Mu Bonise Kuli mwa Iyakatwa ka ku Eza Misipili ya Makutisezo
1 Ku bata batu ba ba tabela fa munyako ni munyako ku bonisa takazo ya mina ya ku fa ba bañwi tohonolo ya ku utwa lushango lwa Mubuso. Kacwalo mu ikolwise kuli mwa kutela teñi k’o ne mu siile lihatiso mwahal’a kweli ya January, kakuli yeo ki yona nzila ye bonisa kuli mwa iyakatwa ka za batu ba bañwi.
2 Haiba ne mu siile buka ya “Our Incoming World Government—God’s Kingdom” mu kona ku lika ku kalisa sinca ku ambolisana kwa mina cwana:
◼ “Nako ye felile ne lu ambozi ka za Mubuso wa Mulimu ni seo u ka lu ezeza. Mubuso w’o cwanoñu fa u ka eza lifasi-mubu le ku ba paradaisi. Bakeñisa kuli ni kamuta ha lu si ka bona kale paradaisi, ne ku kana kwa ba t’ata ku i beya mwa pono. Niteñi, paradaisi ye cwalo i sepisizwe mwa Bibele. [Mu bale Samu 72:7.] Ki sifi se mu hupula kuli ki sona se si tokwahala kuli lu be kalulo ya lifasi le linca leo la kozo?” Mu litele muñ’a ndu a fe maikuto, cwale mu nyakisise muhupulo o kwa Samu 37:9, 11, 29.
3 Ki ye akalezo kwa neku la ku kutela k’o ne mu siile buka ya “Is This Life All There Is?”:
◼ “Kaufel’a luna lu tabela ku ba ni tabo. Ba bañata ba ikutwa kuli tabo y’e buniti ha i konwi ku fumanwa mwa lifasi le. Mu ikutwa cwañi ka za seo? [Mu litele kalabo.] Se ku bulezwi kuli tabo ki muinelo wa munahano. Haiba minahano ya luna i tazwa ka lilato la ku lata ba bañwi, likute ku Mulimu, ni ku ba ni sepo ya luli ka za nako ya kwapili, f’o lwa kona ku ikola tabo ye buniti ku si na taba ni but’ata bwa luna.” Mu bale Samu 119:1, 2. Mu utwahaze hande kuli ku ituta Bibele ku lu luta ka m’o lu kona ku bela ni lilato ku ba bañwi, ku bonisa likute ku Mulimu, ni ku fumana sepo ye omba-omba ya za nako ya kwapili.
4 Ne mu kana mwa kutela k’o ne mu siile buka ya “Kozo ni Buiketo za Niti—Mu Ka Li Fumana Cwañi?” ka mutahisezo wa ka bukuswani o’ cwale ka wo:
◼ “Babusi ba lifasi kacenu se ba palezwi ku tisa kozo ni buiketo. Jehova Mulimu ki yena fela y’a kona ku eza seo. Bibele i lu bonisa se lu tokwa ku eza. [Mu buhisane lisupo ze mwa maparagilafu 1 ni 2 fa likepe 175, mi cwale mu bale Isaya 26:4.] Ni bata ku mi bonisa ka m’o buka ye i kona ku mi tuseza.”
5 Ne mu kana mwa kutela k’o ne mu siile broshuwa ya “Kana Mulimu wa L’u Nga Luli Sina Batu ba Butokwa?” ka akalezo ye:
◼ “Nako ye felile ne ni mi siyezi kopi ya broshuwa ye, ili y’e zusa puzo ya butokwa hahulu, ye li: ‘Kana Mulimu wa l’u nga luli sina batu ba butokwa?’ Hamulaho wa ku lundulula broshuwa ye, ne mu fitile fa kutwisiso ifi? [Mu litele kalabo.] Ka mo ku kana kwa bela ne mu susuelizwe ka ku bala mañolo a’ fa sepiso ya paradaisi ya lifasi le linca, m’o lu kona ku pila mwa kozo. [Mu mu bonise maswaniso a’ fa makepe 2 ni 3, mi mu ame kwa likalulo ze ñwi ze cisehisa za lifasi le linca.] Ni na ni buikolwiso bwa kuli mina ni balatiwa ba mina ne mu ka tabela ku pila mwa lifasi le li cwalo. A mu bone seo paragilafu 16 y’e fa likepe 31 i bulela ka za seo.” Mu bale paragilafu yeo, mi mu bonise kuli ku bata Jehova ku talusa ku ituta ze ñata ka za hae ni milelo ya hae ka ku ituta Linzwi la hae, yona Bibele.
6 Jehova u file mutala o petehile sina Mulisana y’a lilato y’a babalela lingu za hae. (Ezek. 34:11-14) Buikatazo bwa luna bo bu buniti bwa ku likanyisa pabalelo ya hae y’e lilato bwa mu tabisa, bu bonisa lilato la luna, mi bu tahisa limbuyoti ku ba bañwi.