Ku Itusisa Hande Libuka za Luna za Kale
1 Jehova u lu file sico se si tiile sa kwa moya ka buñata. Buñata bwa sona seo se si bile mwa mufuta wa libuka za makepe a 192 zeo se li hatisizwe mwa lilimo za cwale. Mwahal’a January lu k’a fa buka ifi kamba ifi ya makepe a 192 ka ku swalisana ni zibiso ya se si ka fiwa mwa January. Kana mu na ni ze ñwi za zona libuka zeo kwa ndu z’e sa li mwa muinelo o munde? Kana puteho i na ni ze ñwi mwa pulukelo? Haiba ku cwalo, ne i ka ba nto ye nde kuli mu lundulule litaba ze mwahali ni ku keta lisupo za ku buhisana teñi ze mu kona ku itusisa mwa mutahisezo wa mina.
2 Haiba mu itusisa buka ya “Our Incoming World Government—God’s Kingdom,” ne mu kana mwa kalisa ka ku bulela kuli:
◼ “Bakreste se ba lapelezi ku taha kwa Mubuso wa Mulimu ka lilimo ze bat’o ba ze 2,000. Mu hupula kuli Mubuso u ka ezeza nto mañi mufuta wa mutu? [Mu litele kalabo. Mu apule fa likepe 190, mi mu bale paragilafu 15 ka za limbuyoti ze ñwi ze ka talelezwa mwatas’a puso ya Mubuso.] Buka ye i tolongosha lika ze ka petiwa ki Mubuso mi i talusa ka m’o mina ni balatiwa ba mina mu kona ku fumanela tuso. Ni tabela ku mi siyela kopi ka nubu ya K50.”
3 Haiba mu itusisa buka ya “Is This Life All There Is?,” ne mu kana mwa lika muatumelelo wo:
◼ “Batu ba bañata ba palelwa ku fumana tabo mwa lifasi le kabakala but’ata bo butuna hahulu. Kana mu hupula kuli kwa konahala ku ba ni tabo mwatas’a miinelo ya cwale? [Mu litele kalabo. Mu apule fa likepe 5, paragilafu 2, mi mu ame kwa but’ata bo buñwi bo bu atile bo bu lu tahiseza ku ikalelwa.] Bibele i bonisa ka m’o lu kona ku talimanela ni but’ata b’o mi kwa nalulelule ni ku ikola tabo ye s’a feli mwa lifasi le linca la kozo. [Mu bale Isaya 32:17, 18.] Bibele i fa kelezo y’e nongile luli y’e kona ku lu tusa ku fumana tabo ye tuna ni ku fita mwa bupilo. Buka ye i lundulula yona kelezo yeo ni ku talusa m’o lu kona ku i sebeliseza.”
4 Haiba mu itusisa buka ya “Kozo ni Buiketo za Niti—Mu Ka Li Fumana Cwañi?,” mu kana mwa bata ku lika cwana:
◼ “Mañi ni mañi n’a ka tabela ku pila mwa lifasi m’o ku na ni kozo ni buiketo. Ka bumai, ha lu si ka ipumana kale mwa muinelo o cwalo mwahal’a bupilo bwa luna. Mu hupula kuli lu tokwa ku eza nto mañi ilikuli kozo ni buiketo li be teñi? [Mu litele kalabo.] Mulimu u na ni m’ata a ku tisa kozo fa lifasi-mubu fa, mi u sepisize kuli u ka eza cwalo.” Mu apule fa siswaniso se si fa likepe 98, mi cwale mu bale Mika 4:3, 4. Mu taluse litaba ze ñwi ka za sepo ya Mubuso, mu fe buka ka nubu ya K800, mi mu eze litukiso za musipili wa makutisezo.
5 Ne mu kana mwa iketela ku itusisa broshuwa ya “Kana Mulimu wa L’u Nga Luli Sina Batu ba Butokwa?” Haiba mu itusisa yeo, mu kona ku bulela cwana:
◼ “Batu ba bañata ba makala libaka Mulimu h’a tuhelezi manyando a mañata cwalo mwa lifasi. Bakeñisa kuli ki ya m’ata kaufela, ki kabakalañi h’a sa ezi nto ye ñwi ili ku felisa maswenyeho a luna? Mu ikutwa cwañi ka za seo? [Mu litele kalabo.] Bibele i lu fa tiisezo ya kuli Mulimu h’a si ka lu fulalela.” Mu apule fa likepe 27, paragilafu 22, mi mu bale Samu 37:11, 29. Mu ame kwa siswaniso se si cisehisa se si bonisa lika zeo lu kona ku libelela kwapili. Haiba broshuwa i amuhelwa, mu fe sepiso ya ku kutela teñi ili ku t’o bonisa ka m’o i konwa ku itusisezwa kwa neku la tuto ya Bibele.
6 Lihatiso za luna li susuelize likiti-kiti za batu kuli ba tatubisise Bibele ka tokomelo ye tuna ni ku fita. Litaba ze ba itutile li ba file sepo ka za nako ya kwapili ya tabo. (Samu 146:5) Ki tohonolo ya luna ku ba fa tuso.