe ka mo ku konahalela kaufela. Hape, haiba kezahalo ye ñwi ye lumelelizwe, ye cwale ka Sikolo sa Sebelezo ya Bupaina, mukopano wa maeluda ba mwa mupotoloho, kamba sinawenga, i tomahanyiwa, liputeho ze ñwi ni baokameli ba mupotoloho bafi kamba bafi ba ba amilwe ba swanelwa ku talusezwa ka bunako; kacwalo ha ba na ku tomahanya ku itusisa Ndu ya Mubuso ka nako ye swana.

⁶ Ku na ni palonyana ya mandu a’ itusiswa ki liputeho ze mwa mipotoloho ye fapahana. Ki kwa butokwa kuli baokameli ba maeto ba ba potela mandu ao ba zibisane ka za misipili ye kwapili ye swelwi ku tomahanyiwa. Licinceho za ka ku liyeha kamba but’ata bo buñwi bu kona ku taha muta baokameli ba maeto ba babeli ba tomahanya ku pota mwahal’a viki ye swana.

⁷ Ku beya ba bañwi mwa munahano ka lilato, hamohocwalo ni ku ambolisana ko kunde, ku ezeza cimo litukiso ni ku sebelisana hamoho li k’a tusa mwa ku buluka swalisano ye silikani mwahal’a liputeho mi ku k’a fa buikolwiso bwa kuli “linto kaufela li ezwe ka swanelo, ni ka mulao.”—1 Makor. 14:40.