Mu Itukiseze Mutahisezo wa Mina Tota wa Limagazini
1 Lwa itebuha limagazini za Tora ya ku Libelela ni Awake! kabakala litaba za zona za ka bunako ni ze luta, ili ze ama lika kaufela ze kalela ku za litaba ze tuna za lifasi ku isa ku “ze tungile za Mulimu.” (1 Makor. 2:10) Kaufel’a luna lwa hupula lika ze ñata ze nca ili ze yahisa ze lu balile mwa limagazini ze, zeo Jehova a sweli ku itusisa mwa ku patulula niti ka ku zwelapili. (Liprov. 4:18) Lu bata ku tukufalelwa ku li abela ka buñata ka mo ku konahalela kaufela.
2 Mu Tatubisise Kalulo ya Mina ya Simu: Ki batu ba ba cwañi ba ba pila mwa sibaka sa mina? Haiba kamita ki ba ba hemile, ne mu kana mwa tokwa ku itukiseza mutahisezo o mukuswani ili o nongile fa taba. Haiba mu na ni kalulo k’o ku si na batu ba ba hemile, ne mu kana mwa kona ku bulela ze ñata. Haiba buñata bwa bañi ba mandu ba sebeza mwahal’a musihali, ne mu kana mwa peta ze ñata ka ku ba potela fa mandu a bona ha se ku sikuluhile hahulu kamba ka ku itahanela manzibwana. Ne mu kana mwa bonana ni ba bañwi musihali ka bupaki bwa mwa likululu kamba ka ku ya fa sintolo ni sintolo. Bahasanyi ba bañwi ba fumana ze nde ka ku atumela batu ka ku tandalelwa mwa libaka mo ku yemisezwa limota ni mwa misika.
3 Mu Zibe Hande Limagazini: Mu bale musulo ni musulo ka bubebe mu man’o u amuhela. Mu kete litaba ze mu bona kuli li ka tabelwa ki batu mwa kalulo ya mina. Ki litaba mañi ze ba ama? Mu bate sisupo se si nongile fa taba seo mu kona ku ama ku sona mwa taba ye ñozwi yeo mu lela ku fitisa. Mu nahane ka za puzo ye mu kona ku buza kwa neku la ku tahisa cisehelo. Mu kete liñolo le li swanela la ku balela muñ’a ndu haiba mu fumana sibaka sa ku eza cwalo. Mu hupule ka mo mu ka konela ku toma mutomo wa ku eza musipili wa makutisezo.
4 Mu Itukiseze Manzwi a Mina a ku Kalisa: Mu kete ka tokomelo manzwi ao mu lela ku itusisa mwa ku itahisa ili mina ni ku kalisa ka ona puhisano. Ba bañwi ba petile se siñwi ka pulelo ye ya ku kwalula: “Ni balile taba ye tabisa hahulu mwa magazini ye, mi ni lakaza ku i abana ni ba bañwi.” Ba bañata ba kalisa ka puzo ye tomile fa sisupo sa ku ikambota ka sona se ba lela ku itusisa. Ka mutala:
5 Haiba mu koñomeka taba ye ama ku ata kwa bukebenga, ne mu ka buza kuli:
◼ “Ne ku ka tokwahala nto mañi kuli lu kone ku no lobalanga busihu ku si na sabo ya ku tukutwa kamba ku holofazwa?” Mu taluse kuli mu na ni litaba ka za tatululo kwa butata b’o. Tatululo i ka tuha i zwisa hape mufuta ni mufuta kaufela wa ku mbwenjuka kwa miinelo ya nyangela. Mu ame ku se siñwi mwa magazini ili se si fa sepo ye cwalo. Ha mu kutela teñi, mwa kona ku hohela mamelelo ya muñ’a ndu kwa kauhanyo 1 ya buka ya Zibo.
6 Ha mu fa taba ye ama bupilo bwa lubasi, ne mu kana mwa bulela se:
◼ “Bashemi ba bañata ba ku fumana ku ba ko ku t’ata hahulu ku uta lubasi mazazi a. Libuka ze ñata li ñozwi ka za taba yeo, kono nihaiba bocaziba ha ba lumelelani. Kana ku na ni yo muñwi ya kona ku fa ketelelo ye itingwa?” Mu abane maikuto a mañwi mwa magazini ili a bonisa kelezo ye butali ye fumanwa mwa Bibele. Ha mu kutela teñi, mu buhisane mihupulo ya mwa Mañolo ka za ku uta bana ye amilwe mwa buka ya Zibo, makepe 145-8.
7 Mwa ku fitisa taba ye ama butata bwa mwa nyangela, ne mu kana mwa bulela kuli:
◼ “Batu ba bañata ba ikutwa ku zingeha kabakala linako ze kayamanisa ze lu pila ku zona. Mu hupula kuli ki mwa n’a lelezi Mulimu kuli lu pile ona cwana?” Mu ame kwa taba ye bonisa ka mwa ku talimanela ni butata bwa kacenu kamba ye fa mabaka a ku talimela kwa nako ya kwapili mo ku si ke kwa ba ni lipilaelo. Fa musipili wa mina o tatama, mu buhisane siswaniso ni litaluso za sona fa makepe 4-5 a buka ya Zibo, mi cwale mu kenelele fela mwa tuto ya Bibele ya fa ndu.
8 Mu Cinca-Cince ka ku Ya ka Muñ’a Ndu: Mu ka fumana batu ba ba na ni licisehelo ni miinelo ye fapahana. Mu itukiseze mutahisezo o mutomo ili o mu ka kona ku cinca ku muñ’a ndu yo muñwi ni yo muñwi. Mu beye mwa munahano ka mo ne mu ka cinceza seo mu bulela ku munna, musali, mutu yo muhulu, kamba yo munca. Ha ku na milao ye sa sikuluhi ka za seo mu lukela ku bulela. Mu itusise sifi kamba sifi se si bulelwa hande ki mina mi ili se si tahisa se siñwi. Niteñi, mu be ni mafulofulo, mu bulele ka ku zwelela kwa pilu, mi mu be muteelezi yo munde. Ba ba na ni “mayemo a mande” ba ka lemuha buniti bwa mina mi ba ka nga muhato o munde.—Lik. 13:48, NW.
9 Mu Tusane: Ka ku abana hamoho mihupulo, lwa ituta linzila ze nca za ku bulela ka zona. Ku kuta-kutela mitahisezo hamoho kwa lu fa yeloseli ni buikolwiso. (Liprov. 27:17) Haiba mu lundulula seo mu ka yo bulela, mu ka lukuluha hahulu fa munyako. Ki kwa butokwa hahulu kuli bashemi ba be ni nako ya ku tusa bana ba bona kuli ba itukiseze, ku teeleza ha ba nze ba kuta-kutela mitahisezo ya bona, ni ku fa liakalezo kwa neku la zwelopili. Ba banca ba kona ku tuseha ka ku sebeza ni bahasanyi ba ba yeziseli hahulu.
10 Ku itukiseza mutahisezo wa mina tota wa limagazini ha ku swaneli ku ba t’ata. Ki taba ya ku beya fela nto ye ñwi mwa munahano ya ku bulela ili ye nongile fa taba mi cwale ni ku i talusa ka mukwa o tabisa. Ka ku nga muhato ni ku nahanela cimo, mwa kona ku tahisa mutahisezo o munde ili o ka tahisa muhato o munde.
11 Ku abela limagazini ki ye ñwi ya linzila za butokwa za ku hasanya ka zona lushango lwa Mubuso mwa bupala bwa lifasi. Haiba mu fa Tora ya ku Libelela ni Awake! mwa mazoho a batu ba ba buniti, limagazini za kona ku ipulelela. Kamita mu hupule butokwa bwa zona ni ka m’o lushango lwa zona lu kona ku puluseza bupilo. Ona mufuta wo wa “ku eza ba bañwi hande, ni ku fana” ki sona se si tabisa hahulu Jehova.—Maheb. 13:16.