Mu I Buluke

Mitahisezo Ye Akalelizwe ya mwa Sebelezo ya mwa Simu

Mu itusise liakalezo ze latelela kwa ku itukiseza mitahisezo ya mwa ku fela lihatiso ka kweli ni kweli.

Mu Sutelele ku Jehova

“Batu ba bañata ba ba lumela ku Mulimu ba bata ku ikutwa bukaufi ni yena. Kana mwa ziba kuli Mulimu u lu mema ku sutelela ku yena? [Mu bale Jakobo 4:8.] Buka ye i lukiselizwe ku tusa batu ku itusisa Bibele ya bona kuli ba sutelele ku Mulimu.” Mu bale paragilafu 1 fa likepe 16.

“Kacenu, ku sa luka ku atile hahulu. Ku swana fela sina ha ku talusizwe fa. [Mu bale Muekelesia 8:9b.] Ba bañata ba honona za haiba Mulimu wa ba isa pilu. [Mu bale mibamba ye mibeli ya makalelo ya paragilafu 4 fa likepe 119.] Kauhanyo ye i talusa libaka Mulimu h’a tuhelezi ku sa luka ka nakonyana.”

Is There A Creator Who Cares About You?

“Lu kona ku fumana kai kelezo ye nde ye kona ku lu tusa ku tatulula matata a lu unjami? [Mu litele kalabo. Kihona mu ka bala Mateu 7:28, 29.] Ze lu balile li bonisa mo ne ba amezwi batu ki Ngambolo ya Jesu ya fa Lilundu. Ha mu bone ze ba bulezi ba bañwi ka za Ngambolo ya hae ya fa Lilundu. [Mu mu bonise maikuto a fa likepe 152.] Kauhanyo ye i nyakisisa za bupilo ni lituto za Jesu.”

“Kana mu kile mwa kengeyela kuli: ‘Haiba Mulimu u teñi, kana u ka nga muhato wa ku felisa manyando ni ketululo mwa lifasi?’ [Mu litele kalabo. Kihona mu ka bala Sinulo 21:3, 4.] Buka ye i talusa sa ka eza Mulimu kuli a felise manyando ni simbule sa ona.” Mu mu bonise kauhanyo 10.

Mu Libelele!

“Batu ba bañata ba bilaezwa hahulu ki matata a matuna ni likezahalo ze kakamalisa ze atile kacenu. [Mu fe mutala wa nto ye ezahezi fa sibaka.] Kana mwa ziba kuli zona likezahalo zeo ki ze ñwi za lisupo za lifasi ze bonisa kuli ona cwale-cwale fa, mubuso wa Mulimu u tuha u zamaisa miinelo ya lifasi? [Mu litele kalabo. Kihona mu ka bala liñolo le li swanela, le li cwale ka Mateu 24:3, 7, 8; Luka 21:7, 10, 11; kamba 2 Timotea 3:1-5.] Broshuwa ye i nyakisisa libaka ha ku li kwa butokwa hahulu kuli lu tone ni ku lemuha taluso ya likezahalo za cwale.”

“Batu ba bañata kacenu ba mbemukiswa ki likezahalo ze kakamalisa kamba ku latehelwa ko kutuna. Ba bañwi ba komoka kuli Mulimu kiñi ha sa tibeli matata a. Bibele i lu kolwisa kuli Mulimu u tuha a nga muhato wa ku imulula mufuta wa mutu kwa manyando. [Mu bale Sinulo 14:6, 7.] Mu lemuhe seo katulo ya Mulimu i ka si ezeza batu. [Mu bale 2 Pitrosi 3:10, 13.] Broshuwa ye i nyakisisa ze ñata ka za taba ya butokwa yeo.”

Zibo Ye Isa kwa Bupilo bo Bu Sa Feli

“Ha ne mu ka memiwa kuli mu pile mwa libaka ze buheha inge ze bonisizwe fa, kana ne mu ka amuhela memo yeo? [Mu bonise siswaniso se si fa makepe 4-5, mi mu litele kalabo.] Ha mu bone se li bulela Linzwi la Mulimu kuli kona sinotolo kwa ku ikola bupilo b’o bwa ku ya ku ile. [Mu bale Joani 17:3.] Buka ye i ka mi tusa ku fumana zibo ye isa kwa bupilo bo bu sa feli.” Mu lukise kuli fa musipili o tatama mu ka nyakisisa maparagilafu a 5 mwa kauhanyo ya 1.

Mu apule siswaniso se si fa makepe 188-9, mi ka ku itusisa manzwi a zamaelela ni siswaniso, mu buze muñ’a ndu kuli: “Kana mu na ni sepo ya ku to pila mwa paradaisi, muta zibo ya Mulimu i ka tala mwa lifasi? [Mu litele kalabo. Kihona mu ka bala Isaya 11:9.] Buka ye i ka mi tusa ku ituta ze i bulela Bibele ka za Paradaisi ni ze lu swanela ku eza kuli lu to fumaneha mwateñi.” Mu lukise kuli fa musipili o tatama mu ka to nyakisisa maparagilafu 11-16 mwa kauhanyo 1.

Itute ku Muluti Yo Mutuna

“Kana mu nahana kuli lifasi ne li ka ba sibaka se sinde kambe batu ne ba latelela pulelo ye? [Mu bale Mateu 7:12a. Mi cwale mu litele kalabo.] Buka ye i na ni lituto ze ñata ze zwa ku muluti yo mutuna ka ku fitisisa ya kile a pila.” Mu bonise maswaniso ni manzwi a ñozwi ka za maswaniso ao mwa kauhanyo 17.

“Bashemi ba bañata kacenu ba lika ku luta bana ba bona likuka ze nde. Kana mu ikutwa kuli seo ki sa butokwa? [Mu litele kalabo. Mi cwale mu bale Liproverbia 22:6.] Mu lemuhe kuli bashemi ba susuezwa ku kala ku luta bana ba bona ku zwelela kwa bwanana. Buka ye i lukiselizwe ku ba tusa ku eza cwalo.” Mu bonise maswaniso ni manzwi a ñozwi ka za maswaniso ao mwa kauhanyo 15 kamba 18.

“Kamita bashemi ba komokiswanga ki lipuzo ze ba buzanga bana ba bona. Ze ñwi za lipuzo zeo za kona ku ba t’ata ku li alaba, nji haki cwalo? [Mu litele kalabo. Mi cwale mu bale Maefese 6:4.] Buka ye i kona ku tusa bashemi ku alaba lipuzo za bana ba bona.” Mu bonise maswaniso a sikai ni manzwi a ñozwi ka za ona mwa kauhanyo 11 ni 12 kamba 34 ku isa 36.

Life—How Did It Get Here? By Evolution or by Creation?

“Kaufela luna lu bilaezwa ki bukebenga ni mifilifili ye mwa silalanda sa luna. Kana mu nahana kuli ku na ni ya kona ku tatulula butata bo? [Mu litele kalabo.] Mulimu yena wa kona ku bu tatulula.” Mu apule fa likepe 196; mu bale ni ku talusa liñolo la Liproverbia 2:21, 22 mwa paragilafu 19. Mu bonise toho ya taba ya kauhanyo 16, mi mu fe buka.

Mu apule fa likepe 6, mi mu bulele kuli: “Batu ba bañata ba nahana kuli lifasi la luna le linde ni bupilo bo bu ku lona, ne li itahezi fela. Mina mu bona kuli niti luli ki ifi ya ka mo ne li tezi lifasi? [Mu litele kalabo.] Bupaki bo buñata bu bonisa kuli Bibele i nepahezi ha i bulela kuli ku na ni Mubupi ya m’ata ni ku fita mi ili ya lu lata hahulu. Ki yena Mulimu wa niti mi libizo la hae ki Jehova.” Mu bale Isaya 12:2, mi mu taluse ka bukuswani kuli mulelo wa hae ki wa ku cinca lifasi kaufela ku li bisa paradaisi.

Mankind’s Search for God

“Bakeñisa kuli kacenu ku na ni bulapeli bo buñata, kana mu kile mwa nahana mo lu kona ku zibela bulapeli bo bu amuheleha ku Mulimu?” Mutu ha sa alabile, mu apule fa likepe 377. Mu koñomeke sisupo sa bu 7, mi mu buze muñ’a ndu haiba wa lumela kuli bulapeli bwa niti bu swanela ku swalisanisa batu ba mishobo kaufela. Mu bale le liñwi la mañolo a bonisizwe, mi haiba ku na ni nako, mu nyakisise lisupo ze ñwi ze fa mukoloko. Haiba u bonisa ku tabela kwa luli, mu mu siyele buka. Mu si ka funduka kale, mwa kona ku mu buza puzo ya kuli, “Bulapeli bwa niti bu swanela ku ama cwañi mupilelo wa mutu?” Mu lukise musipili wa makutisezo kuli mu to alaba puzo yeo.

Haiba mutu a itibahaza kuli u mwa bulapeli bo buñwi bo butuna, ne mu ka bulela kuli “Kwa tabisa luli ku kopana ni batu ba bulapeli bo bu shutana-shutana. Mufuta wa mutu u bata Mulimu ka linzila ze shutana-shutana. [Haiba kwa swanela, mu bale Likezo 17:26, 27.] Batu hañata ba latelelanga bulapeli bwa bashemi ba bona. [Mu bale paragilafu 12 fa likepe 8.] Ku ituta hahulu za bulapeli bo buñwi kwa tusa mi ku fa zibo. Buka ye i bonisa simuluho, lizo ni lituto za bulapeli bo butuna bwa lifasi.” Mu mu bonise ze mwa buka ka za bulapeli bwa hae, inge cwalo litaba ze fumaneha fa makepe a latelela: bulapeli bwa si-Sikh (100-1); bwa Sihindu (116-17); bwa Sibuddha (141); bwa Tao (164-6); bwa si-Confucius (177); bwa Shinto (190-5); bwa Sijuda (220-1); ni bwa Simozilemu (289).

Revelation—Its Grand Climax At Hand!

“Mu kana mu utwile ka za [mu bulele taba ya mwa makande]. Batu ha ba shwa mwa kozi, ba bañata ha ba zibangi mwa ku omba-ombela mabasi a shwezwi. Mina mu nahana cwañi?” Mu litele kalabo. Cwale mu apule fa likepe 299, mi mu bonise kezahalo ya ku zuha kwa bafu ye mwa siswaniso. Mu zwelepili ka ku bulela kuli: “Ba bañata ba komoka ha ba ituta kuli batu ba ba lukile hamoho ni ba ba si ka luka ba ka kutisezwa kwa bupilo mwa Paradaisi ya fa lifasi-mubu. [Mu bale Likezo 24:15 sina mo ku ñolezwi mwa paragilafu 9 fa likepe 297, mi mu bonise taluso ye mwa paragilafu 10.] Buka ye i nyakisisa litaba ze ñwi ze ñata ili ze hoha mamelelo ka za mulelo wa Mulimu ka za nako ya kwapili.

The Bible—God’s Word or Man’s?

“Linako ze, mañi ni mañi u i pumana mwa butata bo butuna. Ba bañata ba yanga kwa baelezi kuli ba ba tuse. Ba bañwi ba yanga kwa balauli kuli ba ba tuse. Mu hupula kuli lu kona ku fumana kai kelezo ye itingwa ili ye kona ku lu tusa? [Mu litele kalabo.] Bibele i lu taluseza nto ye ñwi ya butokwa ye lu swanela ku utwisisa. [Mu bale 2 Timotea 3:16. Kihona mu ka apula likepe 187, ni ku bala paragilafu 9.] Buka ye i ka mi tusa ku bona kuli ku latelela seo Bibele i si bulela ku ka lu tusa.”

Mutu Yo Mutuna ka ku Fitisisa ya Kile a Pila fa Lifasi-Mubu

“Mwahal’a yona nako ye batu ba sweli ku hupula ka za Jesu. Nihakulicwalo, bakeñisa kuli lika ze ñata ze maswe li sweli ku ezahala mwa lifasi, ba bañwi ba kakanya ka za haiba luli Jesu u l’u nga ku ba ba butokwa. Mu ikutwa cwañi ka za seo?” Mu litele kalabo. Mu apule fa kauhanyo 24, mi mu buhisane ka bukuswani libaka Jesu ha n’a tile fa lifasi-mubu. Cwale mu bale Joani 15:13, ili ku koñomeka lilato le lituna leo Jesu n’a na ni lona ku ba bañwi.

“Muta mutu a bulela ka za Jesu Kreste, batu ba bañata ba m’u nga ku ba sina mbututu kamba mutu ya mwa manyando ya s’a li bukaufi ni ku shwa. Muhupulo wa bona ka za Jesu u ama fela ka za ku pepwa kwa hae ni ku shwa kwa hae. Lika ze makaza za n’a bulezi ni ku eza mwahal’a bupilo bwa hae hañata ha li lemuhiwi. Z’a petile li ama mutu kaufela ya s’a pilile fa lifasi-mubu fa. Kona libaka ha ku li kwa butokwa hahulu kuli lu itute ka mo lu konela kaufela ka za lika ze komokisa z’a lu ezelize.” Mu bale Joani 17:3. Mu apule likepe la pili la litaba za makalelo, ni ku bala paragilafu ya bune.

Ki Sifi Seo Mulimu A Tokwa ku Luna?

“Kana mu nahana kuli Mulimu n’a lelile kuli lu pile mwa butata bo bu cwale ka bo lu talimani ni bona kacenu? [Mu litele kalabo. Kihona mu ka bala Mateu 6:10.] Kana mu kile mwa nahana seo Mubuso wa Mulimu u li sona luli?” Mu apule fa tuto 6, mi mu bale lipuzo ze bonisizwe kwa makalelo a tuto. Mu kale ku nyakisisa tuto kamba mu lukise kuli mu ka to i nyakisisa fa musipili o tatama.

“Ku si na taba ni zwelopili ya mazazi a, makulano ni lifu li zwelapili ku nyandisa ni ku swabisa mufuta wa mutu. Kana mwa ziba seo Jesu a ka ezeza bakuli, basupali, ni bafu?” Mu litele kalabo. Haiba mutu u bata ku ziba kalabo, mu apule fa tuto 5, mi mu bale lipuzo za maparagilafu 5-6. Mu nyakisise maparagilafu ao, kamba mu lukise kuli a to nyakisiswa fa musipili o tatama.

Mu Lapele Mulimu A Nosi wa Niti

“Mu nahana kuli lu kona ku fumana kai tuso ya ku talimana ni butata bwa bupilo? [Mu litele kalabo. Kihona mu ka bala Maroma 15:4.] Mu bone kuli Mañolo a’ tahile ka moya wa Mulimu a lu luta, ku lu omba-omba, ni ku lu fa sepo ye kona ku lu tiisa kuli lu tiyele butata. Buka ye i bonisa ze lu swanela ku eza kuli lu fumane tuso ye tuna ye zwa mwa ku bala Bibele.” Mu koñomeke lisupo zene ze bonisizwe fa likepe 30.

“Ku zwa Jesu ha n’a sa li fa lifasi-mubu ku to fita ni cwale, batu ba bañata ne ba nze ba lapelelanga Mubuso wa Mulimu kuli u tahe. Kana mu kile mwa nahana seo Mubuso o taha u ka si ezeza mufuta wa mutu? [Mu litele kalabo. Kihona mu ka bala Daniele 2:44.] Buka ye i talusa seo Mubuso wa Mulimu u li sona, se u ka eza, ni tuso ye lu kona ku fumana kwa puso ya ona ye lukile.” Mu bonise siswaniso se si fa makepe 92-3.