Linzila za ku Kondolokisa ku Kutaza Mubuso kwa Luna

¹ Musebezi wa luna wa ku kutaza ki wa ka putako hahulu cwale ku fita ka mo ne ku inezi kwamulaho. Ka za haiba batu ba ka pila kamba ku shwa seo si ka itinga fa muhato wa bona kwa neku la taba ye nde. (1 Pit. 4:5, 6, 17; Sin. 14:6, 7) Ka lona libaka leo kamita lu swanela ku bata linzila za ku kondolokisa ku kutaza Mubuso kwa luna. Ki lifi linzila ze ñwi za ku kondolokisa lika ka zona?

² Mu Itukiseze Hande: Ka ku itusisa musulo wa cwale wa Bukombwa bwa Luna bwa Mubuso, mu kete mutahisezo o mu ikutwa kuli u ka hoha cisehelo ya batu ba bañata mwa kalulo ya mina. Ki kwa butokwa ku tahisa kuli manzwi a mina a swalisane ni miinelo ya fa sibaka. Kamba ne mu kana mwa tabela ku itukiseza mutahisezo wa mina tota, ka ku itusisa mihupulo ni litaba za mwa Mañolo zeo mina ka butu se mu li fumani ku ba ze buanyu. Ne mu ka tokwa mukalisezo o hoha cisehelo. (Mu bone buka ya Reasoning, makepe 9-15.) Mwendi mu lelile ku buza puzo ye tahisa nahanisiso kamba ku kupa maikuto a muñ’a ndu fa taba ye ñwi ya mwa makande a fa sibaka ili ye hoha cisehelo. Ha se mu beile mutahisezo wa mina mwa munahano, mu itwaeze ona ni silama wa mwa lubasi kamba muhasanyi yo muñwi ili y’o a kona ku fa liakalezo mwa ku u kondolokisa.

³ Mu Ambolisane ni Batu: Mulelo wa luna ki ku fitisa lushango lwa butokwa. Seo si kona ku eziwa ka ku kenya muteelezi wa luna mwa puhisano ye mulelo. Haiba muñ’a ndu u fita fa ku hanyeza kamba u tahisa muhupulo wa hae, mu teeleze ka tokomelo ku seo a na ni ku si bulela. Maikuto a hae a ka mi tusa ku fa kalabo ya mwa Mañolo kwa neku la sepo ye ku mina. (1 Pit. 3:15) Haiba mubonelo wa hae ha u lumelelani ni wa mwa Bibele, ka butali ne mu kana mwa bulela kuli: “Batu ba bañata ba ikutwa sina ka mo mu ikutwela. Niteñi, ki ye nzila ye ñwi ya ku talima ka yona taba ye.” Cwale mu bale liñolo le li swanela, mi mu mu buze ka za maikuto a hae.

⁴ Mu Be ni Tomahanyo ye Kona ku Cinciwa: Ku ba y’a itukiselize hande ki nto ya butokwa bo bunyinyani fela haiba ha lu koni ku bulela kwa batu. Kacenu ki nto ye atile ku fumana bañi ba mandu ba sikai fela fa lapa muta lu pota. Haiba kona mo li inezi lika mwa kalulo ya mina, mu like ku cinca tomahanyo ya mina ilikuli mu kone ku sebeza fa ndu ni ndu ka nako yeo batu ba fumaneha fa lapa. Ne mu kana mwa fumana kuli nako ye nde ka ku fitisisa mwa ku pota ki kwa mafelelezo a viki; ba bañwi ne ba kana ba fumaneha ni ku fita mwahal’a viki kono ili mwa lihora za manzibwaninyana. Mwa likalulo ze ñwi bahasanyi ba fumana kuli kw’a tusa ku fa bupaki mwa mazazi a lipumulo za silifasi kakuli ba fumana batu ba bañata ni ku fita fa lapa. Batu ka nañungelele ba mwa muinelo wa mombela mi ne ba kana ba itatela ku buhisana ni ku fita ka linako ze cwalo. Neikaba ko kunde ku cinca mutahisezo wa mina kuli u swalisane ni muinelo mi cwale ni ku kopanya lipulelo za mina ni taba ya mwa Mañolo.

⁵ Mu Tatubisise Buanyu bwa Mutahisezo wa Mina: Hamulaho wa ku siya munyako o muñwi ni o muñwi, mu ipuze kuli: ‘Kana ne ni fitile kwa pilu ya muñ’a ndu? Kana ne ni mu susuelize ku ipulelela ka tukuluho ni ku fa mamelelo ku seo n’a na ni ku si bulela? Kana ne ni alabile ka butali? Ka ku beya mwa munahano miinelo, kana ne ni itusisize muatumelelo o munde ka ku fitisisa?’ Ne ku kana kwa ba ko ku tusa ku sebeza ni muhasanyi ya cuukile kamba paina ka linako ze ñwi ni ku teeleza ka tokomelo kwa mitahisezo ya hae ka mulelo wa ku kondolokisa buanyu bwa mina mwa bukombwa.

⁶ Haiba mu na ni buikoneli mwa musebezi wa mina, mu ka kona ku abana liniti za Mubuso ze ka tahisa kuli mu ‘ipilise, ni ku pilisa ba ba mi utwa.’—1 Tim. 4:16; Liprov. 22:29.