Mu Fumane Tuso ku Zwelela kwa Sikolo sa Bukombwa sa Teokratiki sa 1996—Kalulo 2
1 Hasamulahonyana wa ku tomiwa kwa Sikolo sa Bukombwa sa Teokratiki mwa 1943, mutai o muñwi wa Sosaiti ne u bihile kuli: “Tukiso ye nde hahulu y’e i konile mwa nakonyana ku tusa mizwale ba bañata ku fita fa ku ba ni buikoneli hahulu fa libulelelo ni ku ba ni buanyu bo bu ekezehile mwa simu ili bao ne ba nahanile kuli ni kamuta ne ba si ke ba ba babuleli ba fa nyangela.” Sikolo si zwelapili ku fa tuto ye nde ka ku fitisisa, ili yeo kaufel’a luna lu tokwa.
2 Ku Bala Bibele: Ba ba filwe likalulo za ku bulela haki bona fela ba ba fumana tuso ku zwelela kwa sikolo. Kaniti, kaufel’a luna lu na ni musebezi—ku bala Bibele kwa ka viki. Tomahanyo ya sikolo i bonisa likauhanyo za Bibele ze na ni ku baliwa ka viki ni viki. Ku na ni likupuliso za ka Mañolo ze ñata ze koñomeka butokwa bwa ku bala Bibele ka zazi. (Josh. 1:8; Samu 1:2; Lik. 17:11) Ku bala Bibele ki kwa butokwa kwa neku la buikangulo bo bunde bwa kwa moya; ku fepa munahano ni pilu. Haiba lu bala Bibele ka mizuzu ye ketalizoho fela ka zazi, lu ka kona ku zamaelela ni tomahanyo. Kwa mafelelezo a silimo, lu ka be lu balile likauhanyo ze fitelela 150 za Linzwi la Mulimu. Haiba lu sa kauhani ni Bibele, lu swanela ku kona ku bala se siñwi sa yona ka zazi ni zazi.
3 Ngambolo ya Taelo: Kuli mizwale ba susuezwe ku sebeza ka busepahali, ili ka cisehelo, mubuleli ya fa ngambolo ya taelo u tokwa ku itusisa milutelo ye minde, ku fitisa kutwisiso, ni ku yaha buitebuho kwa neku la Jehova, Linzwi la hae, ni kopano ya hae. Maeluda ni batanga ba bukombwa ba kona ku peta seo ka ku itukiseza hande, ku toma ngambolo ya bona fa toho ya taba, ku bulela ka buikolwiso, ni ku ezisa taba ku ba ye nyangumuna. (Maheb. 4:12) Ki kwa butokwa kuli mubuleli a mamele nako ya filwe. Buka ya “Ku Swalisana Hamoho mwa ku Lapela” i tezi ya mañolo a Bibele mi i tahisa litaba ze fitana-fitana ze susueza za mwa Mañolo ze kona ku lu tusa kwa moya. Buka ya Ba Ba Kopanyizwe i hohela mamelelo kwa buikalabelo bwa luna bo bu mutomo bwa ka Mañolo mi i lu bonisa litaba za ka nañungelele ze ama misebezi ya maeluda ni batanga ba bukombwa, ni miinelo ye fapahana ya tamaiso ya Puteho. Ku na ni ze ñata za ku ituta.
4 Ze Zwile Mubano: Mizwale ba ba filwe kalulo ye ba swanela ku keta litimana ze ñwi ze konwa ku sebeliswa ka nzila ye tusa kwa neku la tuso ya puteho. Seo si tokwa ku bala likauhanyo ze filwe, ku yeya ku zona, ni ku eza patisiso fa litimana ze ketilwe ili ku fumana lisupo ze ka utwahaza taluso ya mañolo ao. Kwamulaho wa Watch Tower Publications Index, ku na ni “Scripture Index,” [Mukoloko wa Mañolo] o kona ku ba ni tuso mwa ku fumana litaba ze ama litimana ze ñwi za Bibele. Mizwale ba ba fa kalulo yeo ba swanela ku nahanisisa hande ni ku ambuka ku tahisa litaba ze sa tokwahali. Ha ba swaneli ku itukiseza litaba ze ñata hahulu ku fita ze konwa ku fiwa hande mwa mizuzu ye silezi.
5 Kaufel’a luna lwa kona ku fumana tuso ku zwelela kwa Sikolo sa Bukombwa sa Teokratiki. Sa kona ku lu tusa ku zwisezapili buikoneli bwa luna bwa ku bulela ni ku luta. Ku nga ka butuna tukiso yeo ku ka lu tusa luli ku ezisa ‘ku zwelapili kwa luna ku lemuhiwa ki batu kaufela.’—1 Timotea 4:15.