Mu Lute Ba Bañwi Z’a Tokwa Mulimu
1 Batu ba bañata ba sa konwa ku fumaneha ili ba ba shwa tala ya kwa moya ya “ku utwa manzwi a [Jehova, NW].” (Am. 8:11) Hailif’o ba bañwi ba ba lumela kuli Mulimu u teñi, ha ba zibi mulelo wa hae ni zeo a tokwa. Kacwalo, ku na ni tokwahalo kwa neku la luna ya ku ba luta niti ya Mubuso ye punyusa bupilo. Ka ku ipakanya ni ku itukiseza hande ku fa bupaki fo ku fumanelwa fela sibaka, lwa kona ku fita ku bao ba ba bata ku ituta z’a tokwa Jehova.
2 Mwa April ni May, lu ka ba ni misulo ya ka bunako hahulu ya Tora ya ku Libelela ni Awake! ya ku abela. Ka ku ekeza, lwa pili, lu ka fa broshuwa ya Ki Sifi Seo Mulimu A Tokwa ku Luna? Maswaniso a yona a’ buheha ni lipuzo ze tahisa ku nahana li bisa yona broshuwa ye ku ba ye tabelwa hahulu. Liakalezo ze latelela li filwe ku lu tusa ku itusisa ka buanyu lihatiso za luna ze nde ka ku fitisisa.
3 Ku Bata Batu: Mwa libaka m’o batu ba bañata ba sa fumanehi fa mandu ha lu ya fa ndu ni ndu, ku bonahala ku ba ko ku tusa ku bata ni ku ambola ni batu kai ni kai ko ba fumaneha. Ñambeko ya Bukombwa bwa Luna bwa Mubuso bwa September 1996, ne i lu susuelize ku kutaza taba ye nde kai ni kai—mwa makululu, mwa litanansipoti za nyangela, ni mwa libaka ze buheha, mo ku yemisezwa limota, ni mwa libaka za lipisinisi. Hape ne i lu lemusize ka za tokwahalo ya ku tahisa miinelo ya ku kutaza ka ku tandalelwa. Ka ku ba mutala wa seo, kaizeli ya li paina n’a ile ko ku utelwa lifolofolo mi n’a shimbile limagazini ze ñata za Awake! ya August 8, 1996, ye na ni litaba za ka ku tatamana za “Endangered Species—Why Be Concerned?” Mwahal’a hora i liñwi fela, n’a file likopi ze 40 kwa batu ba ba itebuha ni ku lata hahulu lifolofolo! Kacwalo ki ku kondisa lika kufi ko se mu ikozi mwa ku kutaza taba ye nde kai ni kai? Tora ya ku Libelela ni Awake! hamohocwalo ni broshuwa ya Seo A Tokwa li swanela mwa mifuta kamukana ya ku fa bupaki, bakeñisa kuli li fa litaba ze ama bupilo bwa batu mi li zusulusa buikoneli bwa ku nahana.
4 Ku Kalisa Lipuhisano: Likepe la kwamulaho la Bukombwa bwa Luna bwa October 1996 li fa litaba ka mwa ku itukiseza muatumelelo wa mina ka limagazini za Tora ya ku Libelela ni Awake! Liakalezo ze swana li ka sebeza hande ha mu itukiseza mutahisezo wa mina wa broshuwa ya Seo A Tokwa. Se lu bulela si kona ku ba sa makutelakaufi ka manzwi a sikai kamba a matelelenyana ili a kopanyeleza muhupulo wa mwa Mañolo. Ki kwa butokwa ku keta manzwi a makalelo ka tokomelo, bakeñisa kuli a ka taluhanya ka za haiba mutu ye lu atumela u ka zwelapili ku teeleza. Ba bañwi se ba kondisize lika ka manzwi a makalelo a cwale ka a: “Ni balile taba ye ni susuelize, mi ni bata ku i abana ni mina.” Kamba puzo ye tahisa cisehelo i kona ku buziwa ili ku tahisa kuli mutu yo muñwi a kene mwa puhisano.
5 Haiba ki ko ku swanela mwa kalulo ya mina, ne mu kana mwa lika ku buza lipuzo ze swana ni ze latelela mwa mitahisezo ya mina kweli ye:
◼ “Kacenu lu bona ku ñolwa-ñolwa kwa fa mamota, manyalala, ni silafalo ze ñata hahulu. Ku ka tokwahalañi kuli lifasi-mubu li keniswe ni ku li bisa sibaka se sinde ni ku fita sa ku pila teñi”? Mu libelele kalabo, mi cwale mu taluse kuli mu na ni litaba ze lu kolwisa ka za m’o ni f’o lifasi-mubu li ka fita fa ku ba simu ya mwa lifasi kamukana. Mu abane maikuto a nongile fa taba, liñolo la makutelakaufi, ni siswaniso se si buheha ku zwelela mwa magazini ya cwale, mi cwale mu i fe ku mutu kuli a ipalele yona. Mu taluse za tukiso ya ñoliso. Pili mu si ka feza kale puhisano, mu like ku lukisa za ku t’o i zwisezapili ka nako ye ñwi.
◼ “Kana mu nahana kuli Mulimu n’a lelile kuli lu pile mwa butata bo bu cwale ka bo lu talimani ni bona kacenu?” Ha sa alabile puzo yeo, ne mu kana mwa bulela kuli: “Ku si na kuli cwañi mwa ziba tapelo yeo Jesu n’a lutile balateleli ba hae ku lapela, ili ku kupa Mubuso wa Mulimu kuli u tahe. Kana se mu kile mwa nahana kuli ki sifi seo Mubuso wa Mulimu u li sona luli?” Mu apule kwa tuto 6 mwa broshuwa ya Seo A Tokwa, mi mu bale lipuzo ze buzizwe kwa makalelo a tuto. Cwale, ha mu nze mu bala paragilafu 1, mu bulele kalabo ya puzo ya pili. Mu taluse kuli buñata bwa lipuzo li alabiwa fela ka bukuswani. Mu fe broshuwa mi mu ikatulele za ku t’o kopana hape kuli mu abane litaba ze ñwi ka za Mubuso.
◼ “Batu ba bañata ba ba nahana se ba kalisa k’u nga bulapeli bwa lifasi ku ba bona bo bu tisa butata bwa batu ku fita ku ba bo bu tatulula. Mu nahanañi ka za seo?” Ha se mu teelelize kwa mubonelo wa mutu, mu bonise se siñwi ku zwelela ku ye ñwi ya limagazini za cwale ili se si kona ku hoha cisehelo ya hae ka za ku palelwa kwa bulapeli bwa buhata kamba ku atumela ku wa kwa bona. Mu buze ka za haiba n’a ka tabela ku i bala. Mu zibane mabizo, mi mu ikatulele kuli mu kopane hape ilikuli mu kone ku talusa ka m’o ku bezi kuli bulapeli bwa niti ha bu si ka palelwa ku tusa mufuta wa mutu. Mu like ka t’ata ku fumana ñoliso ya Tora ya ku Libelela.
◼ “Ka ku ba ni matata a mañata cwalo mwa bupilo bwa lubasi kacenu, kana se mu kile mwa nahana ka za se si li sinotolo kwa ku fumana tabo ya lubasi?” Mu libelele kalabo, cwale mu taluse kuli mwa Bibele, Mulimu u patulula sinotolo sakata sa tabo ya lubasi. Mwendi ne mu kana mwa bala Isaya 48:17. Cwale mu apule kwa tuto 8 mwa broshuwa ya Seo A Tokwa, mi mu ame kwa mañolo a mañwi a Bibele a’ ñozwi ili a fa ketelelo ye konwa ku itingiwa ki silama yo muñwi ni yo muñwi wa lubasi. Mu bale mukoloko wa lipuzo kwa makalelo a tuto. Mu buze ka za haiba mutu y’o na ka tabela ku bala likalabo. Mu ikatulele kuli mu ta kutela teñi nako ye ñwi ku t’o abana ze ñata za ketelelo ye sebeza yeo Bibele i na ni yona kwa neku la tabo ya bupilo bwa lubasi.
6 Se si tokwahala hahulu kwa mufuta wa mutu ki ku ituta seo Mulimu a tokwa mi cwale ni ku si eza. (Makolo. 1:9, 10) Lu ka tusa hahulu ba bañwi mwahal’a April ni May haiba lu kalisa ku ba luta seo lu ziba ka z’a tokwa Jehova kwa neku la bupilo.—1 Makor. 9:23.