‘Se Ki Sona Se Si Talusa Bupilo bo Bu Sa Feli’
1 Manzwi a Jesu a ñozwi kwa Joani 17:3 a swanelwa ku utwisiswa ka butuna hahulu. N’a talusa sa n’a bulezi—kuli ku ikungela zibo ya ku ziba Mulimu ni Kreste ku talusa bupilo bo bu sa feli! Kona kana ki ka ku ba fela ni zibo ya ku ziba Jehova ni Jesu f’o lu ka fiwa mupuzo wa bupilo bwa kamita? Batili. Maisilaele ne ba zibile kuli Jehova ne li Mulimu wa bona, kono mupilelo wa bona ne u sa bonahalisi tumelo yeo. Kacwalo, ne ba latehezwi ki muhau wa hae. (Hos. 4:1, 2, 6) Kacenu bolule-lule ba batu ne ba kana “ba tukufalezwi za Mulimu, kono isi ka zibo ye nepahezi.” (Maro. 10:2, NW) Ba tokwa ku fita fa ku ziba Jehova, “Mulimu a nosi wa niti,” ni ku ituta ka mwa ku mu sebeleza ka swanelo. Kabakaleo, mwahal’a November lu ka fa buka ya Zibo ye Isa kwa Bupilo bo Bu Sa Feli. Mu ka itusisa muatumelelo ufi mwa ku fitisa buka ya Zibo? Ki ze liakalezo ze kana za mi tusa.
2 Bakeñisa kuli muhupulo wa ku pila ku ya ku ile fa lifasi-mubu ki o munca kwa batu ba bañata, mukalisezo wo u kana wa hoha cisehelo ya bona:
◼ “Lu sweli ku buza bomuyahwa ni luna puzo. Haiba ne mu ka memiwa ku pila ku ya ku ile mwa lifasi le li cwale ka le, kana ne mu ka amuhela memo? [Mu bonise siswaniso se si fa makepe 4-5 mwa buka ya Zibo. Mu litele kalabo.] Sona se si kona ku ba luli se si tabisa sa mina mwa bupilo. Kono mu hupula kuli ki sifi se ne mu ka tokwa ku si eza kuli mu iponele kalulo ye ha i ezahala luli ku mina? [Mu litele kalabo.] Mu lemuhe muhato o tokwahala ka ku ya ka Joani 17:3. [Mu bale.] Buka ye i sweli ku tusa ba bañata kuli ba fumane ona mufuta wa zibo ye ipitezi ye. Kana ne mu ka tabela ku ba ni kopi ya ka butu ya ku bala? [Mu litele kalabo.] Fa musipili wa ka o tatama, lwa kona ku buhisana libaka ha ku li ko ku swaneleha ku lumela kuli lwa kona ku fumana bupilo bo bu sa feli ona fa lifasi-mubu fa.”
3 Ha mu kutela ku yo potela bo ne mu buhisani ni bona Joani 17:3, ne mu kana mwa zwelapili cwana:
◼ “Fa musipili wa ka o felile, ne ni mi balezi manzwi a Jesu a tabisa hahulu a fumanwa kwa Joani 17:3, k’o n’a lu kolwisize kuli ku ikungela zibo ya ku ziba Mulimu ni yena ku talusa bupilo bo bu sa feli. Kono batu ba bañata ba lumela kuli bupilo bo bunde bu konwa ku fumanwa fela kwa lihalimu. Mu li ñi ka za seo? [Mu litele kalabo.] Haiba buka ye ne ni mi siyezi i teñi fakaufi, ni ka tabela ku mi bonisa litimana za Bibele ze fa bupaki bwa kuli Paradaisi i ka kutiswa sinca fa lifasi-mubu. [Mu buhisane maparagilafu 11-16 fa makepe 9-10 mwa buka ya Zibo.] Fa musipili wa ka o tatama, ni ka tabela ku mi bonisa libaka ha mu kona ku sepa lisepiso ze ze fumanwa mwa Bibele. Ka nako ye, mwendi mwa kona ku bala kauhanyo 2 mwa kopi ya mina ya buka.”
4 Ki wo mutahisezo o ne mu kana mwa lakaza ku itusisa kwa batu ba ba tengamezi kwa bulapeli:
◼ “Ne lu nze lu bulela ku bomuyahwa ni luna ka ku ama libaka ha ku na ni bulapeli bo buñata bo bu fapana-fapana mwa lifasi. Mwa Zambia fela, ku na ni likopano za bulapeli ze 96, ni ze fitelela 10,000 mwa lifasi kaufela. Niteñi, ku na ni Bibele i liñwi fela. Ka mo mu hupulela, ki kabakalañi ha ku na ni ku lyangana kwa bulapeli k’o? [Mu litele kalabo. Mu apule buka ya Zibo kwa kauhanyo 5, ni ku bala paragilafu 1.] Mu ka amuhela likalabo ze kolwisa ka ku bala kauhanyo ye. Ni ka tabela ku mi siyela yona buka haiba mwa lata ku i tatuba.” Haiba i amuhelwa, mu eze litukiso ze buniti za ku kutela teñi, ni ku bulela kuli: “Ha ni ka kuta, mwendi lu ka buhisana ka za haiba bulapeli kaufela ki linzila fela ze fapana ze liba kwa sibaka se si swana.”
5 Ha mu kutela ku y’o zwisezapili puhisano ka za libaka ha ku na ni bulapeli bo buñata hahulu, mwa kona ku bulela se:
◼ “Ha ne ni ambozi ni mina, ne ni buzize puzo ka za haiba bulapeli kaufela ki linzila fela ze fapahana ze libile kwa sibaka se si swana. Mu hupulañi ka za seo? [Mu litele kalabo.] Ni ka tabela ku mi bonisa mwa buka ye ne ni mi siyezi seo Jesu n’a bulezi fa taba yeo. [Mu apule kwa kauhanyo 5 mwa buka ya Zibo, ni ku bala maparagilafu 6-7, hamohocwalo ni Mateu 7:21-23.] Ne mu kana mwa komoka libaka ha ku li ko ku butokwa hahulu ku ziba luli seo tato ya Mulimu i li sona. Mu ka fumana kuli maparagilafu a tatama a na ni tuto ye tuna hahulu. Shangwe mu bale ze siyalezi za kauhanyo ye. Ha ni ka taha hape, ni ka tabela ku mi bonisa butokwa bwa ku ba ni zibo ye nepahezi ya Bibele.”
6 Muatumelelo o nongile hañata ki o kondisa mwa ku kalisa lituto za Bibele. Ki wo mukalisezo o akalelizwe o fa likepe 12 mwa buka ya “Reasoning”:
◼ “Ni til’o pota kuli ni fe tuto ya Bibele ya mahala. Haiba mu ni lumeleza, ni ka tabela ku itusisa fela mizuzu ye sikai ili ku bonisa ka m’o batu mwa linaha ze fitelela 200 ba buhisanela Bibele fa mandu ka likwata za mabasi. Lwa kona ku itusisa lifi kamba lifi za litaba ze sina mutomo wa puhisano. [Mu bonise mukoloko wa litaba mwa buka ya Zibo.] Ki ifi luli ye mi tabisa?” Mu mu litele a kete. Mu apule kwa kauhanyo ye ketilwe, ni ku kalisa tuto mwa paragilafu ya makalelo.
7 Ki wo muatumelelo o muñwi o nongile ili o kondisa o ne mu kana mwa lika mwa ku kalisa lituto:
◼ “Ni fa lituto za Bibele mahala mi ni sa na ni nako ya ku ituta ni baituti ba bañwi. Siitusiso sa tuto ya Bibele se ki sona se lu itusisa. [Mu bonise buka ya Zibo.] Butelele bwa tuto ki bwa likweli ze sikai fela mi i fa likalabo kwa lipuzo ze cwale ka: Ki kabakalañi Mulimu ha tuhelela manyando? Ki kabakalañi ha lu supala ni ku shwa? Ki sifi se si ezahala kwa balatiwa ba luna ba ba shwile? Ni lu kona cwañi ku sutelela ku Mulimu?” Cwale mu kupe kuli, “Kana na kona ku mi bonisa mo ku itutelwa?” Haiba tuto i haniwa, mu fe buka ya Zibo ni ku lukisa za ku kuta hasamulaho.
8 Ki sifumu se si butokwa hakalo sa zibo ye nepahezi ya ku ziba Mulimu ni Kreste ku mañi ni mañi ya ba ni yona! Ku ikungela yona ka buniti ku talusa bupilo bo bu sa feli mwa miinelo ye petehile. Ha lu itusiseñi sibaka kamukana se si fumaneha mwahal’a November ili ku abana ni ba bañwi zibo ye isa kwa bupilo bo bu sa feli.