Ku Tusa Mabasi Kuli A Fumane Nako ya Kwapili ye Inelela
1 “Mukwañuli wa tusa,” ya talima za mali a nyangela a taluseza sitopa sa kwa koleji se ne si kwaza, ka ku ekeza kuli: “Wa kona ku ba ni mukwañuli ni ku ikutwa hande ka za wena hape.” W’o ki mutala tenyene wa ka m’o lifasi li bubekela buitati sina nzila ya ku ipakanyeza za nako ya kwapili. Ka ku fapana ko kutuna, Jesu n’a lutile kuli Mukreste u lukela ku “itoboha . . . ku ka tusañi mutu h’a luwile lifasi kamukana, mi a sinyehelwa ki moya wa hae?” (Mat. 16:24-26) Kuli a fumane nako ya kwapili ye inelela, mutu u lukela ku toma bupilo bwa hae kaufela fa ku eza tato ya Mulimu—ili sikonkwani sa butokwa ka ku fitisisa kwa mabasi kacenu. (Samu 143:10; 1 Tim. 4:8) Lushango l’o lu tahisizwe mwa kauhanyo ya mafelelezo ya buka ya Sinotolo kwa Tabo ya Lubasi. Hatiso ye nca ye i tusa batu ku bona se si li sa butokwa luli mwa bupilo ni ka m’o ba kona k’u ngela muhato o tusa kwa neku la mabasi a bona. Ha lu nze lu zwelapili ku kutaza taba ye nde kai ni kai, ki sika mañi se lu ka bulela ili se si ka susueza bao lu katana kuli ba bale buka ya Tabo ya Lubasi? Ki ze liakalezo ze ñwi:
2 Fa minyako hamohocwalo ni mwa makululu, mwa kona ku lika ku itusisa trakiti ya “Mu Ikole Bupilo bwa Lubasi” mwa ku kalisa lipuhisano. Mwa kona ku buza kuli:
◼ “Ka ku ambekwa kwa luna ki lipilaelo kaufela za mupilelo wa cwale, kana mu ikutwa kuli kwa konahala ku ba ni bupilo bwa lubasi bwa tabo luli? [Mu litele kalabo.] Trakiti ye i lu kolwisa kuli kwa konahala. Kana mwa tabela ku i bala?” Haiba i amuhelwa, mwa kona ku zwelapili ka ku bulela kuli: “Bakeñisa kuli mu cisehezi mwa taba ye, hape ne mu kana mwa ikola buka ye ili ye fa kelezo ye tezi ka mwa ku fumanela tabo mwa sikwenda sa lubasi.” Mu bonise mukoloko wa ze mwahali mwa buka ya Tabo ya Lubasi. Mu bonise litoho za litaba za likauhanyo ze sikai ze hoha mamelelo. Mu apule kwa likepe 10, mi mu bale ku kalisa mubamba wa mafelelezo wa paragilafu 17 ku isa kwa mafelelezo a paragilafu 18. Mu fe buka. Mu taluse kuli mu na ni ze ñata za ku abana, mi mu buze fo mu kona ku bonanela hape.
3 Mwa kona ku latelela puhisano ya mina ya makalelo ka za bupilo bwa lubasi bwa tabo ka ku bulela kuli:
◼ “Ni bata ku talusa se siñwi mwa buka ye ne mu ngile ili seo ni nahana kuli mu ka itebuha sona. Kauhanyo ya mafelelezo i tomile fa sinotolo luli sa tabo ya lubasi. [Mu bale paragilafu 2 fa likepe 183.] Mu lemuhe kuli sinotolo ki ku sebelisana hamoho mwa ku eza tato ya Mulimu. Lu babaza kuli mabasi a itute Bibele hamoho ilikuli a itute seo tato ya Mulimu ili sona ni mwa ku i sebeliseza mwa lapa. Lu fa tuto ya Bibele ye sa lifelwi ye nga fela likweli ze sikai ku i feza. Haiba mu ni lumeleza, ni ka mi bonisa mo i zamaisezwa.” Mu kutele teñi ni broshuwa ya Ki Sifi Seo Mulimu A Tokwa ku Luna? kamba buka ya Zibo, ku be ifi kamba ifi ye ka swanela ni ku fita.
4 Ha mu ambola ni bo mu kena ni bona sikolo kwa sikolo kamba ku yo munca mwa kalulo ya simu, ne mu kana mwa fumana kalabo kwa puzo ye:
◼ “Ki kwa butokwa cwañi kuli bashemi ni bana ba bona ba kwalule linzila za ku ambolisana ka zona kamita yo muñwi ku yo muñwi? [Mu litele kalabo.] Mu lemuhe seo kabuka ka bupilo bwa lubasi ka ka si bulela ka za taba ya ‘Ku Ambolisana kwa ka ku Sepahala ni ku sa Pata-Pata Litaba.’ [Mu bale paragilafu 4 kaufela ni mubamba wa pili wa paragilafu 5 fa likepe 65 mwa buka ya Tabo ya Lubasi.] Maparagilafu a latelela a fa liakalezo ze sebeza ka mwa ku kondolokiseza ku ambolisana mwahal’a lubasi. Toho ya taba ya buka ye ki Sinotolo kwa Tabo ya Lubasi. Haiba mwa tabela ku i bala ni ku sepisa ku eza cwalo, ne mu kana mwa ba ni kopi ye kuli mu ipulukele yona ka nubu ya K1,000.” Mu taluse kuli mu ka kutela teñi hamulaho kuli mu t’o utwa maikuto a hae ku s’a bala.
5 Mwa kona ku ekeza kwa puhisano ya mina ya makalelo ni yo munca ka za ku ambolisana kwa mushemi ni mwana ka ku bulela se:
◼ “Ne ni itebuhile cisehelo ye ne mu bonisize kwa butokwa bwa ku ba ni ku ambolisana ko kunde mwahal’a lubasi lwa mina. Ki taba mañi ye ne mu ka bulela kuli ki yona ya butokwa ka ku fitisisa yeo bashemi ni bana ba swanela ku buhisana?” Mu litele kalabo. Cwale mu apule kwa likepe 68 mwa buka ya Tabo ya Lubasi, ni ku bala kalabo ye fumaneha mwa licika la pili la paragilafu 11. “Ku banga ni tuto ya Bibele ya ka viki ki nzila ye nde ka ku fitisisa ya ku fumana ka yona zibo ya ku ziba Mulimu.” Mu tahise broshuwa ya Ki Sifi Seo Mulimu A Tokwa ku Luna? Mu taluse kuli lituto za yona ze 16 li fa sikuka se si mutomo sa lushango lwa Bibele. Mu bale litaba za makalelo fa likepe 2, mi cwale mu ikatulele ku kalisa tuto ka ku buhisana hamoho tuto ya pili.
6 Haiba mu katana mushemi mwa musebezi wa fa ndu ni ndu, kamba mwendi mwa likululu kamba kwa musika, mwa kona ku zusulusa cisehelo ka ku bulela kuli:
◼ “Ni na ni niti kuli mu ka lumela kuli ku uta bana kacenu ki likulutendano luli. Ki sifi se mu nahana kuli sa kona ku sileleza bana ba mina kwa likukuezo ze maswe? [Mu litele kalabo.] Ki ye kelezo ye nde ye ni itebuhile.” Mu kandeke za swanisezo ye mwa paragilafu 1 mi mu bale paragilafu 2 fa likepe 90 mwa buka ya Tabo ya Lubasi. Mu taluse ka mo i fela ketelelo ye itikanelezi ye sebeza luli kwa ku sileleza mabasi kwa likukuezo ze sinya. Mu fe kopi kuli i siyale, mi mu te mu fumanehe teñi ku t’o alaba lipuzo lifi kamba lifi ze ka zuha.
7 Fa ku pota kwa mina kwa bubeli ku mushemi ya n’a amuhezi buka ya “Tabo ya Lubasi,” mwa kona ku zwelapili mwa puhisano cwana:
◼ “Ha ne lu katani lwa pili, ne ni kona ku bona kuli mwa tokomela luli bana ba mina ni kuli mu bata ku eza ze mu kona kaufela mwa ku ba sileleza kwa likukuezo ze fosahezi. Ku kana kwa ba kuli ha mu si ka i bala kale, kono ku na ni maikuto a butokwa hahulu a talusizwe mwa buka ye ne ni mi siyezi ili ao mu swanela ku bona. [Mu bale paragilafu 19 fa likepe 59.] Ku tahisa swalisano ni Mulimu ku lu tokwa ku mu ziba ku zwelela mwa makepe a Linzwi la hae le li ñozwi, Bibele. Kana ne mu ka tabela kuli ni mi bonise mo lu itutelanga Bibele sina lubasi?”
8 Baelezi ba silifasi ha ba koni ku bonisa mabasi nzila ye libisa kwa tabo kono ba ka ba nyefisa fela luli. Ha lu abeleñi ka buñata buka ya Tabo ya Lubasi ilikuli kai ni kai batu ba konwe ku tusiwa ka Linzwi la Mulimu kuli ba fumane nako ya kwapili ye inelela.—1 Tim. 6:19.