Ku Shaela Niti ka Zazi ka ku Likanyisa Jesu

¹ Jesu n’a na ni musebezi tenyene wa ku peta ha n’a tile fa lifasi-mubu. Ne u lemuseha ka bunolo sina: ‘Ku paka niti.’ (Joa. 18:37) N’a shaezi niti ka za tulemeno ni milelo ya Ndat’ahe ze makaza. Musebezi w’o ne u li sina sico ku yena; bupilo bwa hae kamukana ne bu tomile ku ona. (Joa. 4:34) Luka n’a bihile kuli Jesu n’a zwelapili ku “luta mwa Tempele ka zazi.” (Lu. 19:47, NW) Jesu n’a itusisize ka ku tala nako ye ne i fumaneha. (Joa. 9:4) Nakonyana pili a si ka shwa, n’a kona ku bulela ku ndat’ahe kuli: “Ni ku lumbile mwa lifasi; ni felize musebezi o n’o ni file kuli ni u eze.”—Joa. 17:4.

² Lipilu za luna ha li tala buitebuho ku zeo kaufela Jehova a ezize, ni luna lu ikutwa ku susuezwa ku bulela ka za hae ka zazi. Lu ba fela sina balutiwa ba Jesu ba ne ba bulezi ka bundume kuli: “Ha lu koni ku sa bulela ze lu boni, ni ze lu utwile.” (Lik. 4:20) Ku bulela kwa bona za Jehova ne ku zwelapili, kakuli ze ñozwi li bulela kuli “ha ba si ka lisela, ka mazazi kaufela.” (Lik. 5:42; litaku li siyamisizwe ki luna.) Lu swanela ku ipuza kuli, ‘Kana ni mulikanyisi wa Muluti wa ka, Jesu?’

³ Ku Kutaza ka Putako: Jesu n’a bulezi cimo kuli lushango lwa Mubuso ha se lu bulezwi mwa lifasi-mubu kamukana, “kihona ku ka taha mafelelezo.” (Mat. 24:14) Seo si swanela ku lu lemuhisa butokwa ni putako ya musebezi wa luna. Ka ku ba mwa lubeta kwa bupilo bwa batu ba ba eza bolule-lule tenyene, ha ku na se lu kona ku fumana se si butokwa kamba se si na ni tuso ku si eza ku fita seo. Bakeñisa kuli muinelo wa linto wo u atumela mafelelezo a wona, nako ye siyezi kuli musebezi wo u feziwe i kusufezi!

⁴ Lipiho li bonisa kuli Jehova u sweli ku akufisa ku kubukanyiwa kwa ba ba swana sina lingu. (Is. 60:22) Mwa libaka ze ñata za lifasi, batu ba sweli ku selehanela luli kwa niti, ka kezo yeo ba nze ba zibahaza ka tabo kuli: “Lu ka ya ni mina; kakuli lu utwile kuli [Muñ’a Bupilo] u inzi ni mina”! (Zak. 8:23) Ku fita lili kaufela mwa nako ya kwamulaho, manzwi a Jesu ki a niti a’ li: “Lukau ki lo lutuna luli, kono ba ba kutula ki ba banyinyani. Mu lapele . . . Muñ’a lukau, kuli a lume babeleki mwa lukau lwa hae.” (Mat. 9:37,38) Kana seo ha si lu susuezi ku ba ni cisehelo sina balutiwa ba Jesu ba “ne ba li mwa Tempele kamita, inze ba lumba Mulimu”?—Lu. 24:53; litaku li siyamisizwe ki luna.

⁵ Mu Zibahalise Niti ka Zazi: Ka zazi ni zazi, lu swanela ku n’o bata linzila za ku fitisa niti ku ba bañwi. Libaka za fumaneha ka bunolo. Kana mwa kona ku itusisa mizuzu ye sikai ku lizeza mulikani luwaile kamba ye ne mu katani y’o mu hupula kuli n’a kana a tabela? Kamba ku cwañi ka za ku ñolela mutu ye ne mu si ka fumana fa ndu liñolo? Kana se mu nahanile za ku fa trakiti ku mulekisi wa mwa sintolo ha mu nze mu leka lika? Mwendi, mwa kona ku nahana ka za libaka ze ñwi ze ñata ze mu banga ni zona ka zazi ni zazi za ku abana sepo ya mina ni ba bañwi. Haiba mu eza buikatazo ni ku ba bundumenyana, Jehova u ka mi tusa.—1 Mates. 2:2.

⁶ Kacwalo, ha lu nze lu kalisa misebezi ya lizazi le liñwi ni le liñwi, lu swanela ku ipuza kuli, ‘Kana ni ka nga muhato wa ku abana sepo ya ka ni yo muñwi haiba sibaka si fumaneha kacenu?’ Mu likanyise mubonelo wa Jesu, ya n’a talusize libaka ha n’a lumilwe fa lifasi-mubu kuli: “Ni swanezi ku y’o [bulela, NW] taba ye munati ya mubuso wa Mulimu.” (Lu. 4:43; litaku li siyamisizwe ki luna.) Haiba lu bata ku ba sina Muluti wa luna, lu ka eza nto ye swana.—Lu. 6:40.