Mu Be ni Tabo mwa ku Fa Bupaki bo bu Tezi
1 Kaufel’a luna lu ikolanga ku eza lika ze lu ziba ku eza hande. Mareka 7:37 i bulela kuli nyangela ne i bulezi ka za Jesu kuli: “Linto z’a eza kaufela wa li kondisa.” Ha ku komokisi Jesu ha n’a tabela ku eza tato ya Jehova! (Mu bapanye Samu 40:8.) Ka ku nahanisisa ka za liakalezo ze latelela, ni luna lu ka fumana tabo ha lu nze lu utwa taelo ya Jesu ya “ku bulelela sicaba, ni ku paka.” (Lik. 10:42) Ka January lu ka fa buka ifi kamba ifi ya makepe a’ 192 ye hatisizwe pili 1985 i si ka fita kale ili yeo puteho i kana ya ba ni yona mwa pulukelo kamba libuka za Mankind’s Search ni Mutu yo Mutuna. Lu kona cwañi ku itusisa zona lihatiso zeo kuli lu fe bupaki bo bu tezi?
2 Ka ku ba kuli batu hañata ba b’a nga ba ba hupula ka za buikangulo, mu kana mwa bulela kuli:
◼ Ku si na taba ni lipetahalo ze ezizwe mwa kalulo ya za milyani, manyando ki a mañata kabakala makulanu. Ka mubonelo wa mina, ki kabakalañi ha ku li cwalo? [Mu litele kalabo.] Jesu Kreste n’a bulezi kuli matuku a’ yambukela neikaba sisupo sa mazazi a maungulelo. (Lu. 21:11) Niteñi, Bibele hape i bulela ka za nako f’o ku kula ku si ke kwa ba teñi. [Mu bale Isaya 33:24.] Ha mu bone ka mo buka ye i susueleza sepo ku yona tuto ye mutomo yeo.” Mu bonise lisupo ze swanela mwa buka yeo mu bonisa, mi mu i fe.
3 Ha mu fa bupaki bwa ku tandalelwa bukaufi ni libaka za mileko, mu kana mwa lumelisa ni ku buza kuli:
◼ “Kana mu bona kuli lika li zamaya li tula hahulu mazazi a kuli ku t’ata ku li kwanisa? [Mu litele kalabo.] Kana mu hupula kuli ni kamuta nako ikaba teñi fo ku si ke kwa ba ni butata ka za mali?” Mu litele kalabo. Mi mu bonise Liñolo le li swanela ku zwelela mwa buka ye mu fa. Mu zwelepili ka ku bulela kuli: “Buka ye i bonisa ka mo, ka Mubuso wa hae, Mulimu a ka tatululela butata bo bu tatafalisa bupilo kacenu.” Mu fe buka. Mu kana mwa bulela ka mo mu ikolezi puhisano mi cwale mu buze kuli: “Kana ku na ni nzila ka mo lu kona ku zwelapili mwa puhisano ye ka nako ye ñwi?” Ka nzila yeo mu kona k’u nga nombolo ya luwaile kamba keyala ya mutu y’o.
4 Hamulaho wa ku italusa, mu kana mwa bulela kuli:
◼ “Ka ku ba teñi kwa bulapeli bo buñata kacenu, kana se mu kile mwa nahana ka za mo lu kona ku zibela kuli bulapeli bwa luna bu na ni tumelezo ya Mulimu? [Mu litele kalabo, mi mu bonise siswaniso se si fa likepe 13 la buka ya Mankind’s Search for God.] Siswaniso se si bonisa kalulo yeo bulapeli bu bile ni bona mwa lindwa ze ñata ze sinyize mufuta wa mutu ni ku tisa manyando a matuna. [Mu bale Mateu 7:17-20, ku zwelela mwa paragilafu 19. Mi cwale mu bale manzwi a zamaelela ni siswaniso.] Ka ku ya ka ze lu bona mwa bulapeli ni ka swanisezo ya n’a file Jesu, lu kona ku fita fa mafelelezo a kuli muzamao wa mutu ni mutu, ka mo ku inezi u ka bonisa ka butuna kamba ka bunyinyani, bulapeli bwa hulezi ku bona. Kacwalo, ku nyakisisa kwa buka ye kwa ku bata Mulimu kwa mufuta wa mutu ka bulapeli bo bu mwa lifasi ku lukela ku tusa mwa ku alaba lipuzo za mina ze ñwi.” Mu fe buka.—Kuli mu fumane linzila ze ñwi za ku fa buka ya Mankind’s Search, mu bone likepe la mafelelezo la Bukombwa bwa Luna bwa Mubuso bwa June 1992. Ka za buka ya Mutu yo Mutuna, mu bone likepe 4 la Bukombwa bwa Luna bwa June 1993.
5 Ha mu kutela ku yo bona ba ba bonisize cisehelo, mu kona ku lika ku kala tuto ya Bibele ka ku itusisa muatumelo wo:
◼ “Nako ye felile ha ne lu ambozi, ne mu fitisize maikuto a mande. [Mu bulele maikuto ao mutu yo n’a fitisize.] Ne ni nze ni nahana ka za teñi, mi ne ni ka tabela ku abana ni mina ze ni fumani mwa patisiso ye ni ezize ka za yona taba yeo. [Mu abane liñolo le li swanela.] Lu fanga ku zamaisa tuto ya Bibele ye sa lifelwi ili ye tusize bolule-lule ba batu ku fumana lituto ze mutomo za Bibele mwa nako ye kuswani. Nyakisiso ye cwalo i kona ku hulisa buikolwiso bwa mina ka za lisepiso za Mulimu.” Mu bonise lipuzo ze ñwi ze ka alabiwa. Haiba mutu a hana tuto ya Bibele, mu taluse kuli hape lu na ni tuto ye ipitezi ili ye kusufalizwe y’e nga fela mizuzu ye 15 viki ni viki mi i fela mwa liviki ze 16. Mu bonise broshuwa ya Seo A Tokwa, mu ye fa tuto 1, mi mu kupe kuli mu bonise mo i ezezwa tuto ya pili.
6 Mu hupule ku itusisa matrakiti: Niha tu li to tu nyinyani, tu fitisa lushango lo lu m’ata ili lo lu kolwisa. Tuto i kona cwañi ku kalwa mwa trakiti? Ka ku fa fela muñ’a ndu trakiti ye mu bona kuli i ka hoha mamelelo ya hae. Mi mu be ni maseme, mu meme muñ’a ndu kuli a bale paragilafu ya pili ni mina. Mu bale mañolo a bonisizwe, mi mu ambolisane ka mw’a swalisanela ni taba. Fa mupotelo wa pili, mu kana mwa nyakisisa paragilafu i liñwi kamba a mabeli. Muñ’a ndu ha nze a itebuha kuli z’a ituta mwa Bibele ki lika ze tabisa, mu kana mwa kona ku ekeza nako ya ku buhisana.
7 Mu be ba ba buanyu mwa musebezi wa mina, mi mu ka nyakalala ka ona. Mu ise mamelelo kamita kwa ku fa bupaki bo bu tezi, mi mu be ni tabo mwa ku eza likalulo kaufela za bukombwa hande.—1 Tim. 4:16.