Zibo ya ku Ziba Mulimu wa Niti I Isa kwa Bupilo
1 “Bupilo bo bu sa feli,” ka mwa n’a bulelezi Jesu mwa tapelo ku ndatahe, “kikuli ba ku zibe, Wena, Mulimu a nosi wa niti.” (Joa. 17:3) Ki ko ku tahisa mupuzo o mutuna hakalo! Ku itusisa hatiso ya Knowledge That Leads to Everlasting Life, lwa kona ku tusa ba bañwi ku ituta se ba lukela ku eza kuli ba pile ku ya ku ile. Ki sifi se lu kona ku bulela ili ku zusulusa cisehelo ya bona ni ku ba tahiseza ku tabela ku bala buka ya Knowledge?
2 Ne mu kana mwa itusisa mutahisezo wa ku itusisa Bibele sina simbule se si sebeza sa ketelelo, ka ku bulela kuli:
◼ “Lu sweli ku buhisana ni bomuyahwa ni luna ka za ko lu kona ku fumana simbule se si sebeza sa ketelelo kwa neku la ku talimana hande ni butata bwa bupilo. Mwa linako za kwamulaho batu ba bañata pili ne ba batisisanga mwa Bibele. Kono cwale mibonelo ya batu i cincize; buñata ha ba lumeli za Bibele, ka ku i nga sina buka fela ye ñozwi ki batu. Ki ufi muhupulo wa mina? [Mu libelele kalabo.] Ku na ni libaka le linde luli ha ku konwa ku bulelwa kuli Bibele ki ye sebeza mwa lizazi la luna. [Mu bale 2 Timotea 3:16, 17.] Likuka za Bibele li sa sebeza hahulu cwale sina mo ne li sebeleza Mulimu ha n’a buyelezi ku ñolwa kwa Bibele.” Mu apule kwa likepe 16 mwa buka ya Knowledge, mi ka bukuswani mu fe maikuto fa ketelelo ye sebeza ye fumanwa mwa Ngambolo ya Jesu ya fa Lilundu. Mu bale manzwi a amilwe teñi mwa paragilafu 11 kamba a mwa paragilafu 13. Mu fe buka, mi mu lukise ku kuta ku t’o alaba puzo ye li, Lu kona cwañi ku fumana tuso ka butu ku zwelela kwa zibo ye mwa Bibele?
3 Bakeñisa kuli tapelo ki taba ye tabelwa ki batu ba bañata, ne mu ka tabela ku i buhisana ka ku buza kuli:
◼ “Ka ku ba ni lishemaeto kaufela zeo lu na ni ku talimana ni zona mwa bupilo bwa lizazi la kacenu, kana mu nahana kuli tapelo i kona ku ba ye na ni tuso luli ku luna? [Mu libelele kalabo.] Ba bañata ba ikutwa kuli ba sutelezi ku Mulimu ka ku lapela ku yena ni kuli ku eza cwalo ku ba file mutomo wa m’ata a mwahali, ili seo Bibele i sepisa luli. [Mu apule buka ya Knowledge kwa likepe 156, mi mu bale Mafilipi 4:6, 7.] Nihakulicwalo, mutu n’a kana a ikutwa kuli litapelo za hae ka nako ye ñwi li ikela fela li sa alabiwi. Kauhanyo ye italusa ‘Ka Mo Mu konela ku Sutelela ku Mulimu.’ [Mu fe buka ka nubu ya kamita.] Kauhanyo ye hape i talusa ka mo lu konela ku teeleza ku Mulimu, bakeñisa kuli ku ambolisana ni yena haki kwa lineku li li liñwi fela. Lwa kona ku t’o buhisana seo ha ni ka taha nako ye tatama.”
4 Kana ne mu ka tabela ku lika muatumelelo o nongile fa ku kalisa tuto? Ki wo o muñwi o ne u kana wa sebeza kwa neku la mina:
◼ “Lu fa tuto ya Bibele ya fa ndu ye si na tifo. Kana se mu kile mwa ituta Bibele? [Mu libelele kalabo.] A lu boneñi ni mi bonise siitusiso sa tuto se lu itusisanga.” Mu bonise buka ya Knowledge, mu apule kwa likepe 3 ilikuli muñ’a ndu a kone ku bona mukoloko wa ze mwahali, mi mu buze kuli, “Kana se mu kile mwa ipuza ka za seo Bibele i si bulela ka za litaba zeo?” Mu apule kwa kauhanyo yeo a bonisa cisehelo ye tuna ku yona, mi mu bale litohonyana za litaba. Mu taluse kuli ne mu ka bata ku bonisa ka bukuswani ka mo lu itutela litaba zeo ha ku itutiwa. Ku si na taba ni kuli tuto ya kaliswa kamba kutokwa, mu fe buka yeo ka nubu ya kamita.
5 Kacenu buñata bwa batu ba nga muhato kwa zibo ye nepahezi ya Mulimu wa niti. (Is. 2:2-4) Ki tohonolo ya luna ku tusa ba bañata ka mo ku konahalela kaufela ku ituta ka za Jehova ni ku libiswa kwa bupilo.—1 Tim. 2:4.