Mu Bonise Mamelelo ye Buniti kwa Cisehelo Kaufela ye Fumanwi
1 Ku shaelwa kwa Mubuso mwa lifasi kamukana ku ka tuha ku fita fa mafelelezo, hamulaho wa f’o bao kaufela “ba ba sa zibi Mulimu” ba ka timezwa. (2 Mates. 1:7-9) Kacwalo, mamelelo ye buniti kwa neku la bupilo bwa ba bañwi i susueza batu ba Jehova ku fita kwa batu ba bañata ka mo ku konahalela kaufela ka lushango lwa Mubuso.—Zef. 2:3.
2 Ka kweli ni kweli, lihora ze eza bolule-lule li itusiswa mwa ku bata ba ba bata ku utwa “litaba ze nde.” (Is. 52:7) Ka k’u nga muhato kwa libuka ze sweli ku fiwa cwale, ba bañwi se ba ezize ñoliso ya Tora ya ku Libelela, mi ba bañata se ba amuhezi likopi za Tora ya ku Libelela ni Awake! kamba broshuwa ya Ki Sifi Seo Mulimu A Tokwa ku Luna? Mamelelo ye buniti kwa batu bao i swanela ku lu susueza ku latelela cisehelo kaufela ye fumanwi.—Liprov. 3:27.
3 Mu Buluke ze Ñozwi ze Nepahezi: Ze ñata li ka petiwa haiba mu buluka ze ñozwi ze kwanile ili ze nepahezi za cisehelo ni ze siilwe. Litaba ze cwale ka libizo ni keyala ya muñ’a ndu, lizazi ni nako ye ne mu potile, libuka ze siilwe, ni taba ye ne buhisanwi li ka mi tusa kuli mu be ni buanyu ha mu kutela teñi. Hape, haiba m’u ñola maikuto a na filwe ki muñ’a ndu fa ngambolo ya mina ya makalelo, ne mu kana mwa kona ku ama ku ona ka buanyu ha mu kalisa sinca puhisano ha mu kutela teñi.
4 Mu Be ni Kazatu mwa ku Eza Misipili ya Makutisezo: Ki ba ba kai ku be ne ba amuhezi libuka ku mina kweli ye felile be mu likile ku potela hape? Kana liviki ze ñata se li fitile ku si na ku bonana ko kuñwi? Mamelelo ye buniti kwa neku la muinelo wa bona wa ku ya ku ile i swanela ku mi susueza ku kutela ku bona ka bubebe ka mo ku konahalela kaufela, sihulu-hulu mwahal’a mazazi fela a sikai, ilikuli puhisano i kone ku ba ye sa hupulwa ka bunolo. Ka ku kutela teñi ka kazatu ku yo zwisezapili cisehelo ya bona, ne mu kana mwa kona ku paleliswa buikatazo bwa Satani pili a si ka ‘pakisa ku taha ku to feza linzwi le li calilwe ku bona.’—Mare. 4:15.
5 Ku Itukiseza ki kwa Butokwa Hahulu: Buanyu bwa mina mwa ku eza misipili ya makutisezo bu itingile ka mo mu itukiseza hande. Mu lele muatumelo wa mina pili mu si ka funduka kale. Likepe la mafelelezo la Bukombwa bwa Luna bwa Mubuso bwa April 1997 li fa mitahisezo i sikai ye ne kana ya itusiswa ka ku kondisa hande lika ha mu fa limagazini kamba broshuwa ya Seo A Tokwa. Nto ye tatama ki ku ba ni mihupulo ye miñwi mwa munahano ya ku abana ha mu kutela teñi. Ki sifi se si konwa ku bulelwa ha mu kutela ko ku fumanwi cisehelo? Tuto ya Bibele i konwa ku kaliswa cwañi? Ne mu kana mwa lika liakalezo ze.
6 Ha mu ama kwa puhisano ya se si tokwahala ku eziwa kuli lifasi-mubu li keniswe ni ku li bisa sibaka se sinde sa ku pila teñi, ne mu kana mwa bulela kuli:
◼ “Fa musipili wa ka o felile, ne lu lumelelani kuli mihato ye mituna i tokwa ku eziwa pili lifasi-mubu li si ka eziwa kale paradaisi ye na ni kozo. Kana mu nahana kuli batu ba na ni se si tokwahala kuli musebezi wo u petiwe? [Mu litele kalabo.] Shangwe ha mu lemuhe libaka ha ku ka ba kwa butokwa hahulu kwa neku la Mulimu ku ikenya mwa litaba za mutu.” Mu bale Samu 37:38. Cwale mu apule kwa tuto 5 mwa broshuwa ya Seo A Tokwa, mi mu itusise likalulo ze ketilwe za liparagilafu 4-5 ku bonisa ka m’o Mulimu a ka taleleza bupolofita b’o. Mu zwelepili ka ku fa tuto ya Bibele ka ku itusisa broshuwa yeo.
7 Haiba ne mu buhisani ka za Mubuso wa Mulimu mi ne mu siile broshuwa ya “Seo A Tokwa” fa musipili wa makalelo, ha mu kutela teñi ne mu kana mwa bulela nto ye cwale ka ye:
◼ “Ha ne lu ambozi nako ye felile, ne lu boni kuli Mubuso wa Mulimu ki mulonga luli o ka busa lifasi-mubu kamukana. Bibele i bonisa kuli Jesu Kreste u ka ba mubusi wa ona. Kana mwa kona ku bona lituso ze ñwi za ku ba ni mulonga ni mubusi ya cwalo?” Mu litele kalabo. Mu apule broshuwa ya Seo A Tokwa kwa tuto 6. Ka ku itusisa lisupo ze ketilwe mwa maparagilafu 6-7 ni siswaniso se si fa likepe 13, mu bonise seo Mubuso wa Mulimu u ka ezeza mufuta wa mutu mwa nako ya kwapili. Mu bale Daniele 2:44, mi haiba ku lukela, mu tahise buka ya Zibo ni ku fa tuto ya Bibele.
8 Haiba ne mu fumani mutu ya lumela kuli bulapeli bwa lifasi bu tahisize butata kwa mufuta wa mutu, ne mu kana mwa buza se fa musipili wa makutisezo:
◼ “Kana mu kile mwa singanyeka ka za mo lu kona ku zibela bulapeli bo bu lumelelwa ki Mulimu? [Mu litele kalabo.] Broshuwa ye ya Ki Sifi Seo Mulimu A Tokwa ku Luna? i bonisa lisupo za bulapeli bwa niti.” Mu apule kwa tuto 13, mi mu koñomeke lisupo ze ketalizoho ze mwa miñolo ye siyami mwa maparagilafu 3-7. Ne mu kana mwa zwelapili ka ku bulela kuli: “Fahalimw’a ku fumana bulapeli bwa niti, lu lukela ku ziba seo Mulimu a tokwa ku luna ka butu.” Mu bale Joa. 4:23, 24. Mu taluse kuli mu ka tabela ku buhisana seo hape. Mu apule kwa tuto 1 mwa broshuwa, mi mu bonise ka mo lu itutela yona.
9 Ha mu kutela ku yo zwisezapili puhisano ya za tabo ya lubasi, ne mu kana mwa bulela nto ye swana ni ye latelela:
◼ “Ha ne lu kopani lwa pili, ne ni abani ni mina sinotolo sa tabo ya lubasi, ili ku sebelisa kelezo ye fumanwa mwa Linzwi la Mulimu, Bibele. Ha ku amiwa za ku fa mamelelo kwa butokwi bwa lubasi lwa mwa nako ya cwale, kana mwa lumela kuli Bibele ki ya kale kamba ya zamaelela ni miinelo ya cwale?” Mu litele kalabo. Mu tahise buka ya Zibo. Mu apule kwa kauhanyo 2, mi mu bale ze amilwe mwa paragilafu 13. Ka ku itusisa lisupo ze mwa paragilafu 3, mu fe tuto ya Bibele ya lubasi.
10 Ka ku buluka ze ñozwi ze nepahezi, ku eza buitukisezo bwa butokwa hahulu, ni ku kutela ka kazatu ku yo zwisezapili cisehelo ya bona lwa kona ku bonisa mufuta wa lilato la ku lata muyahwa ni yena le li ka ba hohela kwa nzila ya puluso.—Mat. 22:39; Magal. 6:10.