Ku Kutaza—Ki Tohonolo ye Tompeha

¹ Bukombwa bwa taba ye nde ki tohonolo ye tompeha yeo Jehova a tahisize ku luna. (Maro. 15:16; 1 Tim. 1:12) Kana kona mo mu b’u ngela? Ku ululuka kwa nako kamba ku sheununwa ki ba bañwi ha ku swanelwi ku tuhelelwa ku fita fa ku nyinyafaza butokwa bwa bona mwa meto a luna. Ku lwala libizo la Mulimu ki tompo ye fiwa fela ku b’a sikai. Lu kona ku hulisa cwañi buitebuho bwa luna kwa neku la tohonolo yeo?

² Ku kutaza lushango lwa Mubuso ha ku lu tahisezi ku latiwa ki lifasi. Ba bañata b’a nga musebezi wa luna ka ku tokwa cisehelo kamba ku s’a tabela. Ba bañwi b’a u sheununa ni ku u lwanisa. Twaniso ye cwalo i kona ku zwelela ku bo lu beleka ni bona, bomuyahwa ni luna, kamba mane lilama za lubasi. Mwa meto a bona ne lu kana lwa bonahala ku yauluka ni bukuba. (Joa. 15:19; 1 Makor. 1:18, 21; 2 Tim. 3:12) Litaluso za bona ze zwafisa li lukisizwe ka mulelo wa ku fokolisa cisehelo ya luna ni ku lu tahiseza ku tepelela kamba ku tuhela tohonolo ya luna y’e li tompo. Mibonelo ya ku ba ni likesha i tahiswa ki Satani, ili y’o a “foufalize kutwisiso ya [ba ba sa lumeli], kuli ba si ke ba bonisezwa liseli la Evangeli.” (2 Makor. 4:4) M’u nga muhato kamukwaufi?

³ Ki kwa butokwa ku beya mwa munahano kuli ku kutaza kwa luna ka za Mubuso ki ona musebezi wa butokwa ka ku fitisisa w’o mañi ni mañi wa luna a kona ku eza kacenu. Lu na ni lushango lo lu punyusa bupilo ili l’o lu sa fumanwi ka linzila lifi kamba lifi. (Maro. 10:13-15) Ku lumelelwa ki Mulimu, mi isiñi ki mutu, k’ona nto ya butokwa. Mubonelo wa lifasi ili wa likesha kwa neku la musebezi wa luna wa ku kutaza ha u lu palelwisi ku shaela ka bundume taba ye nde.—Lik. 4:29.

⁴ Jesu n’a ngile ka butuna tohonolo ya hae ya ku eza tato ya Ndat’ahe. (Joa. 4:34) N’a ifanile ka ku tala kwa bukombwa mi n’a si ka tuhelela liyembuluko kamba balwanisi ku mu tepeleza. Ku kutaza lushango lwa Mubuso kamita ne ku bile mwa sibaka sa pili mwa bupilo bwa hae. (Lu. 4:43) Lu laelelwa ku likanyisa mutala wa hae. (1 Pit. 2:21) Ka ku eza cwalo, lu fita fa ku “sebeza ni Mulimu.” (1 Makor. 3:9) Kana lwa fumana tuso ye tezi ku yona tohonolo yeo? Kana lwa bata linako za ku abana taba ye nde ni ba bañwi ka ku sa tand’alelwa ni ka ku tand’alelwa? Ka ku ba Lipaki za Jehova, kamita lu swanela ku ip’akanya ku “lumba Libizo la hae.”—Maheb. 13:15.

⁵ Kabelo ya luna mwa bukombwa ka butuna i tahiswa ki mubonelo wa luna. Kana lwa itebuha ka butungi kaufela z’a lu ezelize Jehova? Kana se lu tahisize mwa lipilu za luna lilato la ku lata Jehova ili leo li lu susueza ku eza ka mo lu konela kaufela mwa sebelezo ya hae? Ku nahanisisa ka butuna fa limbuyoti ze lu ikola cwale ni zeo Jehova a sepisize mwa nako ya kwapili ku lu tusa ku ñatafalelwa ki lilato la ku lata Mubupi wa luna. Lilato le li cwalo li lu susueza k’u nga kezo—ku tundamena ni ku ba kamita mwa musebezi wa ku kutaza Mubuso ili ku fita fa sipimo seo miinelo ya luna i lumeleza. Cisehelo ya luna i k’a fa bupaki bwa lilato la luna ku Jehova ni ku muyahwa ni luna.—Mare. 12:30, 31.

⁶ Lu bonisa ka m’o lu ngela nto ye ñwi ka butuna ka seo lu eza ka za yona ni seo lu bulela ka za yona. Kana luli lw’a nga ka butuna tohonolo ya luna ya ku kutaza ka za Mubuso? Kana lwa lumba bukombwa bwa luna? Kana ki tundamo ya luna ya ku zwelapili mwa musebezi wo wa butokwa hahulu ku si na taba ni twaniso? Haiba luli lu nga ka butuna tohonolo yeo ye nde hahulu, ka buniti luli lu ka ba ni cisehelo ni ku eza ka pilu ye tezi.—2 Makor. 4:1, 7.