Mu Likanyise Jehova ka ku Babalela ba Bañwi ka Buniti
1 Jehova ki mutala o mutuna ka ku fitisisa wa mutu ya bonisa pabalelo ye buniti ku ba bañwi. Ka ku ba Mubusi wa Pupo Kamukana, u na ni maikuto kwa neku la litokwahalo za libupiwa za hae za butu. (1 Pit. 5:7) Jesu n’a susuelize balutiwa ba hae kuli ba bonise tulemeno twa Ndat’ahe, ili ya pazuliseza lizazi ni ku neliseza pula batu ba bande ni ba ba maswe. (Mat. 5:45) Mwa kona ku likanyisa Jehova ka ku bonisa buiyakato bo bu buniti ku ba bañwi—ka ku itukiseza ku abana lushango lwa Mubuso ni mutu kaufela yo mu katana ni yena. Ka ku twaelana hande ka ku tala ni mabroshuwa a ka itusiswa mwa bukombwa mwahal’a July, mu ka ba mwa mayemo a mande a ku fa tuso ya kwa moya ku ba bañwi. Liakalezo ze latelela li fa mihupulo ye miñwi ili ka m’o ne mu kana mwa itukiseleza kwa neku la ku pota kwa pili mi cwale ni ku ndongwama cisehelo ka misipili ya makutisezo ya ka bunako.
2 Ha mu fa broshuwa ya “Kana Mulimu Wa L’u Nga Luli Sina Batu ba Butokwa?” ne mu ka bulela cwana:
◼ “Kana se mu kile mwa buza kuli ki kabakalañi Mulimu ha tuhelezi batu kuli ba nyande haiba luli wa ba babalela? [Mu litele kalabo.] Broshuwa ye ha i fi fela kalabo ye kolwisa kwa puzo y’e kono hape i bonisa kuli Mulimu u sepisize ku felisa ku pongana kaufela k’o mutu a tisize ku ili yena ni lihae la hae la lifasi-mubu.” Mu bale paragilafu 23 fa likepe 27. Mu bonise siswaniso se si kwatas’a yona, mi mu bale Samu 145:16 mwa paragilafu 22. Mu fe broshuwa. Haiba i amuhelwa, mu buze puzo ye konwa ku alabiwa fa musipili o tatama, ye cwale ka ye: Kana ne mu ka tabela ku ziba ka m’o Mulimu a ka petela mulelo wa hae wa ku tahisa limbuyoti kwa mufuta wa mutu ni ku fetula lifasi-mubu ku ba paradaisi?”
3 Ha mu kutela ku be ne mu siyezi broshuwa ya “Kana Mulimu Wa L’u Nga Luli Sina Batu ba Butokwa?” ne mu kana mwa kalisa puhisano ye ñwi cwana:
◼ “Ha ne ni potile nako ye felile, ne lu nyakisisize kuli Mulimu wa lu babalela luli ni kuli ki mulelo wa hae kuli a felise ku pongana kaufela k’o mutu a tisize ku ili yena ni kwa lihae la hae la lifasi-mubu.” Mu apule broshuwa kwa siswaniso se si fa makepe 2-3 ni ku bulela kuli: “Ne lu ciñekelize puhisano ya luna ka puzo ye li, Mulimu u peta cwañi mulelo wa hae wa ku tahisa limbuyoti kwa mufuta wa mutu ni ku fetula lifasi-mubu ku ba paradaisi? Mina mu hupula cwañi?” Mu litele kalabo. Mu apule kwa likepe 17, mi mu bale paragilafu 2 ni Daniele 2:44. Hasamulaho wa fo, mu bale paragilafu 12 fa likepe 18. Mu buze muña ndu haiba n’a ka tabela ku nyakisisa ni mina kalulo 9 ya broshuwa. Haiba a lumela, mu itute yona ni yena.
4 Ki wo muatumelelo o ne u kana wa itusiswa mwa ku fa broshuwa ya “Muta Mutu Yo Mu Lata H’a Timela.” Mu bonise likepe la fahalimu la yona ni ku bulela kuli:
◼ “Kacenu lu sweli ku abana broshuwa ye ye tahisize ku omba-omba ni sepo ku bolule-lule ba batu ba ba latehezwi ki balatiwa ba bona ka lifu. Kana se mu kile mwa buza kuli ki sepo mañi ye li kwa neku la bafu? [Mu litele kalabo.] Bibele i bulela hande ka ku utwahala ka za sepiso ya Mulimu ya zuho.” Mu bale Joani 5:28, 29. Mu apule broshuwa ni ku talusa fa lisupo ze filwe mwa paragilafu ya mafelelezo fa likepe 28 ni paragilafu ya pili fa likepe 31. Mu bonise maswaniso a swalisana ni kalulo yeo. Mu fe broshuwa. Mwa kona ku lukisa nzila kwa neku la musipili wa makutisezo ka ku buza kuli, “Lu ka kona ku ikolwisa cwañi ka za kuli lifu li ta be li felisizwe ka ku tala kwa nalulelule?”
5 Ne mu kana mwa bata ku itusisa mutahisezo wo fa musipili wa makutisezo ko ne mu siyalisize broshuwa ya “Muta Mutu Yo Mu Lata H’a Timela”:
◼ “Ha ne lu bulelisani pili, ne lu buhisani ka za sepo ye makaza ya zuho. Broshuwa ye ne ni mi siyezi i talusa libaka ha lu kona ku ikolwisa kuli kwa nalulelule lifu li ta be li felisizwe ka ku tala. Kana ha mu si ka fumana lisepiso za Mulimu ku ba ze omba-omba ni ze kolwisa?” Mu litele kalabo. Cwale mu apule kwa likepe 31 mwa broshuwa, mi mu bale paragilafu ya bubeli ni ya bulalu, hamohocwalo ni Sinulo 21:1-4. Mu koñomeke tibelelo ye lu na ni yona ya ku ikola bupilo ku si na ku shwa ni kamuta. Ka ku itinga fa cisehelo ye bonisizwe ni miinelo ya ka nako yeo, ne mu kana mwa fa tuto ya Bibele mwa buka ya Zibo kamba ku buza puzo ye ñwi ya ku kwalula ka yona nzila kwa neku la musipili o tatama wa makutisezo.
6 Ne mu kana mwa bulela ze latelela ha mu tahisa broshuwa ya “Mulelo wa Bupilo ki Ufi—Mu Kona Ku U Fumana Cwañi?”:
◼ “Batu ba bañata ba se ba buzize ka za seo mulelo wa bupilo u li sona. Ba ipuzize kuli: ‘Ki kabakalañi ha ni li teñi fa? Ki kai ko ni libile? Ki sika mañi se ni libelezi mwa nako ya kwapili?’ Mu hupula kuli ki kai ko lu kona ku fumana likalabo? [Mu litele kalabo.] Mu lemuhe seo Bibele i si bulela. [Mu bale Samu 36:9.] Kana haki ko ku utwahala hande ku fita fa mafelelezo a kuli mubupi wa mutu ki ya li mwa mayemo a mande ka ku fitisisa a ku talusa libaka ha lu li teñi fa? [Mu libelele kalabo.] Broshuwa ye i bonisa mulelo o makaza ili w’o Mulimu a lu bulukezi wona.” Mu apule kwa makepe 20-1, mu bale litaluso za siswaniso, mi mu bulele ka za siswaniso; mi cwale mu fe broshuwa. Haiba i amuhelwa, mu buze kuli: “Lu kona ku ikolwisa cwañi kuli isali mulelo wa Mulimu kwa neku la batu kuli ba pile ku ya ku ile mwa Paradaisi fa lifasi-mubu?” Mu tomahanye nako ya ku kutela teñi.
7 Haiba broshuwa ya “Mulelo wa Bupilo ki Ufi—Mu Kona Ku U Fumana Cwañi?” i siilwe, ne mu kana mwa bulela sina cwana ha mu kutela teñi:
◼ “Fa musipili wa ka wa kwamulaho, ne ni ikozi luli ku ambolisana ni mina ka za mubonelo wa Bibele kuli bupilo bwa mutu bu na ni mulelo luli.” Mu bonise siswaniso fa likepe 31 ni ku buza kuli, “Lu ka kona ku ikolwisa cwañi kuli isali mulelo wa Mulimu kuli batu ba na ni ku pila ku ya ku ile mwa Paradaisi fa lifasi-mubu?” Mu bale paragilafu 3 fa likepe 20. Mu buhisane lisupo ze mwatas’a tohonyana ya taba ye li, “Mulelo wa Mulimu u Sa Li Teñi,” fa likepe 21. Mu apule kwa likepe la mafelelezo la fahalimu la broshuwa, mi mu bale ka za memo ya tuto ya Bibele ya mwa ndu ye sa lifelwi. Mu tahise buka ya Zibo, mi mu itatele ku bonisa ka m’o lu itusiseza yona sina siitusiso kwa ku ituta Bibele.
8 Bukombwa bwa luna bu swanela ku bonisa cisehelo ye buniti ye lu na ni yona mwa ku tusa ba lipilu ze nde kuli ba “fite fa zibo ya ku ziba niti.” (1 Tim. 2:4) Kacwalo, mu tomahanye nako mwa sebelezo ya mina ya ku kutela ku mutu ni mutu yo mu siyezi broshuwa. Ku bonisa kwa mina buiyakato bwa luli ku bona ne ku kana kwa tahisa tuso ku bao ba ba tonga ni ku utwa butuku kabakala lika ze masila ze eziwa mwa bulapeli bwa buhata ilikuli ba fite fa ku ketahanyezwa kwa neku la puluso. (Ezek. 9:4, 6) Hape mu ka fumana tabo ni munyaka ze zwa mwa ku ziba kuli mwa likanyisa Jehova ka ku babalela ba bañwi ka buniti.—Mu bapanye Mafilipi 2:20.